1 Hakorinte 6
6
Mandhango ghopakatji kawatawi
1Nye yokuyendera ghumweya ghopapenu, oyu ghadi non̂ando kwamutawi ghumweya, gha ka shane ndhango dhendi kwawapanguri wawahayidena, aye shidhishana kwawatawi? 2Mbadi mwa yidimuka eshi, hatawi ne mbo hana tetera yopakaye ndi? No ngeshi mbo mu tetere yopakaye. Mbadi wa kukona mwe tundhangoghana ndi? 3Kadi ya kudimuka mwe eshi, haengeli mbo ha tetera ndi? No karo kuyinu yokehe diyuwa. 4Ngeshi mwa karo nomandhango muyinu yokehe diyuwa, mu thighe keho hanu wa ha dhina mbunga eshi ha kare hapanguri ndi? 5Eyi ne kuna kuyighambera mukumufitha honyi. Nane mbadipo pakatji ken̂u mukamaghano yu ghokukona kupangura n̂ando dhopakatji kawatawi ndi? 6Ene mutawi ghumweya gha yendanga namuyendhendi kundhango no kughutho wawapanguri hokupira matawero ndi?
7Nando dhenu pan̂anyi‐n̂anyi ne mbadiko. Yoyishi mwa pakerera mandhango ghenu pofotji. Nye mwa shwenena rupetho? Nye mwa dhirera kukuthigherera eshi ha mu kungure? 8Mudyango dyoyinu yo, mwa tenda mwe ghuyi no mwa kunguranga hamweya. Eyi ne mwa yi tenda kwawatawi hayendhenu. 9Endi mbadi mwa yidimuka eshi, hanu hokutenda ghuyi ne mbadi mbo ha yora ghutungi waNyambi ndi? Mwa kwangera mwathinda. Mbadiko hakarungu ngambi hakakukarera hanyambi hombango, ngambi hakakutjora mayekero ngambi hakakukutapa kuyishamberera yodidhiko, ngambi hakakutenda yinu yohonyi, 10ngambi hakaghumu ngambi hayidakwi, ngambi hapata ngambi hakambango, mbadi mbo ha yora ghufumu waNyambi. 11Kemo dyo ha karire karo hamweya hopapenu. Ene mwe, mwapwa kukushura, kumaharwero ghenu, ha mu pongokitha, ha mu thigherera muDina dyaHekudyetu Jesus Kristusi no paMupepo waNyambi.
Mufumaneke Nyambi muyirama yenu
12“Yoyiheya ha yi ni fundhwera.”
Kemo, ene mbadi ya hungama yoyihe.
“Yoyiheya ha yi ni fundhwera.”
Kemo, ene mbadi na kona kutokomena kehe thinu.
13“Yidya ne yadira, no dira ne dyayidya.”
Ghuhunga, Nyambi ne mbo ghana dhongonona yoyiheya yi. Yirama yamunu, mbadi yayirumberitha yorungu. Ene yaNyambi yu gha kara Fumu, no Fumu karo peghuru dhoyirama yetu. 14Nyambi gha tumunine Fumu nongcamu dhendi mukufa, naFumu Yu dyo mbo gha tu tumuna natwe.
15Mbadi mwa dimuka eshi yirama yenu ne yipo yaKristusi ndi? Ni tumbure thipo thaKristusi ho ni thi tende mukadhi ghorungu ndi? Kadi kemo! 16Endi mbadi mwa dimuka eshi, yomuhe mukakukakatera mukarungu ne hana kutendi thirama thofotji ndi? Nyambi ghana kughamba eshi mbana kara hakayirama yofotji mughuwadi wawo. 17Ene yu ghokukupakerera naFumu, gha kara nomudhimu ghofotji nendi.
18Mu thighe yipara yorungu. Kehe diharwero di ghana kutenda munu, kadi dya kuyirama yendi, ene yu ghana kupara murungu, ghana kuharura kuyirama yendi thinda. 19Karo mbadi mwa dimuka eshi, yirama yenu ne tembeli waMupepo ghoKupongoka, oyu gha tunga mumwenu noyu mwa wanine kwaNyambi, ene kadi mumwenu mwathinda. 20Amwe ne mwapwa kughura. No paro dhapwa kuruwera. Yodigho mu fumaneke Nyambi muyirama yenu.
ที่ได้เลือกล่าสุด:
1 Hakorinte 6: MHW1986
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Mbunga dhoBayibili dhaNamibia (Bible Society of Namibia) 1986