Luka 5
5
Yɛsu ɔsɔsɔbɔa baeyechwa
(Mat 4:18-22; Mali 1:16-20)
1Lɔmɔ lusu, awɛ Yɛsu waba mo mweema mɔ mɔkɔngɛ we kichibachiba kye Kɛnɛsalɛti#5:1 kichibachiba kye Kɛnɛsalɛti Kɛkyɔ kichibachiba kitwitaniwa kabee, kichibachiba kye Kalilaya. ne ndongo yee bando, na kumwisɛnɛnɛa itɛ baungwe ikomo lya Kakua. 2Na kɔmɔa, bwato chibee, chabɛchaya mɔ mɔkɔngɛ we kichibachiba ne balɔbi na kwika mɔ kɔɔya makia maabɔ. 3Yɛsu na kokobea mɔ bɔmɔ bwato, bwabɛchaya bwa Simɔni, na kosaolea Simɔni uisɔkyɛ bwato nɛ matɛkɛ, na kuchikaa, na koeyecha kea ketongo.
4Asia Yɛsu kɔɔcha, na komosaolea Simɔni itɛ: «Isɛɛnya bwato mo maache ma manika, na mwikye makia minu mo maache, nɛ kɔlɔba mwɛa.» 5Simɔni na komosaolea itɛ: «Mweyechi, tokambee kɔ bɔkɛtɛ butu bɔɔsɛ ndetwakonja keemo, kɔmɛɔcha yao, ndaikye makia mo maache.»
6Abɔ na kwikya makia mo maache, na kubunda mwɛa wabua, abe abe makia mabɛa mangabɛmbɛka. 7Na kɔlɔbɔa basambe nabɔ babɛchaya monda mwe bukinɛ bwato, babake kwa bakwase. Aolea basambe nabɔ, abɔ na kochekya bwato bɔsɛ bobee nɛ mwɛa, abe abe koenga kwina. 8Alya amɔa Simɔni Pɛtɛlɔ bia, awɛ na kokea mo meende ya Yɛsu, na kɔɔcha itɛ: «Mwaame, ndokea, kɔmɔa nae ne mondo wee bwabea.»
9Simɔni na baa basɛ babɛchaya naakɛ, bakanakana byabua ku kibuichi kyɛ mwɛa wakonja abɔ. 10Yakɔbɔ na Yɔana, baana ba Sɛbɛlayɔ, babɛchaya mo kokamba kɔmɔɔsa na Simɔni. Abɔ kabee bakanakana byabua. Yɛsu na kosaolea Simɔni itɛ: «Ndotenaya; ano ano otabɛ mɔlɔbi we bando.» 11Aɔtɔsa abɔ bwato koe matɛkɛ, na kusia biisɛ, na koyea Yɛsu.
Yɛsu osoolosa mondo wee baacha
(Mat 8:1-4; Mali 1:40-45)
12Lukinɛ lusu, Yɛsu wabɛchaya mɔ kamɔ kalya ka ɔyɔ mɔsɛngɛ. Ɔmɔ mondo wa chaa ne baacha na kwikeecha. Amɔa awɛ Yɛsu, na kokea bingukumanya kombaa kwakɛ, na kwiyaya itɛ: «Mwaame, wasokonda, unaɔsɔna kongolola.» 13Yɛsu na koenda kɔ kɔbɔkɔ, na kumubunda na kɔɔcha itɛ: «Natokonda, oloka!» Akaɛ alya, baacha na komotoka. 14Yɛsu na kɔmɔɛbɛcha itɛ: «Ndosaoleaya mondo bia bikoolelee, alakini, yaaka kwaiangoeche kwa musia kooloka kwao, kusia, oocha keochwa bwasiela Musa, ko kokoangoecha itɛ ososokoka.#5:14Ingɛ mondo osoololwa baacha, biengye oyake kwailangoeche ko basia kokoangwecha itɛ osooloka; ko bobo batamwimenye kabee mwingya bakinɛ bando. Yɔɔla Law 13:45-46; 14:1-32.»
15Ɔbɛɛ bɔbɔ, boombe bwa Yɛsu, na konyaa kɔsɛ, bando babua na kukumbakanaya ku kumuungwa ne koololwa ne ingwo chabɔ. 16Awɛ na kwisɔka ne bando na koya ataasi bando ku kwiyaya kwa Kakua.
Yɛsu osoolola mondo walɛbɛa bibando
(Mat 9:1-8; Mali 2:1-12)
17Lɔmɔ lusu, Yɛsu wabɛchaya mo koeyecha. Bafalisayɔ ne baeyechi be Salia babɛchaya ase mo kea ketongo. Batokaya mo tolya tɔɔsɛ twe Kalilaya, ne Yulɛa na toa twe Yɛlusalɛma. Yɛsu wabɛchaya mo koolola balwachi kɔ bɔkɛtɛ bwa Mwaame Kakua. 18Bamɔ bando baolea, mo kochaa mondo walɛbɛa bibando mo kyandwa. Baenga njea yee kumwingecha mo ndabo bamobeke kombaa kwa Yɛsu. 19Ndebakonja iboa kukumwingecha kɔmɔa bando baba ne kubua. Ko boa, abɔ na kokobea ko lotanda lwa elya ndabo.#5:19 Bamɔ Bayula, mo koaboka maabɔ, babɛchaya mo koanja mete mo nganda, kɔmɔngɔ na koasea ne kobomba. Abɔ na kuunjua lɛmɔ iboa na kumwikya asambea bando kombaa kwa Yɛsu, oe bochalwe mo kyandwa kyaakɛ. 20Alya amɔa Yɛsu, kuimenya kwa baa bando, awɛ na kosaolea olya molwachi itɛ: «Ee munjinanɛ, bwabea bwao bosoebeelwa.»
21Ne baeyechi be Salia, ne Bafalisayɔ, na kobangoa manungunungu na kɔɔcha itɛ: «Moke mondo ona ɔtɔtɔnda Kakua? Naani unaebeela bwabea ataasi Kakua mwɛɛnɛ?» 22Yɛsu wacheba ngani chabɔ, na kobabocha itɛ: «Ko eke kotochombya banu ngani mo metema yiinu? 23Monjaolee: Keke ne kyalɛnga asambea bibi bibee kɔɔcha: ‹Bwabea bwao bosoebeelwa› ɔbɛɛ kɔɔcha: ‹Taoka, ɛnda›? 24Natokonda mochebe itɛ mee Mwaana we Mondo nae nɛ bɔkɛtɛ bwe koebeela bwabea moono mɔ mɔsɛngɛ.» Kwibɔngɛa, Yɛsu na kosaolea olya walɛbɛa bibando itɛ: «Mee ne ɔsɔɔcha, enda kyandwa kyao ne ɔtɔka kwao!» 25Akaɛ alya, kombaa kwe bando basɛ, awɛ na kotaoka, na koenda kipɔyɔ kya kɛsɛaya awɛ ka koya kwakɛ mo koseka Kakua. 26Bando basɛ na kokanakana byabua, na koseka Kakua, na kochaa ne bɔɔba itɛ: «Tɔsɔmɔa melendo leno.»
Yɛsu usuitana Lawi
(Mat 9:9-13; Mali 2:13-17)
27Kɔmɔngɔ kwe maa makomo, Yɛsu na koola mo ndabo na kɔmɔa, ɔmɔ otolamboesa molambo wee chiina lya Lawi,#5:27 Lawi Ɔbɛɛ Matayɔ. Yɔɔla Mat 9:9. wabɛɛ a iboa lye kɔɛngɛa molambo. Yɛsu na komosaolea itɛ: «Mbyea!» 28Lawi na kotaoka, kusia biisɛ na koyea Yɛsu.
29Kɔ mɔngɔ Lawi na kosangyea Yɛsu ketokoyoo kyanaka mo ndabo yaakɛ. Monda mwa elya ndabo mwabɛa batolamboesa molambo babua kɔmɔɔsa ne bando bakinɛ babechaya mo kolya nabɔ. 30Amɔa Bafalisayɔ ne baeyechi be Salia be ndongo yaabɔ na kɔsɔnɛkɛa baeyechwa ba Yɛsu, na kobangoa kɔɔcha itɛ: «Ko eke kotolya baanu ne kɔsɔa amɔɔsa na baa batolamboesa molambo na bae ne bwabea?»
31Yɛsu na kobasaolea itɛ: «Bando bae ne maɛma baatoenga munganga, balwachi ne batomoenga. 32Sabaaka kwaitane bando be kiinɛkinɛ kombaa kwa Kakua, nabaaka ne kwaitane bando babea batuuluke kotoka bwabea bwabɔ.»
Bamɔ Bafalisayɔ bae mɔ kɔɔcha na Yɛsu
(Mat 9:14-17; Mali 2:18-22)
33Bamɔ Bafalisayɔ na kosaolea Yɛsu itɛ: «Baeyechwa ba Yɔana ne biito, batwiyaya mu kuikaka kolya ne kɔsɔa, be kwao bae mo kolya ne kɔsɔa.»
34Yɛsu na kobasaolea itɛ: «Mutuninga itɛ muunaɔsɔna kuchibea baa baitaniwee ko ketokoyoo kye ilangya itɛ baikake kolya ne moome mwɛɛnɛ we ilangya oe kɔmɔɔsa nabɔ? Kuusi! 35Keeko ketabe, olya moome mwɛɛnɛ we ilangya, otatoswe asambea abɔ. Mo maɔ masu ne motaikake abɔ kolya.»
36Yɛsu na kobasaolea bwakaɛ kee kisimo itɛ: «Kuusi mondo otokoka kɔbɛmba kyunda kye ngubɔ meyameya na kɔkɛtɛcha ku ngubɔ yee kaɛ. Ndasoketa bɔbɔ, kyunda kye ngubɔ meyameya kekabundane bwaachi na kea kye kaɛ. 37Bwakaɛ, kuusi otwiteela lifai leyaleya mu machupa me bikɔba ke kaɛ. Olya otoketa bɔbɔ, otatome lea lifai leyaleya koata maa machupa, lifai letaiteke, ne machupa mataɔnɛkɛ bokata.#5:37 Bayula babekaya lifai lyabɔ mu machupa me bikɔba. Ingɛ lifai leukuka, letokwaoche lɔbɛ. Machupa me bikɔba biyabiya maembaya nɛ lɔbɛ. Alakini, machupa me bikɔba bye kaɛ mabɛchaya mo koateka. 38Bie bwaachi lifai leyaleya liingee mu machupa me bikɔba biyabiya. 39Kuusi mondo ɔɔsɔa lifai lye kaɛ otakonde kabee kɔsɔa lifai leyaleya. Kɔ kɔmɔa otaɔchɛ itɛ: ‹Lifai lye kaɛ ne lyaachi koeta!›»
ที่ได้เลือกล่าสุด:
Luka 5: ZMB
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2022 Seed Company in coordination with Forum Communautaire des Traducteurs de la Bible et Alphabétisation
