ᒫᔪᐦᐧᑖᑦ ᒫᕠᔫ 27
27
ᒌᓴᔅ ᑳ ᐄᑐᐦᑎᐦᐋᑭᓅᑦ ᐹᔨᓕᑦᐦ ᐋᐦ ᑖᔨᒡ
ᒫᕐᒃ 15:1; ᓘᒃ 23:1, 2; ᒞᓐ 18:28-32
1ᐐᐱᒡ ᒫᒃ ᒋᔮᒋᔖᐹᔮᔨᒡ ᒥᓯᐙ ᐊᓂᒌ ᑳ ᓃᑳᓂᔥᑭᐙᒡ ᐊᔨᒥᐦᐋᐅᒋᒫᐤ ᑭᔮᐦ ᐊᓂᒌ ᒎᐄᔨᔨᐤ ᑳ ᓃᑳᓂᔥᑭᐙᒡ ᒌ ᓂᔥᑐᐎᒡ ᒑ ᒌᐦ ᐎᔮᔨᐦᑎᐦᒡ ᑖᓂᑖᐦ ᒑ ᒌᐦ ᐅᐦᒋ ᓂᐱᐦᐄᒫᑭᓂᐐᔨᒡ ᒌᓴᔅᐦ᙮ 2ᐄᔥᐱᐦ ᒫᒃ ᑳ ᒥᒫᒋᒫᐱᐦᑳᑎᒸᐦᒡ ᐅᑎᐦᒌᔨᐤ, ᐋᒄ ᑳ ᒋᔅᑐᐦᑎᐦᐋᒡ᙮ ᐊᓂᑖᐦ ᒫᒃ ᐊᓂᔮᔨᐤ ᕎᒻ ᒋᐦᒋᐅᒋᒫᐤ ᐹᔨᓕᑦᐦ ᑳ ᐃᔑᓂᐦᑳᓱᔨᒡ ᐋᐦ ᑖᔨᒡ ᐋᑯᑖᐦ ᑳ ᐄᑐᐦᑎᐦᐋᒡ᙮
ᒍᑖᔅ ᑳ ᓂᐱᐦᐄᓱᑦ
ᐋᑆᔅᑎᓕᒡ 1:18, 19
3ᒍᑖᔅ ᒫᒃ ᐊᓐ ᑳ ᒫᒥᔑᒫᑦ ᒌᓴᔅᐦ ᐄᔥᐱᐦ ᒑᔅᒑᔨᑎᒃ ᑖᑆᐦ ᒑ ᓂᐱᐦᐄᒫᑭᓂᐐᔨᒡ ᒌᓴᔅᐦ ᓈᔥᒡ ᒌ ᒥᐦᒋᔨᐙᓲ ᐋᒄ ᑳᐤ ᑳ ᐄᑐᐦᑐᐙᑦ ᐊᓂᔮᔨᐤ ᑳ ᓃᑳᓈᔮᔨᐦᑖᑯᔒᔨᒡ ᐊᔨᒥᐦᐋᐅᒋᒫᐤᐦ ᑭᔮᐦ ᐊᓂᔮᔨᐤᐦ ᒎᐄᔨᔨᐤᐦ ᑳ ᓃᑳᓂᔥᑭᐙᔨᒡ ᐊᓂᔮᔨᐤ ᓂᔥᑐᒥᑎᓂᐤ ᔓᐎᔮᓈᐱᔅᑯᔥ ᑳ ᒥᔮᑭᓅᑦ, 4ᐋᒄ ᑳᐦ ᐄᑖᑦ, “ᑖᑆᐦ ᓄᐎᒡ ᓂᐎᓂᑐᑖᓐ ᑖᓐ ᑳ ᐄᔑ ᒫᒥᔑᒥᒃ ᓈᐹᐤ ᐋᐦᐋᑳ ᐅᐦᒋ ᒥᒌᐦᑐᑎᐦᒃ᙮” ᐋᒄ ᑳᐦ ᐄᑎᑯᑦ ᐊᓂᔮᔨᐤ ᐊᔨᒥᐦᐋᐅᒋᒫᐤᐦ ᑭᔮᐦ ᐊᓂᔮᔨᐤ ᒎᐄᔨᔨᐤ ᑳ ᓃᑳᓂᔥᑭᐙᔨᒡ, “ᑖᐹ ᐎᔮᔥ ᓂᑭ ᒌᐦ ᑎᓈᓐ ᓃᔮᓐ᙮ ᒌᔨ ᒋᑭ ᐐ ᒥᔪᐱᔨᐦᑣᓱᓐ ᐊᓐ᙮”
5ᐋᒄ ᒍᑖᔅ ᐊᓂᑖᐦ ᒧᔅᑎᑎᐦᒡ ᑳ ᐄᔑ ᐙᐱᓈᑦ ᐊᓂᔮᔨᐤ ᔔᐎᔮᓈᐱᔅᒄ ᐊᓂᑖᐦ ᒋᔖᐊᔨᒥᐦᐋᐅᑭᒥᑯᐦᒡ, ᑳᐦ ᐋᑎ ᒫᒌᑦ᙮ ᑳ ᒌᔅᐦᑑᐦᑖᑦ ᑭᔮᐦ ᑳ ᓂᑑᐊᑯᑏᓱᑦ᙮
6ᐋᒄ ᐊᓂᒌ ᑳ ᓃᑳᓂᔥᑭᐙᒡ ᐊᔨᒥᐦᐋᐅᒋᒫᐤ ᑳ ᐅᑎᓈᒡ ᐊᓂᔮᔨᐤ ᔓᐎᔮᓐ ᐋᒄ ᑳᐦ ᐃᔨᒡ, “ᐄᑎᔥᑖᐤ ᐐᔔᐙᐎᓐ ᐋᑳ ᒑ ᒌᐦ ᑭᓂᐙᔨᒫᑭᓅᑦ ᐆ ᔓᐎᔮᓐ ᐅᑎᐦ ᒋᔖᐊᔨᒥᐦᐋᐅᑭᒥᑯᐦᒡ, ᐋᔥ ᒌᐦ ᐋᐱᑎᓰᐤ ᐋ ᑎᐱᐦᐋᒧᐙᑭᓅᑦ ᐊᐙᓐ ᒑ ᒌ ᓂᐱᐦᐋᑭᓅᑦ ᓈᐹᐤ᙮” 7ᐱᑎᒫ ᒫᒃ ᒌᐦ ᐋᔨᒸᐦᐄᑯᒡ ᐅᔮᔨᐤ᙮ ᐋᒄ ᒑᒃ ᑳ ᓂᔅᑯᒧᒡ ᒑ ᒌᐦ ᐅᑎᓂᒑᐦᒡ ᐊᔅᒌᔨᐤ ᐊᓂᑖᐦ ᑳ ᒌᐦ ᐅᐦᑎᓈᑭᓅᑦ ᓯᔅᒋᐤ ᐎᔮᑭᓐ ᐋ ᐅᐦᒋ ᐅᔑᐦᑖᑭᓂᐎᒡ᙮ ᐋᔪᐎᒄ ᒫᒃ ᐊᓂᔮᔨᐤ ᐊᔅᒌᔨᐤ ᑳᐦ ᐋᑎ ᐄᑖᐱᒋᐦᑖᒡ ᐋ ᓂᐦᐄᑯᐙᒡ ᒫᓂᑖᐤᐦ ᐋ ᐴᓂᐱᒫᑎᓰᔨᒡ᙮ 8ᐋᐅᒄ ᒫᒃ ᐙᐦᒋ ᐋᑎ ᐃᔑᓂᐦᑳᑖᒡ ᐊᓐ ᐊᔅᒌ, “ᒥᐦᒄ ᐊᔅᒌ᙮” ᐋᐅᒄ ᒫᒃ ᐋᔥᒄ ᐊᓅᐦᒡ ᐋᔑᓂᐦᑳᑖᒡ ᐊᓐ ᐊᔅᒌ᙮
9ᐋᒄ ᒫᒃ ᑳ ᑎᐱᐱᔨᒡ ᐊᓂᔮ ᒉᕆᒫᔮ ᑳ ᐃᔑᓂᐦᑳᓱᑦ ᐅᒋᔅᒋᐙᐦᐄᒑᓯᐤ ᑳᐦ ᐃᔨᑯᐱᓈ,
ᒌᐦ ᐅᑎᓈᐅᒡ ᐊᓂᔮᔨᐤ ᓂᔥᑐᒥᑎᓂᐤ ᔔᐎᔮᓈᐱᔅᒄ ᑖᓐ ᑳ ᐄᔑ ᓂᔅᑯᒧᒡ ᐱᔅᒡ ᐃᔅᕋᐄᓪ ᐄᔨᔨᐅᒡ ᒑ ᐃᔥᐱᔥ ᑎᐱᐦᐙᒡ ᐅᔮᔨᐤ ᑳ ᐄᑖᒋᒫᑭᓂᐎᔨᒡ᙮ 10ᐋᒄ ᒫᒃ ᑳ ᐱᒋᔅᑎᓂᐦᒡ ᐊᓂᔮᔨᐤ ᔓᐎᔮᓐ ᒑ ᒌᐦ ᐅᑎᓂᒑᓂᐎᔨᒡ ᐊᓂᔮᔨᐤ ᐊᔅᒌᔨᐤ ᐊᓂᑖᐦ ᑳ ᒌᐦ ᐅᐦᑎᓈᑭᓅᑦ ᓯᔅᒋᐤ ᐎᔮᑭᓐ ᐋ ᐅᐦᒋ ᐅᔑᐦᑖᑭᓂᐎᒡ᙮ ᐙᔥ ᐋᔪᐎᒄ ᐅᔮᔨᐤ ᑳᐦ ᐄᑎᔓᒥᑦ ᑎᐹᔨᐦᒋᒑᓯᐤ ᒑ ᑑᐎᒡ᙮
ᐋᔪᐎᒄ ᐅᔮᔨᐤ ᒌᐦ ᐃᔨᒑ ᒉᕆᒫᔮ᙮
ᐹᔨᓕᑦ ᑳ ᐄᔑ ᑯᒀᒋᒫᑦ ᒌᓴᔅᐦ
ᒫᕐᒃ 15:2-5; ᓘᒃ 23:3-5; ᒞᓐ 18:33-38
11ᒌᓴᔅ ᒫᒃ ᒌᐦ ᐐᐦᑎᔅᑭᐎᑳᐴᔥᑎᐙᐤ ᐹᔨᓕᑦᐦ ᐊᓂᔮᔨᐤ ᕎᒻ ᒋᐦᒋᐅᒋᒫᐤ ᐅᒋᔕᐅᒋᒫᒻ᙮ ᐋᒄ ᑳ ᑯᒀᒋᒥᑯᑦ, “ᒌᔨ ᐋ ᒎᐤ ᐄᔨᔨᐅᒡ ᐅᒋᐦᒋᐅᒋᒫᒧᐙᐤ?” ᒌᓴᔅ ᒫᒃ ᒌᐦ ᐄᑖᐤ, “ᐋᐅᒄ ᐊᓐ ᐋᓯᔨᓐ᙮” 12ᐋᒄ ᐊᓂᔮᔨᐤ ᑳ ᓃᑳᓂᔥᑭᐙᔨᒡ ᐊᔨᒥᐦᐋᐅᒋᒫᐤ ᑭᔮᐦ ᐊᓂᔮᔨᐤ ᒎᐄᔨᔨᐤ ᑳ ᓃᑳᓂᔥᑭᐙᔨᒡ ᓂᓈᐦᑭᐤ ᒌᐦ ᐄᔑ ᒥᒥᒑᒋᒥᑰ, ᓂᒧᐃ ᐅᐦᒋ ᒋᔅᑑ ᒌᓴᔅᐦ᙮
13ᐋᒄ ᑳᐦ ᐄᑎᑯᑦ ᐊᓂᔮᔨᐤ ᐹᔨᓕᑦ, “ᓂᒧᐃ ᐋ ᒌ ᐹᐦᑎᐙᐅᒡ ᑖᓐ ᐋ ᐄᔑ ᓂᓈᐦᑭᐤ ᐄᑖᒋᒥᔅᒡ?”
14ᓂᒧᐃ ᒫᒃ ᐊᔮᐱᒡ ᐅᐦᒋ ᒋᔅᑑ ᒌᓴᔅ᙮ ᐋᒄ ᐊᓂᔮᔨᐤ ᕎᒻ ᒋᐦᒋᐅᒋᒫᐤ ᐅᒋᔕᐅᒋᒫᒻ ᓈᔥᒡ ᑳ ᒥᔅᑳᑖᔨᒥᑯᑦ᙮
ᑳᐦ ᐄᑎᔓᐙᓂᐐᒡ ᒌᓴᔅ ᒑ ᓂᐱᐦᐋᑳᓅᑦ
ᒫᕐᒃ 15:6-15; ᓘᒃ 23:13-25; ᒞᓐ 18:39–19:16
15ᐋᔑᑯᒻ ᐱᐳᓐ ᒫᒃ ᐄᔥᐱᐦ ᐙᑎᐦᒋᐱᔨᐦᒡ ᐊᓐ ᒥᔮᔥᑳᒑᐤ ᒥᑯᔖᐎᓐ ᐹᔨᓕᑦ ᒌ ᐱᒋᔅᑎᓈᐤ ᒫᓐ ᐹᔨᒄ ᐊᐙᔨᐤᐦ ᐋ ᒌ ᒋᐱᐦᐅᒫᑭᓂᐎᔨᒡ ᐋ ᒌᐦ ᐎᓂᐦᐱᓱᔨᒡ ᐅᐦᒋ᙮ ᒥᒄ ᐊᓂᔮᔨᐤᐦ ᓈᑐᐙᔨᒫᔨᒡ ᐊᓂᔮᔨᐤᐦ ᐄᔨᔨᐤᐦ ᒑ ᒌ ᐱᒋᔅᑎᓂᒫᑭᓂᐎᔨᒡ ᐋᔨᐅᑯᓐ ᐊᓂᔮᔨᐤ ᑳ ᒌ ᐱᒋᔅᑎᓈᑦ᙮ 16ᒫᒀᒡ ᒫᒃ ᒌᐦ ᑖᐤ ᓈᐹᐤ ᐊᓂᑖᐦ ᒋᐱᐦᐅᑑᑭᒥᑯᐦᒡ ᓈᔥᒡ ᐋ ᒋᔅᒑᔨᒫᑭᓅᑦ ᑖᓐ ᑳ ᐄᔑ ᓂᓈᐦᑭᐤ ᐎᓂᐦᐱᓱᑦ, ᐹᕌᐹᔅ ᐋ ᐃᔑᓂᐦᑳᓱᑦ᙮ 17ᐄᔥᐱᐦ ᒫᒃ ᓈᔅᑐᐎᔨᒡ ᐊᓂᔮᔨᐤᐦ ᐄᔨᔨᐤᐦ, ᐹᔨᓕᑦ ᒌᐦ ᑯᒀᒋᒫᐤ, “ᐊᐙᓐ ᓈᑐᐙᔨᒥᔮᒄ ᒑ ᒌ ᐱᒋᔅᑎᓂᒫᑎᑯᒡ, ᐹᕌᐹᔅ ᐋ ᑭᔮᐦ ᒫᒃ ᒌᓴᔅᐦ ᐊᓐ ᙭ ᑳ ᐃᔑᓂᐦᑳᑖᑭᓅᑦ?” 18ᒌ ᒋᔅᒑᔨᒫᐤ ᐹᔨᓕᑦ ᐊᓂᔮᔨᐤ ᒎᐄᔨᔨᐤ ᑳ ᓃᑳᓂᔥᑭᐙᔨᒡ ᐋ ᐅᐐᐦᑖᔨᒫᔨᒡ ᒌᓴᔅᐦ, ᐋᐦ ᐋᐎᓃᔨᒡ ᐊᓂᔮᔨᐤ ᐙᐦᒋ ᐱᒋᔅᑎᔓᐙᑎᒫᑯᑦ᙮
19ᒫᒀᒡ ᒫᒃ ᐹᔨᓕᑦ ᐋ ᐊᐱᑦ ᐊᓂᑖᐦ ᑎᐹᔅᑯᓂᒑᐅᑭᒥᑯᐦᒡ ᐐᐤᐦ ᒌ ᐹᒋ ᐄᑎᔑᐦᐙᔨᐤ ᐊᐙᔨᐤᐦ ᒑ ᒌᐦ ᐄᑎᑯᑦ, “ᐊᑳᐐ ᐎᔮᔥ ᑐᑐᐤ ᐊᓐ ᑳ ᑯᐃᔅᑯᑖᑎᓰᑦ ᓈᐹᐤᐦ᙮ ᐙᔥ ᓈᔥᑖᑆᐦ ᓂᓈᔨᐦᑳᑖᔨᒥᐦᐄᑯᐙᓐ ᑖᓐ ᑳ ᐄᔑ ᐳᐙᑎᒃ ᑖᐱᔅᑳᔨᒡ᙮”
20ᐊᓂᒌ ᒫᒃ ᑳ ᓃᑳᓂᔥᑭᐙᒡ ᐊᔨᒥᐦᐋᐅᒋᒫᐤᐦ ᑭᔮᐦ ᐊᓂᒌ ᒎᐄᔨᔨᐤ ᑳ ᓃᑳᓂᔥᑭᐙᒡᐦ ᒌ ᔒᐦᑰᒋᒫᐅᒡ ᐊᓂᔮᔨᐤ ᐋ ᒫᒨ ᒥᐦᒑᑎᔨᒡ ᐄᔨᔨᐤᐦ ᐊᓂᑎᐦ ᑳᐦ ᑖᔨᒡ ᒑ ᒌᐦ ᑯᒀᒋᒫᔨᒡ ᐹᔨᓕᑦᐦ ᐹᕌᐹᔅᐦ ᒑ ᒌ ᐱᒋᔅᑎᓈᔨᒡ, ᐋᒄ ᒌᓴᔅᐦ ᒑ ᒌ ᓂᐱᐦᐄᒫᑭᓂᐐᔨᒡ᙮
21ᐋᒄ ᐹᔨᓕᑦ ᒦᓐ ᑳ ᑯᒀᒋᒫᑦ ᐊᓂᔮᔨᐤᐦ ᐄᔨᔨᐤᐦ, “ᑖᓐ ᒫᒃ ᐊᓐ ᓈᑐᐙᔨᒥᔮᒄ ᒑ ᒌ ᐱᒋᔅᑎᓂᒫᑎᑯᒡ ᐅᒌ ᐋ ᓃᔑᒡ?” ᐋᒄ ᐊᓂᒌ ᐄᔨᔨᐅᒡ ᑳᐦ ᐄᑖᒡ, “ᐹᕌᐹᔅ᙮”
22ᐋᒄ ᐹᔨᓕᑦ ᑳᐦ ᐄᑖᑦ, “ᑖᓐ ᒫᒃ ᒑ ᑐᑎᐎᒃ ᐆ ᒌᓴᔅᐦ, ᐊᓐ ᙭ ᑳ ᐃᔑᓂᐦᑳᑖᑭᓅᑦ᙮” ᐋᒄ ᒥᓯᐙ ᐊᓂᒌ ᐄᔨᔨᐅᒡ ᑳᐦ ᐃᔨᒡ, “ᒌᔅᑖᔅᑯᐦᐋᐦᒄ ᐋᔑᑖᔮᐦᑎᑯᐦᒡ᙮”
23ᐋᒄ ᐹᔨᓕᑦ ᑳᐦ ᐄᑖᑦ, “ᒑᒀᔨᐤ ᐋᒄ? ᑖᓐ ᑳ ᐄᔑ ᒥᒌᐦᑐᑎᐦᒃ?” ᐋᒄ ᐋᐦᒡ ᐊᑎᑎᐤ ᑳᐦ ᐋᔑᐦᒀᒡ ᐊᓂᒌ ᐄᔨᔨᐅᒡ, “ᒌᔅᑖᔅᑯᐦᐋᐦᒄ ᐋᔑᑖᔮᐦᑎᑯᐦᒡ᙮”
24ᐄᔥᐱᐦ ᒫᒃ ᐎᔮᐱᐦᑎᐦᒃ ᐹᔨᓕᑦ ᐋᑳ ᒑ ᒌᐦ ᔑᐦᑯᒋᒫᑦ ᐊᓂᔮᔨᐤ ᐋ ᒫᒨ ᒥᐦᒑᑎᔨᒡ ᐄᔨᔨᐤᐦ ᑭᔮᐦ ᒑᔥᑳ ᐋᐦ ᐋᑎ ᒋᐦᒋ ᒥᒋᐱᔨᓈᓂᐎᔨᒡ ᑳ ᐅᑎᓂᐦᒃ ᓂᐲᔨᐤ ᑳ ᒋᔅᑖᐹᐅᑎᐦᒑᑦ ᐅᐦᑎᔅᑰ ᐊᓂᔮᔨᐤ ᐄᔨᔨᐤᐦ ᐋᐦ ᑖᔨᒡ᙮ ᐋᒄ ᑳᐦ ᐄᑖᑦ, “ᓂᒧᐃ ᐐ ᓃᔨ ᓂᑭ ᐅᐦᒋ ᐊᑖᒫᔨᐦᑖᑯᓯᓐ ᒑ ᓂᐱᐦᐋᑭᓅᑦ ᐆ ᓈᐹᐤ᙮ ᒌᔨᐙᐤ ᐆ ᑳ ᐊᔨᐦᑎᔮᒄ᙮”
25ᐋᒄ ᐊᓂᒌ ᐄᔨᔨᐅᒡ ᑳᐦ ᐄᑖᒡ, “ᐋᑯᔥ ᓃᔮᓐ ᑭᔮᐦ ᓂᑎᐙᔒᒥᓈᓂᒡ ᓂᑭ ᐱᑎᑯᔥᑳᑯᐙᓈᓐ ᑖᓐ ᒑ ᐄᔑ ᓂᐱᐦᐋᑭᓅᑦ᙮”
26ᐋᒄ ᐹᔨᓕᑦ ᑳᐦ ᐄᑎᔓᐙᑦ ᒑ ᒌ ᐱᒋᔅᑎᓈᒫᑭᓂᐎᔨᒡ ᐹᕌᐹᔅᐦ᙮ ᐄᔥᐱᐦ ᒫᒃ ᑳᐦ ᐄᑎᔓᐙᑦ ᒑ ᒌ ᐱᔑᔥᑖᐦᐅᒫᑭᓂᐎᔨᒡ ᒌᓴᔅᐦ, ᐋᒄ ᑳ ᐱᒋᔅᑎᔓᐙᑖᑦ ᒑ ᒌ ᒌᔅᑖᔅᑯᐦᐅᒫᑭᓂᐎᔨᒡ ᐋᔑᑖᔮᐦᑎᑯᐦᒡ᙮
ᓂᑐᐱᔫᒡ ᑳ ᒫᔮᔨᒫᒡ ᒌᓴᔅᐦ
ᒫᕐᒃ 15:16-20; ᒞᓐ 19:2, 3
27ᐋᒄ ᐹᔨᓕᑦ ᐅᓂᑐᐱᔨᒻᐦ ᑳ ᐄᑐᐦᑎᐦᐋᔨᒡ ᒌᓴᔅᐦ ᐊᓂᑖᐦ ᐊᓂᔮᔨᐤ ᒋᐦᒋᐅᒋᒫᐤ ᐐᒋᔨᐦᒡ᙮ ᒥᓯᐙ ᒫᒃ ᐊᓂᒌ ᓂᑐᐱᔫᒡ ᐊᓂᑎᐦ ᑳᐦ ᑖᒡ ᒌ ᐙᔅᑳᑳᐳᔥᑎᐙᐅᒡ ᒌᓴᔅᐦ᙮ 28ᒌ ᒥᓂᒸᐅᒡ ᒫᒃ ᐅᒑᒀᓂᒥᔨᐤ᙮ ᐋᒄ ᐋ ᒥᐦᒀᑭᓃᔨᒡ ᐊᑯᐦᐱᔨᐤ ᑳ ᐳᔥᑭᒧᔮᐦᒡ ᒧᔮᒻ ᒋᐦᒋᐅᒋᒫᐤ ᐋᐦ ᐄᑖᔅᐱᑖᒡ᙮ 29ᐋᒄ ᑳ ᐅᔑᐦᑎᒧᐙᒡ ᒋᐦᒋᐅᒋᒫᐤ ᐊᔥᑐᑎᓂᔨᐤ, ᑳᑳᐙᔅᑯᓃᔨᒡ ᓂᐱᓯᔮᐦᑎᒄ ᐋ ᒌᐦ ᐋᐱᒋᐦᑖᐙᒡ᙮ ᑭᔮᐦ ᒌ ᒥᔮᐅᒡ ᒥᔅᑎᑯᔨᐤ ᒑ ᒌ ᑎᐦᑯᓂᒥᔨᒡ᙮ ᐋᒄ ᑳ ᓃᐱᔅᑰᐳᐙᒡ ᐅᐦᑎᔅᑰ ᐊᓂᑎᐦ ᐋᐦ ᑖᔨᒡ᙮ ᒌ ᒫᔮᔨᒫᐅᒡ ᒧᔮᒻ ᐋ ᒫᒥᐦᒋᒫᒡ ᐋᐦ ᐄᑖᒡ, “ᐋᐅᒄ ᒌᔨ ᒎᐤ ᐄᔨᔨᐅᒡ ᐅᒋᐦᒋᐅᒋᒫᒧᐙᐤ᙮” 30ᒌᐦ ᓯᐦᒀᑖᐅᒡ ᒫᒃ᙮ ᐋᒄ ᑳ ᐅᑎᑖᒥᔅᑎᒀᓈᐦᐙᒡ ᐊᓂᔮᔨᐤ ᒥᔅᑎᑯᔨᐤ ᑳ ᑎᐦᑯᓂᒥᔨᒡ᙮ 31ᐄᔥᐱᐦ ᒫᒃ ᑳ ᒌᔥ ᒫᔮᔨᒫᒡ ᐋᒄ ᑳ ᒥᓂᒸᒡ ᐊᓂᔮᔨᐤ ᐊᑯᐦᐱᔨᐤ ᑳ ᒋᒋᔥᑭᒥᔨᒡ ᐋᒄ ᐐᔨ ᐅᒑᒀᓂᒥᔨᐤ ᑳ ᐳᔥᑭᒧᔮᐦᒡ᙮ ᐋᒄ ᑳ ᐎᔨᐐᐦᑎᐦᐋᒡ ᒑ ᓂᑑᒌᔅᑖᔅᑯᐦᐙᒡ ᐋᔑᑖᔮᐦᑎᑯᐦᒡ᙮
ᒌᓴᔅ ᑳ ᒌᔅᑖᔅᑯᐦᐙᑭᓅᑦ ᐋᔑᑖᔮᐦᑎᑯᐦᒡ
ᒫᕐᒃ 15:21-32; ᓘᒃ 23:26-43; ᒞᓐ 19:17-27
32ᒫᒀᒡ ᒫᒃ ᐋᐦ ᐋᑎ ᐎᔨᐐᒡ ᐊᓂᔮᔨᐤ ᐃᐦᑖᐎᓂᔨᐤ, ᒌ ᓂᒋᐦᐋᐅᒡ ᓈᐹᐤ ᓵᐃᒥᓐ ᐋ ᐃᔑᓂᐦᑳᓱᔨᒡ ᓵᐃᕇᓐ ᑳ ᐃᔑᓂᐦᑳᑖᔨᒡ ᐃᐦᑖᐎᓂᔨᐤ ᐋ ᐅᐦᒌᔨᒡ᙮ ᐋᔨᐅᑯᓐ ᐅᔮᔨᐤ ᑳ ᔒᐦᒋᒫᒡ ᒑ ᒌᐦ ᐎᓂᑳᑎᐦᐙᔨᒡ ᒌᓴᔅᐦ ᐅᑖᔑᑖᔮᐦᑎᑯᒥᔨᐤ᙮ 33ᒀᓪᒀᕧ ᑳ ᐃᔑᓂᐦᑳᑖᔨᒡ ᐋᑯᑖᐦ ᑳ ᐄᑐᐦᑎᐦᐋᒡ ᒌᓴᔅᐦ᙮ ᐆ ᒀᓪᒀᕧ ᑳ ᐄᓈᓅᒡ, ᐊᓂᑎᐦ ᐋᐦᑎᑯᐦᒡ ᒥᔥᑎᒀᓂᑭᓐ ᐄᔑ ᐄᑣᔥᑎᒧᐙᑖᑭᓂᐤ᙮ 34ᐋᑯᑖᐦ ᑳ ᐐ ᒥᓂᐦᐋᑭᓅᑦ ᒌᓴᔅ ᔔᒥᓈᐴᔨᐤ ᒋᔨᑰ ᐐᓯᑳᐳᔨᐤ ᐋ ᒌ ᐱᒋᔅᑎᓂᑭᓂᐎᔨᒡ ᐊᓂᑎᐦ᙮ ᒥᒄ ᒫᒃ ᐄᔥᐱᐦ ᑳ ᑯᒋᔥᑎᐦᒃ ᒌᓴᔅ ᐊᓂᔮᔨᐤ ᓂᒧᐃ ᐅᐦᒋ ᐐ ᒥᓂᐦᒀᐤ᙮ 35ᐄᔥᐱᐦ ᒫᒃ ᑳ ᒌᔅᑖᔅᑯᐦᐙᒡ ᒌᓴᔅᐦ, ᒋᐐᐦ ᑖᐅᓂᒫᑑᐎᒡ ᐅᒑᒀᓂᒥᔨᐤ᙮ ᒌᐦ ᐐᑖᐅᐦᐄᒑᐎᒡ, ᐋᑯᑖᐦ ᑳ ᐅᐦᒋ ᐎᔮᔨᐦᑎᐦᒡ ᐊᐙᔨᐤᐦ ᒑ ᐃᔮᔨᒡ ᐊᓂᔮᔨᐤ ᐅᒑᒀᓂᒥᔨᐤ᙮ ᐅᔮᔨᐤ ᒫᒃ ᑳᐦ ᑎᒡ ᐋᑯᑖᐦ ᑳ ᑎᐱᐱᔨᒡ ᑖᓐ ᑳ ᐄᔨᔨᒡ ᐊᓂᔮᔨᐤ ᐅᒋᔅᒋᐙᐦᐄᒑᓯᐤ,
ᒌ ᒫᑎᓂᒫᑑᐎᒡ ᓂᒑᒀᓂᒻ ᑭᔮᐦ ᒌ ᑖᐅᐦᐄᑭᓂᐤ ᓂᑎᑯᐦᑉ᙮
36ᐋᒄ ᒫᒃ ᑳ ᐅᐙᔮᐱᒡ ᐋ ᓈᓈᑭᒋᐦᐋᒡ᙮ 37ᐃᔥᐱᒥᔒᔥ ᒫᒃ ᐊᓂᑎᐦ ᐅᔥᑎᒀᓂᐦᒡ ᒌᐦ ᐊᑯᐦᑎᑭᐦᐄᑭᓂᐎᔨᐤ ᐋ ᒥᓯᓈᑖᔨᒡ ᑖᓐ ᑳ ᐄᔑ ᐊᑖᒫᔨᒫᑭᓅᑦ᙮ ᐅᔮᔨᐤ ᒌᐦ ᐄᑎᔅᑖᔨᐤ, “ᐋᐅᒄ ᐆ ᒌᓴᔅ, ᒎᐤ ᐄᔨᔨᐅᒡ ᐅᒋᐦᒋᐅᒋᒫᒧᐙᐤ᙮” 38ᓃᔓ ᒋᒧᑎᔅᒃᐦ ᒌ ᒌᔅᑖᔅᑯᐦᐙᐅᒡ ᑭᔮᐦ, ᐹᔨᒄ ᐊᓂᑖᐦ ᒌᓴᔅᐦ ᐅᓂᐦᐄᐎᓃᔨᐦᒡ ᐄᑖᐦᒑ ᒌᐦ ᐊᑯᒋᓐ ᐋᒄ ᐊᓐ ᑯᑎᒃ ᐊᓂᑖᐦ ᐅᓂᒥᐦᒌᐎᓃᔨᐦᒡ ᐄᑖᐦᒑ᙮ 39ᐋ ᐱᒧᐦᑖᒡ ᒫᒃ ᐄᔨᔨᐅᒡ ᐊᓂᑎᐦ ᒌ ᐙᐙᐱᔅᒀᔫᒡ ᑭᔮᐦ ᒌ ᒫᔮᔨᒫᐅᒡ ᒌᓴᔅᐦ᙮ 40ᒌᐦ ᐄᑖᐅᒡ, “ᒌᔨ ᑳ ᐃᔨᓐ ᒑ ᒌ ᓂᔑᐎᓈᒋᑖᔨᓐ ᒋᔖᐊᔨᒥᐦᐊᐅᑭᒥᒄ ᐋᒄ ᒫᒃ ᓂᔥᑐ ᒌᔑᑳᐤᐦ ᐃᔥᐱᔥ ᒦᓐ ᑳᐤ ᒑ ᒌᐦ ᐎᔨᑳᐳᐦᑖᔨᓐ, ᑖᑆᐦ ᐃᔮᐎᓈ ᒋᔖᒥᓂᑑ ᐅᑯᓯᔅᐦ, ᐱᒫᒋᐦᐄᓲ ᐹᒋ ᓃᔖᐦᑎᐐᐦ ᐊᓐ ᒋᑖᔑᑖᔮᐦᑎᑯᒻ᙮”
41ᐋᔪᐎᒄ ᑭᔮᐦ ᑳ ᐄᔑ ᒫᔮᔨᒫᒡ ᐊᓂᒌ ᑳ ᓃᑳᓂᔥᑭᐙᒡ ᐊᔨᒥᐦᐋᐅᒋᒫᐤᐦ ᑭᔮᐦ ᐊᓂᒌ ᑳ ᒋᔅᑯᑎᒫᒑᒡ ᐐᔓᐙᐎᓂᔨᐤ ᑭᔮᐦ ᐊᓂᒌ ᑳ ᓃᑳᓂᔥᑭᐙᒡ ᒎᐄᔨᔨᐤ᙮ ᒌᐦ ᐃᔨᐅᒡ, 42“ᒌ ᐱᒫᒋᐦᐋᐤ ᑯᑎᒃ ᐊᐙᔨᐤᐦ᙮ ᓂᒧᐃ ᒫᒃ ᐙᐙᒡ ᒌ ᐱᒫᒋᐦᐄᓲ ᐐᔨ᙮ ᓂᒥᔮᐤ ᐋ ᒫᒃ ᐆ ᐃᔅᕋᐄᓪ ᐄᔨᔨᐅᒡ ᐅᒋᐦᒋᐅᒋᒫᒧᐙᐤ? ᒑ ᒌ ᐱᑯᐦᐄᓱᒀ ᒫᒃ ᐋᔑᑖᔮᐦᑎᑯᐦᒡ ᐅᐦᒋ ᐋᒄ ᒑ ᑖᑆᔮᔨᒥᐦᒄ᙮ 43ᑖᑆᔮᔨᒫᐤ ᒋᔖᒥᓂᑑ, ᑖᑆᐦ ᒫᐦ ᑭᑎ ᐐᒋᐦᐄᑰ ᒋᔖᒥᓂᑑ ᐊᓅᐦᒡ, ᐐᐦ ᐐᒋᐦᐄᑯᒑ᙮ ᐙᔥ ᒌᐦ ᐃᔨᐤ, ‘ᓃᔨ ᒋᔖᒥᓂᑑ ᐅᑯᓯᔅ᙮’ ” ᑖᑆᐦ ᒫᐦ ᑭᑎ ᐐᒋᐦᐄᑰ ᒋᔖᒥᓂᑑ ᐊᓅᐦᒡ, ᐐᐦ ᐐᒋᐦᐄᑯᒑ᙮
44ᑭᔮᐦ ᐊᓂᔮᔨᐤ ᒋᒧᑎᔅᒃ ᑳ ᐃᔅᒡ ᒌᔅᑖᔅᑯᐦᐅᒫᑭᓂᐎᔨᒡ ᐋᔪᐎᒄ ᑭᔮᐦ ᑳ ᐄᔑ ᒫᔮᔨᒥᑯᑦ᙮
ᒌᓴᔅ ᑳ ᐴᓂᐱᒫᑎᓰᑦ
ᒫᕐᒃ 15:33-41; ᓘᒃ 23:44-49; ᒞᓐ 19:28-30
45ᑳᐦ ᐋᐱᐦᑖᒌᔑᑳᒡ ᒫᒃ ᐋᑯᑖᐦ ᒥᑐᓐ ᐋ ᑭᔅᑎᐱᔅᑳᒡ ᑳ ᐃᓯᓈᑯᐦᒡ ᒥᓯᐙ ᐋ ᐃᔥᐱᔖᒡ ᐊᓂᑎᐦ ᐊᓐ ᐊᔅᒌ᙮ ᓂᔥᑣᐤ ᐋᐦᒋᓂᒀᓂᐦᑖᒡ ᐋᐅᒄ ᑳ ᐃᓯᓈᑯᐦᒡ᙮ 46ᐎᔮᔥ ᒫᒃ ᓂᔥᑐ ᐋ ᐃᔅᐱᔨᒡ, ᒌᓴᔅ ᐋ ᒋᔣᐙᑦ ᑳᐦ ᐃᔨᑦ, “ᐄᓨᐃ, ᐄᓨᐃ, ᓛᒫ ᓵᐹᑭᑖᓃ᙮” ᒫᐤ ᐋ ᐄᔑ ᐄᑣᔥᑎᒧᐙᑖᑭᓂᐎᒡ ᐆ, “ᓂᒋᔖᒥᓂᑑᒻ, ᓂᒋᔖᒥᓂᑑᒻ, ᒑᒀᓐ ᐙᐦᒋ ᐹᒋ ᓂᑭᓯᔨᓐ?”
47ᐱᔅᒡ ᒫᒃ ᐊᓂᒌ ᐊᓂᑎᐦ ᑳ ᓈᓃᐱᐎᒡ ᒌ ᐹᐦᑎᐙᐅᒡ ᐊᓂᔮᔨᐤ ᑳ ᐄᔨᔨᒡ᙮ ᐋᒄ ᑳᐦ ᐄᑖᒡ, “ᐄᓛᐃᒑ ᐙᔥ ᐊᓐ ᑖᑆᑖᐤ᙮” 48ᑏᐙᐦᒡ ᒫᒃ ᐹᔨᒄ ᐊᓂᑎᐦ ᐋ ᐃᑎᔑᒡ ᒌᐦ ᐅᐦᒋ ᐅᑎᓂᒻ ᒑᒀᔨᐤ ᐅᐦᐱᓂᐦᒡ ᐋ ᐄᑖᔨᐦᑖᑯᓃᔨᒡ ᑳ ᒋᐦᑖᓂᐦᒃ ᐊᓂᑖᐦ ᐋ ᐎᓯᑳᑭᒦᒡ ᔔᒥᓈᐴᔨᐤ᙮ ᐋᒄ ᐋ ᐎᓂᔥᒀᔅᑯᓃᔨᒡ ᒥᔅᑎᑯᐦᒡ ᑳ ᒋᑭᒧᐦᑖᑦ᙮ ᐋᒄ ᐊᓂᑖᐦ ᒌᓴᔅᐦ ᐅᑑᓃᔨᒡ ᑳ ᐄᑎᓂᐦᒃ ᐋ ᐐ ᒥᓂᐦᐋᑦ᙮
49ᒥᒄ ᒫᒃ ᐊᓂᒌ ᑯᑎᑭᒡ ᐄᔨᔨᐅᒡ ᒌᐦ ᐃᔨᐅᒡ, “ᐊᑳᐐ ᐱᑎᒫᐦ᙮ ᐊᔑᓂᐙᐦᑖᐤ ᒫᐦ ᒑ ᐹᒋ ᐐᒋᐦᐄᑯᒀ ᑖᑆᐦ ᐄᓛᐃᒑ᙮”
50ᒌᓴᔅ ᒫᒃ ᒦᓐ ᒌ ᑖᑆᐤ ᐋ ᒋᔣᐙᑦ᙮ ᐋᒄ ᑳ ᐴᓂᐱᒫᑎᓰᑦ᙮
51ᐄᔥᐱᐦ ᒫᒃ ᓈᐱᑦ, ᐊᓐ ᐋᑯᔮᑯᐦᐄᑭᓐ ᐊᓂᑖᐦ ᒋᔖᐊᔨᒥᐦᐋᐅᑭᒥᑯᐦᒡ ᑳᐦ ᑎᑯᐦᒡ ᒥᑐᓐ ᒌ ᑖᔅᒋᐱᔨᐤ ᐊᓂᑖᐦ ᐋᐦ ᐄᔥᒀᔮᑭᒡ ᐄᔑ᙮ ᐊᔅᒌ ᑭᔮᐦ ᒫᒃ ᒌᐦ ᐋᔮᐦᒋᐱᔨᔨᐤ᙮ ᑭᔮᐦ ᐊᓯᓃᔨᒡ ᒌ ᑖᔅᒋᐱᔫᒡ᙮ 52ᒌᐲᑭᒥᒄ ᒌᐦ ᐋᐱᐦᐄᐱᔨᐤ᙮ ᒥᐦᒑᑐ ᒫᒃ ᒋᔖᒥᓂᑑ ᐅᑎᔨᔨᒻᐦ ᑳ ᐴᓂᐱᒫᑎᓰᔨᒡ ᒌᐦ ᐎᓂᔥᑳᓂᒫᑭᓂᐎᔨᐤ᙮ 53ᒌ ᒋᔅᑐᐦᑖᐅᒡ ᒫᒃ ᐊᓂᑎᐦ ᒌᐲᑭᒥᑰᐦᑳᓂᐦᒡ ᐅᐦᒋ ᐊᓂᒌ ᑳ ᐎᓂᔥᑳᓈᑭᓂᐎᒡ᙮ ᐄᔥᐱᐦ ᒫᒃ ᑳ ᐎᓂᔥᑳᔨᒡ ᒌᓴᔅᐦ ᓂᐱᐎᓂᐦᒡ ᐅᐦᒋ ᐋᒄ ᐊᓂᑖᐦ ᑳ ᐱᔮᐦᑭᓃᒡ ᒋᕉᓯᓕᒥᐦᒡ ᑳ ᐄᑐᐦᑖᒡ᙮ ᐋᑯᑖᐦ ᒫᒃ ᒥᐦᒑᑐ ᐊᐙᔨᐤᐦ ᑳ ᐙᐱᒥᑯᒡ᙮
54ᐊᓐ ᒫᒃ ᓂᑐᐱᔨᐅᒋᒫᐤ ᑭᔮᐦ ᐊᓂᔮᔨᐤ ᐅᓂᑐᐱᔨᒻᐦ ᑳ ᓈᓈᑭᒋᐦᐋᔨᒡ ᒌᓴᔅᐦ ᐄᔥᐱᐦ ᐎᔮᐱᐦᑎᐦᒡ ᐋ ᑯᐎᐦᑯᓃᔨᒡ ᑭᔮᐦ ᒥᓯᐙ ᐊᓂᔮᔨᐤ ᑳ ᐄᔅᐱᔨᒡ ᓈᔥᒡ ᒌ ᓵᒋᓯᐎᒡ᙮ ᐋᒄ ᑳᐦ ᐃᔨᒡ, “ᑖᑆᐦ ᒀ ᐋᔨᐅᑯᓐ ᐅᔮᔨᐤ ᒋᔖᒥᓂᑑ ᐅᑯᓯᔅᐦ᙮”
55ᒌ ᒥᐦᒑᑑᒡ ᒫᒃ ᐃᔅᒀᐅᒡ ᐊᓂᑎᐦ᙮ ᐋᐅᑯᓂᒡ ᐅᒌ ᐊᓂᑖᐦ ᑳᓕᓖ ᐊᔅᒌᐦᒡ ᑳ ᐅᐦᒋ ᐐᒑᐙᒡ ᒌᓴᔅᐦ ᑭᔮᐦ ᑳ ᒌ ᐙᐐᒋᐦᐋᒡ᙮ ᐙᐦᔨᐤ ᐊᓂᑖᐦ ᒌᐦ ᐅᐦᒋᑳᐳᐎᒡ ᐋ ᓈᓈᑭᒋᐦᐄᐙᒡ ᑖᓐ ᐋᐦᑎᓈᓂᐎᔨᒡ᙮ 56ᐋᑯᑖᐦ ᑳᐦ ᑖᒡ ᒣᕇ ᒫᒃᑖᓖᓐ ᑭᔮᐦ ᒣᕇ, ᒉᒥᔅ ᑭᔮᐦ ᒍᓯᕝ ᐅᑳᐐᐙᐤ, ᑭᔮᐦ ᓭᐱᑏ ᐅᑯᓯᔅᐦ ᐅᑳᐐᔨᐤ᙮
ᒌᓴᔅ ᐅᔨᐤ ᑳ ᓂᐦᐄᐦᑳᑭᓂᐎᔨᒡ
ᒫᕐᒃ 15:42-47; ᓘᒃ 23:50-56; ᒞᓐ 19:38-42
57ᐄᔥᐱᐦ ᒫᒃ ᐋᐦ ᐋᑎᐅᑖᑯᔑᒡ ᒌ ᑎᑯᔑᓐ ᓈᐹᐤ ᒍᓯᕝ ᐋ ᐃᔑᓂᐦᑳᓱᑦ᙮ ᓈᔥᒡ ᒌ ᒥᓯᒋᓰᐤ ᐆ ᓈᐹᐤ᙮ ᐊᓂᑖᐦ ᒫᒃ ᐃᐦᑖᐎᓂᔨᐤ ᐋᕆᒫᕠᔮ ᑳ ᐃᔑᓂᐦᑳᑖᔨᒡ ᐋᑯᑖᐦ ᑳ ᐅᐦᒌᑦ᙮ ᒌ ᓅᔔᔥᑯᐙᐤ ᑭᔮᐦ ᐐᔨ ᒌᓴᔅᐦ᙮ 58ᒌ ᓂᑎᐙᐱᒫᐤ ᒫᒃ ᐹᔨᓕᑦ᙮ ᐋᒄ ᑳ ᑯᒀᒋᒫᑦ ᒑ ᒌ ᐱᒋᔅᑎᓂᒫᑯᑦ ᒌᓴᔅᐦ ᐐᔮᔨᐤ᙮ ᐹᔨᓕᑦ ᒫᒃ ᒌᐦ ᐄᑎᔑᐦᐙᐤ ᒑ ᒌ ᒥᔨᒫᑭᓂᐎᔨᒡ ᒍᓯᕝᐦ ᐊᓂᔮᔨᐤ ᒥᔮᔨᐤ᙮ 59ᐋᒄ ᒍᓯᕝ ᑳ ᓃᐦᑎᓂᒸᑦ ᒌᓴᔅᐦ ᐐᔮᔨᐤ ᐊᓂᑎᐦ ᐋᔑᑖᔮᐦᑎᑯᐦᒡ ᐅᐦᒋ᙮ ᒌᐦ ᐋᑎ ᐐᔅᒀᔮᒋᓂᒻ ᒫᒃ ᓈᔥᒡ ᐋ ᐱᔮᐦᒑᑭᓃᔨᒡ ᐱᒋᐎᔮᓈᒋᓂᔨᐤ᙮ 60ᐊᓂᑖᐦ ᒫᒃ ᐋ ᒌ ᐙᑎᒀᐱᔅᑭᐦᐊᒧᑯᐱᓈ, ᐋᓅᐦᒌᐦᒑ ᐋ ᒌᐦ ᐅᔑᐦᑖᑯᐱᓈ, ᐋᑯᑖᐦ ᑳ ᐲᐦᑎᐦᐋᐦᒃ᙮ ᐐᔨ ᒫᒃ ᒋᐱᐦ ᒌ ᓂᐦᐄᑭᐙᑭᓂᐤ ᐊᓂᑎᐦ ᐄᔥᐱᐦ ᐴᓂᐱᒫᑎᓰᒑ᙮ ᐋᒄ ᐋ ᒥᐦᒑᐱᔅᒋᔨᒡ ᐊᓯᓃ ᑳ ᑎᐦᑎᐱᓈᑦ ᐊᓂᑖᐦ ᐋ ᐃᔥᒀᐦᑎᒥᐎᔨᒡ ᐊᓂᔮᔨᐤ ᒌᐲᑭᒥᑯᐦᑳᓂᔨᐤ ᑳ ᒋᐱᔑᒫᑦ᙮ ᐋᒄ ᑳ ᒋᔅᑐᐦᑖᑦ᙮ 61ᐋᑯᑖᐦ ᒫᒃ ᑳᐦ ᑖᒡ ᒣᕇ ᒫᒃᑖᓖᓐ ᑭᔮᐦ ᐊᓐ ᑯᑎᒃ ᒣᕇ ᐋ ᐅᑖᔥᑎᒥᐱᔥᑎᐦᒡ ᐊᓂᔮᔨᐤ ᑳ ᐙᑎᒀᐱᔅᑭᐦᐄᑭᓂᐎᔨᒡ᙮
ᑳ ᓈᓈᑭᒋᐦᑖᑭᓂᐎᒡ ᒌᐲᑭᒥᑯᐦᑳᓐ
62ᐊᓐ ᒫᒃ ᒦᓐ ᐎᔮᐱᐦᒡ ᐋᔪᐎᒄ ᐅᔮᔨᐤ ᒎᐤ ᐄᔨᔨᐅᒡ ᐅᑎᔨᐙᓲ ᒌᔑᑳᒧᐙᐤ᙮ ᐊᓂᒌ ᒫᒃ ᒋᔖᐊᔨᒥᐦᐋᐅᒋᒫᐅᒡ ᑭᔮᐦ ᐊᓂᒌ ᐹᕆᓰᒡ ᒌ ᓂᒋᔥᑭᐙᐅᒡ ᐹᔨᓕᑦ᙮ 63ᐋᒄ ᑳᐦ ᐄᑖᒡ, “ᐅᒋᒫᐤ, ᓂᒋᔥᒋᓯᓈᓐ ᐋᔥᒄ ᐋ ᒌ ᐱᒫᑎᓰᑦ ᐊᓐ ᑳ ᓂᓂᑎᔨᑦ ᐋ ᒌᐦ ᐃᔨᑦ, ‘ᓂᔥᑐ ᒌᔑᑳᐤᐦ ᐃᔥᐱᔥ ᐋᒄ ᒑ ᐎᓂᔥᑳᓂᑭᐎᔮᓐ ᓂᐱᐎᓂᐦᒡ ᐅᐦᒋ᙮’ 64ᐄᑎᔓᐙ ᒫᐦ ᔮᒀᐦ ᒑ ᒌ ᓈᓈᑭᒋᐦᑖᑭᓂᐎᒡ ᐊᓐ ᒌᐲᑭᒥᑯᐦᑳᓐ ᐹᑎᔥ ᒌ ᓂᔥᑐᒌᔑᑳᒑ᙮ ᐙᔥ ᑭᑎ ᒌ ᐹᒋ ᒋᒧᑎᔨᐤ ᐅᒋᔅᒋᓂᐦᐊᒧᐙᑭᓐᐦ ᐊᓂᔮᔨᐤ ᐅᔨᐤ ᒑ ᒌ ᓂᓂᑎᔨᒫᔨᒡ ᐊᐙᔨᐤᐦ ᐋᐦ ᐄᔨᔨᒡ ᐋ ᒌᐦ ᐎᓂᔥᑳᔨᒡ ᓂᐱᐎᓂᐦᒡ ᐅᐦᒋ᙮ ᐋᒄ ᐊᓐ ᒫᐦᒋᒡ ᓂᓂᑎᔨᐎᓐ ᐊᐅᔅᑖ ᓂᒧᐃ ᑭᑎ ᐅᐦᒋ ᒋᐦᑳᐙᓯᑖᑯᓐ ᐃᔥᐱᔥ ᐐ ᐊᓐ ᓃᔥᑎᒻ ᓂᓂᑎᔨᐎᓐ᙮”
65ᐋᒄ ᐹᔨᓕᑦ ᑳᐦ ᐄᑖᑦ, “ᐅᑎᓈᐦᑯᒡ ᓂᑐᐱᔫᒡ᙮ ᒑ ᓂᑑᔮᐃᒋᐦᑖᔮᒄ ᐊᓐ ᒌᐲᑭᒥᑯᐦᑳᓐ ᒥᒄ ᒑ ᒌᐦ ᐃᔥᐱᔥ ᔮᐃᒋᐦᑖᔮᒄ᙮”
66ᐋᒄ ᒫᒃ ᑳ ᒋᔅᑐᐦᑖᒡ᙮ ᒌ ᓂᑑᒋᔅᒋᓂᐦᐋᒋᐦᐋᐅᒡ ᐊᓂᔮᔨᐤ ᐊᓯᓃ ᑳ ᒋᐦᐱᔑᒫᑭᓂᐎᔨᒡ ᐊᓂᑎᐦ ᒌᐲᑭᒥᑰᐦᑳᓂᐦᒡ ᒑᐦ ᐋᑳ ᐊᐙᔨᐤᐦ ᒌ ᐱᒫᔨᒫᔨᒡ᙮ ᐋᒄ ᑳᐦ ᐄᑖᒡ ᓂᑐᐱᔨᐤᐦ ᒑ ᒌ ᓈᓈᑭᒋᐦᑖᔨᒡ ᐊᓂᔮᔨᐤ ᒌᐲᑭᒥᑯᐦᑳᓂᔨᐤ᙮
Đang chọn:
ᒫᔪᐦᐧᑖᑦ ᒫᕠᔫ 27: crls
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2016, Wycliffe Bible Translators, Inc. All rights reserved.
