Yòhánà 9
9
Yèésù tsí odzú fú afɔ́dzú yèé à bí wá bɛ́ɛ̀#ɛ́
1Náànyì-bɛ́ɛ̀#ɛ́, Yèésù wáa làkóò, tsí ó rí afɔ́dzú-kã̀ nɔ́ɔ̀nà. Afɔ́dzú#ɛ́, bɛ́ɛ̀ ní à bíi wá#á. 2Ńbɛ̀ɛ́, ɔmatsɛ́‐ɛ̀ ŋa wà bèrèé ní: Akɔ́nɛ, nɛ̀ɛ́ dzàbi-Ɔ̀ɖáyé tã́ná à bí afɔ́dzú#ɛ́ wá bɛ́ɛ̀? Afɔ́dzú#ɛ́ òŋu ká‐ɛ̀ nàmí boba‐ɛ̀ ŋa ni?
3Tsí Yèésù wà wí fú ŋa ní: Kò tsi àtsùgbé-àbi tòŋu ká‐ɛ̀ nàmí ti boba‐ɛ̀ ŋa ní tse tsí à bíi wá bɛ́ɛ̀#ɛ́. À bíi náfɔ́dzú, àtsùgbée Ɔ̀ɖáyé kó gbà ńǹtá‐ɛ̀, tsí nya ikpá‐ɛ̀ ɖíre fú ɔ̀nyà ŋa ni. 4Bí ilɛ̀ má#á, ó wà ní àŋa kó tsitsɛ́-Ɔ̀ɖáyé, ɛnɛ yèé bɛ òŋu wá#á. Ó ɖi, òruru bòkó ru ńǹsɛ̃̀ɛ̃́ yèé ɔ̀nyà-kã̀ kpókpó kàkó nyáa tsitsɛ́ ró#ɛ́. 5Tsí títí fú ìwèrè yèé òŋu wà náyé#ɛ́ si#ɛ́, òŋu ní dzɛ́ olí-mímá, tsí òŋu náa wà má fú ɔ̀nyà ŋa kpó#ɛ́.
6Kíbí ó wí bɛ́ɛ̀ tã́#á, ó titɔ́ si ńlɛ̀, tsí ń tse kpɛ̀tɛ̀kpɛ́tɛ́, tsí ń rá odzú fú afɔ́dzú#ɛ́, 7tsí wí fúu ní: Kó lɔ káà wɛ odzú náàɖágúlɛ̀-Sìlòwá. (Òkpì-Sìlòwá ní dzɛ́ à bɛ̀ɛ́ lɔ#ɛ́.)
Ńbɛ̀ɛ́, afɔ́dzú#ɛ́ lɔ káà wɛ odzú‐ɛ̀ náàɖágúlɛ̀#ɛ́. Tsí kíbí ó sɛ̃̀ bɔ̀ wáa làkóò#ɛ́, ó wà rírã.
8Tsí enìkéèdzì‐ɛ̀ ŋa, òŋu ɛnɛ yèé ŋa náa ríi, tsí náa wà bere iŋɛ́#ɛ́, à wà fɔ̀ ní: Kò tsi idza yèé ní náa dzokó si, tsí wà bere ɔ̀nyà ŋa ńŋɛ́#ɛ́ɛ̀?
9Tsí ɔ̀nyà kã̀ŋa ní: Ɛ̃ɛ̃, òŋu ni nɔ̀!
Tsí ɔ̀nyà kã̀ŋa ní: Òò, kò tsi òŋu ni, ɛnɛ nyɛ̀ŋɛ̀ dzɔɔ́ ni.
Tsí òŋu ká‐ɛ̀ ní: Èmi gìɖì gìɖì ńnɛ̀ɛ́.
10Tsí à wà bèrèé ní: Bí ó tse fáà, tsí odzú‐ɛ̀ tsí?
11Tsí ó wà wí fú ŋa ní: Ɛnɛ yèé à náa kpè ní Yèésù#ɛ́, ó titɔ́ si ńlɛ̀, tsí ń tse kpɛ̀tɛ̀kpɛ́tɛ́, tsí ń rá odzú-òŋu, tsí wí fú òŋu ní òŋu kó lɔ káà wɛ odzú ńSìlòwá, tsí òŋu lɔ. Kíbí òŋu wɛ odzú tã́#á, òŋu kpé ìrã rírí.
12Tsí à wà bèrèé ní: Ńbisí ɛnɛ nyɛ̀ŋɛ̀ wà?
Tsí ó ní: Òŋu kò mà.
Ɔma-ɛgbɛ́-Fàrísì ŋa wà wo ká ma bí afɔ́dzú#ɛ́ tse fáà, tsí wà rírã#á
13Ńbɛ̀ɛ́, à gbɛ̃́ afɔ́dzú#ɛ́ lɔ fú ɔma-ɛgbɛ́-Fàrísì† kã̀ŋa. 14Nɔ́dzɔ́-ìmíra† ní Yèésù tse kpɛ̀tɛ̀kpɛ́tɛ́, tsí ń tsí odzú fúu#ɛ́. 15Tsí ɔma-ɛgbɛ́-Fàrísì ŋa#á gbo wà bèrèé ní: Bí ó tse fáà, tsí odzú‐ɛ̀ tsí?
Tsí ó ní: Ó mú kpɛ̀tɛ̀kpɛ́tɛ́ rá odzú fú òŋu, tsí òŋu wɛ odzú gé, tsí òŋu wà rírã.
16Náàŋírĩ-ɔma-ɛgbɛ́-Fàrísì ŋa#á, ɔ̀nyà kã̀ŋa wà fɔ̀ ní: Ɛnɛ yèé tse iŋɛ́ nyɛ̀ŋɛ̀#ɛ́, kò wà nyɛ̀wɔ̀-ɔdzɔ́-ìmíra. Kàkó nyáa ti ńɖi-Ɔ̀ɖáyé.
Tsí ɛnɛ-olòmírɛ̃̀ ŋa gbo wà fɔ̀ ní: Adzàbi-kã̀ kpókpó kàkó nyáa tse iŋɛ́-àwùsì nyɛ̀ŋɛ̀.
Ńbɛ̀ɛ́, arũ-ŋa kò ɖé ró. 17Tsí à tɔ́ sɛ̃̀, tsí wà bere afɔ́dzú#ɛ́ ró ní: Ɛnɛ yèé tsí odzú#ɛ́ fúu#ɛ́ fee, bí òŋu wà rí ti nára-ɛnɛ nyɛ̀ŋɛ̀ fáà?
Tsí ó wà wí fú ŋa ní: Òŋu mà ní agbáfɔ̀-Ɔ̀ɖáyé fɔ̀† ní ó dzɛ́#ɛ́.
18Kíbí ó wí bɛ́ɛ̀ gìɖì#ɛ́, à kò wà wo ká karalé ní ó dzɛ́ afɔ́dzú wáa lɔ, tã́ná kó wà rírã báàyí. Tsí à bɛkɔ̀ lɔ káà kpe boba‐ɛ̀ ŋa wá, tsí ká bèrè ŋá. 19Tsí boba‐ɛ̀ ŋa wáa tó, tsí à wà bèrè ŋá ní: Ɔma-ŋa niì? À bíi wá náfɔ́dzú ìɖéǹɖèè? Bí ó lɔ gbà, tã́ná kó wà rírã báàyí?
20Tsí boba‐ɛ̀ ŋa ní: Àŋa mà ní ɔma-àŋa ní ó dzɛ́#ɛ́. Tsí àŋa bíi wá náfɔ́dzú. 21Ó ɖi, àŋa kò ma bí ó lɔ gbà, tsí ó wà rírã. Àŋa kò ma ɛnɛ yèé tsí odzú#ɛ́ fúu#ɛ́. Ká bere òŋu ká‐ɛ̀. Ó ɖonùgbó, tsí kó nyáa wíìnyɛ̀-ara‐ɛ̀.
22À wà sá fú onùgbó-ɔma-Ìyúɖà† ŋa#á ni. Ńnɛ̀ ní à wà wí bɛ́ɛ̀#ɛ́. Ìɖéǹɖè#ɛ́, onùgbó-ɔma-Ìyúɖà ŋa#á ti mú arũ ɖé ní, bí ɔ̀nyà-kã̀ dzɛ́ ní Yèésù ni Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á, à nákó lé ɛnɛ nyɛ̀ŋɛ̀ ńlé-ìkpàɖé-ɔma-Ìyúɖà ŋa†. 23Ńnɛ̀ ní boba‐ɛ̀ ŋa wà fɔ̀ ní: Kò dzɛ́ maɖé ró, ká bere òŋu ká‐ɛ̀#ɛ́.
24Ńbɛ̀ɛ́, ɔma-ɛgbɛ́-Fàrísì ŋa#á sɛ̃̀, tsí kpe afɔ́dzú#ɛ́ nóláànkéèdzì ró, tsí wà wí fúu ní: Kó wí òtítɔ́ nódzú-Ɔ̀ɖáyé. Ó ɖi àŋa òŋu, àŋa mà ní ɛnɛ yèé bɔɔ́#ɛ́ ni, adzàbi ni.
25Tsí ó wà wí fú ŋa ní: Òŋu kò mà, bí ó tsi adzàbi nàmí kò tsi adzàbi ni. Iŋɛ́ ɔ̀kã̀ntso gé ní òŋu mà#á. Òŋu mà ní òŋu dzɛ́ afɔ́dzú dzɔ̀ɔ́, tsí báàyí#ɛ́, òŋu wà rírã.
26Tsí à wà bèrèé ní: Kí ɛnɛ nyɛ̀ŋɛ̀ tse fúu? Bí ó tse fáà títí odzú#ɛ́ tsí?
27Tsí ó wà wí fú ŋa ní: Òŋu ti wíi fú ŋa ná nɔ̀, tsí à kɔ̀, tsí à kò rɛ̃tígbè-òŋu nɔ̀! Kí tse tsí à wà wò ní òŋu kó sɛ̃̀ fɔ̀ɔ́ fú ŋa ró? Àŋa gbo, à wà wo ká tɛ̀ náànyì‐ɛ̀ɛ̀?
28Kíbí ó fɔ̀ bɛ́ɛ̀#ɛ́, à kpée búbú. Tsí à ní: Òŋu ní wà tɛ̀ náànyì-ɛnɛ nyɛ̀ŋɛ̀#ɛ́. Àŋa òŋu, àŋa wà tɛ̀ náànyì-Mɔ̀ɔ́sè† ni. 29Àŋa mà ní Ɔ̀ɖáyé wíìnyɛ̀ fú Mɔ̀ɔ́sè. Ó ɖi, ɛnɛ yèé òŋu, àŋa kò ma ńbí ó ti#ɛ́.
30Tsí afɔ́dzú#ɛ́ wà fɔ̀ fú ŋa ní: Ńbí afɔ̀#ɛ́ munɛ#ɛ́ ńnɛ̀ɛ́ nɔ̀! À kò ma ńbí ó ti#ɛ́, tsí ó sì tsí odzú fú òŋu. 31Àŋa mà ní Ɔ̀ɖáyé kà rɛ̃tígbè-adzàbi ŋa. Ó ɖi, bí ɔ̀nyà-kã̀ wà, tsí wà nɛ́ àrísá fú Ɔ̀ɖáyé, tsí wà tse awù‐ɛ̀#ɛ́, Ɔ̀ɖáyé náa rɛ̃tígbè‐ɛ̀. 32Títí kíbí à ɖá ayé#ɛ́, à kò gbɔ́ ní ɔ̀nyà-kã̀ tsí odzú fú afɔ́dzú yèé à bí wá bɛ́ɛ̀#ɛ́ wòrí. 33Ó ɖi, ɛnɛ#ɛ́ kàá ti ńɖi-Ɔ̀ɖáyé, kàá nyáa tse iŋɛ́-kã̀ kpókpó.
34Tsí à wí fúu ní: Títí kíbí à bíi#ɛ́, adzàbi gé ní ó dzɛ́ si#ɛ́, tsí ó ní òŋu bòkó kɔ́ àŋaà?
Tsí à lée fùɖá.
35Ńbɛ̀ɛ́, Yèésù gbɔ́ ní à lée. Tsí ó wà wòó títí ó káà múu kpàɖé. Tsí ó wà bèrèé ní: Ó gba òŋu, Ɛnɛ yèé ɔ̀nyà bí#ɛ́† gbɔ́ɔ̀?
36Tsí afɔ́dzú#ɛ́ ní: Ɔ̀gá, nɛ̀ɛ́ dzɛ́ Ɛnɛ yèé ɔ̀nyà bí#ɛ́ ná? Kó ɖíreé fú òŋu, tsí òŋu kó gbàá gbɔ́.
37Tsí Yèésù wà wí fúu ní: Ó ti ríi. Òŋu ní wà wíìnyɛ̀ fúu báàyí gìɖì#ɛ́.
38Tsí afɔ́dzú#ɛ́ ní: Ɔlá-mi, ǹ gbàɛ́ gbɔ́.
Tsí ó lɔ, tsí káà mú erí kãlɛ̀ fúu.
39Tsí Yèésù ní: Òŋu wá ńǹtalɛ̀ bí, tsí òŋu kó wáa tse tsí obí kó ya náàŋírĩ-ɔ̀nyà ŋa ni. Òŋu wá, tsí afɔ́dzú ŋa kó rírã, tsí ɛnɛ yèé wà rírã ŋa#á, ká ɖi afɔ́dzú. Ɛdzɔ́ yèé òŋu kɛ́ wá#á ńnɛ̀ɛ́.
40Ɔma-ɛgbɛ́-Fàrísì kã̀ŋa gbo wà sɔ́má-ŋa, tsí à gbɔ́ afɔ̀ yèé Yèésù fɔ̀ nyɛ̀ŋɛ̀#ɛ́, tsí à wà bèrèé ní: Ó wà fɔ̀ ní àŋa gbo, àŋa dzɛ́ afɔ́dzú niì?
41Tsí Yèésù wà wí fú ŋa ní: Ó má tsi à dzɛ́ afɔ́dzú, àbi kàá wà nára-ŋa. Ó ɖi, kíbí à ní àŋa wà rírã#á, àbi-ŋa nákó kí nára-ŋa si gé ni.
Đang chọn:
Yòhánà 9: ngl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Wycliffe Bible Translators, Inc. All rights reserved.
