Números 6
6
Tayta Diospaq sapaqchakuqkuna imakunam ruwanankumanta
1-2Israelpa mirayninkunaman ninanpaqmi Moisesta Tayta Dios kaynata nirqa:
Qaripas otaq warmipas ñoqa Tayta Diosllataña serviwananpaq sapaqchakuspaqa, 3amam vinota, poqosqa aqata, uvasmanta ruwasqa vinagreta, aqamanta ruwasqa vinagreta nitaq uvasmanta ruwasqa upitapas tomanqachu. Amataqmi uvastapas nitaq uvasmanta pasastapas mikunqachu. 4Chaynaqa, ñoqapaq sapaqchakusqan punchawkamam ama uvasmanta ima mikuytapas nitaq uvasmanta ima ruwasqatapas mikunqachu. 5Ñoqapaq rakisqa kanankamaqa amam chukchanta rutuchikunqachu. Ñoqa Tayta Diospaq sapaqchakusqan punchawkamam ñoqallapaqña kanqa, hinaspam chukchantapas wiñachinqa. 6Ñoqa Tayta Diospaq rakisqa kasqan punchawkamataqmi wañuqpa ayanmanpas ama asuykunqachu. 7Tayta-mamanña otaq wawqe-paninña wañukuptinpas amam asuykunqachu, mana chayqa millakuypaqmi kanman. Payqa ñoqallapaqñam sapaqchasqa kachkan. 8Tukuy tiempo sapaqchasqa kanankamaqa ñoqa Tayta Diospaq sapaqchasqam kanqa.
9Paypa qayllanpi qonqaymanta pipas wañukuptinqa chay ñoqapaq sapaqchasqa runapa chukchanmi millakuypaq kanqa. Chaynaqa, chuyanchakuspanmi qanchis kaq punchawpi chukchanta kachiy-kachiyta rutuchikunqa. 10Pusaq kaq punchawpiñataqmi iskay qoqñuta otaq iskay mallqo palomata asuykuwanaykichik carpapa punkunman apamuspa sacerdoteman qonqa. 11Hinaptinmi sacerdoteñataq hukninta hucharayku ofrendata hina ofrecemuwanqa, huknintañataq lliw kañana ofrendata hina ofrecemuwanqa. Chaynapim wañuqpa ayan hapirusqanmanta chay ñoqapaq sapaqchakuq runapa huchan pampachasqa kanqa. Chay punchawmantam chukchanta sapaqchapuwanqa. 12Chaymantam musoqmanta qallarinqa ñoqallapaqña sapaqchakuyta. Watayuq carnerotam huchanmanta ofrecewananpaq apamuwanqa. Punta sapaqchakusqanqa yanqapaqmi kanqa, ñoqapaq sapaqchakuchkaspa millarikuypaq kaqta ruwarusqanraykum.
13Ñoqapaq sapaqchakusqan punchaw tukuruptinqa kay yachachikuyman hinam ruwanqa: Asuykuwanaykichik carpapa punkunmanmi pusasqa kanqa. 14Chaypim ñoqa Tayta Diosman lliw kañana huk watayuq sano carnerota ofrecemuwanqa, huk watayuq sano ovejatañataqmi huchamanta ofrendata ofrecemuwanqa. Ofrecemuwanqataqmi ñoqawan allinlla kasqanmanta carnero ofrendatapas. 15Canastillapim ofrecemuwanqa fino harinamanta aceitewan masa ruwasqa mana levadurayuq tantakunatapas chaynataq aceitewan chapusqa mana levadurayuq tortillakunatapas, chaykunatawan kuskatam ofrecemuwanqa kawsaykunamanta ofrendatapas chaynataq tallinapaq vino ofrendatapas.
16Tukuy chaykunataqa sacerdotem ñoqa Tayta Diospa qayllayman apamuspan hucharayku ofrendapaq ofrecewanqa, ofrecewanqataqmi lliw kañana ofrendatapas chaynataq huknin carnerotapas. 17Chaymantam ofrecewanqa chay ofrecewaqniy runa ñoqa Tayta Dioswan allinlla kasqanmanta carnero ofrendata canastillapi mana levadurayuq tantatawan kuskata. Ofrecewanqataqmi kawsay ofrendatawan tallinapaq vino ofrendatapas. 18Hinaspam chay ñoqapaq sapaqchakuq runa, asuykuwanaykichik carpapa punkunpi ñoqapaq sapaqchasqan chukchanta kachiy-kachiyta rutuchikuspan ninaman wischuykunqa, ñoqawan allinlla kasqanmanta rupaq ofrendapa ukunman. 19Sacerdoteñataqmi chay ñoqapaq sapaqchakuq runaman hapichinqa carneropa yanusqa brazonta chaynataq canastillapi kaq mana levadurayuq tantatawan mana levadurayuq tortillatapas. Chaykunataqa hapichinqa ñoqapaq sapaqchasqan chukchanta ruturachikuptinñam. 20Chaymantam sacerdotepa kuyuchisqa ofrendata hina ñoqa Tayta Diosman ofrecemuwanqa. Ofrecemuwasqan animalpa qasqonwan piernanqa ñoqallapaqña sapaqchasqa kasqanraykum sacerdotepaq kanqa. Chaynata sacerdote ruwaruptinñam chay runaqa vinota tomanman.
21 #
Hch 21.23-24. Kay yachachikuykunaman hinam ñoqa Tayta Diospaq sapaqchakuq runaqa ruwanqa, atisqanman hinam imatapas ruwanqa. Chaytaqa ruwanqa ñoqallapaqña sapaqchakuqkunapaq yachachikuyman hinam, nispa.
Runakunapaq imaynam Sacerdotekuna Diosta mañakunankumanta
22-23Aaronman chaynataq churinkunaman ninanpaqmi Moisesta Tayta Dios kaynata nirqa:
Israelpa mirayninkunata bendecispaykichikqa kaynatam ninkichik:
24“Tayta Diosyá bendecisuspayki waqaychasunki.
25Tayta Diosyá allin ñawinwan qawarisuspayki llakipayasunki.
26Tayta Diosyá kuyakuywan qawariykususpayki hawkayayta qosunki”, nispa.
27Chaynatam Israelpa mirayninkunapa favorninpi sutiyta rimarinkichik, hinaptinmi paykunata bendecisaq.
ที่ได้เลือกล่าสุด:
Números 6: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012