Những câu Kinh Thánh phổ biến từ 2 คร 5

Chia sẻ

โคว, เซ ดูอี อู วี แฮะ หณึม เฌา เยซู, เฌาพรา แฮะ แตห ดูอี ตี แบน ดูอี กามาย. อี บรีม แฮะ ฮอต หราย, แฮะ แบน โตต อี กามาย ดอน โมยว.

เฌา เยซู ตู ดึอม โบง หมาบ. มาแล, เฌาพรา แฮะ แตห อัน วี แบน อี ดึห หมาบ เอ, แตห อัน คัม หมาบ กาดาง เอ. เซ เอ หณึม เฌา เยซู ตี, อึณ แตห เอ วี แบน ดูอี น็อห ซืร น็อห หมาน โดบ ปี อึง เฌาพรา.

เอ ตู โบง โดบ ปี ยึร ดี งาย. เอ โบง โดบ ปี หณึม เอ.

ฌึร ตี ดอน โมยว เฌาพรา อี โบง. อัน แตห เอ วี ดาคึย ดี เฌาพรา โกบ หณึม เอ เฌา เยซู. แดง ตี, อัน วี แตห เย โบง บอ ฆาน อัน, แตห เย จอย บอ อี เฮา แตห บอ เฆ วี ลาย กาล็อะ ดี เฌาพรา. เฌาพรา แฮะ โบง แตห ดูอี แดง กาดาย บอกาเฆลียด วี ลาย กาล็อะ ดี อัน โกบ หณึม เฆ เฌา เยซู. เฌาพรา มืร ตู โนว หมาบ แปะ แฮะ โบง เฆ. อัน แฮะ หณึม น็อห เย, แตห เย วี กาลาง ดี อี เฮา ลอง เฌาพรา ฆาย ดูอี แฮะ วี ลาย ดาคึย.

ปาย ตี, เฌา เยซู แฮะ แตห เย แบน อามาด อัน. เฌาพรา มืร แฮะ จัร เย กาลาง โฆรห อัน ดี ดูอี. โคว, เย กาซูห เบ แตห อึณ ปี เฌา เยซู กาซูห เบ ต็อห, แตห เบ วี ดาคึย ดี เฌาพรา, แกวะ ฮู แตห เบ กาบัห ดี อัน, แบน รันซู อัน.

อัน เฌา แฮะ คัม ดี ยัม กาดาง ดูอี บอกาเฆลียด, แตห เฆ อี ปึอน อาซาก กามาย อาว ฮู โบง โดบ ปี อึง เฆ, แตห เฆ วี โบง โดบ ปี อึง อัน เฌา อี แฮะ ยัม กาดาง เฆ. แฮะ ฮอต, อัน วี ยีต วี อีม. โคว, ปูง อาตึร นี ฮาว, บอ มูห อาเซ อาว ต็อห, เย ฮู มาด อาเซ ปี ดูอี อี กอย แดง กาดาย นี ลาย มาด. ดอ มึอน เย ปี บอ แฮะ มาด, เฌา เยซู มูห ดูอี อี กอย แดง กาดาย นี มืร, นา อาต นี ฮาว, เย อาว ฮู มาด ปาย ตี.

เฌา เยซู แฮะ ร็อก กาเว เย. โคว, เย วี กาลาง ดี อี เฮา. เย แฮะ นับ, เฌา เยซู อู วี แฮะ ยัม กาดาง ดูอี บอกาเฆลียด. โกบ อึณ ปาย ตี, อึณ ปี ดูอี บอกาเฆลียด แฮะ ฮอต ยัม.