မးသဲ 22
22
တဲၤဖၱးစူးအကလဲၤ
(လူၤ ၁၄:၁၅-၂၄)
1ကၱာ်ဒီယ့ၣ်ရှူးယၱၢ်ဘဲာ်ထၱးစဲာ်တစီာ်တဲၤကလဲၤ အပူၤတပျာ် ပ့ၤကယဳၤ, 2“မီၢ်ခဳးအထံအက့ၤ မဲၤအစာ်ဘိဆးဖြးအမဲၤနံၤ အဖဳးတဲၤဖၱးစူးအပွဲတပွဲၤ နဳၤ. 3ကၱာ်ဒီစနှးစဇိၤဖဳးတစီာ်လ့ၤ ယဳၤပၠၤ အဘဲာ် ယဳၤပွဲပူၤတစီာ်နဳၤ. မၱာ်စတသးအဲးလ့ၤတစီာ်နီး. 4တပျာ် ပ့ၤစနှးစဇိၤဖဳးအလဝ့ၤတစီာ်ကၱာ်စဒီၣ်, ‘ဒီဆးအဘဲာ်ယဳၤတစီာ်ကယဳၤ, “ယပြးနှဲးဝှါထဳတဲၤအၣ်တဲၤအီ, ယဗဳၤကၱာ်တဲၤဖဳးတဲၤဝ့ၤအဘိးအသဳးတစီာ်လၤခူးထဳ. ကၱာ်ဒီတဲၤအီၣ်ပြးနှဲး ထဳကိမံၤမံၤလီၤ. လ့ၤပီၢ်ပွဲပူၤတခး. ” ’ 5ပရၤဆါပၠၤအနဳၤတစီာ်တဆီးခ့န့းနီး, ကၱာ် ဟဲးဖျီးမံတပွဲး. တပွဲၤလ့ၤအဟူးကျဲ, တပွဲၤလ့ၤကွၢ် အၣ်တဲၤ. 6ကၱာ်ဒီအလဝ့ၤတစီာ်ဖီးဝှါလၢ်ဝၤ အဇိၤဖဳးကၱာ် စမဲၤ ယဳၤမဲၤနှါမဲၤသံတပွဲးလၢ်ဝၤတစီာ်. 7ဘ့ဆးဖြးသၱာ်ဟဲဘဲာ်အဝၱၤ အကဲနဳၤ, စသဲးထဲးဆိး ကဲၤ, ကၱာ်ဒီစနှး ကဲၤစခၱစပွဲၤလ့ၤမဲၤကဲပၠၤအမဲၤ သံတဲၤ အနဳၤတစီာ်ကၱာ်ရွှံးကဲၢ်ဟီးလၢ်ဝၤအအူးနဳၤ. 8မဲၤဝှါစဒီၣ်စဇိၤဖဳးတစီာ်, ‘တဲၤဖၱးစူးပွဲအီၣ်ပြးနှဲးထဳဟဳ, မၱာ်အဘဲာ်ယဳၤတစီာ်တတးနံၤ ကဲၤနီး, 9မဲၤကနဳၤ လ့ၤပီၢ်ဒဳကျဲးတၡံးတစီာ်အပူၤနဳၤ ကၱာ်သံကပး နံၤပၠၤ အရါလီၤ, ယဳၤပီၢ်စလ့ၤပွဲပူၤ.’ 10ကၱာ်ဒီဇိၤဖဳး တစီာ်ဟဲး ထာ်ကျဲးတစီာ်အပူၤဒဳၣ် စပးနံၤပၠၤအရါ အဝၱၤဝၱၤတဝၱၤနီးနီး, စယဳၤပျဳၤလဳ လၢ်ဝၤကၱာ်တၱတမဲ ပ့ထာ်လဳၢ်ကဲၤပွဲပူၤ.
11“ကၱာ်ဒီဆးဖြးလ့ၤဘးနံၢ်အပူၤစာ်ဘိထဲၢ်စကစာ်ပၠၤအအီၣ်ပွဲပူၤတစီာ်နဳၤ, ကၱာ်စစာ်ထၱးကဲၤပၠၤအတသီးအဖၱးစူးအပွဲအၡံာ်ဒဳနီး တပွဲၤ. 12ကၱာ်ဒီ စဒီၣ်ကဲၤလၢ်ဝၤ, ‘အသီၣ်, နတသီးတဲၤဖၱးစူးပွဲ အၡံာ်ဒဳ နီး, နလ့ၤနံၢ်ပွဲၤပူၤစာ်တဲၢ်.’ မၱာ်စအီၣ်ဇီၤကဲၤ. 13ဘ့နဳၤ ဆးဖြးဒီၣ်အဇိၤဖဳး, ‘စဳကျဳၤစစူးစခၣ်ကၱာ် ထၱးဖျီး မံ စဲာ်ဒဳအချဳတဲၤခံးကျဲ. ဒဳနဳၤတဲၤယဳၤတဲၤဟးကၱာ်တဲၤ အ့းတံၤသိအ့းတံၤသဲကအီၣ်ကီ.’ ”
14“မၤနဲၢ်ကဒီၣ်ဓဳၤဒဳၣ်, ပၠၤအဘဲာ်ယဳၤအီၣ်အဲ ပွဲၤ, ပရၤဆါ ပၠၤအဘဲာ်ရိၤအီၣ်တကၱာ်ဖဳး.”
တဲၤဒဲဘဲာ်ကၠးတဲၤအံာ်လၤရိမ့ၤအဆးဖြးဓဳၤတဲၤမှူ
(မၢ် ၁၂:၁၃-၁၇, လူၤ ၂၀:၂၀-၂၆)
15ဘ့နဳၤဖၤရဲၤၡဲဖဳးတစီာ်ဟဲးထာ်တပီၤ, စဒီၣ်ဘဲာ်လှဲးလၢ်ဝၤ စာ်ဘိ ထဲၢ်စကဖၱးနံၤလၢ်ဝၤ အတဲၤကမဲာ်စတဲၤယၱၢ်ဘဲာ်အကျဲစာ်တဲၢ်နဳၤ. 16ကၱာ်ဒီစနှးစခီပံၤစဖဳးကၱာ်ဟ့ၤရိာ်အပၠၤတစီာ်လ့ၤဒီၣ် စဲာ်ကယဳၤ, “ဆရၣ်, ဝၤသၱာ်ဟဲတပွဲးနမၱာ်အယၱၢ်ဘဲာ် တနၢ်, ကၱာ်အဒီဆးကဘၱာ်စဲာ် အကျဲးအသအီတဲၤတၱၢ် တဲၤမှးအပူၤကၱာ်ဒီအတစာ်ပၠၤအမူၢ်ကါတဗွဲနီး, မၤနဲၢ်ကဒီၣ်ဓဳၤဒဳၣ်, နမၱာ်ပၠၤအတၱၢ်အမှးတပွဲၤ. 17မဲၤကနဳၤဒဳၣ်, နကမဳၤစာ်တဲၢ်, ဒီဆးပီၢ်ဝၤတကၱာ်. ကအံာ်ဘဲာ်ကဲစၢ်တဲၤမှူဧါ, နီးဧါ.”
18မၱာ်ယ့ၣ်ရှူးသၱာ်ဟဲ စတဲၤကၱကဲာ်မဲၤလှီဒဳၣ်, စဒီၣ်လၢ်ဝၤ, “ပၠၤအဝၱၤတပီးခဳးတစီာ်, သံဘဳာ်မၤယသးနဲၢ်. 19ဒဲလၱၢ်ယဲၤတဲၤ မှူအနံၤခံဝှိတဘ့ာ်.”
ကၱာ်ဒီပၠၤလ့ၤအံာ်စဲာ်ဝှိဒန့ၤရံၤတဘ့ာ်. 20ကၱာ်ဒီ ယ့ၣ်ရှူးဒီၣ် ကဲၤစဲာ်တစီာ်, “အယဳၤမၱာ်ပီၢ်ပွဲၤအယီၤကၱာ် အမံၤအခဲပွဲၤ.”
21“မၱာ်ရိမ့ၤအဆးဖြးဓဳၤအဲ,” ပၠၤဒီၣ်စဲာ်ဓဳၤ.
ဘ့နဳၤစဒီၣ်ပၠၤကယဳၤ, “မဲၤကနဳၤ ရိမ့ၤအဆးဖြးဓဳၤ အတဲၤနဳၤအံာ် က့ၤပီၢ်ရိမ့ၤအဆးဖြးဓဳၤ, ကၱာ်ဒီ ကဘၱာ်စဲာ်အတဲၤနဳၤအံာ်က့ၤပီၢ်ကဘၱာ် စဲာ်.”
22ပၠၤသၱာ်ဟဲဘဲာ်တဲၤအယဳၤဒဳၣ်, စဲာ်တစီာ်ထဲး တမိၢ်တမှါ ကဲၤ. စဲာ်တစီာ်လဲၢ်တၤစဲာ်ကၱာ်က့ၤသံဝံၢ် ကဲၤစဲာ်.
တဲၤဒဲအဘဲာ်ကၠးတဲၤထာ်ပဳၤက့ၤ
(မၢ် ၁၂:၁၈-၂၇, လူၤ ၂၀:၂၇-၄၀)
23အနဳၤတနံၤစးဒူၤကဲဖဳးထဲၢ်အဒီၣ် တဲၤထာ်ပဳၤ က့ၤတအီၣ် နီးတစီာ်နဳၤလ့ၤထၱးစဲာ်ကၱာ် စဒဲလၢ်ဝၤကယဳၤ, 24“ဆရၣ်, စီၤမိၤ ၡ့ဒီၣ်ကဲၤကယဳၤ, ‘ပၠၤတပွဲၤအဖဳးတအီၣ်နှၱနီး, စကသံဒဳၣ်, စသဲပူၤဝ့ၤကဖၱး ဒီဧဲၤစမှဲကၱာ်စမဲၤလၤကွါဒီဧဲၤစသဲပူၤဝ့ၤအခွံ.’ 25မၱာ်ဒဳစကျဲနဳၤ အသဲပူၤဝ့ၤအီၣ်ကဲၤသါသိးတပွဲၤ, ကၱာ်ဒီ အအူဓဳၤပွ့ၤတပွဲၤဖၱးဝှါအမှဲစသံ ကဲၤ. ကၱာ်ဒီစဖဳးတအီၣ် နီးဒဳၣ်, စလဲၢ်လၤတၤနံၤကဲၤစသဲပူၤဝ့ၤစမှဲ. 26ကၱာ်ဒီတဲၤဖၱထာ်နံၤအသဲပူၤဝ့ၤကၠံၢ်ပွဲၤတပွဲၤ, သဳပွဲၤ တပွဲၤကၱာ်အလဝ့ၤတစီာ်ထိဓဳၤလၤသါသိးတပွဲၤကနဳၤ လီၤလီၤ. 27ကၱာ်ဒီအကဓူၤ လါအမံၤမှူးမၱာ်မၱာ်သံကဲၤကဲၤ. 28မဲၤကနဳၤဘ့တဲၤထာ်ပဳၤက့ၤအမူၤ နံၤနဳၤ, စကမၱာ်ကီဒီၣ်လဲၢ်တပွဲၤပွဲၤအမှဲပွဲၤ. မၤနဲၢ် ကဒီၣ်ဓဳၤဒဳၣ်, စဖၱးကဲၤ လၢ်ဝၤကိအပွဲၤလီၤ.”
29ကၱာ်ဒီယ့ၣ်ရှူးဒီၣ်က့ၤစဲာ်တစီာ်, “သံကမဲး ကဲၤ, သံတသၱာ်ဟဲစဲာ်စါထံနီးကၱာ် ကဘၱာ်စဲာ်အစိ သလဲမၱာ်တၤနဲၢ်နီးအစဲ. 30မၤနဲၢ်ကဒီၣ်ဓဳၤဒဳၣ်, ဘ့တဲၤထာ်ပဳၤက့ၤအနံၤနဳၤ, ပၠၤကတဖၱးကီအမှဲအဝၤ နီး, ကၱာ်ပၠၤကမၱာ်ကီအစာ်ဘိကဘၱာ်စဲာ် အမီၢ်ခဳးပွဲၤဇဳၤ တစီာ်နဳၤ. 31ကၱာ်ဒီအဘဲာ်ကၠးအသံတစီာ်အတဲၤ ထာ်ပဳၤက့ၤနဳၤသံတဖးဘဲာ်တဲၤယၱၢ် ဘဲာ် ထဲၢ်ကဘၱာ်စဲာ် ဒီၣ်သံကယဳၤနီးဧါ. 32စဒီၣ်, ‘ယမၱာ် စီၤအၤ ဘြၤ ဟၣ်အဘၱာ်စဲာ်, စီၤအံၤစဲးအဘၱာ်စဲာ်, စီၤယၤကိာ် အဘၱာ်စဲာ်နဳၤ’ နီး ဧါ. စတမၱာ်ပၠၤသံတစီာ်အဘၱာ်စဲာ်နီး, မၱာ်ပၠၤအအီၣ်သမိတစီာ်အဘၱာ်စဲာ် လီၤ.”
33ကၱာ်ဒီပၠၤအပဳၤအဟီးသၱာ်ဟဲ ဘဲာ်တဲၤအယဳၤ ဒဳၣ်, စထဲး တမိၢ်တမှါနံၤကဲၤလၢ်ဝၤအတဲၤသိၣ်တဲၤသီ အလ့ၤ.
တဲၤမှးလၤဓဳၤ
(မၢ် ၁၂:၂၈-၃၄, လူၤ ၁၀:၂၅-၂၈)
34မၱာ်ဖၤရံၤၡဲဖဳးတစီာ်သၱာ်ဟဲဘဲာ်စးဒူၤကဲဖဳး တစီာ်အီၣ်တၤ နံၤယ့ၣ်ရှူးအလ့ၤဒဳၣ်, စလၤတ့ၢ်ပျဳာ် လၢ်ဝၤ, 35ကၱာ်ဒီစကျဲတပွဲၤ, ထဲၢ်အဝှ့းစဲာ်တပွဲၤ နဳၤ, ဒဲစဲာ်အစာ်ဘိစဘဳာ်လၢ်ဝၤအသးနဳၤ. 36“ဆရၣ်, ဒဳတဲၤ မှဲးလၤအကျဲနဳၤ, အဓဳၤကဓူမၱာ်ဒီၣ်လဲၢ် တမှိမှိ.”
37ယ့ၣ်ရှူးဒီၣ်ကဲၤစဲာ်, “‘နဘဲာ်လီၢ်ဘဲာ်နဘၱာ်စဲာ် ဘၱာ်စဲာ် လဳကၱာ်နသး, လဳကၱာ်နခဳးနအါ, လဳကၱာ်နတဲၤ သၱာ်ဟဲ.’ 38အယဳၤ မၱာ်တဲၤမှဲးလၤအအူဆူးကၱာ် အဓဳၤကဓူတမှိနဳၤ. 39ကၱာ်ဒီအလှီမီၢ် တမှိမၱာ်အစာ်ဘိအနဳၤတမှိနဳၤ. ‘နဘဲာ်လီၢ်ဘဲာ် နသဲပူၤဝ့ၤအစာ် ဘိနန့ၤ နဳၤ.’ 40စီၤမိၤၡ့ကၱာ်ဝံတစီာ်အတဲၤမှဲးလၤ အကျဳၤပူၤမၱာ်အယဳၤကၠံၢ် မှိလီၤ.”
ဆးဖြးဒၤဝံးအဖဳးခဳ
(မၢ် ၁၂:၃၅-၃၇, လူၤ ၂၀:၄၁-၄၄)
41ကၱာ်ဒီဖၤရံၤၡဲဖဳးတစီာ်လၤတ့ၢ် ပျဳာ်လၢ်ဝၤဒဳၣ်, ယ့ၣ်ရှူးဒဲ စဲာ်တစီာ်ကယဳၤ, 42“အဘဲာ်ကၠးခရၱာ်နဳၤ, သံကမဳၤစာ်တဲၢ်. စမၱာ် ပီၢ်ပွဲၤ အဖဳးပွဲၤ.”
စဒီၣ်က့ၤလၢ်ဝၤ “စီၤဒၤဝံးအဖဳး.”
43ယ့ၣ်ရှူးဒီၣ်စဲာ်တစီာ်, “မဲၤကနဳၤဒဳၣ် ဒဳသးစါထံအတဲၤအံာ် စာ်ထၱးကဲၤအစဲ, စီၤဒၤဝံၤယဳၤ မၤစဲာ် ‘ဘၱာ်စဲာ်’ နဲၢ်. 44စဒီၣ်,
‘ဘၱာ်စဲာ်ဒီၣ်ယဘၱာ်စဲာ်,
ဆးနါပီၢ်ယစူးခီးအတထွဲးတခီ
ထိယမဲၤဖၱထာ်နဒ့ဒီၣ်တစီာ်နခၣ်ယၢ်လၤနဳၤ.’
45မဲၤကနဳၤစီၤဒၤဝံးယဳၤစဲာ်ဘၱာ်စဲာ်ဒဳၣ်, စမၱာ်ဒီလၢ်ဝၤအဖဳးခဳစာ် တဲၢ်.”
46ကၱာ်ဒီပၠၤတပွဲတဒီၣ်က့ၤကဲာ်ထာ်စဲာ် တဲၤယၱၢ်ဘဲာ်တမှိနီး. ကၱာ်ဒီဘ့ နဳၤတနံၤဖျီအလှီမီၢ်, ပၠၤတဒဲဘူၣ်ပ့ၤစဲာ်တဲၤတဗွဲနီး.
Kasalukuyang Napili:
မးသဲ 22: GBA
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Geba Roman New Testament © Bible Society of Myanmar, 2021.
