If you would like a copy of this version please contact info@davaraudiobibles.org

Dogri Bible, CC-BY-SA-4.0, Beyond Translation. (Text)
Dogri Audio Bible, CC-BY-SA-4.0, Davar Partners International, Beyond Translation, 2026. (Audio)

Dogri Bible

This work is licensed under Creative Commons Attribution-ShareAlike 4.0 License.

जेसलै ओ यरूशलेम दे कोल पूजे ते जैतून पाड़ उपर बैतफगे दे कोल आए, तां यीशु ने दाऊँ चेलें गी ए आखीयै पेजया, “अपने सामनें दे घरां च जाओ। उत्थें पुज्जदेगै गै एक गदही बन्नी दी, ते ओदे कन्ने एक बच्चा तुसेंगी मिलग। उनेंगी खोलियै मेरे कोल लेई आओ। अगर तुसेंगी कोई केश आखे, तां बोलयो के प्रभु गी इंदी दौनी दी जरुरत ऐ, ओस बेलै ओ फोरन उनेंगी पेजी देग।” ए एसकरी ओया के जेड़ा वचन पविखवक्ता थमां बोलया गीया हा, ओ पूरा उवै,
“सिय्योन दी कुड़ी गी आखो, देख, तेरा राजा तेरे कोल आवा करदा ऐ; ओ दीन ऐ, ते गदहे उपर बैठे दा ऐ; बरना लादू दे बच्चे उपर।”
चेलें जाईयै, जियां यीशु ने उंदे कन्ने गला दा हा, उय्यां गै कित्ता। ते गदही ते ओदे बच्चे गी आनीयै, उंदे उपर अपने कपड़े सुट्टे, ते ओ उंदे उपर बैठी गीया। ते ओस बेलै मते सारें लोकें अपने कपड़े रस्ते च बछाए, ते बाकी लोकें बूट्टें दियें डालियें गी बडीयै रस्ते च बछाइयां। ते जेड़ी पीड अगें-अगें जा करदी ही ते पिछें-पिछें आवा करदी ही, जोरें-जोरें बोलियै आखदी ही, “दाऊद दी औलाद दी होशाना, तन्न ऐ ओ जेड़ा प्रभु दे नां कन्ने ओंदा ए, अम्बर च होशाना।” जेसलै यीशु यरूशलेम च दाखल ओया, तां सारे शैर च अलचल मची गेई, ते लोग आखना लगे, “ए कुन्न ऐं?” लोकें आखया, “ए गलील जिले दे नासरत दा पविखवक्ता यीशु ऐ।”

यीशु ने परमेसर दे मंदर च जाईयै उनै सबनी गी, जेड़े मंदर च लैंन-देंन करा करदे हे, उनेंगी कड्डी दित्ता, ते शाऊकारें दे मेज ते कबूतर बेचने आलें दियां चोकियाँ परती दितीयां; ते उनेंगी आखया, “लिखे दा ऐ, मेरा कर प्रार्थना दा कर आखया जाग; लेकन तोस उसी डाकुओं दी खोह बनांदे ओ।”
ओस बेलै अन्नें ते लंगड़े, मंदर च ओदे कोल आए, ते ओसने उनेंगी चंगा कित्ता। लेकन जेसलै प्रधान याजकें ते शास्त्रियें इनें अद्भोद कम्में गी, जेड़े ओसने कित्ते, ते जागतें गी मंदर च दाऊद दी औलाद दी होशाना बोलदे ओई दिखया, तां ओ गुस्सै ओई गै, ते उसी आखन लगे, “के तुं सुनना ऐ के ए लोग के आखदे न?” यीशु ने उंदे कन्ने आखया, “हां; के तुसैं ऐ कदें नी पढ़या; जागतां थमां ते दुध पींदे बच्चें दे मुंहाँ चा तो स्तुति सेध कराई?” ओस बेलै ओ उनेंगी शुड़ीयै शैर दे बार बैतनिय्याह गी गीया ते उत्थें रात बताई।

पयागै जेसलै ओ शैर गी बापस आवा करदा हा तां उसी पोख लगी। ते सेड़क दे कंड्डे अंजीर दा बूट्टा दिखियै ओ ओदे कोल गीया, ते पत्रें गी शुड़ीयै ओस बेच ओर केश नेई लबदे ओई ओसगी आख्या, “ऊन थमां लेईयै तेरे बेच पी कदें फल नेई लगग।” ते अंजीर दा बूट्टा फोरन सुकी गीया। ए बारदात दिखियै चेलें रांनगी कित्ती ते आखया, “ए अंजीर दा बूट्टा फोरन कियां सुकी गीया?” यीशु ने उनेंगी जबाब दित्ता, “आऊँ थुआड़े कन्ने सच आखना ऐं, जेकर तोस बश्वास रखो ते शक नेई करो, तां नां सेर्फ इयै करगे जेड़ा एस अंजीर दे बूट्टे कन्ने कित्ता गीया ऐ, लेकन जे एस पाड़ गी बी आखगे, पटोई जा, ते समुंदर बेच जाई पो, तां ए ओई जाग। ते जे केश तोस प्रार्थना च बश्वास कन्ने मंगगे ओ सब केश तुसेंगी मिलग।”

ओ मंदर च जाईयै शिखया देया करा दा हा, के प्रधान याजकें ते लोकें दे प्राचीनें ओदे कोल आईयै पूछ्या, “तू ऐ कम किस दे अख्त्यार कन्ने करना ऐं? ते तुगी ए अख्त्यार कोस ने दिते दा ऐ?” यीशु ने उनेंगी जबाब दित्ता, “आऊँ बी थुआड़े कोलां एक गल्ल पूछनां ऐं; जेकर ओ गल्ल मिकी सनागे, तां आऊँ बी तुसेंगी सनागा के ए कम किस दे अख्त्यार कन्ने करना ऐं। यूहन्ना दा पवित्रशनांन कुत्थुआं दा हा? सोर्ग थमां या मनुक्खें हां?” ओस बेलै ओ आपस च बोलन लग्गे, “जेकर अस आखचै, सोर्ग त्र्फुं हा, तां ओ असेंगी पूछग के, पी तुसें ओसदे उपर बश्वास कि नेई कित्ता?” ते जेकर आखचै के, “मनुक्खें त्र्फुं हा तां असेंगी पीड दा डर ऐ, किके ओ सारे यूहन्ना गी पविखवक्ता मनदे न।” खीरी च उनै यीशु गी जबाब दित्ता, “अस नेई जांनदे।” ओसने बी उंदे कन्ने आखया, “तां आऊँ बी तुसेंगी नेई दसदा के ए कम केस दे अख्त्यार कन्ने करना ऐं।”

तोस एस मसाल दे बारै च के सोचदे ओ? कुसे मनुक्ख दे दाऊँ पुत्तर हे; ओसने पैले दे कोल जाईयै आखया, हे पुत्तर, अज्ज दाख दे बाग च कम कर। ओसने जबाब दित्ता, मैं नेई जाना लेकन बाद बेच पछाताइयै कम करने आसतै गीया। पी ओसने दुए दे कोल जाईयै इयां गै आखया, ओसने जबाब दित्ता, जी हां जन्नां, लेकन नेई गीया। इंदे दौनीं बिचा कोस ने पिता दी मरजी पूरी कित्ती? “उनै गलाया पैले ने।” यीशु ने उंदे कन्ने आखया, “आऊँ थुआड़े कन्ने सच आखना ऐं के चुन्गी लेने आलें ते दहे वपार करने आले थुआड़े थमां पैलैं परमेसर दे राज च दाखल ओगन। किके यूहन्ना तर्म दा रस्ता दसदे ओई थुआड़े कोल आया, ते तुसैं ओसदा बश्वास नेई कित्ता; लेकन चुंगी लेने आलें ते दहे वपार करने आलें ओसदा बश्वास कित्ता; ते तोस ए दिखियै बाद बेच बी नेई पछताए के ओस उपर बश्वास करी लैंदे।”

एक ओर कानी सुनो; एक करै दा मालक हा, जेस ने अंगुर दा बाग लाया, ओदे चौनी बक्खी बाड़ा बन्या, ते उसै च गै अंगुरें दे रस दा कुंड कढया ते गोम्मट बनाया, ते क्रसानें गी ओदा ठेका देईयै परदेसे गी चली गीया। जेसलै फल दा समां कोल आया, तां ओसने अपने नौकरें गी ओसदा फल लेने आसतै क्रसानें कोल पेजया। पर क्रसानें ओदे नौकरें गी पकड़ीयै, कुसे गी मार चाढ़ी, ते कुसे गी मारी दित्ता, ते कुसे उपर पत्थर मारे। पी उसने पैलैं थमां मते नौकरें गी पेजया, ते उनै उंदे कन्ने बी उवै कित्ता। खीरी च ओसने अपने पुत्तर गी उंदे कोल ए सोचीयै पेजया के ए मेरे पुत्तर दा आदर करघंन। लेकन क्रसानें ओदे पुत्तर गी दिखियै अप्पुं पिछें ए गलाया, ए तां वारस ऐ; आओ, अस इसी मारी ओड़चै ते एस दी वरासत लेई लेचै। ते एस आसतै उनै उसी पकड़या ते अंगुरें दा बाग बिचा बार कढीयै मारी दित्ता। एसकरी जेसलै अंगुरें दे बाग दा स्वामी औग, तां पी ओ उनै क्रसानें कन्ने के करग? उनै ओस कन्ने आखया, “ओ उनै बुरे लोकें गी बुरी रीति कन्ने नाश करग; ते अंगुरें दे बाग दा ठेका दुए क्रसानें गी देग, जेड़े बेलै-बेलै उपर उसी ओदा फल दिंदे रोघंन।”
यीशु ने उन्दे कन्ने आखया, “के तुसैं कदें पवित्र शास्त्र बेच ए नेई पढ़या; जेस पत्थर गी राजमिस्त्रियें नक्म्मां आखया हा, उवै कोने दे सिरे दा पत्थर ओई गीया? ए प्रभु थमां ओया, ते साड़े दिखने च रांनगी ऐ। एसकरी आऊँ थुआड़े कन्ने आखना ऐं के परमेसर दा राज थुआड़े थमां लेई लीता जाग ते ऐसी जाती जेड़ी ओसदा फल देग उसी, देई दित्ता जाग। जेड़ा एस बट्टे उपर किरग, ओ चकना चूर ओई जाग; ते जिस उपर ओ किरग, ओसगी पीह् देग।” प्रधान याजकें ते फरीसियें ओदीयें मसालें गी सुनीयै समझीयै के ओ उंदे बारै च आखा करदा ऐ। ते ओ उसी पकड़ना चांदे हे, लेकन लोकें थमां डरी गै किके ओ उसी पविखवक्ता मनदे हे।

Nghe मत्ती 21