Números 23
23
1Rey Balactam Balaam nirqa:
Qanchis altarkunata kaypi hatarichipuway hinaspa qanchis torokunatawan qanchis carnerokunata nakamuy, nispa.
2Chaymi Balaampa nisqanman hina rey Balac ruwarqa. Hinaptinmi iskayninku huk torota huk carnerota wañuchispanku sapa altarpi ofrecerqaku.
3Chaymantam rey Balacta Balaam nirqa:
Ofrecesqayki animalpa ladonpi sayaykuchkay. Ñoqañataqyá rirusaq, ichapas Tayta Dioswan tuparamuyman, nispa. Hinaspanmi chunniq orqoman qespirqa.
Israel runakunapa favorninpi Balaam rimarisqanmanta
4Chaypim Tayta Dios rikuriykurqa, hinaptinmi Balaam nirqa:
Qanchis altarkunata perqachispaymi sapa altarpi huk torotawan huk carnerota ofrecemurqayki, nispa.
5Rimananpaq Balaamta yachachispanmi Tayta Dios nirqa:
Rey Balacman kutispa nisqayta hinalla nimuy, nispa.
6Balaam kutiruptinmi rey Balacqa Moab nacionpi llapallan kamachikuqkunapiwan lliw kañana ofrendanpa waqtanpi sayachkasqaku. 7Hinaptinmi Balaam kaynata nirqa:
Aram nacionmantam rey Balac pusachimuwarqa,
intipa qespimunan law orqomantam Moab nacionpa reynin pusachimuwarqa;
paymi kunamuwarqa:
“Hamuspayki Jacobpa mirayninkunata ñakaykapuway,
Israelpa mirayninkunata ñakaykapuway”, nispa.
8Ichaqa,
¿Imanispaytaq Tayta Diospa mana ñakasqankunata ñakayman?
Paykunapaq allinllata munachkaptinqa
¿imaynataq paykunapa mana allinninta rimayman?
9Kay alto orqokunamantam paykunata qawarini,
kay moqokunamantam paykunata rikuykuni.
Paykunaqa wakin nacionkunamanta sapaqchakuspa yachaq runakunam.
10Jacobpa mirayninkunaqa ñutu allpa hinañam,
¿pitaq yupayta atinman?
¿Pitaq hayka kasqankutapas yachanman?
¡Ima allinraq kanman allin ruwaq runakuna hina
ñoqapas wañukuptiyqa!
¡Ima allinraq kanman paykunapa wañukuyninta
hina ñoqapas chinkaruptiyqa!
11Chaymi Balaamta rey Balac reclamarqa:
¿Imatataq rimachkanki? Ñoqaqa enemigoykunata ñakanaykipaqmi pusachimurqayki, manam paykunata bendecinaykipaqchu, nispa.
12Hinaptinmi Balaam nirqa:
Ñoqaqa nirqaykiñam, Tayta Diospa niwasqallantam rimasaq, nispa.
13Rey Balacñataqmi nirqa:
Huklawman hakuchik, chaymantaqa manam lliw Israel runakunapa campamentontachu rikunki aswanqa wakillantam, chaynapi ñakaykapamuwanaykipaq, nispa.
14Chaymi Balaamta rey Balac pusarqa Pisga orqopi Zofim patakama. Chaypim Balaam qanchis altarkunata ruwaspa huk torotawan huk carnerota sapa altarpi ofrecerqa.
15Hinaspanmi rey Balacta nirqa:
Lliw kañana sacrificioykipa waqtanpi sayaykuchkay. Ñoqañataqyá rirusaq Tayta Dioswan tuparamunaypaq, nispa.
16Chaypim Balaamman Tayta Dios rikuriykuspan kaynata yachachirqa:
Rey Balacman kutispayki nisqayta hinalla nimuy, nispa.
17Balaam kutiruptinmi rey Balacqa lliw kañana sacrificiopa waqtanpi sayachkasqaku, Moab nacionpi kamachikuqkunapiwan kuska. Hinaptinmi rey Balac tapurqa:
¿Imanintaq Tayta Dios? nispan.
18Chaymi Balaam kaynata profetizarqa:
¡Yaw Balac, hatariy!
¡Yaw Ziporpa churin, nisqayta uyariy!
19Diosqa manam runachu,
manam payqa llullakunmanchu,
tanteasqantapas manam yanqachanchu,
imapas rimasqantaqa ruwanqapunim,
imapas nisqantaqa cumplinqapunim.
20Ñoqataqa bendecinaypaqmi kamachiwarqa,
Diospuni bendecichkaptinqa
manam kutipaymanchu.
21Jacobpa mirayninkunataqa
manam pipas huchayuqmi ninmanchu,
Israel runakunataqa
manam pipas mana allin ruwaqkunam ninmanchu.
Tayta Diosmi paykunawan kachkan,
reyninkuta hinam paykunapas hatunchanku.
22Egiptomanta hurqomuqninku Diosqa
búfalo hina kallpasapallañam.
23Jacobpa mirayninpa contranpiqa
manam layqapas atinmanchu,
Israelpa mirayninpa contranpiqa
manam qatipaqkunapas atinmanchu.
Kunanqa Jacobmantawan Israelmantam ninqaku:
“¡Mayna admirakuypaqmi qanwan
Diospa ruwasqanqa!” nispanku.
24Kay llaqtaqa león hinam hatarichkan,
león hinam chutaparikuchkan.
Manam samaykunqachu wañuchisqanta mikuruspan yawarninta llaqwanankama.
25Hinaptinmi Balaamta rey Balac nirqa:
Mana ñakaspaykiqa amataq bendeciypaschu, nispa.
26Balaamñataqmi nirqa:
¿Manachum ñoqaqa nirqayki: “Tayta Diospa niwasqallantam ruwasaq”, nispay?
27Chaymi rey Balac nirqa:
Huklawman hakuchik, ichapas Dios munanman chaymanta ñakaykapuwanaykita, nispa.
28Chaynapim Balaamta rey Balac pusarqa Peor sutiyuq orqopa puntanman. Chaymantam tukuy chunniq rikukurqa. 29Chaypim rey Balacta Balaam nirqa:
Kaypi qanchis altarkunata hatarichipuway hinaspa qanchis torotawan qanchis carnerota nakamuy, nispa.
30Chaynapim Balaampa tukuy kamachisqanta rey Balac ruwarqa, hinaspam huk torotawan huk carnerota wañuchispa sapa altarpi ofrecerqa.
ที่ได้เลือกล่าสุด:
Números 23: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012