Mákò 1

Yòhánà Awɛ̀fúnɛ wà dzíkɔ̀-Ɔ̀ɖáyé fúnɛ

(Màtéwò 3:1-12; Lúkà 3:1-3; Yòhánà 1:19-28)

1Ìwé yèé bɛ́ wà dzíkɔ̀ ɖíɖɔ̃̀-Yèésù† Kírísítò†, Ɔma bíbí-Ɔ̀ɖáyé. Ìkpìnkpìlɛ̀‐ɛ̀ gìɖì ní. 2Dzɔ̀ɔ́ dzɔ̀ɔ́#ɛ́, à ti kɔ afɔ̀-kã̀ ti nára-Kírísítò si ńǸwé-Yèsáyà† agbáfɔ̀-Ɔ̀ɖáyé fɔ̀† ní:

“Màa bɛ adzítsɛ́-mi tsúwádzú-ɛ̀ɛ lɔ,

tsí kó lɔ káà tɔ́tse ɔ̀nà-ɛ̀ɛ si fɛ́ɛ.

3Ó ɖi, oŋù-ɔ̀nyà-kã̀ wà ɖɔ̃́ nɔ́ɔ̀ɖã̀, tsí wà ɖúgbe ní:

È tɔ́tse ɔ̀nà si fú Ɔlɔ́dzɔ́. È tɔ́ ɔ̀nà sísɛ̃́ ŋa si fúu.”#1:3 Ìwé-Màlàkí 3:1, Ìwé-Yèsáyà 40:3 (Malachie 3:1, Ésaïe 40:3)

4Ìɖéǹɖè#ɛ́, iŋɛ́ ŋa#á lɔ bɛ́ɛ̀ kíbí ìwé#ɛ́ fɔ̀#ɛ́. Ɔ̀nyà-kã̀ bɔ́ nɔ́ɔ̀ɖã̀, tsí à náa kpèé ní Yòhánà†, tsí ó wà wɛ̀† fúnɛ. Náa wà fɔ̀ fú ɔ̀nyà ŋa ní: Ká nyíìlò kpaɖà, tsí òŋu kó wɛ̀ fú ŋa, tsí Ɔ̀ɖáyé kó mú àbi-ŋa tɔrɛ fú ŋa.

5Ɔ̀nyà kpó yèé wà nérè-ìyabɛ̀#ɛ́, nérè-Yùɖéyà òŋu ńǹlú-Yèrúsàlɛ́mì#ɛ́, à náa wáa lɔ ńɖɔ̀‐ɛ̀. Tsí à náa wà fɔ àbi yèé à dzɛ si ŋa#á, tsí náa wà wɛ̀ fú ŋa nóɖò-Yòɖánì. 6Àwù-Yòhánà#á, irɔ̃-ràkumi#1:6 Ràkumi#ɛ́, ɛrã gíga-kã̀ ni, tsí náa gbé nɔ́ɔ̀ɖã̀. Ó ga láre atsĩ, tsí irɔ̃ tɛ̀ɛ̀ kà rɛ̃́. ní à ń ŋɔɔ́#ɛ́. Tsí náa mú ɖíɖì-awɔ-kã̀ gbo, tsí ń ɖì néèrèɖé si. Tsí náa wà dzɛ ìgbɛ̃̀ ŋa, tsí wà lá onyi gbo.

7Ńbɛ̀ɛ́, ó wà wí fú ŋa ní: Ɔ̀nyà-kã̀ nákó wáa wá náànyì-òŋu, tsí nɛ́kpá láre òŋu, tsí òŋu kò dzɔ òŋu kó balɛ̀, tsí tú okù-kpákò‐ɛ̀ gìɖì. 8Òŋu, omi gé ní òŋu wà ń wɛ̀ fú ŋa#á. Ó ɖi, ɛnɛ nyɛ̀ŋɛ̀ òŋu nákó tse tsí Mímí-Ɔ̀ɖáyé† nákó tì wɔ̀ ńǹtá-ŋa.

Yòhánà wɛ̀ fú Yèésù

(Màtéwò 3:13-17; Lúkà 3:21-22)

9Nára-ɔdzɔ́ nyɛ̀ŋɛ̀#ɛ́, Yèésù gbo ǹɖe ńǹlú-Nàsàrɛ́tì, nérè-Gàlìlé, tsí wá ńɖi-Yòhánà† nétí-oɖò-Yòɖánì, tsí Yòhánà wɛ̀† fúu nóɖò#ɛ́. 10Kíbí Yèésù wà fùɖá nómi#ɛ́, ó rí ní ɔ̀rɔ̃ tsí, tsí Mímí-Ɔ̀ɖáyé tì wá ńǹwànwà-àlúǹkùkù bɛ́, tsí wáa dzì ńǹtá‐ɛ̀. 11Ńbɛ̀ɛ́, oŋù-Ɔ̀ɖáyé ɖɔ̃́ ti nɔ́ɔ̀rɔ̃, tsí wà fɔ̀ ní: Ìwɔ ní dzɛ́ Ɔma bíbí-mi#ɛ́, tsí ò dzɛ́ àrínódzú-mi gbo, tsí iŋɛ́-ɛ̀ɛ dzɔdzú-mi héŋú.

Ètsù ɖã́ Yèésù wò

(Màtéwò 4:1-11; Lúkà 4:1-13)

12Gbòkã́#á, Mímí-Ɔ̀ɖáyé† kɛ́ɛ lɔ nɔ́ɔ̀ɖã̀, 13tsí ó gbé bɛ̀ títí fú ɔdzɔ́ ogóòdzì, tsí Ètsù† náa wà ɖã́ã wò. Ó wà náàŋírĩ-ɛrã-kóko ŋa si, tsí adzítsɛ́-ɔ̀rɔ̃† ŋa náa wà mɔ́wɔ́ gbè fúu.

Yèésù kpe aɖàɖɔ̀ɔ́ mɛ́ɛrɛ̃

(Màtéwò 4:12-22; Lúkà 4:14-15; 5:1-11)

14Náànyì-bɛ́ɛ̀#ɛ́, à mú Yòhánà† si nɛ́ɛ̀ŋà. Tsí Yèésù ǹɖe lɔ nérè-Gàlìlé, tsí wà dzíkɔ̀ ɖíɖɔ̃̀ ti nára-Ɔ̀ɖáyé ní: 15Ɔdzɔ́#ɛ́ kò, iŋɛ́ yèé tse#ɛ́, ìwèrè sɔ́má tã́, tsí Ɔ̀ɖáyé kó dzoyè. È nyíìlò kpaɖà, tsí e gba ikɔ̀#ɛ́ gbo gbɔ́.

16Ó ɖi, nɔ́dzɔ́-kã̀, tsí Yèésù gbà nétíɖò-Gàlìlé#ɛ́ làkóò,#1:16 Oɖò#ɛ́, ó wà kíbí àɖágúlɛ̀ bɛ́, tsí ó tsédzú títí à kàkó nyáa rí àtàkè‐ɛ̀. Gúgù‐ɛ̀ tó ìtsɛ́kòlò ogú, tsí tsítsédzú‐ɛ̀ gbo tó ìtsɛ́kòlò maá. tsí ó rí aɖàɖɔ̀ɔ́ méèdzì kã̀ŋa, tsí à wà ɖàɖɔ̀ɔ́ làkóò. Ìnàbí ŋa ní à dzɛ́#ɛ́. À náa kpe ɔ̀nyà-kã̀ ní Sìmɔ́nì, tsí ɔmàná‐ɛ̀ dzɛ́ Ànɖérè. 17Tsí Yèésù kpè ŋá, tsí fɔ̀ fú ŋa ní: Ká tɛ̀ náànyì-òŋu. Ó ɖi, òŋu nákó tse tsí à kàkó wà mú ɛdzã ró. Òŋu nákó kɔ́ ŋa, tsí à nákó wà gbɛ̃́ ɔ̀nyà ŋa wá fú òŋu.

18Gbòkã́ gé#ɛ́, à kɔ ɔ̀ɖɔ̀ɔ́-ŋa dzɔ̀ɔ́, tsí à tɛ̀ náànyì-Yèésù lɔ. 19Tsí ó lɔ ńwádzú oɖé máa, tsí ó rí ɔma-Sèbèɖé ŋa, tsí à wà ńnɔ́-ɔkɔ̃̀-odzómi-ŋa si, tsí wà tɔ́tse ɔ̀ɖɔ̀ɔ́-ŋa. À náa kpe ɔ̀nyà-kã̀ ní Yàkúbù, tsí ɔmàná‐ɛ̀ dzɛ́ Yòhánà†. 20Tsí gbòkã́ gé#ɛ́, Yèésù kpè ŋá. Tsí àŋa gbo, à kɔ boba-ŋa Sèbèɖé dzɔ̀ɔ́ ńnɔ́-ɔkɔ̃̀-odzómi#ɛ́ òŋu àtsìtsɛ́‐ɛ̀ ŋa, tsí à tɛ̀ náànyì‐ɛ̀ lɔ.

Yèésù lé edzò-kã̀ sɛ̃̀ náànyì-ɔ̀nyà-kã̀

(Lúkà 4:31-37)

21Tsí Yèésù òŋu ɔmatsɛ́‐ɛ̀ ŋa, à ǹɖe nétíɖò#ɛ́ lɔ ńǹlú-kã̀. À náa kpe ìlú#ɛ́ ní Kàfànàwú, tsí ilé-ìkpàɖé-ɔma-Ìyúɖà ŋa†-kã̀ wà bɛ̀. Tsí kíbí ɔdzɔ́-ìmíra† tó#ɛ́, Yèésù lɔ ńlé#ɛ́, tsí káà tsɛ̀kɔ́ fú ɔ̀nyà ŋa. 22Ɛnɛ yèé wà bɛ̀ ŋa, tsí wà rɛ̃tígbè‐ɛ̀#ɛ́, ɛ̀kɔ́‐ɛ̀ mù ŋá. Iŋɛ́ yèé tse#ɛ́, ɛ̀kɔ́‐ɛ̀ ŋa kò dzɔ ti akɔ́nɛ nɛ́kpa-Ɔ̀ɖáyé† ŋa. Ɛ̀kɔ́‐ɛ̀ nɛ́kpá.

23Ńǹwèrè nyɛ̀ŋɛ̀#ɛ́, ɔ̀nyà-kã̀ gbo wà ńnɔlé#ɛ́ bɛ̀, tsí edzò†-kã̀ wà ɖɔ́kpɔ fúu. Ńbɛ̀ɛ́, edzò#ɛ́ bɛ̀ɛ́ ńtsɛ́, tsí ó ɖúgbe kũkũ ní: 24Ètsúwɛ́ɛ́ɛ̀! Yèésù ti Nàsàrɛ́tì, kí ò wà wò fú wa ni? Ò wá, tsí o wáa ra wá ní nɔ̀? Èmi, ǹ mɛ̀ɛ́, ìwɔ ní dzɛ́ ɛnɛ yèé Ɔ̀ɖáyé tsã̀, tsí bɛ̀ ti nɔ́ɔ̀rɔ̃ wá#á.

25Tsí Yèésù kɔ̀ fúu ní: Kóyá! Kó tsikó, tsí kó sɛ̃̀ náànyì-idza#á ńǹsɛ̃̀ɛ̃́!

26Gbòkã́#á, edzò#ɛ́ mú idza#á, tsí mìí kpàkpàkpà, tsí ɖúgbe kũkũ, tsí kɔ̀ɔ́ dzɔ̀ɔ́. 27Tsí ɛnɛ yèé wà bɛ̀ ŋa#á, dzidzi mú ŋa kpó, tsí à wà bere ara-ŋa ní: Kpɔ̀ɔ́! Bɛ́ fáà ńnɛ̀ɛ́! Ɛ̀kɔ́ titɔ̃-kã̀ ní, tsí ikpá wà ńnɛ̀! Ɛnɛ yèé bɛ́ wà kã́rũ-edzò ŋa gìɖì, tsí àŋa gbo, à wà mú éwo dzó fúu.

28Ńbɛ̀ɛ́, títí kó tse oɖé#ɛ́, ɛ́kɔ-Yèésù fì wérí ìlú ŋa kpó nérè-Gàlìlé#ɛ́.

Yèésù bɔ àkɔ̃̀rɔ̃̀ kpíkpɔ̀

(Màtéwò 8:14-15; Lúkà 4:38-41)

29À fùɖá ńlé-ìkpàɖé-ɔma-Ìyúɖà ŋa†, tsí lɔ ńlé-Sìmɔ́nì òŋu Ànɖérè, tsí Yàkúbù òŋu Yòhánà† gbo lɔ bá ŋa. 30Kíbí à káà tó#ɛ́, ìnà-aya-Sìmɔ́nì sũ̀ si, tsí otútù wà kpaá, tsí à wáa wíi fú Yèésù gbòkã́. 31Ńbɛ̀ɛ́, Yèésù wɔ̀ ńǹtá‐ɛ̀, tsí dzi ɔwɔ́‐ɛ̀, tsí kɛ́ɛ ɖóro, tsí otútù#ɛ́ gbã̀ã́, tsí ó ǹɖe, tsí gbà ŋá náàledzò.

32Tsí ó ɖi ńmúmù-odzúùrɔ̃̀, kíbí ɔdzɔ́-ìmíra† tã́#á, tsí ɔ̀nyà ŋa wà kɛ́ àkɔ̃̀rɔ̃̀ ŋa kpó wá fúu, tsí ɛnɛ yèé edzò† ŋa wà ɖɔ́kpɔ fú ŋa#á gbo wà náàŋírĩ-ŋa. 33Ìlú#ɛ́ kpó ní kpérí si náànkpã̀nàkũ̀-ilé#ɛ́. 34Tsí ó ǹɖe, tsí bɔ àkɔ̃̀rɔ̃̀ ŋa ńǹrɔ́ǹrɔ́, tsí edzò yèé ŋa gbo wà ɖɔ́kpɔ fú ɔ̀nyà ŋa#á, ó lé ŋa sɛ̃̀ náànyì-ŋa. Edzò ŋa#á ti ma ɔ̀nyà-ìrɔ́ yèé ó dzɛ́#ɛ́, tsí kà dzɛ́ fú ŋa gìɖì ní ká wíìnyɛ̀.

Yèésù wà dzíkɔ̀ ɖíɖɔ̃̀ nérè-Gàlìlé

(Lúkà 4:42-44)

35Náàkìkɔ-àtsɛ̃̀tsɛ̃̀#ɛ́, Yèésù ǹɖe, tsí fùɖá ńnɔ́-ìlú#ɛ́ lɔ ńǹɖì dzídzɛ̃̀-kã̀ oɖé, ńbí ɔ̀nyà kò wà#á, tsí káà wúùre. 36Ńbɛ̀ɛ́, Sìmɔ́nì òŋu enìkéèdzì‐ɛ̀ ŋa, à wà wòó wérí dzàdzàdzà, títí à káà ríi. 37Kíbí à ríi#ɛ́, à wà wí fúu ní: Ɔ̀nyà ŋa kpó wà wòó.

38Tsí ó wí fú ŋa ní: Àŋa kó lɔ ńbòmírɛ̃̀, ńǹlú-àtíbɔ̀ yèé ŋa wà nérè-bɛ̀#ɛ́. Ó wà ní òŋu kó dzíkɔ̀-Ɔ̀ɖáyé ńbɛ̀ ŋa gbo. Náàtsùgbée bɛ́ɛ̀ ní òŋu wá náyé#ɛ́.

39Tsí à lɔ nérè-Gàlìlé#ɛ́ kpó, tsí ó káà dzíkɔ̀-Ɔ̀ɖáyé ńlé-ìkpàɖé-ɔma-Ìyúɖà ŋa†, tsí ó wà lé edzò† ŋa gbo sɛ̃̀ náànyì-ɔ̀nyà ŋa.

Yèésù bɔ aɖɔ́ɔ̀tɛ̀-kã̀

(Lúkà 5:12-16)

40Ó ɖi nɔ́dzɔ́-kã̀, tsí aɖɔ́ɔ̀tɛ̀†-kã̀ wá ńɖi-Yèésù, tsí wáa kálɛ̀ nábɛ́‐ɛ̀, tsí wà tsìkálɛ̀ fúu ní: Ó dzàre ɖé, kó bɔ òŋu! Ó ɖi, bí ó dzɛ́ nákó nyáa bɔ òŋu, tsí òŋu kó ɖi ɔ̀nyà mímá nódzú-Ɔ̀ɖáyé.

41Ńbɛ̀ɛ́, iŋɛ́‐ɛ̀ tse ànyínɔ́ fú Yèésù, tsí Yèésù na ɔwɔ́, tsí ń kã̀ã́, tsí fɔ̀ fúu ní: Ɛ̃ɛ̃, òŋu dzɛ́! Kó ɖi ɔ̀nyà mímá nódzú-Ɔ̀ɖáyé.

42Tsí ńǹɖì-bɛ̀ gbòkã́#á, ɔ̀tɛ̀#ɛ́ ǹɖe nára‐ɛ̀, tsí ó ɖi abarakpá. 43Ńbɛ̀ɛ́, Yèésù ní kóyá, kó lɔ, tsí ó wà fɔ̀ fúu ní: 44Kó rɛ̃tígbè, tsí kó gbɔ́! Kó máa dzɛ́ fɔ̀ɔ́, tsí ɔ̀nyà-kã̀ kó gbɔ́ oo. Ó ɖi, kó lɔ káà mú ara‐ɛ̀ ŋa atsɛbɔ-Ɔ̀ɖáyé† ní àrɔ̃̀#ɛ́ tã́. Tsí kó fú iŋɛ́ yèé Mɔ̀ɔ́sè† ti fɔ̀ si fú ŋa dzɔ̀ɔ́ dzɔ̀ɔ́#ɛ́, tsí kó ń gba àfárá, àtóoríi ɔ̀nyà kpó kó mà ní àrɔ̃̀#ɛ́ tã́ fúu.

45Ńbɛ̀ɛ́, kíbí ó lɔ#ɛ́, kò rɛ̃̀ si ńǹtá‐ɛ̀ bɛ́ɛ̀. Kà kàa bɛ́ɛ̀, ó wà kpɛ̀rɔ́-afɔ̀#ɛ́ wérí làkóò, títí Yèésù kàkó nyáa wɔ̀ ńǹlú-kã̀ kpókpó nódzú-ɔ̀nyà ŋa ró, iŋɛ́ yèé tse#ɛ́, ɔ̀nyà ŋa wà kpérí bòó gbegbé. Náa káà gbé nóòtèrè fú ìlú ŋa, ńbí ɔ̀nyà kò wà#á. Tsí ɔ̀nyà ŋa náa sì wà ti ńɖi-ɔ̀kã̀lɔ́ɔ̀kã̀ kpó wá ńɖɔ̀‐ɛ̀.

Đang chọn:

Mákò 1: ngl

Tô màu

Sao chép

So sánh

Chia sẻ