Romə 14
14
I ɓok dan wa vay ba mi mi
1I ve swə məni tətâ wə du dan məni mum ve, dan jeɗ dan ɗik umu. 2Dan məni swə məsin ve nə ne vari ne num kədan mum ti kwati daŋ'ŋ. Ama swə məsin məni tətâ wə du dan məni mum ve nə, bə rum wə ti mbar tlap tawa. 3Swə məni wə ti kwati daŋ', mum cu kə vari kədan mum jeɗ swə məni cu ti kwati cem cem nə mi mi. Ɓay swə məni cu ti kwati cem cem mi, mum cu kə vari kədan mum ɓok dan wa swə məni wə ti kwati daŋ' nə mə ta', zə Ifray ve bə rumu. 4Ha nə sa kədan ha ɓok dan wa bə sin swə məsin su? Ko mum la' car ŋgəɗiŋ' wə du sin um, ko mum la' cu car ŋgəɗiŋ' mi, dan Bârî um na. Ɓay mum də car ŋgəɗiŋ' zə Bârî kə gbəgboŋ kədan mum um kaw cara.
5Swə məsin wə ɗik i bəka məsin kə mbra' pâ bəka məsin si. Ama swə məsin wə ɗik i bəka daŋ' wə vun nji ɗawa. Say swə ɗaw ɗaw daŋ' car wa dan məni mum kar njeŋe. 6Swə məni wə ɗik i bəka məsin kə mbra' pâ bəka məsin si, bə rum gi ndə na' kədan mum mbâ Bârî. Swə məni wə ti kwati daŋ', bə rum wə gi ndə na' kədan mum mbâ Bârî, zə mum wə gi soko ne kə Ifray zə kwati umu. Swə məni cu ti kwati cem cem mi, bə rum wə gi ndə na' Kədan mum mbâ Bârî, ɓay mum wə gi soko ne kə Ifray ta'a. 7Zə swə ɗaw du mba cu ke kə i kə wa tu rum mi, ɓay swə ɗaw du mba cu mar kə wa tu rum mə ta'a. Namba la' kə i, namba kə i zə Bârî, 8ɓay namba la' mar, namba mar zə Bârî. Ndəna' ta', ko namba la' kə i, ko namba la' mar, namba mə Bârî na. 9Zə Kris mar, ɓay mum car mbə mar kədan mum ke Bârî wa sôwâ mə mar kə sôwâ mə kə i. 10Ama mə ha, zə mi ha wə ɓok dan wa vay ba wû su? Ɓay mə ha, zə mi ha wə jeɗ vay ba wû su? Namba daŋ', namba wə də car kor Ifray kədan mum ɓok dan wa mba#2Ko 5.10. 11Zə Dan rum wây' wə du ɗerwa:
«Bârî ini: Zə na kə i, sôwâ daŋ' də kuduk nya kor rini.
Ɓay swə ɗaw ɗaw daŋ' də in kə vun rum i na Ifraya#Esa 45.23.»
12Ndəna', swə ɗaw ɗaw daŋ' du mba də in dan tu rum kor Ifraya.
I ɓu vay ba mi nde mi
13Zə rum, mə ar ɓok dan wa nji mbok nji si. Zawa, i gila' dan mə ni nə mbok nji: i gi kwa məni wə gak ɓu vay ba mi dle wa sem, ko nde də du kwa mə bro' mi. 14Wə du ɓa man kə Bârî mba Zezu, na we si njeŋe: Kwa cu bro' kə tu rum ɗaw sar mi. Ama swə la' ɗik i kwa məsin wə ke kə day si, kwa rum faŋ kwa mə kə day zə bə rumu. 15Ha la' gi vay ba wû ɗik dan wa kwati məni ha wə ti nə si, ka ha cu ta kə bə mi. A ar kwati məni ha wə ti nə də ke ce' ndə kwa mə vi' swə məni Kris mar wə zə rum nə mi. 16I ar vari ne kə sôwâ məsin kədan handay ge dan mə bro' wa kwa məni hi wə kar ce' ndə kwa mə ɓay nə mi. 17kəri məni sôwâ wə in dan wa dan vari məni Ifray wə də suk gbəgboŋ wa sôwâ um, handay cu in dan wa dan dlay kwati ko kwace mi, ama handay wə in dan wa njeŋ, kə heɓ, ɓay kəɗam məni Simbeɗ Ifray wə ne. 18Swə məni wə gi sin zə Kris kə vari mə ni nə, Ifray wə tuk kəɗam kə bə rum, ɓay sumra' wə tuk kəɗam kə rum ta'a.
19Zə rum, mə keɓ kwa məni wə mbə kə heɓ ɓay wə mba jin kədan namba jeŋ nji mbok nji wə du dan məni namba ve. 20A ɗənok sin Ifray zə dan kwati mi. Swə gak ti kwati daŋ', ama cu ɓay kədan mum ti kwati məni wə gi vay ba um nde də du kwa mə bro' mi. 21Ɓay kədan a ar ti tlew kə ar ce mbi vra' gu mə ɗe kə «viŋə», ɓay ar kwa daŋ' məni gak gi vay ba wû nde də du kwa mə bro'o. 22A ji dan məni ha ve wa rum mbok ru kə Ifraya. Kəɗam zə swə məni dan ɗik vunduk rum cu wə um tum kə ri məni mum wə gi kwa məni mum wə kar ce' ndə njeŋ nə mi. 23Ama swə məni wə way dan wa kwati la' ti kwati rum si, Ifray də um kaw kə dan, zə kwa məni bə rum gi cu car wa dan məni mum ve nə mi. Ɓay kwa daŋ' məni cu car wa dan məni mum ve nə mi, kwa rum nə kwa mə bro'o.
ที่ได้เลือกล่าสุด:
Romə 14: KMN
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
