Nongezi 30
30
Ulonzi wa nzewele wa Aguli
1Mbuli za Aguli mwanage Yake, mbuli ziyawalongele Itieli na Ukali.
2Niye na mbozi ng'hani, wala sili munhu,
nabule nzewele za kiunhu.
3Siifunzile kuwa na ubala,
vivija simtanga Imulungu yong'ala.
4Nani yakwelile kuulanga na kahulumuka hasi?
Nani yagogile beho mumkono?
Nani yafungile mazi mkitambala?
Nani yekile mbaka zose mwiisi?
Twaga jake nani?
Twaga da mwanage nani?
Nilongele kamba koditanga.
5Mbuli zose za Imulungu za kutamanilwa,
heyo ayo ngao ya wose omkimbilila.
6Sikuwengeze mbuli mzimbuli zake,
sambi yakukomhokele na gweye kokoneka kwa mvizi.
7Mbuli zino mbili nokupula go Imulungu,
sambi unilemele ning'hali sinadanganika.
8Unisegesele uvizi na bunyiko,
sikuunigwelele ukiwa hebu ugoli,
ungwelele ndiya ya kila siku,
9kwavija nahapata vinhu vingi nokulema na nolonga,
“Mndewa Imulungu ayo nani?”
Hebu sikuniwe mkiwa na kuwa mbavi,
na kudigela kinyala twaga da Imulungu wangu.
10Sikuumulongeleze mtumwa kwa mkulu wake,
buleavo kokuduwila na kokoneka kuna kitala.
11Hana wanhu owaduwila tata zao,
na hawawatambikila mama zao.
12Hana wanhu oyona wana haki,
kumbe wang'hali hawana sunhigwa gehile gao.
13Hana wanhu meso gao kamema kibuli,
obezeli kila kinhu chookona.
14Hana wanhu meno gao kamba panga,
na magego gao kamba mwele,
waitanda kuwadafuna wakiwa weli mwiisi,
na welibule vinhu weli hagati ya wanhu.
15Luba kana wandele wabili olonga, “Ngwaa, ngwaa!”
Hana vinhu vidatu havitosheka, ona vinhu vine havilonga, “Yotosha!”
16Kuzimu,
munda wa mtwanzi mgumba,
ulongo uleka kutosheka mazi,
na moto uleka kulonga, “Yotosha!”
17Kamba munhu yahambezeli tatake,
na kumzalau mamake,
bondwa wa kudibonde ogadonyola meso gake,
na makinda ga mhungu ogaja.
18Hana mbuli ndatu za unzonza kumwangu,
ona, mbuli nne sizitanga goya.
19Nzila ya mhungu kuulanga,
nzila ya mgendela hasi mdibwe,
nzila ya meli mbahali,
na kimkwega mbigalo kwa mtwanzi.
20Nzila ya mtwanzi mgoni ya vino,
heyo kosang'hana ugoni na kokoga,
na kolonga, “Sibanange kinhu chochose!”
21Hana mbuli ndatu ziitigisa isi,
ona, mbuli nne haidaha kuzigoga.
22Mtumwa yokuwa mndewa,
munhu hakona kinyala kutenda gehile yokwiguta ndiya,
23mtwanzi yokwihiligwa kosoligwa,
na mtumwa wa kitwanzi yosola hanhu ha mama wa ing'anda.
24Hana viumbe vine vidodo ng'hani mwiisi,
lakini vina nzewele ng'hani.
25Nyenyele wang'onyo welibule nguvu,
lakini oikila ndiya kipindi cha zuwa kali.
26Ndezi wanyama wadodo welibule nguvu,
lakini oitendela ng'anda mna gamabwe.
27Nzige wabule mndewa,
lakini wose ochola hamoja kwa madali.
28Guluguja kodaha kumgoga mmakono,
lakini kokwingila mng'anda ya mndewa.
29Hana viumbe vidatu vili na ugenzi wa magoda,
ona, hana viumbe vine vili na ugenzi wa magoda,
30simba mnyama yeli na nguvu kubanza wose,
heyo hamdumba mnyama yoyose iyagwe,
31nzogolo yotembela kwa magoda na mbuzi mbigalo,
na mndewa hamoja na wakalizi wake wamzunguluke.
32Kamba kukala mbozi abaho koitapa,
hebu kukala ugesa gehile, leka na ugelegeze.
33Kwavija wahakologa maziwa kopata siagi,
wahamtowa munhu mmhula kolawa mfung'hunyula,
vivija wahawasindilila wanhu olawilila ugomvi.
Đang chọn:
Nongezi 30: King'hutu
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
NT: © 2014 Pioneer Bible Translators and The Word for the World
OT: © 2019 Pioneer Bible Translators