မးသဲ 23
23
ယ့ၣ်ရှူးအံာ်သဓံပၠၤအကဟဲကိအသၱာ် ယူဒၤအတဲၤသိာ်တဲၤသီတစီာ်ကၱာ်ဖၤရံၤရှဲတစီာ်
(မၢ် ၁၂:၃၈-၃၉, လူၤ ၁၁:၄၃-၄၆, ၂၀:၄၅-၄၆)
1ဘ့နဳၤအခဲယ့ၣ်ရှူးယၱၢ်ဘဲာ်ထၱးပၠၤအပဳၤအဟီး ကၱာ်စပျဲၢ်စဘီာ်တစီာ်ကယဳၤ, 2“အဝှ့းစဲာ် ကၱာ်ဖၤရံၤၡဲ ဖဳးတစီာ်ဆးနါအီၣ် စီၤမိၤၡ့အကါတီးပူၤ. 3မဲၤကနဳၤတဲၤအရါစကဒီၣ်သံနဳၤတီၤနံၤကၱာ်မဲၤကိာ်ပီၢ်အကါ, ပရၤဆါမဲၤမဲး အစာ်ဘိစမဲၤတစီာ် နဳၤမဲး. မၤနဲၢ်ကဒီၣ်ဓဳၤဒဳၣ်, စဒီၣ် မၱာ်စတမဲၤနီး. 4မၤနဲၢ်ကဒီၣ်ဓဳၤ ဒဳၣ်, စဘိးဒီၣ်ကျဳၤ တဲၤဘံာ်အထဳးပၠၤတဘံာ်ကဲာ်ထာ်နီးနဳၤကၱာ်စဒီထာ်ပၠၤ အပျ့ဘးခဳး, ပရၤဆါစဲာ်တခီနဳၤ, စစူးကနဳတမဲလီၤနှီနူၤ မးစသးတအီၣ် အကဘးဇဳၤနီး. 5ကၱာ်ဒီ စမဲၤကဲၤတဲၤဖၱးတဲၤမဲၤလဳစါစဲးနဳၤ, မၱာ် စာ်ဘိထဲၢ် ပၠၤကစာ်ထၱးဘဲာ်အနံၤခံနဳၤလီၤ. မၤနဲၢ်ကဒီၣ်ဓဳၤဒဳၣ်, စမဲၤဓဳၤ အကဳဖဳးထဲၢ် စဘဲနံၢ် စဲာ်စါထံအကျၤဖဳးတစီာ်အပူၤကၱာ် စဳဝဲၢ်ကျဳၤဒဳစမ့ၢ် ပီၤ လီၤ, စစူးဒူးလီၤကၱာ် ကၱာ်စမဲၤဇိၤၡံာ်ဒဳအကါဝံၢ်တစီာ် နဳၤ. 6ကၱာ်ဒီစဘဲာ်လီၢ်အလ့ၤအကျဲးအကဓူ ထာ်ဒဳရှံးပူၤပွဲပူၤ ကၱာ်ကါတီးအကဓူထာ်ဒဳ ဘူၣ်ဘျီၣ် အပူၤနဳၤ. 7ကၱာ်ဒီစဘဲာ်လီၢ်ပၠၤနှူဆဲးစဲာ်ဒဳတဲၤ ပွၱၤ တဲၤဆဲအတကျၢ်ခဳးကၱာ်ပၠၤယဳၤစဲာ်, ရၤဘံ, ရၤဘံ. 8မၱာ်သံနဳၤ သးနံၤမဲးပၠၤယဳၤသံရၤဘံမဲး. မၤနဲၢ်ကဒီၣ် ဓဳၤဒဳၣ်, သံဆရၣ်အီၣ်တပွဲၤလီၤ ကၱာ်ဒီသံမၱာ်လဳအသဲ ပူၤသဲဝ့ၤလီၤ. 9ကၱာ်ဒီဒဳလၢ်ခဳးယဳၤ, ယဳၤမဲး ပၠၤပာ် တပွဲမဲး. မၤနဲၢ်ကဒီၣ်ဓဳၤဒဳၣ်, သံပာ်အီၣ်တပွဲၤလီၤ, ထဲၢ်အအီၣ်ဒဳ မီၢ်ခဳးတပွဲၤနဳၤ. 10ဘဲာ်ယဳၤမဲးဆရၣ် မဲးမဲး. မၤနဲၢ်ကဒီၣ်ဓဳၤဒဳၣ်, သံဆရၣ်အီၣ်တပွဲၤ လီၤထဲၢ်ခရၱာ်နဳၤ. 11သံကျဲအဓဳၤကဓူၤတပွဲၤ ကမၱာ်ကီသံဇိၤ. 12ကၱာ်ဒီပၠၤအပဲၢ်ထာ်ယၱၤ အန့ၤ တပွဲၤပွဲၤ, ကဘဲာ်ကီတဲၤပဲၢ်ဘိးလၤ, ကၱာ်ဒီပၠၤအပဲၢ် ဘိးလၤအန့ၤတပွဲၤပွဲၤ, ကဘဲာ်ကီ တဲၤပဲၢ်ထာ်ယၱၤ.
ယ့ၣ်ရှူးဒီၣ်ထဲးကဲပၠၤအတပီးခဳး
(မၢ် ၁၂:၄၀, လူၤ ၁၁:၃၉-၄၂,၄၄,၅၂, ၂၀:၄၇)
13“မၱာ်ဘဲာ်ကၱာ်သံ, အသဲာ်ယူဒၤအတဲၤသိၣ် တဲၤသီကၱာ် ဖၤ ရံၤၡဲဖဳးအဝၱၤတပီးခဳးတစီာ်. မၤနဲၢ်ကဒီၣ် ဓဳၤဒဳၣ်, သံကျဲၢ်ဘံာ်သံဝံၢ် ပၠၤ မီၢ်ခဳးအထံအက့ၤအခး ကျဲၢ်, သံသဲန့ၤသံတလ့ၤနံၢ်နီးကၱာ် သံတအံာ်ပၠၤ လ့ၤ နံၢ်နီးနီး.
14“ဘဲာ်ကၱာ်သံ, အသဲာ်ယူဒၤအတဲၤသိၣ်တဲၤ သီကၱာ်ဖၤရံၤ ၡဲဖဳးအဝၱၤတပီးခဳးတစီာ်. မၤနဲၢ်ကဒီၣ်ဓဳၤ ဒဳၣ်, သံဒီၣ်ဝှါတဲၤသဘဲအထိ ဒဳၣ်သံရှူနံၢ်အၣ်တပွဲး အမူၤကမဲၤအၡံၣ်အဖါ. အယဳၤအစဲ သံကဘဲာ်စံး ရး ဆိးဒဳၣ်ချဳကီ.
15“ဘဲာ်ကၱာ်သံ, အသဲာ်ယူဒၤအတဲၤသိၣ်တဲၤ သီကၱာ်ဖၤရံၤ ၡဲဖဳးအဝၱၤတပီးခဳးတစီာ်. မၤနဲၢ်ကဒီၣ်ဓဳၤဒဳၣ်, သံဟဲးခွဲဘးပဲာ်လဲာ်ကၱာ်ခီခဳး စာ်ဘိထဲၢ်သံကမဲၤနံၤအပျဲၢ်အဘီၣ်တပွဲၤနဳၤ. ကၱာ်ဒီ အနံၤဝှါဒဳၣ်, သံမဲၤဖၱ ထာ်ကဲၤစဲာ်လရာ်အဖဳး အဇၱၢ်ဒဳၣ် လံသံကၠံၢ်ပျာ်တခီ.
16“ဘဲာ်ကၱာ်သံ, အဒဲလၱၢ်ပၠၤကျဲးအတခံးမ့ၢ် တစီာ်, ထဲၢ်အဒီၣ်ပၠၤကဝှိးဒါဝဲၢ်တဲၤလှူၣ်ၡံၣ်အလီၤ တပွဲၤပွဲၤ, မၱာ်တဲၤဝှိးဒါမၱာ်အနှးနှါ. ပရၤဆါပၠၤကဝှိး ဒါဝဲၢ်တဲၤလှူၣ်ၡံၣ်အထဲအလီၤတပွဲၤပွဲၤ, အကပီၤတပွဲး. 17သံပွဲၤတံးတဳတခံးမ့ၢ်တစီာ်, အဓဳၤချဳမၱာ်ဒီၣ် လဲၢ်တဓဲဓဲ. ထဲ ဧါ. မၱတမၱာ်နီးတဲၤလှူၣ်ၡံၣ်, ထဲၢ်အမဲၤ စါထံထဲနဳၤဧါ. 18ကၱာ်ဒီ ပၠၤတပွဲၤပွဲၤကဝှိးဒါဝဲၢ် တဲၤသဘဲခဳးအလီၤဒဳၣ်, တဲၤဝှိးဒါမၱာ်အနှးနှါ, ပရၤ ဆါပၠၤတပွဲၤပွဲၤကဝှိးဒါဝဲၢ်တဲၤလှူၣ်, အအီၣ် တဲၤသဘဲခဳး နဳၤအလီၤဒဳၣ်, အကပီၤတပွဲး. 19သံအတခံးမ့ၢ်, မၤနဲၢ်ကဒီၣ်ဓဳၤဒဳၣ်, အဓဳၤဒဳၣ်ချဳ မၱာ်ဒီၣ်လဲၢ်တဓဲဓဲ. တဲၤလှူၣ်ဧါ. မၱတမၱာ်နီးတဲၤသဘဲခဳးထဲၢ်အမဲၤစါထံ တဲၤလှူၣ်နဳၤဧါ. 20မဲၤကနဳၤပၠၤအဝှိးဒါပီၤဘဲာ်အန့ၤ တဲၤသဘဲခဳးအလီၤတပွဲၤ, ဝှိးဒါပီၤဘဲာ်အန့ၤတဲၤသဘဲ ခဳးကၱာ်တဲၤလဳစါစဲး ထဲၢ်အအီၣ် တဲၤသဘဲခဳးတစီာ် အလီၤ. 21ကၱာ်ဒီပၠၤကဝှိးဒါပီၤဘဲာ်အန့ၤတဲၤ လှူၣ်ၡံၣ် အလီၤတပွဲၤပွဲၤ, စဝှိးဒါပီၤဘဲာ်စန့ၤတဲၤလှူၣ်ၡံၣ်ကၱာ် အအီၣ်အံာ် တဲၤလှူၣ်ၡံၣ်တပွဲၤအလီၤ. 22ကၱာ်ဒီ ပၠၤကဝှိးဒါပီၤဘဲာ်အန့ၤ မီၢ်ခဳး အလီၤတပွဲၤပွဲၤ, ဝှိးဒါပီၤ ဘဲာ်အန့ၤကဘၱာ်စဲာ်အနၤ အလီၤကၱာ်ပၠၤအဆး နါအီၣ် အနၤအပူၤတပွဲၤအလီၤ.
23“ဘဲာ်ကၱာ်သံ, အသဲာ်ယူဒၤအတဲၤသိၣ်တဲၤ သီကၱာ်ဖၤရံၤ ၡဲဖဳးအဝၱၤတပီးခဳးတစီာ်, မၤနဲၢ်ကဒီၣ်ဓဳၤ ဒဳၣ်, သံလှူၣ်တပွဲးဇၤရၤလှဲာ်, ဖူ ဒူၣ်လှဲာ် ကၱာ်ရှၱဖဳးဇ့ၤ လှဲာ်အသွဲၡံးတသွဲ, မၱာ်ဒဳတဲၤမှဲးလၤအကျဲနဳၤသံလဲၢ် လၤဓ့ၢ်တၤကဲအဓဳၤဒဳၣ်ချဳတစီာ်, ထဲၢ်တဲၤတၱၢ်တဲၤမှး, တဲၤခီၣ်ဝဲၤမှီး ဘဲာ် ကၱာ်တဲၤအဲးတဲၤအီတစီာ်နဳၤ. ဘဲာ်ကၱာ် သံကမဲၤတဲၤအလှီမီၢ် တစီာ်နဳၤနဳၤ ကၱာ်ကတဘဲလါတၤပီၢ် အလ့ၤကါတစီာ်နီးနီးနဳၤ. 24အဒဲလၱၢ်ကျဲး အတခံးမ့ၢ်တစီာ်, ထဲၢ်အစၱလါကဲဖဳးဘါတဘဲာ် ပရၤဆါ အရှူနံၢ်အၣ် ကီၤလၤအူးနဳၤ.
25“ဘဲာ်ကၱာ်သံ, အသဲာ်ယူဒၤအတဲၤသိၣ် တဲၤသီ ကၱာ်ဖၤရံၤၡဲဖဳးအဝၱၤ တပီးခဳးတစီာ်. မၤနဲၢ်ကဒီၣ်ဓဳၤဒဳၣ်, သံမဲၤဘါသးဘါတပွဲးဖလါ ကၱာ်စီး လီး အချဳအသါပၤ, မၱာ်သံသးပူၤအီၣ်ပ့ထာ်ကၱာ် တဲၤအါဝူၢ်အါသဖျဲး ကၱာ်တဲၤစၱးပိးစၱးသဳ. 26နဲၤ, ဖၤရံၤၡဲဖဳးအတခံးမ့ၢ်, မဲၤဘါအူဆူး ဖလါကၱာ်စီးလီး အပူၤ, စာ်ဘိထဲၢ်အချဳကဘါနဳၤ.
27“ဘဲာ်ကၱာ်သံ, အသဲာ် ယူဒၤအတဲၤသိၣ်တဲၤ သီ ကၱာ်ဖၤ ရံၤၡဲဖဳးအဝၱၤတပီးခဳးတစီာ်. မၤနဲၢ်ကဒီၣ်ဓဳၤ ဒဳၣ်, သံလါကၱာ်လူၢ်ခဳး, ထဲၢ် ပၠၤသဖြိးဘိာ်သါတစီာ်နဳၤ, အချဳအဝၱၤအမီၤဘဲာ်ပၠၤအကၢ်ဓူဟဳ. ပရၤ ဆါ အပူၤတခီ အီၣ်ပ့ထာ်လူၢ်အခွံးအခွးကၱာ်တဲၤဇံၤဇီၤမီၤသဳအမဳ အမဳၤနဳၤ. 28အစာ်ဘိကနဳၤ, အချဳအဟူးတခီသံ လၱၢ်ထာ်တပွဲးပၠၤအလှီမီၢ် အတၱၢ်အမှး, ပရၤဆါအပူၤ တခီသံအီၣ်ပ့ထာ်တဲၤတပီးခဳးကၱာ်တဲၤကၱ ကဲာ်မဲၤလှီ.
ယ့ၣ်ရှူးဒီၣ်တီၤလီၤစဲာ်တစီာ်အတဲၤစံးရး
(လူၤ ၁၁:၄၇-၅၁)
29“ဘဲာ်ကၱာ်သံ, အသဲာ်ယူဒၤအတဲၤသိၣ် တဲၤ သီကၱာ်ဖၤ ရံၤၡဲဖဳးအဝၱၤတပီးခဳး, ထဲၢ်အဘီာ် ထာ်ဝံတစီာ်အလူၢ်ခဳးကၱာ်အရၤဝၱၤရၤ မီၤပၠၤအတၱၢ်အမှး အဘံာ် ခဳးကၱာ်အဒီၣ်, 30‘ဝၤကအီၣ်ကဲၤမၤလှ့ ဝၤဖံ ဝၤဖူ အဇိၤခဲနဳၤဒဳၣ်, တဘဲာ်ဝၤကမဲၤကိာ်စကါအလှီးလၤ ဝံတစီာ် အသွံၣ်အထံနီး,’ အဒီၣ်ဓဳၤတစီာ်နဳၤ. 31အနဳၤမၱာ်သံသဲန့ၤသံခး သဲသၱးထဲၢ်သံမၱာ်ကဲၤပၠၤအမဲၤ သံဝံတစီာ်အဖဳးအလံၤနဳၤ. 32မဲၤ ကနဳၤ, မဲၤထာ် ဘးပီၢ်သံဖံသံဖူအအဲ. 33ကလၤပူးမဳၤအခွံ, သံ ကဆဲးလှိထာ်ကီလရာ်အတဲၤစံးရးစာ်တဲၢ်. 34မဲၤကနဳၤစာ်ပီၢ်, ယကနှးလ့ၤသံအီၣ်ဝံ, ပၠၤအဇၤအပျၤ ကၱာ်အသဲာ်အံာ်ယူဒၤအတဲၤသိၣ်တဲၤ သီတစီာ်, ကၱာ်ဒီ အနဳၤတစီာ်အကျဲသံကမဲၤသံတစီာ်, သံကထာ်လၤ ကျဳၤသဳာ်ပျီၤထူၣ်စူညါအလီၤတစီာ်, သံကလှၱးကပျဲကီ ဒဳသံ ဘူၣ်ဘျီၣ်အပူၤတစီာ်, ကၱာ်သံကလိၤမဲၤဆဲးညဲကီ စဲာ်တအူးဝှါတအူး. 35ကနဳၤအစဲ, တဲၤစံးရးအဘဲာ်ကၠးကၱာ် တဲၤမဲၤသံပၠၤအတဲၤကမဲာ်တအီၣ်နီး, စး ထာ်ဒဳ တဲၤမဲၤသံစီၤဟ့းဘ့းလး, ထိဓဳၤလၤတဲၤမဲၤသံ စီၤဘရၤဃံ အဖဳးစီၤစဃၤ ရံ, ထဲၢ်သံမဲၤသံကဲၤတဲၤ လှူၣ် ၡံၣ်ကၱာ်တဲၤသဘဲခဳးအပျဲးတပွဲၤအသွံၣ်နဳၤ ကလၤတ့ၢ်ပီၢ်သံခဳး. 36ယဒီဆးအတၱၢ်အမှး, တဲၤအယဳၤလဳစါစဲး ကလၤတ့ၢ်ကီပၠၤအယဳၤ တဇိၤ အခဳး.
ယ့ၣ်ရှူးအတဲၤဘဲာ်လီၢ်ယရူၤၡလ့ၣ်
(လူၤ ၁၃:၃၄-၃၅)
37“အဳယရူၤၡလ့ၣ်, ယရူၤၡလ့ၣ်, ထဲၢ်အမဲၤသံ ဝံတစီာ်, ကၱာ်အဝှ့သံကၱာ်လဳၤပၠၤအဘဲာ်သဓဳလ့ၤ နအီၣ်တစီာ်နဳၤ, ယသးအဲၤယဳၤ ပျဳာ်ကီနဖဳးအစာ်ဘိ ၡၱမူၤပွ့ၤယဳၤပျဳာ်အဖဳးအဒ့းလဲၢ်နဳၤပွ့းတဲၢ်. မၱာ်နတအဲး ကဲၤနီး. 38စာ်ပီၢ်, သံရှံၣ်သံဖါကအီၣ်တၤ နှးနှါ ကီ. 39ယဒီၣ်သံ, စးထာ်ဘ့ခိနဳၤယဳၤ, သံ ကတစာ်ထၱးဘဲာ်ကီယဲၤတပျါပ့ၤနီး ထိသံဒီၣ်, ‘အဘဲာ် ဟိးဝၱၤမၱာ်အလ့ၤဘၱာ်စဲာ်အမံၤပူၤတပွဲၤနဳၤ.’ ”
Kasalukuyang Napili:
မးသဲ 23: GBA
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Geba Roman New Testament © Bible Society of Myanmar, 2021.
