1 Hakorinte 10
10
Mashwenekero ghokughunyambi ghombango
1Mwayendhange, ame na haka kumuvurukitha eshi, hakerekandongo wetu wahe ha karire kwishi dhodivuyi no wahe ha tjinaghanine dikuruviya. 2Wahe ha pwire kuyogha mudivuyi nomudikuruviya eshi, ha kare hakathishongero waMosesi. 3Wahe ha dire yidya yofotji yomudhimu. 4No wahe ha nwine yinwa yofotji yomudhimu. Yoyishi ha nwine mudimuwe dyomudhimu edi dya yendire pofotji nawo. Dimuwe di ne yoKristusi. 5Ene Nyambi mbadi gha shambererire muwingi wawo hopapawo. Yoyi awo ne ha kudhirire mumamboreya.
6Yinu yi ne ya karire yira thitamenedhi kukwetu eshi, tu dhire kukara yira wa ya thinenekire yirumbera yawo yoyimango. 7Mbadi mwa kona kukara hakareri wawanyambi hombango yira hamweya hopapawo. Awa ha tjangera eshi: “Diko dya hungumanine di dye no kunwa, ho dyeman̂anyine di kutape kughuyi.” 8Twa tenda karo rungu. Thika di ha tendire hamweya hopapawo rungu. Ene mudiyuwa dyofotji ha fire hanu mayovi makumi mawadi nomahatu. 9Twa mu sherera Kristusi, thika di ha mu shererire hamweya hopapawo. Awo ne gho ha fire kuyiyoka. 10No mwa mwiman̂anyena Nyambi, thika di ha mwiman̂anyenine hamweya hopapawo. Nawo ha pwire kupagha kwamuengeli ghoyifa.
11Eyi ya hokokerire kukwawo yinu yi ne, thitamenedhi thokukwetu. Ho yapwire kutjanga yira mashingero ghokukwetu twe tudi paghuhura ghomanako gha twa parithire.
12Yodigho kehe‐yu ghana kughayara eshi gha nemana, gha dimuke eshi yene ghawa. 13Mbadiko mayerekero agha gha piterera yi gha shwena munu agha gha mu witha. Nyambi ne muhunga. Aye mbadi gha kumuthigherera eshi ha mu yereke kupiterera mangcamu ghenu. Ngeshi ha gheya mayerekero, mbadi mbo gha wana karo ndhira. Kemo sho mu kone kughawitha.
14Mwahakwa, yodigho mu tunde kwawanyambi hombango. 15Ame na kughamba nenu yira mwakamaghano. Mu kutetere mwathinda koyi na kughamba. 16Thinwitho thomatumero, ethi tuna kutumeritha Nyambi ne, mbadi ghomakupakerero nomanyinga ghaKristusi ndi? Ghuroto ghu tuna kuyondora ne, mbadi ghomakupakerero noyirama yaKristusi ndi? 17Yodigho, ghuroto ghofotji ghu ngambi ngepidi twa kara twengi, twahe twa kara thirama thofotji. Yoyishi, twahe twa kara kughuroto ghofotji.
18Mu mone eshi ngepi di yidi kudiko dyaWajuda. Mbadipo makupakerero pakatji kothinyaku nawa hana kudya muyambo ndi? 19Nye na kughambera kemo? Eshi muyambo ghokwanyambi ghombango ngambi nyambi ghombango ne nomudyo wayo ndi? 20Mbadi kemo, ene wa ha tupura kukwawo, ha tupura kwawashatani, kadi kwaNyambi. Name mbadi na haka eshi mu kupakerere nawashatani. 21Mbadi mwa kona kunwa thinwitho thaFumu no thawashatani. Mbadi mwa kona kuyerana kuthidyero thaFumu no karo thawashatani. 22Endi tuna haka kushamuna Fumu? No yatwe twa kara nongamu dhokupiterera Ye ndi?
Yoyiheya yakudifumanekero dyaNyambi
23“Yoyiheya ha yi fundhwera.”
Kemo, ene yoyiheya kadi yihunga.
“Yoyiheya ha yi fundhwera.”
Kemo, ene yoyiheya mbadi ya rikanya.
24Gha shana munu yokumuroghera thinda, ene yokwamuyendhendi ndani.
25Dye yoyihe yi ha ghuritha mundhugho dhomapaghero ghonyama, kupira noyighayadhara, 26yoyishi, “Kaye ka kara kaFumu, no yoyiheya yi ya karapo.”
27Ngeshi ha mu ragha mukakudhira kutawa, namwe ha mu himi kuyenda ko, mu dye yoyihe yi sho gha mu yarekere kupira norwipu‐rwipu. 28Ene ngeshi ha mu tongwera ghumweya eshi: “Nyama yu ne muyambo wanyambi ghombango,” mwa dya ko, pamurandu ghoyu ghana yi tongora no pamurandu ghoyighayadhara. 29Mbadi na kutamba kumahimeno ghoye ghothinda, ene gha, ghaghumweya.
“Pashanye” ghuna kwipwera eshi, “ngepi di sho gha kone kushinga ghumweya horo dhange muyihima yendi? 30Ngeshi ha ni towaritha thinu nomatumero, nye keho yokuniyodhinganena, ethi na tumera kwaNyambi?”
31Ngambi ha mu di, ngambi ha mu nu ngambi ha mu tendi kehe thi, mu tende yoyihe kudifumanekero dyaNyambi. 32Mwa yakunuka kwaWajuda, ngambi kwaWahirika ngambi kumbunga dhaNyambi. 33Ene thika me: Ame na yereka kuwana wahe muyoyihe. Mbadi na shana yange nothinda vene, ene yawengi hamweya eshi, nawo hapwe ndani kughamwena.
ที่ได้เลือกล่าสุด:
1 Hakorinte 10: MHW1986
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Mbunga dhoBayibili dhaNamibia (Bible Society of Namibia) 1986