मुलिचेला टोॽवा 8
8
1इस्तिफानास सेप्माउङ्सा सावालङा चा टाक् पिडुचे॥
सावालङा बिस्वासिचि याङ्छामा चाट्टुचिगा
हिट्ना लेम्बालाम्मा यरुसलेमङिना माङ्पाङ्ङि ठेना सातावाट् लिमा ठालाँ लिसे॥ हिट्नुङ् आरु ख्वाप्पा बिस्वासिचि याहुदिया हिट्नुङ् सामारिया छेट्रालेङ् उछिन्डे, टरो मुलिचेलाचिम्बाक् यरुसलेमङि डोक् उयुङे॥ 2हिट्नुङ् उन्चि निङ् मुक्टागा आम्टेप्मा धारमोति याप्मिचिङा इस्तिफानास उहुमुङ् आड्डिक् सानिङ्ग्वा ओलोसे॥ 3टरो सावालङा माङ्पाङ् जाखाम् चोक्मा ठालाँ चोगुए॥ उन् पाङ्-पाङ्ङि खाडाउङ् मेन्झेमा हिट्नुङ् येम्बेछा बिस्वासिचि लाबुचिउङ् साट्सा खाम्बाङ्ङि ठेन्डुचे॥#मुलिचेला टोॽवा २२:४-५; २६:९-११
सामारियाङि नुना खाबोर छिन्डाना
4बिस्वासिचि यरुसलेमलाम्मा पारिक् पारिक् डेन्ङि उछिन्डाउङ् नुना खाबोर पारचार ओचोगुए॥ 5फिलिप सामारिया खालाङ्गाङि खाडे हिट्नुङ् हिट्निगा याप्मिचि येसु डोक् खिरिस्ट ए पिक्सा पारचार चोगुचे॥ 6जोम् याप्मिचिङा फिलिपङा माट्टुना रिङ् ओखेम्सुए हिट्नुङ् उन्ङा चोगुना डोङ् ठोङ्डिना रिङ् उनिसुङ् हिट्नागा याप्मिचिङा उरिङ्ङि नुलोक् निङ्ग्वा उपिडुङ् ओखेम्सुए॥ 7हिट्नि जोम् याप्मिचिलाम्मा टोंडेबाचि राट्सा ओहोन्डाडे, हिट्नुङ् जोम् पाक्छेघात हिट्नुङ् लोङ्लेन् याप्मिचि उनुये॥ 8हिट्डेउङ् सामारिया खालाङ्गाङि ठेना हारका लिसे॥
9हिट्ना खालाङ्गाङि सिमोन ओलोडुना ठिबाङ् याप्मि डाना॥ हिट्नाँ पाइलेलाम्मा डोक् सामारिया खालाङ्गाङि चाटाक् टोॽवा चोगुङ् याप्मिचिगा निङ्ग्वा डोङ् ठोङ्डिलोक् चोगु बिडुएसुचिगा॥ हिट्नाँ “आङा ठेना याप्मि” पिक्सा ठेलोक् चोगाना डाना॥ 10हिट्नुङ् खालाङ्गाङि उयुङागा ठेगा खाट्टिगा ख्वाप्पा याप्मिचिङा “नालोक् माङ्हाङ्ङाना ठेना बोल् युङ्ग्वा” पिक्सा ओलोडुए॥ 11हिट्नुङ् जोम् बारखालाम्मा हिट्नाँ ओचाटाके मुन्डुम्ङा याप्मिचि डोङ् ठोङ्डिलोक् चोगुचिनाँ उरिङ् सोब्बेङा नुलोक् ओखेम्सुए॥ 12टरो जब फिलिपङा माङ्हाङ् उमुलुक् हिट्नुङ् येसु खिरिस्टङाना बारेङि नुना खाबोर पारचार चोगुए, टब याप्मिचिङा फिलिपङा माट्टुना रिङ्ङि बिस्वास ओचोगुए हिट्नुङ् जोम् येम्बेछा हिट्नुङ् मेन्झेमाचिङा बाप्टिस्मा ओलाडुए॥ 13सिमोन आप्पेङा चा बिस्वास चोगुङ् बाप्टिस्मा लाडुए॥ हिट्नुङ्ना सिमोन फिलिपलोक् सोरोक् वासे, हिट्नुङ् फिलिपङा डोङ् ठोङ्डिगा टोॽवाचि लोक् मिक्सेन्चि चोगुना निसुङ् उन् डोङ् ठोङ्डे॥
14हिट्नुङ् यरुसलेमङिगा मुलिचेलाचिङा सामारिया छेट्राङिगा याप्मिचिङा माङ्हाङ्ङाना रिङ् बिस्वास ओचोगुना रिङ् ओखेम्सुङ् हिट्नागाँ पाटरुस हिट्नुङ् युहान्ना हिट्नागाङि ओपाङ्सुचे॥ 15हिट्नुङ् हिट्नागाचि सामारियाङि टासाचुङ् बिस्वासिचिङा सेङ्सेङ्ना हाङ्सा ओटोगुॽवाक् नुङ् हिट्नागा लोङ्सा बिन्टि चोगाचुए॥ 16पोङ्भोने हिट्ना बेला सोम्मा खोना बिस्वासिचिङि सेङ्सेङ्ना हाङ्सा उङ्निगेट्निना डाना॥ टरो येसु डाङ्बाङाना उनिङ्ङि एडोक् बाप्टिस्मा उलिसाइसागा॥ 17जब पाटरुस हिट्नुङ् युहान्नाङा सामारियाङिगा बिस्वासिचिगा उठुङ्ङि उन्चि मुक् युङ्साचुए हिट्नुङ् हिट्नागाँ सेङ्सेङ्ना हाङ्साङाना बोल् ओटोगुए॥
18हिट्नागाचि मुलिचेलाचिङा उन्चि मुक् युङ्साचुनाँ याप्मिचिङा सेङ्सेङ्ना हाङ्सा ओटोगुगा निसुङ् सिमोनङा मुलिचेलाचि ओफाबा पिमा कोन्सा, 19हिट्नाँ लोडुचे, “याप्मिचि उठुङ्ङि आमुक् युङ्सुङ्नाँ सेङ्सेङ्ना हाङ्सा टोक्माना ना बोल् आङा चा याङ्पिडाचि लो॥”
20टरो पाटरुसङा लोडुए, “खान्ङाना ओफाबा खान्लोक् डोक् जाखाम् उलियाक्, पोङ्भोने खान्ङा माङ्हाङ्ङाना बारदान ओफाबाङा इम्मा हियुक् नुङ् निङ्ग्वा आचोगुए॥ 21माङ्हाङ्ङा आन्याँलोक् ना टोॽवा चोक्मालोङ्सा खान् खाट्टिप्मा चा आधिकार मापिनिगेट्निना, पोङ्भोने कानिङ्ग्वा माङ्हाङ्ङाना ओटोकानाङि नुना वाइना॥ 22हिड्डेउङ् खान् ओचाफेन्ना निङ्ग्वालाम्मा काएल्-काबु लिसाउङ् टाङ्बाङि बिन्टि चोगु॥ उन्ङा निङ्ग्वा चोगुए भोने, खान्ङाना ना ओचाफेन्ना निङ्ग्वा छेमा माचोक्युबियुक्॥ 23पोङ्भोने आङा कानिङ्ग्वा आड्डिक् ओचाफेन्ना रिङ्ङा इप्टुना हिट्नुङ् पापङा मारेक्टाना निसुएट्टुङ्॥”
24हिट्नुङ् सिमोनङा लोडुए, “खान्चिङा आमाट्टाचुना खोना चा रिङ् आठुङ्ङि ओठानि नुङ् टाङ्बाङि आङालोङ्सा खान्चिङा बिन्टि याङ्चोगाबिडाचि॥”
25हिट्नुङ् पाटरुस लोक् युहान्नाङा ठाहा टोगाचुगा हिट्नुङ् टाङ्बाङाना रिङ् पारचार चोक्मा हिडाचुङ् सामारिया छेट्राङिगा युक्टाम्ङि नुना खाबोर पारचार चोक्सा यरुसलेम नोक्टाचे॥
फिलिप हिट्नुङ् इथियोपियाङिना याप्मि
26ठिक् लेम्बा टाङ्बाङा पाङ्सुना माङ्हाङ् रिङ् काउग्बाङा फिलिप नाड्डे लोडुए, “टेयार लिसा हिट्नुङ् यरुसलेमलाम्मा पारघान्लेङ्ना गाजालेङ् खाट्ना खुसुना डेन्ङिना मुलि लाम्बो खाडा॥” 27हिट्नुङ् फिलिप कोबाउङ् हिट्ना लाम्बो लाम्टिए॥ हिट्ना बेला डोक् उन्ङा ठिबाङ् इथोयोपिया देसङिना नापुङ्साक् टुबुए॥ हिट्ना इथियोपिया देसङिना हाङ्मा कान्दाकिङाना हाकिम हिट्नुङ् माक्फेन्सुबेन् कापुबा कोटेरिबा डाना॥ हिट्ना यरुसलेमङि माङ्ध्यान् चोक्ङा खाडाना॥ 28हिट्नुङ् हिट्ना नापुङ्साक् राथङि युङाउङ् यासैया माङ्काटाङा छेप्टुना किताब पोढाँ लिसा उमुलुक्ङि नोक्टागेट्टाना॥ 29सेङ्सेङ्ना हाङ्साङा फिलिप लोडुए, “राथङाना नेहेटाङ् खाडा॥”
30हिट्नुङ् फिलिप चा पिन्सा राथङाना ओछेउ सोरि खाडाउङ् यासैया माङ्काटाङा छेप्टुना छाप्ला हिट्ना याप्मिङा पोढाँ चोगुना खेम्सुए॥ हिट्नुङ् फिलिपङा सिलाप्टुए, “ना पोढाँ आचोगुना रिङ् खान्ङा बुजा आचोगुए नि?”
31हिट्ना नापुङ्साकङा लोडुए, “ना रिङ्ङाना उटुप् साङा चा याङ्ओलोनेयाट्निङ् भोने, आङा खोड्डे पारिक् बुजा चोगुङ्टुङ्ना टे?” हिड्डेउङ् हिट्नाङा फिलिप छेम्डुङ् उन्लोक् राथङि एक्केउ युङ्सुए॥
32हिट्ना नापुङ्साकङा पोढाँ चोगुना धारमाछाप्लाङाना खान्डा नाड्डेना डाना–
“याप्मिचिङा उन् ठुँबा गाड्डे डोक् सेप्मा ओखाट्टुए
हिट्नुङ् उयामुङ् काहेग्बाचिगा टोकानाङि मिचेक्ङे येप्ना
ठुँबा गाड्डे डोक् उन् पाक्चा पिक्नेएट्नि॥
33हिट्नुङ् याप्मिचिङा उन् ओचाफेन्लोक् चाट्ला ओमेट्टुए
हिट्नुङ् उन् ओचेट्नुलोक् न्याए ओचोग्वाट्टुन्॥
साङा चा उपुङ्लाङाना बारेङि माप्मा उहिडुन्ना,
पोङ्भोने नाराङिगा याप्मिचिङा ओचोला उपुडुबिडुए॥”#यासैया ५३:७-८
34हिट्नुङ् हिट्ना नापुङ्साकङा फिलिप सिलाप्टुए, “ना माङ्काटाङा साङाना बारेङि माट्टुना? आप्पे उन्ङाना बारेङि इ, आरको याप्मिङाना बारेङि माट्टुना? आङा नाङाना उटुप् याङ्लोडा॥” 35हिड्डेउङ् फिलिपङा ना धारमाछाप्लाङाना ओखान्डालाम्मा उटुम् चोगुङ् येसुङाना बारेङि नुना खाबोर हिट्ना नापुङ्साक् खेम्मेट्टुए॥
36हिट्नुङ् हिट्नागाचि हिट्ना लाम्बो लिसा खाडाचिनाँ चुवा लिसाना डेन्ङि टासाचुए॥ हिट्नुङ् हिट्ना नापुङ्साकङा लोडुए, “पुयुटे, नाहि चुवा युङ्ग्वा, पाक् आङा बाप्टिस्मा लिमा हिनिङ्नै टे?” 37[फिलिपङा लोडुए, “छेम्बा डोक्, खान्ङा कानिङ्ग्वालाम्मा डोक् येसु खिरिस्ट बिस्वास आचोगुटु भोने, आङा बाप्टिस्मा पिनाँ॥” हिट्ना नापुङ्साकङा लोडुए, “आए, आङा येसु खिरिस्ट डोक् माङ्हाङ् छा नुङ् बिस्वास चोगुङ्टुङ्॥”]#८:३७ ना पोद आम्टेप्मा सोरोत बाइबलङि वाइना॥ 38हिट्नुङ् उन्ङा राथ येम्सु पिक्सा लोडुए हिट्नुङ् हिट्नागाचि इप्पाङ् डोक् चुवा लिसाना डेन्ङि खाडाचे हिट्नुङ् फिलिपङा हिट्ना बाप्टिस्मा पिडुए॥ 39हिट्नागाचि चुवालाम्मा भारा होन्डाचिनामे सेङ्सेङ्ना हाङ्साङा फिलिप लाबुङ् खाट्टुयेट्टुए॥ हिट्नुङ् नापुङ्साकङा उन् फेरि निस्वाट्टुन्, टरो हिट्ना हारका लिसा ओलाम्बो खाडे॥ 40टरो फिलिप आस्दोद ओलोडुना डेन्ङि ठेट्टे॥ हिट्नुङ् हिट्ना डेन्लाम्मा फिलिपङा कैसारिया ओलोडुना डेन्ङि मिटाङे सोम्मा ख्वाप्पा खालाङ्गाङि नुना खाबोर पारचार चोक्सा खाडे॥
ที่ได้เลือกล่าสุด:
मुलिचेला टोॽवा 8: APH
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023, Wycliffe Bible Translators, Inc. and Nepal Bible Society
