Những câu Kinh Thánh phổ biến từ มท 24

Chia sẻ

เฆ ดูอี ฮาย เฆ แว กืน หลึอม คา อาต. โคว, เฆ ดูอี อาว ฮู นับ ดี ลาย ร็อก ปี คา อาต. อาเซ ยี มึห น็อห มัน บอ คัม โตต ดอน โมยว, แตห ฌาด ตี กอ โตต, เฌาพรา ดี คยอด อาซาก อัน.

เฆ ดูอี ตี ดี กาลาง ลอง เฌาพรา ดี อึบ กาดาย, แตห ดูอี แบน น็อห ดาคึย, แตห ดอน อี แดง กาดาย ปึอน ดี โทม. เซ ดูอี ดอน โมยว ฮี นับ ลอง อัน ตี, ฌาด นี ดี โตต.

เบ ดี บอ ยึร ซาดาง แบน โมยว แบน โมยว ลอง เฆ ดูอี ลาย กาโฆห, บอ ลอง เฆ ดูอี อี ต็อห ดี กาโฆห ดี อี เฮา. ดอ อัน ตี เบ ยี โลว ซาดีก, แกวะ แตห เบ โยว. อึณ ดี บอ แบน ฌึร ตี ดอน โมยว, ยี หณัม ฌัม อาคราว ดี โตต ฌาด นี.

อึณ ดี มึห อาโมยว ดูอี อู โมยว, ดี วี แบน รันซู เฆ ดูอี ปอ อู โมยว. บอ คูนดีคัม อู กาดัง ดี วี กาโฆห ดี คูนดีคัม ปอ อู กาดัง. ดอ อัน ตี อึณ ดี บอ มึห ดูอี แบน โปละ แบน โปละ, เฆ ดี เอต ปี ดี โฮม. บอ มาอีม ดีเยณ แบน โปละ แบน โปละ. เซ ดูอี กาดูห ดูก ฌึร ตี ดอน โมยว, อึณ บอ ปี อีบึณ อี มึห เซา ดี ฆึอด ฆอน.

บอ เบลณ บอ กาดาย ดี หราย โตต. โฆรห ปี กาลาง โอว ยี ตู หราย ดอ เหมา. อึณ ดี กอย เซเซ.

อึณ ดี มึห แบน วี แบน วี, เฆ ดี ตัห ฆาว ปวน โอว. เฆ ดี บอ ต็อห, ‘โอว แฮะ มูห อัน เฌา ปี ร็อห ปี ตึย เฌาพรา แตห อัน คยอด ดูอี.’ ปาย ตี เฆ ดูอี กืน ดี กาลึบ ดี หณึม โฆรห ปี กาโลว เฆ.

อาคราว ดอ อัน ตี เฆ ดี บอ เหมต เบ, อาบ เบ ดี ดา ตาง, แตห บอ เบ คัม ดูก แบน โมยว แบน โมยว, แตห เฆ ง็อห ยัม บอ เบ. โกบ หณึม เบ ดี โอว, เฆ ดูอี ดอน โมยว ดี บอ ฌ็อง เบ. ปัน ดี ฌัม อาคราว อัน ตี, อึณ ดี มึห ดูอี อี หณึม โอว, เฆ กืน ดี บอ แวน โอว, ตู คัม ดูก ฌึร ตี. เฆ ดูอี ตี, เฆ ดี ลาย รู, ดี ลาย พยาก ดี อาต ดา ตาง. อึณ ดี บอ มึห ดูอี กืน, เฆ ดี กาโลว ดี ต็อห, เฆ มูห ดูอี อี บยาน โฆรห เฌาพรา. บอ ดูอี กืน กาลึบ ดี หณึม เฆ.

เฌา เยซู วี ต็อห, “เบ โลว ซาดีก, แกวะ แตห อี ปึอน ดี กาโลว เบ.

ปาย ตี, บอ เบ โลว บัร เซเซ. โคว, บอ โอว อี แฮะ แบน ฆอน ดูอี, โอว ดี วี ตัห อาคราว ปี ตู ทาง เบ.

โคว อัน ตี เบ โลว บัร ซาดีก เซเซ, โกบ ตู นับ เบ ดอ เหมา อัน เฌา ดี ตัห.

ปัน ดี วี ตัห โอว, อาว มึห ดูอี อี นับ ซีคยา ลอง ซีแง อัน, นารี อัน. บอ เฆ อามู อามาด เฌาพรา อี กอย ฆางหราว, บอ ฆอน เฌาพรา มืร ตู นับ. มี เฌาพรา อี นับ ดอ เหมา อึณ ดี แบน ปี ต็อห โอว.

อึณ ดี มึห ดูอี, เฆ กาโลว ดี ต็อห, เฆ มูห ดูอี ดี คยอด อาซาก อี. เฆ ดี บอ กาโลว ดี ต็อห, เฆ มูห ดูอี อี บยาน โฆรห เฌาพรา. เฆ ดี บอ โบง นา หมึอม อาม กาเซา แบน โมยว แบน โมยว. เฆ บอ เทว ดี กาโลว ดี เฆ ดูอี ปี ร็อห เฌาพรา. เฆ ยี ตู แป ดี โบง แตห เฆ หณึม โฆรห ปี กาโลว เฆ ตี.

เซ โอว อี แฮะ แบน ฆอน ดูอี ดี วี ตัห โลง แดง กาดาย, อึณ ปี ดอ มูห ฌาด ดา อาโนว ดอ มึอน ตึอน. โคว, ดอ มูห ฌาด อาโนว ตึอน, อาต มึห อึม ตาง อี อึณปูน กาดาย, เฆ ดูอี โฮม ดาคึย. เฆ บอ ลาย ลาย, ลาย คัด, แตห อึณ กอ ฌัม ซีแง ดอ ลึบ อาโนว แคง รึร ซังโพว ตาง ตึอน. เฆ มืร ตู นับ, อึณ ดี ปาย เหมา. ดอ ตัห อึม, อึณปูน กาดาย, เฆ บอ ยัม อู เฌณ. ปัน ดี วี ตัห โลง โอว, อี แฮะ แบน ฆอน ดูอี แดง กาดาย นี, อึณ ดี บอ ปาย ตี. เฆ ดูอี มืร ดี ฌัม ดูก อู เฌณ.