Mákò 16
16
Yèésù dzí ti náàŋírĩ-òkú ŋa wá náyé
(Màtéwò 28:1-8; Lúkà 24:1-12; Yòhánà 20:1-10)
1Kíbí ɔdzɔ́-ìmíra†#á wáa lɔ tã́#á, Sàlòmɛ́ òŋu Màríyà† ti ìlú-Màɖàlá má nára-Màríyà† ìnà-Yàkúbù, à lɔ káà ra àɖɛ̃́ rṹrũ̀ fĩ́rĩ́fĩ́rĩ́ ńǹrɔ́ǹrɔ́, tsí ká wáa lɔ káà ń kpã́ fú òkú-Yèésù#ɛ́. 2Tsí ó ɖi ńlɛ̀ má‐ɛ̀, nɔ́dzɔ́ɔ̀sɛ̃̀ náàwúrɔ̀ kùtùkùtù, kíbí odzúùrɔ̃̀ bɔ́ gé#ɛ́, à lɔ néèkpò#ɛ́. 3Kíbí à wà nɔ́ɔ̀nà làkóò#ɛ́, à wà bere ara-ŋa ní: Nɛ̀ɛ́ nákó rí òkúta yèé à ń ɖí arũ-èkpò#ɛ́ ǹɖe fú àŋa báàyí?
4Òkúta#á lákṹ gìrìbìtìì bɛ́ ni. Kíbí à tó, tsí kɛ́ odzú fú ìgbèrí gé#ɛ́, à rí ní òkúta#á rí lɔ nákpálà-kã̀. 5Ńbɛ̀ɛ́, à wɔ̀ néèkpò#ɛ́ lɔ, tsí à rí ɔmɔ̀tsɔ́-kã̀, tsí ó dzokó nɔ́wɔ́-àwóòtã́ si, tsí wɔ ìwɔ̀ra fũfũ kãlɛ̀ si. Kíbí à ríi bɛ́ɛ̀#ɛ́, odzo kpé ŋa tsítse. 6Tsí ɔmɔ̀tsɔ́#ɛ́ wà wí fú ŋa ní: Ká máa sá! Kò tsi Yèésù ti Nàsàrɛ́tì, ɛnɛ yèé à kã̀ si ńǹtá-egi-ìɖáàgàlàdzà†#á ní à wà wò#ɛ́ɛ̀? Kò wà ńbí ró. Ó ti dzí ti náàŋírĩ-òkú ŋa wá náyé. Ó ɖi, ká rí! Ńbí à kɛ́ɛ si#ɛ́ ńnɛ̀ɛ́. 7Ó ɖi, ká lɔ káà dzɛ́ fú ɔmatsɛ́‐ɛ̀ ŋa òŋu Òkúta gbo ní: Ó tsúwádzú-ŋa lɔ nérè-Gàlìlé. Ńbɛ̀ ní à nákó ríi#ɛ́, kíbí ó ti wíi fú ŋa wáa lɔ#ɛ́.
8Ńbɛ̀ɛ́, à yára, tsí fùɖá néèkpò#ɛ́, tsí sá lɔ. À nɔ̀ ɖí ara-ŋa, tsí à wà ŋá kpó kpàkpàkpà. À wà sá títí à kò nyáa wíi fú ɔ̀nyà-kã̀ kpókpó.
Yèésù mú ara‐ɛ̀ ŋa Màríyà ti ìlú-Màɖàlá
(Yòhánà 20:11-18)
[ 9Kíbí ɔdzɔ́-ìmíra† wáa lɔ tã́#á, ńlɛ̀má‐ɛ̀ náàwúrɔ̀ kùtùkùtù#ɛ́, Yèésù dzí ti náàŋírĩ-òkú ŋa wá náyé. Tsí ó tsɛ̃̀tsɛ̃̀ mú ara‐ɛ̀ ŋa Màríyà† ti ìlú-Màɖàlá. Màríyà#á, Yèésù ti lé edzò† méedze sɛ̃̀ náànyì‐ɛ̀ wáa lɔ. 10Ńbɛ̀ɛ́, Màríyà#á wáa lɔ ńɖi-ègbènáànyì-Yèésù ŋa. Kíbí ó káà tó#ɛ́, ara kú ŋa si, tsí à wà sɔkṹ. Tsí ó fɔ iŋɛ́ yèé ó rí#ɛ́ fú ŋa. 11Ó wí fú ŋa ní Yèésù wà náàyɛ̀ si, títí ó mú ara‐ɛ̀ ŋa òŋu. Kíbí à gbɔ́ bɛ́ɛ̀#ɛ́, à kò karalé si ńǹtá‐ɛ̀.
Yèésù mú ara‐ɛ̀ ŋa ɔmatsɛ́‐ɛ̀ méèdzì kã̀ŋa nɔ́ɔ̀nà
(Lúkà 24:13-35)
12Náànyì-bɛ́ɛ̀#ɛ́, ɔmatsɛ́‐ɛ̀ méèdzì wà nɔ́ɔ̀nà-ìlú-oko-kã̀ làkóò. Tsí ó mú ara‐ɛ̀ ŋa àŋa gbo ńǹrɔ́-òmírɛ̃̀. 13Kíbí àŋa gbo à sɛ̃̀ bɔ̀ wáa tó ńYèrúsàlɛ́mì#ɛ́, à kpɛ̀rɔ́‐ɛ̀ fú ɛnɛ-àtíbɔ̀ ŋa. Tsí à kò gba àŋa gbo gbɔ́.
Yèésù mú ara‐ɛ̀ ŋa ɔmatsɛ́‐ɛ̀ ŋa
(Màtéwò 28:16-20; Lúkà 24:36-49; Yòhánà 20:19-23; Itsɛ́ 1:6-8)
14Náànyì-bɛ́ɛ̀ ró#ɛ́, ɔmatsɛ́‐ɛ̀ máàwɔɔ̀kã̀ yèé bɔ̀ ŋa#á wà nóòkpì-dzídzɛ si, tsí ó mú ara‐ɛ̀ ŋà ŋá. Tsí ó bá ŋa fɔ̀ ní: À kò nɛ́ àkaralé, tsí ɛ̀ɖɔ̃̀ gbo kã̀ ŋá, iŋɛ́ yèé tse#ɛ́, ɛnɛ yèé ŋa rí òŋu kíbí òŋu dzí wá náyé#ɛ́, à kò nyáa gbà afɔ̀-ŋa gbɔ́.
15Tsí ó wí fú ŋa ní: Ká lɔ náyé gbaŋgba#á kpó, tsí ká káà dzíkɔ̀-òŋu fú ɔ̀nyà kpó. 16Ó ɖi, ɛnɛ yèé nákó gba òŋu gbɔ́, tsí à nákó wìwɛ̀-òŋu fúu#ɛ́, Ɔ̀ɖáyé nákó gbàá là. Tsí ɛnɛ yèé kàkó gbà òŋu gbɔ́#ɛ́, Ɔ̀ɖáyé nákó ɖáàbi fúu.
17Tsí ó sɛ̃̀ wà wí fú ŋa ní: Ɛnɛ yèé ŋa nákó gba òŋu gbɔ́#ɛ́, iŋɛ́-àwùsì yèé à nákó wà tse, tsí wà ń nya ikpá-òŋu ɖíre#ɛ́ ní dzɛ́ ní: Bí à fɔ̀ ní ó ɖɔkpɛ́-òŋu#ɛ́, edzò† yèé ŋa wà ɖɔ́kpɔ fú ɔ̀nyà ŋa#á, à nákó wà lé ŋa sɛ̃̀ náànyì-ŋa, tsí à nákó wà wí ìlú titɔ̃ ŋa gbo. 18Bí à dzi edzò nɔ́wɔ́ nàmí à mú oró fú ŋa ní ká mɔ, iŋɛ́-kã̀ kpókpó kàkó tse ŋá. Tsí à nákó wà mɔ́wɔ́ lé ńǹtá-àkɔ̃̀rɔ̃̀ ŋa, tsí àrɔ̃̀ ŋa nákó wà tù ŋá.
Yèésù sɛ̃̀ lɔ nɔ́ɔ̀rɔ̃ ńɖi-Ɔ̀ɖáyé
(Lúkà 24:50-53; Itsɛ́ 1:9-11)
19Kíbí Yèésù Ɔlá-wa wíìnyɛ̀ bɛ́ɛ̀ fú ŋa tã́#á, ó ǹɖe, tsí lɔ nɔ́ɔ̀rɔ̃, tsí ó káà dzokó náàwóòtã́-Ɔ̀ɖáyé. 20Tsí ɔmatsɛ́‐ɛ̀ ŋa#á lɔ, tsí wà dzíkɔ̀‐ɛ̀ wérí kpó. Ɔlá-ŋa náa wà mɔ́wɔ́ gbè fú ŋa, tsí à náa wà tse iŋɛ́-àwùsì ŋa, tsí wà ń nyà ɖíre ní ikɔ̀ yèé à wà dzɛ́#ɛ́ ni òtítɔ́ ni.]
Đang chọn:
Mákò 16: ngl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Wycliffe Bible Translators, Inc. All rights reserved.
