San Mateo 4
4
Te ixtondoso ña ndivaꞌa Jesús
1Saa kuu ra ndakiꞌin Tachi Yii Ndioxi Jesús kuaꞌan ra xiꞌin ña chi iku yuu, ra ikan ixtondoso timiaꞌa ra. 2Ra te ndixinu uvi xiko kaꞌñu, xiꞌin uvi xiko ñuu ña ndixiyo suꞌun Jesús, ña ndixïxi ra, ra saa xaꞌa ndikaꞌun ini ra. 3Saa ra kuyachin va timiaꞌa nuu ra ña ixtondoso ri ra, ra ndikaꞌan ri xiꞌin ra kachi ri saa:
―Tu ndixa seꞌe Ndioxi kuvi kun, ra kaꞌan xiꞌin yuu yoꞌo ra na nduu ña ixta kuxi kun ―kachi ri xiꞌin ra.
4Ra saa ndakuiin Jesús kachi ra saa xiꞌin ri:
―Tuꞌun Ndioxi ra suꞌva va ke kachi ña: “Süvi ndiakua ixta vi ke kuvi kutiaku yuvi xiꞌin, chi kutiaku tu na ña kandixa na takundiꞌi tuꞌun ña kaꞌan Ndioxi va” ―kachi ra xiꞌin ri.
5Saa ndakiꞌin timiaꞌa kan Jesús kuaꞌan ra xiꞌin ri ñuu yii Jerusalén, ra sandaa ri ra ndia xini veꞌe ñuꞌu nuu sukun vaꞌa. 6Ra ndikaꞌan ri xiꞌin ra kachi ri saa:
―Tu ndixa seꞌe Ndioxi kuvi kun ra sandakava mii kun yoꞌo vichin, chi saa kachi tuꞌun Ndioxi:
Chi tiꞌvi va ra na tatun ra kixi na ña kondiaa na yoꞌo,
ra nuu ndaꞌa va ná ndakava kun,
ra täxi na takueꞌe xaꞌa kun sa yuu ―kachi ri xiꞌin Jesús.
7Saa ndakuiin Jesús kachi ra saa xiꞌin ri:
―Ra kaꞌan tu tuꞌun Ndioxi kachi ña suꞌva va: “Na köto ndoso yuvi Ndioxi” ―kachi ña, kachi ra xiꞌin ri.
8Ra saa ndakiꞌin tuku timiaꞌa kan Jesús kuaꞌan ra xiꞌin ri iin koꞌndo sukun vaꞌa, ra ikan ndiñaꞌa ri takundiꞌi ñuu ña iyoo nuu ña yuuvi yoꞌo, xiꞌin takundiꞌi ña kuika nuu ra. 9Ra ndikaꞌan ri xiꞌin ra kachi ri saa:
―Ndaꞌa yoꞌo taxi yu takundiꞌi ña yoꞌo, tu na ndakusiti kun nuu yu, ra ndasakaꞌnu kun yuꞌu ―kachi ri xiꞌin ra.
10Ra saa ndikaꞌan Jesús xiꞌin ri kachi ra saa:
―Timiaꞌa, kuatiaꞌa nuu yu, saa chi xiniñuꞌu kandixa va yu tuꞌun Tata yu Ndioxi ña kaꞌan ña xiniñuꞌu ndasakaꞌnu yu indaa mituꞌun saa ra kan, ra indaa ra kan tu kandixa va yu, ^kachi ña ―*kachi ra xiꞌin ri.
11Ndia saa ra ndakoo ri Jesús ra ndakiꞌin ri kuaꞌan va ri, ra saa xaa na tatun Ndioxi ña chindiee taꞌan na xiꞌin va ra.
Xaꞌa Jesús xiꞌin chiñu ña taxi Ndioxi ndaꞌa ra
12Ra te kundaa ini Jesús ña tiin na ra Juan chikaa na veꞌe kàà, saa ra nandiko ra chi Galilea va. 13Ndi su nindöo ra koo ra ñuu Nazaret, saa chi chi ñuu Capernaum va ndiyaꞌa ra ndixaꞌan ra ndixiyo ra. Ra ñuu kan, ra yachin yuꞌu mini va ke ndikaa ña, ra ikan kuvi nuu iyoo na seꞌe xikua ra Zabulón, xiꞌin ra Neftalí. 14Ra suꞌva ke kuu ña ndixinu nuu tuꞌun Ndioxi ña ndikaꞌan ra Isaías, ra ndikaꞌan tuꞌun yuꞌu Ndioxi xinaꞌa, ta kachi ra suꞌva:
15Ñuu nuu iyoo na seꞌe xikua ra Zabulón xiꞌin ra Neftalí,
ña ndikaa chi inka xiyo yuꞌu itia Jordán,
yachin yuꞌu tiañuꞌu chi Galilea, nuu iyoo kuaꞌa ni na xïni tuꞌun Ndioxi.
16Yuvi na xika nuu ñaa,
ra xini na ndayeꞌe iin ñùꞌù chee;
ra na ndee nuu ñaa, na xa ndiatu ini kuvi,
ra xini na ndatuun iin ñùꞌù ra ndayeꞌe ña nuu na,
kachi ra Isaías.
17Ra kii kan xaꞌa Jesús kaꞌan ndoso ra tuꞌun Ndioxi nuu yuvi, kachi ra saa:
―Nandiko ini ndo xaꞌa kuachi ndo ra ndakiꞌin ndo ichi Ndioxi, chi xa kuyachin va ra ña kaꞌndia ra chiñu nuu ndo ―*kachi ra xiꞌin na.
^Kana Jesús kumi ndia tiin tiaka
18Saa kuu iin kii, ra kee Jesús kuaꞌan ra chi yuꞌu tiañuꞌu ra ndikaa Galilea, ra ikan xini ra uvi tiaa ndia tava tiaka ra koꞌni ndia inu ndia ini tiañuꞌu kan xika ndia; ra ñani va ndia, ra iin ra nani Simón ra kaꞌan tu na Pedro va xiꞌin ra, ra inka ra nani Andrés, ra niña ndia tava tiaka kuvi va ndia. 19Ra saa ndikaꞌan Jesús xiꞌin ndia kachi ra saa:
―Naꞌa ndo na kuꞌun yo xiꞌin yu, ra sañaꞌa yu ndoꞌo ndia kuꞌva ke ndatuꞌun ndo xiꞌin yuvi ra ndakundikun na yuꞌu ―*kachi ra xiꞌin ndia. 20Ndia saa ra ndikun ndakoo ndia inu ndia ña tava ndia tiaka ra ndakundikun ndia kuaꞌan ndia xiꞌin va ra. 21Ra iin viviꞌi loꞌo ndixaꞌan Jesús, ra saa xini ra inka uvi tuku va ndia, ra ñani tu ndia kan va; ra iin ra nani Jacobo ra inka ra nani Juan, ra ini barca ke ndoꞌni ndia xiꞌin iva ndia ra nani Zebedeo ña ndakaꞌma ndia inu ndia ña tiin ndia tiaka. Ra saa ndikaꞌan Jesús xiꞌin ndia, ña ná kundikun ndia ra. 22Saa ra ndikun ndakoo ndia chiñu ña xa ndia ra nindiayu taꞌan ndia xiꞌin Iva ndia, ra ndakundikun ndia kuaꞌan ndia xiꞌin Jesús va. 23Ra iinii kuvi chi Galilea ^xika Jesús sañaꞌa ra yuvi ta veꞌe ñuꞌu ta veꞌe ñuꞌu, ra ^kaꞌan ndoso ra tuꞌun Ndioxi nuu na, ña ^sañaꞌa ra na xaꞌa ichi nuu xaꞌndia chiñu Ndioxi, ra sandaꞌa ra takundiꞌi yuvi na xiꞌi, ndia ndia ka mii nuu kueꞌe va. 24Ra iin takundiꞌi ñuu ña ndikun ndiaa ñuu Siria, ndindutia ndoso tuꞌun xaꞌa Jesús, ña kuaꞌa ni ña xituꞌun xa ra, ra iin takundiꞌi na xiꞌi, ra vaxi na xiꞌin na nuu ra. Ra ndia ndia ka mii nuu kueꞌe ke ndoꞌo va na, takuu sava na tiin tachi ndivaꞌa, xiꞌin na kueꞌe na küvi kaka, xiꞌin na xiꞌi yiꞌi, ra yo̱o̱ ka mii kuvi va na, chi iin nduvaꞌa yaa va na xa Jesús. 25Ra kuaꞌa ka vi yuvi ndikun kuaꞌan xiꞌin Jesús, na kee chi Galilea, xiꞌin na kee ñuu Decápolis, xiꞌin na kee ñuu Jerusalén, xiꞌin na kee chi Judea, ra saa tu na ndee chi inka xiyo yuꞌu itia Jordán va.
Đang chọn:
San Mateo 4: mxvNT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2017, Wycliffe Bible Translators, Inc. All rights reserved