Lucas 4:1-20

Umalis si Hesus sa Ilog Jordan na puspos ng Banal na Espiritu, at dinala siya ng Espiritu sa ilang. Nanatili siya roon nang apatnapung araw, at sa mga araw na iyon, tinukso siya ng diyablo. Hindi siya kumain sa buong panahong iyon kaya gutom na gutom siya pagkatapos. Sinabi sa kanya ng diyablo, “Kung ikaw nga ang Anak ng Diyos, utusan mo ang batong ito na maging tinapay.” Ngunit sinagot siya ni Hesus, “Sinasabi sa Kasulatan, ‘Hindi lamang sa tinapay nabubuhay ang tao.’ ” Dinala siya ng diyablo sa isang napakataas na lugar, at sa isang iglap ay ipinakita sa kanya ang lahat ng kaharian ng mundo. At sinabi ng diyablo kay Hesus, “Ibibigay ko sa iyo ang karapatang mamuno sa lahat ng ito at ang kadakilaang kalakip nito, dahil ipinagkaloob sa akin ang mga iyan at maibibigay ko sa kahit kanino ko gusto. Kaya kung sasambahin mo ako, mapapasaiyo ang lahat ng iyan.” Ngunit sumagot si Hesus, “Sinasabi sa Kasulatan, ‘Sambahin mo ang Panginoon na iyong Diyos at siya lamang ang dapat mong paglingkuran.’ ” Pagkatapos, dinala siya ng diyablo sa Jerusalem, sa pinakamataas na bahagi ng Templo, at sinabi sa kanya, “Kung ikaw nga ang Anak ng Diyos, magpatihulog ka. Sapagkat sinasabi sa Kasulatan: ‘Uutusan ng Diyos ang kanyang mga anghel na ingatan ka. Aalalayan ka nila upang hindi tumama ang iyong mga paa sa bato.’ ” Ngunit sumagot si Hesus, “Sinasabi rin sa Kasulatan, ‘Huwag mong susubukin ang Panginoon na iyong Diyos.’ ” Matapos siyang tuksuhin ng diyablo sa lahat ng paraan, iniwan siya nito at naghintay ng ibang pagkakataon. Bumalik si Hesus sa Galilea na taglay ang kapangyarihan ng Espiritu. Kumalat sa lahat ng lugar doon ang balita tungkol sa kanya. Nagturo siya sa mga sinagoga, at pinuri siya ng lahat. Umuwi si Hesus sa Nazaret, sa bayang kinalakihan niya. At katulad ng nakaugalian niya, pumunta siya sa sinagoga sa Araw ng Pamamahinga. Tumayo siya upang bumasa ng Kasulatan. Ibinigay sa kanya ang aklat ni Propeta Isaias. Binuksan niya ito at binasa ang bahaging nagsasabing: “Ang Espiritu ng Panginoon ay sumasaakin, dahil hinirang niya ako para ipangaral ang Magandang Balita sa mga dukha. Sinugo niya ako para ipahayag sa mga bihag na lalaya na sila, at sa mga bulag na makakakita na sila. Sinugo rin niya ako upang palayain ang mga inaapi, at ipahayag na dumating na ang panahon ng pagpapala ng Panginoon.” Pagkatapos, ibinilot ni Hesus ang Kasulatan at isinauli sa katiwala, at saka naupo. Nakatutok sa kanya ang mga mata ng lahat ng naroon.