Mak 16
16
Arhiọkpaegbe
(Matiu 28:1-8; Luk 24:1-12; Jọn 20:1-10)
1Ugbẹn vbe Ẹdẹ Ikẹtin ghi gberra nẹ, Meri Magdalen, Meri ne iye Jems, kevbe Salomẹ keghi viọ emwi ne ọ winhin ne iran do yae wo ikun e Jesu. 2Ugbẹn vbe ovẹn ghi wa yan rre vbe owiẹ vbirrivbirri vbe Ẹdẹ uzọla, iran kegha rrie idin. 3-4Ugbẹn vbe iran ghi khian vbe odẹ, iran kegha zẹ iro wẹẹ, “De ọmwa ne ọ ra werriẹ okuta hin unu idin rre ne ima?” (Okuta ẹrẹkhẹrẹ nọ.) Ugbẹn vbe iran ghi tọn aro mu, iran ghi ya ghe a werriẹ okuta ni fua nẹ. 5Iran keghi la uwu idin ni, iran keghi do vba igbama ọkpa ne ọ yọ ẹwu ne ọ fua, ọ tota ye obọ erha ọmwa, ohan keghi mu iran.
6Rẹn tama iran wẹẹ, “Wa ghẹ gie ohan mu uwa, Jesu ne ovbi Nazarẹt ne a kan rẹn mu ugbugbe wa gualọ khian. Sokpan ẹ i ghi rre emwa na, ọ rhiọkpaegbe nẹ, ghe ehe ne iran te wa ẹre yi. 7Wa ya na iyẹn ma avbe erhuanegbe kevbe Pita wẹẹ, ‘Ọ ke odaro ne uwa gha rrie Galili, evba wa gha na miẹn ọẹn zẹ vbene ọ khama uwa.’ ”
8Iran keghi ye ulẹ ladian vbe idin rhunmwuda ohan vbe orrirri ne ọ gbe ku iran, iran ma gu ọmwa rhọkpa guan rhunmwuda ohan mu iran.
VBENE EMWA ESO KA GBẸN UFOMWẸ EBE NA HẸ
Jesu Rhie Egbe Ma Meri Magdalen
(Matiu 28:9-10; Jọn 20:11-18)
[ 9Ugbẹn vbe Jesu ghi rhiọkpaegbe nẹ vbe idin, vbe owiẹ vbirrivbirri ọghe Ẹdẹ Izọla, ọ keghi ka rhie egbe ma Meri Magdalen, ọmwa ne ọ khu orhiọn esu ihinrọn ladian vbe egbe ẹre. 10Rẹn keghi ya na iyẹn ma ivbi otu ẹre. Iran ni gha viẹ, iran na vbe gha khiẹ. 11Rẹn ghi tama iran ighẹ Jesu rre agbọn ighẹ rẹn ye aro irẹn miẹn ọẹn, iran ma yae yi.
Jesu Rhie Egbe Ma Avbe Erhuanegbe Eva
(Luk 24:13-35)
12Vbe iyeke ọnọna, Jesu keghi vbe la odẹ ọvbehe rhie egbe ma eva vbe uwu avbe erhuanegbe ẹre vbe iran rrie igue ọkpa. 13Iran keghi werriegbe vbe odẹ gha dee do na iyẹn ma e nekpa, sokpan iran ma yae yi.
Jesu Rhie Egbe Ma Iran Ne Owọrọ
(Matiu 28:16-20; Luk 24:36-49; Jọn 20:19-23; Iwinna 1:6-8)
14Vbe okiekie ehia, Jesu keghi rhie egbe ma avbe erhuanegbe ne owọrọ vbe ehe ne iran na gha rri evbare, ọ keghi gu iran gui ba ẹmwẹ ne iran i na mwẹ iyayi kevbe wẹ ekhọe iran mu rri sẹ vberriọ ne iran ma na ya emwa ne ọ miẹn ọẹn vbe o rhiọrre nẹ yi. 15Ọ tama iran wẹẹ, “wa gha rrie uwu agbọn hia ne uwa vbe ya kpe orhu iyẹn ne ọ maa ma emwa hia. 16Ọmwaikọmwa ne ọ yayi, a na vbe samẹ nẹ ẹn, ọ gha miẹn imiẹnfan. Ọmwaikọmwa ne ọ ma yayi, a gha bu abe gbẹe. 17A gha rhie ama ẹtin na ne avbe emwa ni yayi. Iran gha ya eni mwẹ khulo avbe esu ladian. Iran gha zẹ ẹvbo ne iran ma rẹn. 18Iran gha ya obọ mu ẹyẹn ra te iran rri eruan, ẹ i ru iran emwi rhọkpa. Iran gha viọ obọ iran yan avbe ọkhọnmwọ, egbe ghi rran iran.”
A Tọn Jesu Mu Gha rrie Ẹrinmwi
(Luk 24:50-53; Iwinna 1:9-11)
19Ugbẹn vbe Nọyaẹnmwa Jesu ghi gu iran guan nẹ, a keghi tọn ẹn mu gha rrie ẹrinmwi, ọ na tota ye obọ erha ọmwa Osanobua. 20Avbe erhuanegbe keghi ladian ya gha kpe orhu lele ehe hia khian. Nọyaẹnmwa keghi rhie obọ ba iwinna iran, ọ kegha ye ama kevbe ẹtin rhie ma wẹ, orhu ẹmwata ọre iran kpe e.]
UFOMWẸ NẸDẸ ỌVBEHE ỌGHE EBE NA
[ 9Ikhuo ni keghi bu Pita kevbe avbe esiọre. Iran keghi ya vbọlọ tama iran vbe uwu ẹmwẹ ne a tama iran. 10Vbe iyeke ọna, Jesu keghi tobọ ọre ya ẹmwẹ etẹbitẹ etẹghori ọghe imiẹnfan ne ẹ i mwẹ ọfo gie avbe erhuanegbe ẹre uhunmwu ke ọlarre owẹn ya sẹ ọlarrie ẹre.]
ที่ได้เลือกล่าสุด:
Mak 16: EDO96
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
@ The Bible Society of Nigeria, 1996
