Keriekitho 3
3
Themia Krüketa
1Siro Ukepenuopfü Jihovae chükeshü khunuo pete donu tinyhüu puo do vikuo. Puoe thenupfü ki “Kepenuopfüe nnie ki, ‘Nnie tezieu nu sei puo si rei cü hie,’ ishü me”? 2Ru thenupfüe tinyhüu ki, “Tezieu nu seiboko si hie cülie vi, 3derei tezie metsuo nu keba seibo-u si cülie lho. Ukepenuopfüe hienie ki, ‘Nnie bu tezie metsuo nu seiu si cülie lho, süu bie reilie lho, süu cü morei bie liro nnie siata zotuo,’ sishülie.” 4Derei tinyhüu sie thenupfü ki, “Nnie siatalie lho. 5Ukepenuopfüe nnie süu cükelie sie mhirholie mu Ukepenuopfü mhie di kevi mu kesuo sitaketuo si bakecü la sikeshü zo,” si. 6Siro thenupfüe seibo-u zivi mu puosi cü viketuo ngushü mu süu cü ro mhasilieketuo si di menguta. Sidi puo nhasiu rie cülie mu huo pie puo ze ketuo puo nupfu rei tsüshü, ru puo rei cülie. 7Sitse unie kenienie mhi mhirho parta. Ru unie methuo keba silie; sitse unie chiedenyü terhü kemalie di pie unie nei chülie.
8Thevatie ki unie Ukepenuopfü Jihovae tezieu nu kemeku nu rühou ketuo pfhe silie, sitse themiau mu puo kimia unie Ukepenuopfü Jihova mhodzü michie di seiboko donu rüshü bata. 9Derei Ukepenuopfü Jihovae themiau kie di, “No kirapuo ba ga?” 10Sitse puoe sie, “A tezie nunu n pfhe si di a michieta di a rüshüte, kekreilamonyü a methuo keba la,” sishü. 11Sitse puoe sie, “Supuo no methuo ba üshü ga? No a n bu cü hienukeshü seiu si cülieta zo mo nyü?” 12Sitse themiau sie, “No thenumiapfü puo bu a ze banu di a tsükeshüpfüe seiu si pie a tsü di a bu cüliete.” 13Sitse Ukepenuopfü Jihovae thenupfü ki “No kiüdi mha hau chüwata ga?” sishü ru thenupfüe sie, “Tinyhüu a sepie a bu cüwate.” 14Sitse Ukepenuopfü Jihovae tinyhüu ki,
“No hau chükewa la,
khunuo pete donu mu nha nu nhachü pete donu n bu rüsekepfüu chütuo;
n bu n va pie rünyo geinu rüyietuo,
mu n rhei chie nyophe cütuo.
15A thenupfü nnie bu kengumvütuo,
puo yie mu n yie donu,
puo n tsü bietshietuo,
mu no puo phitshü medutuo.”
16Siro puo thenupfü ki,
“Ae n bu nuonipfüketuo ki n mezhie chü pekrashütuo,
mu n bu kezie nunu nuo penuotuo.
Sirei n bu n nupfu mengu tuo zotuo
mu puo bu n kekhatuo.”
17Siro puo Adam ki,
“No n kimia pfhe rünyü di,
a n ki, ‘No süu cü lho,’
ikeshü nhasiu cüwate.
N la kijüu bu rüsepfüte ho.
N rhei chie meyhumezhie di süu ciecü di n va pfhütuo.
18Zohu mu u hu kenyi nha n la pelhoushütuo,
sidi n bu lie nu nhako rei pfhü cütuo.
19N zie rükhrudzü nunu n bu n va pfhü cütuo,
no rünyo nu la vota kemochie.
Rünyo nunu n chülie zo;
no sü rünyo ze ru,
tsiu n bu rünyo mevi latatuo,” siwa.
20Themiau puo kimia za thopie Iv#3:20 Ibri nu Eve icü diecau Lhou icüu ze kerie. chülie, puoe kerheiro pete zuopfücü la. 21Siro Ukepenuopfü Jihovae chüzhü pie Adam mu puo kimia unie pfhenei chülie di se unie wheshü.
22Siro Ukepenuopfü Jihovae sie, “Harie, themiau kevi mu kesuo si di u mhiete, mu tsie we puo dzie yhapie kerheiprü bo-u bielie, tsiu cülie di kechachie rhei tuotalie vi.” 23Süla Ukepenuopfü Jihovae Iden zieu nunu puo ketsewa di puo bu kijüu ciecü tuonuwa, süu nunu puo chüse parcü ze ru. 24Puoe sidi themiau whuowa; mu puoe kerheiprü bo-u rüguolieketuo la cherubko siro miü mhiekecü zhiecha puo pie Iden zieu niathutsa shüwa, sidi zhiechau bu rüge zhata.
ที่ได้เลือกล่าสุด:
Keriekitho 3: ANBRBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible Society of India
© 2023, Used by permission. All rights reserved. More