Markus 4
4
“Ap mesik en eʼgen owi pelil laga,” oluk ebam elitsogo moʼgulentesi wene
(Matius 13:1-9; Lukas 8:4-8)
1Pobuk at Yesus ik Galilea omugwe ano esaʼgoma welat wene moʼgulentesi. Moʼgulentasumu aphwami enebe aʼbigat eragam odoktu egesema re, is enebe ik esaʼgoma onoboluk e, at ebe ik so pam hutla ʼgwegei. 2Hutla ʼgwegeitik e, wene di pam yu pam elit hasulat, aʼbigat moʼgulentesi. Moʼgulentasulat e, mesik disogo moʼgulentesi,
3“Henesaʼgo hwelit. Ap mesik yabuk wokho eʼgen owi yeriso aʼge peligoluk libaga. 4Libagarik, pelil lasulat e, eʼgen owi logon ebela pam ʼbelebak poluk laga. ʼBi lasuam e, sue wagarik e, ʼberlek perlengsogo neʼgei. 5Ye, eʼgen owi logon e, helep pam ʼgwiang weiyatma ʼbelebak poluk laga aʼge re, ʼgwiang weiyatma oluk e, perleneat ʼbaktegei. 6ʼBaktegei aʼgeat de, o mo pou wagama re, emeʼgen yoru erlakma oluk e, sawet sawet ʼbuk aga. 7Ye, eʼgen owi logon e, molip salma ʼbelabil lagama re, molip ebano lok agalat e, owi op aʼge yogo ano sebelhesimu ʼgen-ʼgen agarik e, eʼgen u erlakma en mo egei. 8Ye, eʼgen owi mesik e, ʼgwiang opma ʼbelabil laga aʼge re, ʼbaksogo ebe lok agarik e, eʼgen egei. Edip mesik pam e, eʼgen 30 egesegei. Edip mesik pam e, 60 egesegei. Edip mesik pam e, eʼgen 100 egesegei,” oluk moʼgulentesirik e,
9eʼberlik disogo moʼgulentesi,
“His henesaʼgo oruak holuk e, opsogo hwelit o,” oluk moʼgulentesi.
Yesus en e, “Wene ebam elitsogo moʼgulhentasu legi ai, ebe disogo o,” oluk moʼgulentesi wene
(Matius 13:10-17; Lukas 8:9-10)
10Asogo moʼgulentesirik, at Yesus ematek oruakma, pobuk is enebe 12 ebano emin, is nin pema Yesus en wene moʼgulentasukhwe enesaʼgo hweligisa aʼge emin, eʼbek wegesarik e, disogo moʼgulegisa,
“Hat en wene ebam elit hasulat moʼgulnentigen ano, ebe ʼgesogo oluk moʼgulnentigen,” oluk ebam hin wegesa. 11-12Hin wegesema re, at en e, disogo moʼgulentesi,
“Allah en eragam enebasu wene ai, at ogola hisogo welago aʼge, wene his nak e, henaluk emagoluk ʼbaksogo moʼgulhonto epesi aʼgeat de, is aphwami oʼborl oʼgwe aʼge ai nak e, at Allah en e,
Is wiak togwi aʼge ai ukpoluk enebabut heberlumu re,
an en erlagapsogo ukpaikno oluk e,
is enil hogu lema aʼgeat de,
dokhumsogo hogu lema erlak o.
Ye, enesaʼgo hologu lema aʼgeat de,
dokhumsogo hologu lema erlak o, (Yesaya 6:9-10)
oluk egei ai hegit emagoluk, wene di pam yu pam elit hasulat, moʼgulentasu legi ai o,” oluk moʼgulentesi.
At Yesus en, “Ap mesik eʼgen owi pelil laga, oluk moʼgulhentegis ano re, ebe disogo,” oluk moʼgulentesi wene
(Matius 13:18-23; Lukas 8:11-15)
13At Yesus en asogo moʼgulentesirik e, pobuk disogo moʼgulentesi,
“His e, wene ebam elitsogo moʼgulhentegis ano pobirak erlak heneperlak welegep holuk e, pobuk wene di pam elit hasulat, yu pam elit hasulat, moʼgulhentasuam e, noʼgosogo pobirak poluk henaluk ema. 14Ap mesik eʼgen owi pelil noso aʼge oluk moʼgulhentegis ai ebe re, Allah iagat moʼgulentil noʼgwi aiat o. 15Ye, eʼgen owi logon ebela pam ʼbelabegei ai ebe re, is aphwami pema en Allah iak enesaʼgo holugumu re, Iblis perleneat wagalat e, wene enedemu yogo aʼge ano henokho woluk lasu o. 16Ye, eʼgen owi logon helep pam ʼbelabegei ai ebe re, is aphwami logon en Allah iak ai enesaʼgo holugularat de, onogola en enagai hogulat e, perleneat wogwi. 17Asogo perleneat wogwi aʼgeat de, wene ai enedemu emeʼgen yogo erlak il mesigat oruakma en, aphwami nin pema en Allah iak ai paget, eʼgin-peʼgin enebam pogulat, wiagabonobogulat, tugumu re, perleneat enede ʼbuk otluk e, wene ano ʼgoboksogo ukpoluk libagai aiat o. 18Ye, eʼgen owi logon molip salma ʼbelabegei aʼge ebe re, is aphwami logon Allah iak ai enesaʼgo hweligisarik enat de, 19onogola en e,
Yogodak ya paget noʼgosogo tik e, oluk, wenemennei yat horok eberak poluk,
Naʼge aʼbik wellep e, oluk onogola eberugulat, onuʼgwarek en lalhorlugulat, onogola en di aʼge yu aʼge nagai opogulat, togwi ai en e, wene ai edip ʼgen-ʼgen agalat e, eʼgen egesiso erlak aiat o. 20Ye, eʼgen owi logon ʼgwiang mulimu ʼbelabegei ai ebe re, is aphwami logon Allah iak ai enesaʼgo hil-hol wegesarik e, wene ano enedemu eʼgen egesiso yo. Edip mesik pam en eʼgen 30 egesiselat, edip mesik pam en eʼgen 60 egesiselat, edip mesik pam en eʼgen 100 egesiselat, egesiso aiat o,” oluk moʼgulentesi.
Yesus en, “Esaga ʼgwialogo sogoluak lekho po mia,” oluk ebam elitsogo moʼgulentesi wene
(Lukas 8:16-18)
21At Yesus en asogo moʼgulentesirik e, pobuk disogo egei,
“Aphwami en esaga ʼgwialogo re, sogoluak en lekho pogulat, e ʼbet en nogo ogumu ebano lekho pogulat, tuogoluk ʼgwialogwi no? Erlak o. We, ʼgwialogo re, e delak pam pouwogoluk ʼgwialogwi o. 22Di aʼge yu aʼge hisogo oruak aʼge ebano, selakma enam emagoluk hisogo oruak o. Ye, di aʼge yu aʼge sebelak oruak ai, ʼbaksogo selakma emagolugat, sebelak oruak o. 23Ai enat, sa en esaʼgo oruak holuk e, opsogoat holuak o,” oluk moʼgulentesirik, 24-25wene mesik disogo moʼgulentesi,
“Wene moʼgulhentasu legi ai, opsogo pobi togu lomup o. Sa en wik-wok tenak oruak holuk, pobuk Allah en logon emin wogeselat, ye, sa en wogo erlak, we, wei nak tenak welema holuk, delogo togolik hwerlasulat, tua ai en e, his en aphwami logon wouwagoluk elit aʼge walhogulat wogontogu legep ai ʼgelaʼge, his en wogentagup hegitsogoat, at Allah en elit aʼge walsogo wokhontoluk e, logon emin ebam louksogoat wokhontouwayat o,” oluk moʼgulentesi.
Yesus en owi ʼbaktiso aʼge ebam elitsogo moʼgulentesi wene
26Yesus en wene asogo moʼgulentesirik e, mesik disogo moʼgulentesi,
“Allah eragam enebasu ai re, ap mesik iabukmu eʼgen owi peliso ʼgelaʼge o. 27Iabukmu hwik ʼbelabiselat e, o hik osoam nogoselat, dakha osoam elaluk agalat, tisokhwe re, owi ano ʼbaktagalat e, lok ago yo. Asogo lok ago aʼgeat de, noʼgosogo lok ago e, oluk e, wongat welago. 28Owi ai yabukmu yorogwiam e, naduk naduk omuat ebe naduk ʼbaktagalat e, pobuk eʼgen eselat, hurle ago ai o. 29Hurle agoam e,
Eʼgen ʼbalu ano arat horok lau waga o, oluk, eʼgen ʼbalogwi aʼge ʼgarok ʼgorlo aʼge woluk ebe perleneat ʼbalogwi o,” oluk moʼgulentesi.
ʼGebi eʼgen owi pam elitsogo moʼgulentesi wene
(Matius 13:31-32, 34; Lukas 13:18-19)
30Asogo moʼgulentesirik e, pobuk mesik disogo egei,
“Allah eragam enebasu ai ebe re, no ʼgelaʼge ul. Ye, no ebam elitsogo ul. 31Ai ebe re, ʼgebi eʼgen owi ai ʼgelaʼge o. Ap mesik en ʼgebi eʼgen owi pelegei. Di aʼge yu aʼge eʼgen owi ai, weiyat aʼgeat de, ʼgebi eʼgen owi ai nak e, modok weiyat o. 32Asogo aʼgeat de, sawi emin, wudat emin, owi aʼge nin pema emin, yorogwiam e, ʼbaktagalat e, edip wei aʼge ʼgelaʼge ligago. Aʼgeat de, ʼgebi ai nak e, pelogwiam edip modok logat libagalat e, eʼgik aʼbik dualogo eʼgela aʼbik agoam e, sue darak noso aʼge wagalat e, ʼgunmu eba owi elirat wosu ago ai ʼgelaʼgeat o,” oluk moʼgulentesi.
33Is aphwami en wene pobi togwi hegitsogo pobi tuagoluk, aʼbigat di pam elit hasulat, yu pam elit hasulat, moʼgulentasu laga. 34Is aphwami pema moʼgulentaiyogoluk holuk e, wene ebam elit hasulat nak moʼgulentasu laga aʼgeat de, at osi iak wogu legesa aʼge ebano nak e, enemin enematekma welat, wene ebe selakma ʼbaksogo moʼgulentasu laga.
Yesus en yasobu emin, ik hererimtak wago aʼge emin, haʼbugaptegei wene
(Matius 8:23-27; Lukas 8:22-25)
35Asogo moʼgulentasu lagarik e, o hopmu akhit at Yesus en osi ebano wene disogo moʼgulentesi,
“Nis ik etle akhit libomok o,” oluk moʼgulentesimu, 36is en e, ik so Yesus welagama ebano oruakma eʼbek ʼgoluk e, aphwami esan ebano eba onoboluk, at ebe woluk libegesa. Is libagaihwe re, aphwami pema ik so logon pam mesik erlige libegesa. 37Asogo libagaimu, yasobu annisogo punhau wagama re, ik ano hererimtak wagalat, ʼgwesalogo so ogola ʼgwegeimu emde lorop tiogoluk tegei. 38Asogo tisokhwe, at Yesus ebe so agema sum enaʼgul ago togwi aʼge pam aʼgul agosogo nogosoma osi ebano en elalugap pegesa. Elalugap pogulat e, disogo moʼgulegisa,
“Nue. Nis ik olomu lul yema nenebe hede erlak a?” oluk moʼgulegisa. 39Moʼgulegisema, at elaluk agarik e, yasobu ano wene yageselat e,
“Hoborlogouk erlak emen,” egeitik e, ik ano moʼguleselat e,
“ʼGarok in,” oluk moʼgulesimu re, yasobu ʼbalagalat, ik ano ʼgarok eselat, tegei. 40Asogo tegeimu re, at Yesus en e, disogo moʼgulentesi,
“His nopaget honogorlok agama togu legep. Henede an nebam owan heʼberik erlak welegep a,” oluk moʼgulentesimu re, 41onogorlok aʼbik aga. Onogorlok aʼbik agalat e, is-is ogulat e, disogo egesa,
“Eige! Ap yu sa epegep. Yasobu emin, ik hererimtak wago aʼge emin, at iak osoam hologo erlak aga ai, nonogorlok o!” oluk erliktigisa.
ที่ได้เลือกล่าสุด:
Markus 4: WUL
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
