BBƐ 6

Belumitinine ma bɔ́ táfa baacɔ bétíndétú nɔ́mɔ

1Ekúlú etéeyé, ɔmbana ú belumitinine Yésus ŋaá bá weé bísólíkínyi bu bísólíkínyi. Aáná batáŋa *nɔkɛlɛ́k ŋe bú túmé obícúcúlíne batáŋa *nuebélé a asana ayɛ́ bá ŋaá bá bábɔ́ bɛ́hɔ́yáka bíábɔ́ bisíké a nuafa nɔ́ bɛnyɛ́ma bɛ́ ɔnyíá abɛ́ bá ŋaá bá bá yáafaka mɔɔ́sɛ́ mekime. 2Aáná baacɔ bá ɛndɔ́ma bɔ́ɔ́hátá ne béfendí ŋa bɔ́ bándáká belumitinine Yésus bekime ; báyɛ náábɔ́ : « Bɔ́ tɛ á bá bɔmbányɛ anyía túásɔ́ nyɛ́ána ohulinyi baacɔ Bɛsana bɛ́ Bandɔ́mɛsɛ́ anyía tuásɔ́ cɔbá ɔ ɔwaafɛna baacɔ bɛnyɛ́ma bɛ́ ɔnyíá. 3Buátɛ́ bɔkɔ, banɔ́ báásɔ́ benyíinyí, ánɔ táfáka baacɔ bétíndétú nɔ́mɔ aanɔ́ ɛ ɛkatɛ́katɛ́ abá baacɔ ŋe bú ményi anyía bá bɔ́ŋa bɛmbányɛ bɛ́ baacɔ ; bá ŋá bɔ́ nyɛmána bá ɔbámɔ́kɔ́nɛ́na tɔ́na bonyíóyónó ne *Efúúménénú yí Elilé ɛ ɛtɛ́má, ne injiŋé a bɛɛtɔ́. Beébe tu ŋa sɔ́ cɔ́ba o owiínjie buólí eébú. 4Aáná basɔ́, tu ké sú bíínjie na ɔ ɔbɛ́cɔ́kɔ́lɛ́na Bandɔ́mɛsɛ́ ne o ohulikinyi baacɔ bíáyɛ́ bɛsana. »

5Ɔtáŋa ooci ŋeé bílénékíne buéŋí belumitinine bekime, nyíábɔ́ nyɛtáfa eényí Itiene awɔ́ u ŋaá bá na makɛ́nda o olumitinine, wuúci tɔ́na onyíóyónó ne Efúúménénú yí Elilé hú mbiɔ́kɛ ; bá ŋá táfa tɔ́na ne Fílib na Bɔlɔkɔ́ɔl, na Nɛkanɔ́ɔl na Tɛ́mɔn, na Baálmɛ́nas na Nɛ́kɔlas, ɔɔcɔ u Antióse awɔ́ u ŋaá bɛ́kɔ́ŋɔ́nɛ́ná o olumitinine ú *Besuif buáyá.#6.5 Eénye eécí ekime áŋa eénye cá Bakɛlɛ́k ; yááŋa háyɛ anyía belumitinine ŋa bɔ́ táfáka hú baacɔ bá aháŋá yí bebícúcúle. 6Bé ŋe bú tóŋínyí baacɔ bá ɛndɔ́ma bítíndétú nɔ́mɔ eébí. Ɛ́makɛ́la baacɔ bá ɛndɔ́ma ma bɔ́ bɛ́cɔ́kɔ́lɔ́kɛ́na Bandɔ́mɛsɛ́, bé ŋé beébe táláka aabá a bɛɛtɔ́. 7Aáná Bɛsana bɛ́ Bandɔ́mɛsɛ́ ŋaá bá bɛ́á cɔ́cɔbaka ne buúse. Ɔmbana ú belumitinine kɔmaka buéŋí eé Yelúsalɛm, *beluli nyiínjie beéŋí ŋeé lúmítékíníne.

Bekendisi Besuif ma bɔ́ hátɛna Itiene

8Itiene ŋaá bá onyíóyónó na makɛ́nda, anyía Bandɔ́mɛsɛ́ ŋeé wuúci sayábákɛ́na buéŋí. Buátɛ́ bɔkɔ, u ŋaá bá waá kɛ́laka ne bikémése bɛ́ bɛsana na bɛandándá bí bikéki bí tubílícínyínyí ɛ ɛkatɛ́katɛ́ cɛ baacɔ. 9Aáná *Besuif a bɔ́mɔtɛ́ ŋa bɔ́ bá aáhá, bé húlúkúne a bálɛ́ka ne ci Silɛ́ɛn na cɛ Alɛkɛsandilí ; bá ŋa bɔ́ babɛ́bándákánɔ́ a *andaŋía yɛ́ ɔbɛ́cɔ́kɔ́lɛ́na ayɛ́ bɔ́ ŋɔɔ́ lɔ́ŋɔ báyɛ « Andaŋía yɛ́ ɔbɛ́cɔ́kɔ́lɛ́na yɛ́ bɛɔ́lɛ́ a bɛháŋɔ́nákánɔ́ ».#6.9 Bɔmbɛ, ecénji a yaáŋá yí butéŋí bú Lóom, u ŋeé hélékénéne sɔ́kɔ́nɔ́ cɛ baacɔ eébé háyɛ bɛɔ́lɛ́ a tuɔŋɔ 63 ɛ́cɛ Yésus Kilís ti ŋée bíbíéne. Bɔ́mɔtɛ́ tɔ́na ŋa bɔ́ bá hɔ́á, bé húlúkúne ne i iisí ci Silisí na cɛ Asi ; beébe bekime eébé ŋa bɔ́ bɛ́lɔ́lɔ́ Itiene, bé súŋgunyinyi ne wuúci. 10Ta híáná, bɔ́ tɛ ɔ́mɔ bɔ́ bá ne ohónyí wú ɔyáka Itiene i isuŋí, anyía u ŋaá bá waá táŋáka ne injiŋé, wuúci onyíóyónó ne *Efúúménénú yí Elilé hú mbiɔ́kɛ. 11Ɛ́ɛhɛ́ bé ŋge bú hiíte mahɛ́ndɛ́ a baacɔ anyía bá kɔɔ́nákɛ́na Itiene báyɛ u ŋaá bábɛ́na *Moyís, u bábákɛ́na tɔ́na Bandɔ́mɛsɛ́. 12Aáná bé ŋe bú líŋísi na baacɔ bá bunɔŋɔ, na *baáŋá bé Besuif, ne *beékúnyi bikotí. Buátɛ́ bɔkɔ eébú, baacɔ eébé ŋa bɔ́ fááya, bá ŋa mɛ́ɔ́mɛ́na Itiene, bé ŋé wuúci cɔbána eé buúse bú Hitúlé a hiáŋá. 13Bá ŋa bɔ́ cɔbána tɔ́na baacɔ a bá ŋa bɔ́ bá bábɔ́ sɔ́mbákɛ́na Itiene bɛsana, bá kɔ́ɔnaka báyɛ : « Baabá eéyé tɛ ŋɔ́ɔ́ tɔ́mbɔ ɔbábɛ́na ne Efúúménénú yí Ciíbe ne *bikotí bí Moyís áyá. 14Tu ŋá sɔ́ lɔ́kɔ́máká waá kɔ́ɔnaka anyía Yésus ɔɔcɔ u *Násalɛt ooci káá kátaka Ciíbe eécí, yɔ́ hɛ́ŋakɛna bikotí ebí Moyís ŋaá basɔ́ iínjíekine. » 15Baacɔ bekime a bá ŋa bɔ́ bá límekine eé ciíbe ci Hitúlé a hiáŋá ŋa bɔ́ tálá Itiene eése. Bá ŋá lɛca búáyɛ́ buúse á nɔ́máka háyɛ buúse bú *elilé yɛ́ bɔsɔ́ma yɛ́ Bandɔ́mɛsɛ́ a yɛ́mɔtɛ́.

Đang chọn:

BBƐ 6: lem

Tô màu

Sao chép

So sánh

Chia sẻ