Malk 2
2
Zezu asaka muutu widzi buka
(Mat 9.1-8; Luk 5.17-26)
1Va masi masuta, Zezu aye vutse Kapenayumi. Batu bayuka ati Zezu adzi ndaku. 2Ye batu beyitsi bekukene se ndaku, yedze yaya nde bibuma, nzii umbele ŋwe ndaku. Ye Zezu etandaka bangu Iwowe dze Nzambi. 3Batu baya Zezu ne buka, tima ye bangu yedze ne batu benayi bebapa buka. 4Ni bangu beke tuka laka buka ne Zezu, utsɨna ne batu beyitsi. Ye bangu bebita kule ŋwanza ŋwe ndaku batsʉba ibunga buma ye Zezu edze, bangu basundise buka se lipoyi ledzi edze bembula kule langu. 5Ndili ye Zezu eyene ivʉkidze dze batu babu, Zezu atanda ne buka ati: «Ŋwana wami, ma boloko mesumu mowe.» 6Ni yedze ne va belakɨsi be bitsɨla bedze untsitsi se ndaku, bedze ne utsimene se milima mye bangu ati: 7«Ye muutu yu iwowe tuu niyi? Wangu atukene waka Nzambi. Wituka boloko mesumu niza mbisa ye Nzambi?» 8Zezu ayiba metsimini me bangu yedzi etanda ne bangu ati: «Ye beyi bidzi ne metsimini me tuu niyi? 9Ye nde udilu ne utanda ne buka niyi? utanda nedzi ati: “Baboloko we mesumu mowe”, na ne utanda wangu ati: “Telime, boko lipoyi lowe landa?” 10Ni uve beyi bayiba ati, we yikwene Muutu adzi ne pɨlaka#2.10 Pɨlaka signifie le pouvoir kule senze ye uboloko mesumu.» Ye Zezu etanda ne buka ati: 11«Me tanda we, telime, boko lipoyi lowe, tseke sombo yowe.» 12Palɨkise, ye muutu mene etelime, aboko lipoyi ledzi apula busu ve batu besi. Besi bayene bongo ye bangu bekʉmise Nzambi ati: «Besu besande yene dzi ne kala!»
Zezu abanga Levi
(Mat 9.9-13; Luk 5.27-32)
13Zezu avutse uŋkolo ŋwe dzanga dze Ngalilee. Batu beyitsi bedze ne uya kwele yedzi, yedzi edze ne ulakɨse bangu. 14Ye Zezu edze ne usuta, wangu ayene Levi, ŋwana we Alɨfee, untsitsi se buma ye betolingi be bedolo. Zezu atanda nedzi ati: «Binga me.» Levi atelime ne ubinga wangu. 15Yumana, Zezu adza bila se ndaku ye Levi. Betolingi be bedolo ne batu boko bidzi ne mesumu bedze ne udza bila bane Zezu ne bebingi bedzi. Batu bevavu bedze uyitsi ne ubinga Zezu. 16Belakɨsi be bitsɨla bidzi yimvu yotu ne batu be Falizi, beyene ati, Zezu edze ne udza bila bane betolingi be bedolo ne batu bidzi ne mesumu. Bangu batanda ne bebingi be Zezu ati: «Ye kuŋwu we beyi idza bila bane betolingi be bedolo ne batu bidzi ne mesumu niyi?» 17Zezu ayuka me bangu bedze ne uwowe, atanda ne bangu ati: «Batu bidzi mingananga nde dzamvu ne unsaki, bedzi ne dzamvu ne unsaki ni mibedzu. Me keya banga batu bidzi telee, ni me ya ni ne batu biyiba ati bangu bedzi ne mesumu.»
Zezu awowe dze utsilu ve nzala
(Mat 9.14-17; Luk 5.33-39)
18Vʉsa votu, bebingi be Zambatisi ne batu be Falizi bedze ne ukuta utsili ve nzala. Batu baya suŋwule ne Zezu ati: «Bebingi be Zambatisi ne be batu be Falizi bekuta utsili ve nzala, ni ye bebingi bowe nde kuta utsili ve nzala niyi?» 19Zezu akalule ne bangu ati: «Beyi betsimene nati vʉsa ve ibala batu betuka kuta utsili ve nzala ndili ye unlumi idzi kone bangu? Nyee, ndili ye unlumi idzi kone bangu, bangu bedza benoto. 20Ni ndili ye bitse nanguse bangu unlumi yetse ya, avavu ni vʉsa ve bangu bitse kuta utsili ve nzala.»
21Nde muutu we ituka lata liyi ye uŋkanda ŋwe tsaŋwe kule ŋwe kala. Toko, liyi ye uŋkanda ŋwe tsaŋwe ŋwa nyasule ŋwe kala, ye ibunga dze uŋkanda ŋwe kala dzivele yebise nene. 22Nde muutu we isomo melaku me tsaŋwe, se membinda me kala, toko melaku me tsaŋwe mabula membinda, melaku masuve, ne membinda mabiwe. Ni uve basomo melaku me tsaŋwe, se membinda me tsaŋwe.
We yikwene Muutu ni Kuŋwu we vʉsa ve idzundu
(Mat 12.1-8; Luk 6.1-5)
23Vʉsa ve idzundu votu, Zezu alinanga mekuba me mesangwe. Bebingi bedzi bavʉneka mesangwe uŋkolo ŋwe kuba. 24Batu be Falizi batanda ne Zezu ati: «Yene, ye bebingi bowe bipika mamvu midzi ne tsɨla ne upika vʉsa ve idzundu niyi?» 25Ye Zezu ekalule ne bangu ati: «Beyi besande tangala, se buma ye betende ati, Davidi bane batu bedze ne usukudze wangu nzala ye kwata bangu, 26Davidi anyindzile se ndaku ye Nzambi, adza pembe ye bekaba Nzambi. Yedze ni ndili ye uŋkabi we bisemi bye Nzambi we uneni we kumvu Abyata. Yedzi ne tsɨla, batu bidza pembe yayu si bekabi be bisemi bye Nzambi, ni Davidi adza pembe yayu, akaba ne batu bedze ne usukudze wangu.» 27Zezu avele tanda ne bangu ati: «Nzambi epika vʉsa ve idzundu ni utsɨna ne batu, ni wangu eke pika batu utsɨna ne vʉsa ve idzundu. 28Yene utsɨna ve we yikwene Muutu idzi kuŋwu we vʉsa ve idzundu.»
ที่ได้เลือกล่าสุด:
Malk 2: WUM
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
