Luqa 3
3
Eḥya wan ǎnesselmaɣ
1Ǎwetay wan maraw d semmos dɣ temenukela n Elqaysar Tiberyus ; Bilaṭes Elbunṭi yeḥkam dɣ Yehudiya, Hérodes yeḥkam dɣ Jalila, eŋŋas Filibes yeḥkam dɣ ikallen win Iturya d Traxunis, Lisanyus wadih yeḥkam fol Abilya, 2dɣ ezzeman wa dɣ ǎmosen Hana d Qeyafa imerubay wi meqqornén, yesséwel Yaḷḷah i Eḥya ag Zakariya, dɣ ténéré. 3Yegla Eḥya, yellil ǎkal wa yoheẓen eɣǎher wan Elurdun. Iganna awah : « Utabet, selmeɣet iman nwn dɣ aman baš éd tegrewem ǎsaruf n ibekkaḍen nwn. » 4Awéndɣ itag Eḥya, yektabt ennebi Išeƹya dɣ elkettab ennét :
« Ǎmesli n wa yesiɣerén dɣ ténéré, iganna :
zewwejedet ǎbǎreqqa n Émeli,
sugduhet as ǎbǎreqqa ennét !
5iɣehran wi eɣehnén éd enbelen,
éd ensinet tidreɣén d tidebbonén ;
imnenniḍen n ibereqqaten éd eẓẓelen,
ibereqqaten wi exlenén éd ehusiyen.
6Dédih ak ǎwadem éd yeni elɣelas n Yaḷḷah. »
7Ǎgut ǎwadem yosin ɣor Eḥya, baš éd tn iselmeɣ dɣ aman. Yenna hasn : « Ikét n tiššelén ! Mi hawen innen éd terwelem i ǎweššen wan Yaḷḷah wad yoheẓen. ? 8Setbetet s iǧiten olaɣnen as tetubem, eyyet tinawt dɣ iman nwn : -Abba nnɣ Ibrahim-. Asilekeneɣ awen as ikedéwen wiɣ, Yaḷḷah yeddobet éd tn yer iheyawen n Ibrahim ! 9Tolam d iškan, takedimt tojad, tennihel d ikéwen n iškan : ak ašek, kud wr itirew a tha elfayda, éd yemmenkeḍ, éd hin yettenḍew dɣ témsé. » 10Essenstenent ǎddunet, ennen as : « Ma hé neǧ ? » 11Yenna hasn : « Wa ilen essin iselsa, yekfét iyyen i wa wrn ile ula, wa ilen imekšan, yoẓan-tn. » 12Osen-d aked inarmasen n tiwsé, egmayen ǎselmeɣ, essestenen Eḥya, ennen as : « Muƹalim, ma hé neǧ nekkenéḍ ? » 13Yenna hasn : « Wr teẓẓerẓemem denneg awa hawen yahéwelen. » 14Osent in jonditen, essestenent : « Nekkenéḍ daɣ ma hé neǧ ? » Yenna hasn : « Wr teqqimem taheɣem ǎddunet, wr teqqimem taggem tinawén wrn eẓẓél fol ǎddunet, wr tegméyem ar aẓref wa hawen yetterẓemen. » 15Ǎddunet aẓiẓeyderen, egaren eṭṭema, gannén dɣ iman nsn : « Eḥya, weggéɣ enta a yǎmosen Elmesiḥ ? » 16Yenna hasn Eḥya : « Nk, aman a dɣ kewen éd selmeɣeɣ ; beššan éd-d yas wa hi yernen : wr enheggeɣ aked éd areɣ tikerras tin iɣetémen ennét. Wadih Unfas Heddigen d témsé a dɣ kewen éd iselmeɣ. 17Yeṭṭaf dɣ ǎfus ennét téseyt tas izazzaǧ tǎɣerɣert, iẓameẓlay allon d aɣešlaf. Éd yeṭker taheqqa ennét allon, awa yexlen, éd-t yeqqed dɣ témsé ta wrt ɣessey ar abedǎh. » 18Hund awéndɣ itag Eḥya isǎlan n elxér i dg Israyil dɣ isemmetiren ǎǧǧotnén, itabeššar tn.
19Yesséwel Eḥya i Hérodes, amɣar wan Jalila, fol aggay wa iǧa i Herodya hennis n eŋŋas d fol erk iǧiten ǎǧǧotnén heḍnén. 20Yessotin folsn aked awah : yeǧa Eḥya dɣ tǎkormut.
21A yekka Eḥya isalmaɣ ǎddunet, yesselmeɣ aked Ƹisa. A yekka Ƹisa itimuhud, améren iǧennawen 22ezzar yeres in fols Unfas Heddigen, yeǧa emuken n tedebért mellet. Émér héndɣ yegmeḍ-d amesli d ifalen iǧennawen, yenna : « Key tǎmosed Ruré was eknéɣ tera, teknéd ahi iman. »
Ǎddunet win Ƹisa dɣ ezzeman
23Ila Ƹisa berén keraḍet temerwén n ǎwetay as yessenta emahal ennét. Aɣélen ǎddunet rurés n Yusef a yǎmos, Yusef ag Hali, 24ag Matthat, ag Léwi, ag Melki, ag Yenna, ag Yusef, 25ag Matathya, ag Amos, ag Naḥum, ag Ḥesli, ag Nejjay, 26ag Math, ag Matathya, ag Šemaƹi, ag Yusef, ag Yehuda, 27ag Yuḥna, ag Risa, ag Zerubabel, ag Šeyaltayil, ag Niri, 28ag Melki, ag Addi, ag Kosam, ag Elmudam, ag Ƹer, 29ag Ƹisa, ag Elyezer, ag Yurim, ag Matthat, ag Léwi, 30ag Šimƹun, ag Yehuda, ag Yusef, ag Yunam, ag Elyaqim, 31ag Meleya, ag Meynan, ag Mattatha, ag Nathan, ag Dawud, 32ag Yessa, ag Γubeyd, ag Buɣaz, ag Selmun, ag Naḥšun, 33ag Amminadab, ag Admin, ag Arni, ag Ḥeṣrun, ag Fareṣ, ag Yehuda, 34ag Yaƹqub, ag Isḥaq, ag Ibrahim, ag Teraḥ, ag Naḥur, 35ag Serruj, ag Reyu, ag Falej, ag Abir, ag Šelḥa, 36ag Qinan, ag Arfekšad, ag Sam, ag Noḥ, ag Lamek, 37ag Matušaleḥ, ag Axnux, ag Yered, ag Mehlalil, ag Qinan, 38ag Anuš, ag Šit, ag Adam wa yexlek Yaḷḷah.
Đang chọn:
Luqa 3: thv
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Wycliffe Bible Translators, Inc. All rights reserved.