Éxodo 9
9
Faraaon rai bacaauru choae cunai nalutiaa cana Coaunerane
1Nii jana jetaote, Moisesa rai jetao:
“Faraaon coaanite rai aitohi: ‘Caa canu cachaauru Isaraele cocoaichacuru jianeeute, canu coroajeein Canu bajaae bajaaeca cuuruinera. 2Jianena jerelanaala, acaauru chunajeein sacuhine rijijieein aihane 3ii rai bacaauru, carenero, cabario, asno, camecho, naaojoaihunri nii fasoto cuhane nenacaauru ichoaae jataain mijiaainetiin cunai nalutiareein aihane Cana Coaunerara. 4Nii jana, nerihaain nii nejelau Cana Coaunera tenojoihuru Isaraele cocoaichacuru rai bacaauru. Nihei leinjiinejei ohorurihai nii cunai caaunta. Nii nejelau, Egipto nenacaauru rai irihurute nii cunai caaun oorureeincha’, nanihun Faraaon raicha”, naain jetao, Moisesa letoae Cana Coaunera.
5Chaaen jetaotechu, lejanojoeeincha cojoinacatiriin aite: “Eresina caa cunai nalutihareeuni Canura”, 6naain jetao, cojoanoo nii cunai nalutiaa Cana Coaunerane jana jetao, satiin oohacoae jetao nii Egiptoo nenacaauru bacaauru. Nii jana jetaote, leinjiinejei ohoene, Isaraele cocoaichacuru rai bacaauru. 7Nii jana, Isaraele cocoaichacuru rai bacaauru coaaratiha, Faraaonne jana jetao, nihei leinjiinejei ohoi, Isaraelitaauru rai bacaauru. Nitohaneein coaraa natiin jetaotechu, nechu aasaineein mijiaainetiin, Isaraele cocoaichacuru jianena jerene Faraaon.
Itolereneein Egipto cocoaichacuru casetecaa abero que Cana Coaunerane
8Nii jana jetaote, Moisesa, Aaroon, naaojoaihunri rai jetao:
“Inara biji cuhane, lebijijieein, nii faan enoalaauruhane jaa caje ajane soriin, coarajiha Faraaonne acatiha ecuun cuaain nii ajane rialaaiitoora. 9Nii banate, bujuinaa neein nerotoin, itolereneein nii Egipto batane lomohin nii cachaauru, acaauru rai bacaauru, naaojoaihunri itolereneein acaauru jabereco lomoha cureein nii aberora”, naain jetao Moisesa aina Aarooncuru letoae Cana Coaunera.
10Nii jaun jetaote, Aaroon aiha nii faan enoalaauruhane jaa caje, ajane soriin amaain jetao, Faraaon coaraa cuure jetao Moisesa aina Aarooncuru. Faraaon rene turuhin notaracaae ecuun cuaain nii ajane rialaaiitoha Moisesa. Jana, inae ecu jetaote itolereneein abero que neconajae nii cachaauru jabereco, chaaen acaauru irihuru, bacaauru naaojoaihunri aiha jiniiquiin. 11Nii jaun jetaote, nii ichaa Moisesane rijijieein jetao, inaae ichasihurene Moisesa acatiha nii Mago neein curuajaain nenacaauru benanecuru, acaauru netonai itolereneein Egipto cocoaichacuru jiniichaain abero que neconajaa acaauru jabereco najaun. 12Ne jetaote, nitohaneein Cana Coaunera rai caseteco coaraane saijieein jetao, nechu aasaineein mijiainetiin, Aaroon, Moisesa, naaojoaihunri ere tonoraain esenetana jerene Faraaon, inaae nitohaneein bihalu Moisesa rai Cana Coaunerane rijijieein.
Faraaon rai caseteconeein elo ucuhe nalutiaa Cana Coaunerane
13Nii jana jetaote, Moisesa rai:
“Eresi janohetiin nimichuhin Faraaon coaanihute, ‘Ebereeocuru Coaunera Cana Coaunerate, caa Canu cachaauru Isaraele cocoaichacuru jianeeunte, Canu coroajeein Canu bajaae bajaaeca cuuruinera. 14Ena cuhanaine ichei, chaaen ii cachaauru letoaaurera rai, chaaen ii cachaauru, naaojoaihunri rai itolere cunai letoareeuni, neniha itolereneein caa atane que Cana Coaunera nichaaune coitucuhin, niheichu neniha Canu rijijieein ichara cachane coaraquichene coinara. 15Leinjiin canuhachane naineeun, ii cachaauru aina curuataain ichoaae cunai nalutiaain ii que caseteco coaarateein, nii baiha caa atane caje itajihanune coaraatianunera. 16Nena ii ichaolaaun, mijiaaineein itolere cunai nalutiaanune coaraain, itolereneein satiin caa atane que esinae rauhijiriin Cana Coaunera nichaaune coitucuhichene coina. 17Nitohaneein coaraainatiinte, nii Canu cachaauru Isaraele cocoaichacuru jianena jerelanaala chunajeein sacuuhicha. Nii Canu cachaauru jianena jereneeine corenihate caseteco coaariquiincha. 18Eresine caoachaain enarijiu elo ucuhe nalutihareeuni. Nii banate, chabana noaaelu caje coaauneein uheniha itolereneein caa Egiptoo elo ucuhene caje coaariquiincha. 19Nii ajiniha nichutenaa nainecuruane jaun nii ichei saatin fasoto cuhane nenacaauru bacaauru teeura. Inaae naluha nii elo ucuhenete, satiin nii airiniha nenacaauru cachaauru, chaaen nii iriuru, naaojoaiuri ateihareeincha. Nihei airiaain, nii coloheri asaae nenacaauruta’, nanihun Faraaon raicha”, naain beratiha Cana Coaunerane jaun, biha Moisesane 20jana jetaote, loreri asaae rai cachaauru, chaaen bacaauru, naaojoaihunri teeure tabaauru. 21Nii jana leeochaauru jetaote, Cana Coaunera esenetaelanaala airiniha jianacoon rai letonocuru cachaauru, chaaen rai bacaauru, naaojoaihunri sirichure.
22Nii jana:
“Ecuun, dede nichaae cuaain, ichoii michuute, Egipto batane que, nenacaauru cachaauru, chaaen bacaauru, chaaen nii Egiptoo nenacaauru ocoanacuru, temulecuru, naaojoaihunri choae naluhine elo ucuhera”, naa Cana Coaunerane jaun, 23ecuun dede nichaae cuaain biji michuha Moisesane jana jetaote, arara, jiacane, elo ucuhe naaojoaihunri letoae jetao Cana Coaunera chaurutane choae. Nitohaneein jetao, elo ucuhe nejesinaneein itolereneein ichae, Egipto batane que Cana Coaunera. 24Nii jana jetaote, jianelanaala, elo ucuhe, jiacane, naajeeincha naluhajeein sacuhe. Noaaelu caje coaauneein chabana nitohaneein, Egipto batane que naluenihane baiha jetaote, nitohaneein jataain mijiainetiin nalue elo ucuhe. 25Nitohaneein jetaote, Egipto batane que, satiin nenacaauru cachaauru, chaaen acaauru rai bacaauru, chaaen acaauru ocoanacuru jana nenacaauru, satiin temulecuru, naaojoaihunri ateinaacoae jetao nii elo ucuhe nalunaa. Chaaen jetaotechu, satiin nii Egipto batane que, nenacaauru enuha unecuru beeusi. 26Nitohaniha Egipto batane que natiin jetaote, nii ichaaoruha Isaraele cocoaichacurune jaan, Goseen batane que, leinjiinejein naluene elo ucuhe.
27Nii jaun jetaote, Moisesa, Aaroon, naaojoaihunri cotiharateein jetao:
“Esinaena rauhijiriin, baaso ichacaaunne coitucuun. Canune, canu cachaauru aina baaso ichacaaunne ujuhaioneeun. Coatiha Cana Coaunera, nii baaso ujuhaioneein niheita. 28Mainajeeinte, canacaanu rai uuhe elo ucuhe, arara, naaojoaincha. Aihana jaunne, inaae nenacaeneein inara chunarinaauni inaaeta. Chaaen, canacaanu rai Cana Coaunera bajaauche. Inaae cuhichene coinane inara jianereeunicha”, nae jetao, Moisesa rai Faraaon.
29Niritoha rai Faraaonne jana jetaote:
“Caa nese caje cuhanune rijijieeina, Cana Coaunera bajaain cacoii michureeunicha. Nii janate inaae elo ucuhe nejesinajeein sacuhane jianereein. Nii banate, esinae rauhijiriin Cana Coaunera, caa cana rai atane coaaunaane coitucuriquiincha. 30Nii jana, canune raotojoeein coitucuun, coatiha jaiti ii, chaaen ii cachaauru letoaaurera, naaojoaihunri aina jiniiquiin jaiti, Cana Coaunera esenetariheecheein”, nae jetao, Faraaon rai Moisesa.
31Nii elo ucuhe nejesinanejeein naluha Egipto batane quene jana jetaote, rojoiinuineein jetao, nedae nii temulecuru sebada, chaaen lino cajione ichacuruha najaan, naaojoaihunri. Ena ujuanihane que jiniichaain jetaote, nitohane. 32Nii jana, tirico, seenteno, naaojoaihunri jetaote inasiine, ena forohaquiin omaroohaneque jiniichaain nitoanihanejaun.
33Nitohaneein jetaote, nii Egipto neseu Faraaon aina nihane caje cuhin jetao Cana Coaunera bajaain jetao, biji michuha Moisesane rijieeoritiin jetao inaae elo ucuhe neein sacuhane jianeein tonine nenacaaen arara. 34Nii jaun jetaote, inaae naluhane jianiha elo ucuhene jana jetao, jelaiha cocoaain jetao baaso ichae jetao Faraaon. Leinjiin acaacha jetaotechu, nitohaneein, mijiainetiin nechu aansaineein ne. Nii Faraaon, cachaauru rai curuaanaacuru netonai jetaotechu mijiainetiin nechu aasaineein neeure. 35Nii jana jetaote, nitohaneein mijiainetiin nechu aasaineein jetao Isaraele cocoaichacuru jianena jerene nii Egipto curuaanaa Faraaon. Inaae niritiin aitosihalu Moisesa rai Cana Coaunerana jaun.
ที่ได้เลือกล่าสุด:
Éxodo 9: URA
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2005, 2024, Wycliffe Bible Translators, Inc.