Arabic, North Levantine Spoken: العامية اللبنانية بالقافية (Portions)

العامية اللبنانية بالقافية

كانت الحيّة من أدهى الحيوانات البريّة يلّي خلقها الله سبحانُه، وبيوم من الأيّام وَسوَس الشيطان لزوجة آدَم من خلال الحيّة وقالِتلا: "هلّأ الله منعكُن تاكلوا من كلّ شجر الجنّة مَهيك؟" ردّت عليها الإمرأة وقالت: "لأ، نحنا منقدر ناكُل من كلّ الشجر بالجّنة، بس إيه أمرنا إنّه ما ناكُل من الشجرة يلّي بالنص وقَلّنا: "إيّاكُن تاكلوا منها، حتى ولا تلمسوها، إذا بتعملوا هالشي رح تموتوا. وما رح تخلّدوا عالأرض". فقالت الحيّة: "لأ مش رح يصيرلكُن شي! بس الله بيعرف إنكُن لمّا تاكلوا من هالشجرة رح تنفتح بصيرتكُن وتصيروا بتعرفوا الخير من الشرّ متلُه". وصدّقت الإمرأة كلام الحيّة، وبس اتطلّعت عالشجرة وشافت أدّيش منظرا بشهّي! فكّرت إنّا رح تِحْصَل على الحكمة لمّا تاكُل منها، فَقامِت قطفت ثمرة وأكلِتها وخلِّت جوزا ياكُل منها كمان. وبس أكلوا دغري انفَتَحِت بصيرتُن وعرفوا إنّهن عريانين قاموا استحوا وغطّوا حالُن بورق التين. وهبّت عاصفة قويّة وسمعوا صدى صوت الله بالجنّة قاموا دغري هربوا وتخبّوا بين الشجر. فنادى العليم القدير لآدم (عليه السلام) وقلُّه: "يا آدم ليش عم تتخبّى منّي؟" جاوبُه آدم: "أنا يا ربّ، سمعت صوتَك فخِفِت واستحيت منّك لأنّي عريان واتخبّيت." فقلُّه العليم البصير: "مش رح تخبّرني كيف عرفت إنّك عريان؟ شو أكلت من الشجرة يلّي منعتَك عنها؟" ردّ آدم وقال: "لأ بس المرأة يلّي اعطيتني ياها طعمِتْني من الشجرة قِمْت أَكَلِت." وسأل سبحانُه زوجة آدم وقلّا: "إنتِ شو عملتي؟" ردّت وقالت: "هيدي الحيّة! أنا ما خَصّني هِيّ خدعِتْني وخلّتني آكُل من الشجرة! قام سبحانُه قلّا للحيّة: "بسبب الّي عْمِلّتيه، رح تكوني مَلعونة من بين كلّ الكائنات، ورح تصيري تِزحفي عبطنِك، ومستواكِ بينزَل للتراب، ورح أعمُل عداوة بينِك وبين هالمرأة وبين ذرّيتِك وذرّيتا، هو رح يِمعَس راسِك وإنتِ رح تِإذيه من كَعِب إجرُه". وبعدين قلّا للمرأة: "ولأنّك ردّيتي عالحيّة وسمعتي كلمِتا، وما طِعْتي كلامي، رح يصير حَمْلِك يعملِّك قَلَق وخوف ويْوَجّعِك ورح تولّدي بمجهود، وبتضلّي تعيديها لأنّه بصير عندِك رغبة تضلّي مع جوزِك، وهوّ متلِك، وكمان رح يتحكّم فيكِ" والتفت عآدم وقلُّه: "أمّا إنتَ يا آدم ما كان لازم أبداً تعصى وصيتي إلَك، بس إنتَ لحِقِت زوجتَك وسمعِتْ كلاما وأكلت من الشجرة يلّي منعتَك عنّا! بسبَبَك رح إسحَب البركة والحماية عن الأرض، ورح تصير تاكُل منها كلّ عمرَك بجهدٍ جهيد، رح تصير الأرض تْنَبِتْلَك مع ثمارها شوك وعشب برّي كمان. وبتضلَّك تاكُل من تعبَك وعرق جبينَك لحدّ ما تِخْلَص حياتَك وتندَفَن بالأرض لأنّك خْلقِت من التراب ورح تِرجع عالتراب." وسمّى آدم زوجتّه حوّا لأنها رح تكون إمّ كلّ حيّ من البشر. وستَر ربّ العالمين آدم وحوّا بتوبين من الجلد. ولأنّه الله على علِم إنُّه آدَم صار يعرف الخير والشرّ، فقال: "يا ويلُه إذا بقرّب من شجرة الخلود هلّأ، هيدي إذا أكل منها رح يصير خالِد ويعيش للأبد." كرمال هيك طَرَدُن من الجنّة الخصبة، وبعت آدم (عليه السلام) عالأرض يلّي خِلِق منها تَيِزْرَعها. وبعد ما طَرَدُن من الجنّة، حطّ سبحانُه ملايكة تَيِحِرسوا الطريق يلّي بتودّي عشجرة الخلود وحطّ سيف من نار بيِنْتِقِل من جهة لجهة عشان يِحرُس الطريق كلُّه.

Nghe قصص من كتاب التكوين 3