Romə 11
11
Ifray cu vaɗ sôwâ Israyel mi
1Zə rum, na ci vunu: Ifray vaɗ sôwâ um si su? Cu ndəna' mi! Na kə tu rin, na swə Israyel. Na vay rawti Abraham. Na swə zə saŋ Benyami#Fil 3.5. 2Ifray cu vaɗ sôwâ um məni mum da' nday vun kofo ce' ndə sôwâ um kuni mi. Hi cu we dan məni Ɗerwa Ifray in wə ri məni Eliya ci' tu wa sôwâ Israyel kor Ifray nə mə su? 3Mum ini: «Bârî, handay ci sum ka' dan wû, ɓay handay bru kwa cu kwa po' fur wû cem cem ta nya. Say gwa' na ɗaw sar, ɓay handay wə keɓ kədan handay man ci ta'a#1Sja 19.10,14.» 4Ifray ɗam vun rum ma su? Mum ini: «Na kə sôwâ man i mbu seɗa' məni cu kuduk ta nya kor ifray vun fur mə ɗe kə Baal mi.» 5Ndəna', mgbaŋ ni nə ta'a. Gwa' sôwâ cep məni Ifray da' nday zə ɓay umu. 6Mum da' nday zə ɓay um, cu zə sin məni handay wə gi nə mi. La' cu ndə na' mi si, ɓay Ifray cu də ke ɓay mə kəzin' mi.
7Namba də in ma su? Sôwâ Israyel cu za' kwa məni handay wə keɓ nə mi. Say sôwâ məni Ifray da' nday, handay za' kwa rumu. Sôwâ məsin cu gak mun zu dan rum mi. 8Ce' ndə məni Dan rum wây' wə du ɗerwa: «Ifray gi nday faŋ sum wa ɓokroko. Mum gi ndəna' kədan handay cu gak weri kə i nday mi, ɓay handay cu gak mun dan kə hum nday mi hâ bəka rumu#Ddd 29.4; Esa 29.10.» 9Ɓay David ini:
«Na wa' i kwati nday faŋ ruwa, kə təkəy',
kə kwa dle wa sem, ɓay boni zə ndaya.
10Na wa' i i nday kuni dəŋâr kədan handay weri za' mi,
ɓay duɓ nday kuni duŋ də hâ.»
11Zə rum, na ci vunu: kəri məni sôwâ Zuwif dle wa sem, handay njay ta nya faɗ su? Cu ndəna' mi! Ama zə kwa mə bro' nday, sôwâ məni cu zu saŋ sôwâ Zuwif mi za' vari kədan handay siɗi. Zə rum, sây' car wə vunduk sôwâ Zuwif wa ndaya. 12Kwa mə bro' sôwâ Zuwif la' ne ɓay ne kə sôwâ nya juk si, ɓay ɗənok nday la' ne ɓay ne kə sôwâ məni cu zu saŋ sôwâ Zuwif mi juk si, kə ri məni raw sôwâ Zuwif məni Ifray da' nday faŋ vunduk nday kədan handay fe siɗ, kwafe rum də ke ɓayrumu!
Siɗ sôwâ məni cu zu saŋ sôwâ Zuwif mi
13Mgbaŋ ni nə, na wə in mi ne, hi sôwâ məni cu zu saŋ sôwâ Zuwif mi: Na bə sin məni Ifray sin nan hay' ri, ɓay na wə mbra' tu rin kə sin mana. 14Ndəna', na wa' kədan na car sây' wə vunduk sôwâ man kədan sôwâ məsin du nday fe siɗi. 15Zə kə ri məni Ifray vaɗ nday, sôwâ nya za' vari kədan handay gila' dan nday kə Ifraya. kəri məni Ifray wə də faŋ nday ve, kwa rum də ke ce' ndə mi su? Kwa rum də ke ce' ndə mar məni faŋ car i!
16Alkamari mə vun kofo la' kəleŋ si, kam fur rum ke kəleŋ ta'a. Tlor gu la' kəleŋ si, ɓa gu rum ke kəleŋ ta'a. 17Sôwâ Israyel ce' ndə gu olivə mə sine məni Ifray tum ɓa məsin rumu. Ɓay hi, sôwâ məni cu zu saŋ sôwâ Zuwif mi, hi ce' ndə gu olivə mə du za məni Ifray tləɓa ta tan ri ndaya. Ɓay mgbaŋ ni nə, hi wə fe gbəgboŋ məni wə car mbə tlor məni wə ur gu olivə mə sine. 18Zə rum, hi cu gak jeɗ ɓa gu məni swə tum kuni mi. Hi gak mbra' tu ri mə ma su? Hi cu kə məni wə kaw tlor rum mi, zawa, tlor rum kə məni wə mi kawa.
19Hi wə də in man ne: «Ama handay tum ɓa gu kuni kədan handay man tləɓa də tan ri ndaya.» 20Dan rum njeŋe. Ifray tum nday zə handay cu ve dan um mi, ɓay hi gay' wə tan ri nday zə hi ve Kris. Ama i kaw wa ri kədan i mbra' tu ri mi. Zawa, i ne wəloko. 21Zə Ifray la' cu ar sôwâ Zuwif ce' ndə ɓa gu mə kpak rum mi si, mum cu də mi ar mə ta'a. 22I kar vari məni Ifray ta' ɓay um kə bak umu: Mum tle bak wa sôwâ məni wə gi kwa mə bro', ɓay mum gi sin mə ɓay wə hay' ri. Ama say i gay' wə du ɓay umu. La' cu ndə na' mi si, mum də mi tum ce' ndə məni mum tum ɓa gu kuni ta'a. 23Ɓay sôwâ Zuwif la' ar wa ɓokrok nday si, Ifray də nday tləɓa də ri məni handay ke han vun kofo. Zə Ifray kə gbəgboŋ kədan mum nday tləɓa kəreme. 24Hi sôwâ məni cu zu saŋ sôwâ Zuwif mi, hi ce' ndə ɓa gu olivə mə du za. Ifray tum ni ɓay tləɓa ni ta tu gu olivə mə sine məni kpak tu rum cem kə kpak tu ri. Sôwâ Zuwif ce' ndə ɓa gu olivə mə sine. Zə rum, cu kəcik kədan Ifray də faŋ nday tləɓa də wa gu məni handay ke han ɓa' nə mi.
Ndo' vun siɗ sôwâ Israyel
25Daw ba man, na wa' kədan na ta' dan mə kəzin' məni ke pe' nə mi ne, kədan hi gi tu ri ce' ndə sum kwawe mi. Dan rum ni na: Sôwâ məsin wə du sôwâ Israyel gi wa nday ɓokroko. Ama kwa rum də ke ndə na' hâ raw sôwâ məni cu zu saŋ sôwâ Zuwif mi məni Ifray da' nday kuni fe siɗi. 26Ndəna', Ifray də siɗ sôwâ Israyel daŋ'ŋ. Ce' ndə məni Dan rum wây' wə du ɗerwa:
«Bə Siɗ də car mbə so Siyoŋ.
Mum də ra' kwa mə bro' daŋ' mbə
wa daw rawti Yakub də rəka.
27Ɓay kəri məni na də ra' kwa mə bro' nday də rəka,
na də kawvun mə ni nə kə ndaya#Jer 31.33-34.»
28Sôwâ Zuwif faŋ sum sî Ifray, zə handay vaɗ Dan mə Kəɗama. Kwa rum faŋ ɓay zə ri, hi sôwâ məni cu zu saŋ sôwâ Zuwif mi. Ama handay faŋ bây Ifray zə mum da' nday vun kofo zə mum kawvun kə ba mbri randay wa ndaya. 29Zə Ifray cu faŋ ra' kwane məni mum ɓul ne kə sôwâ mi, ɓay mum cu samwa dan ɗik um wa sôwâ məni mum ɗe nday mi. 30Ɓa' si, hi, sôwâ məni cu zu saŋ sôwâ Zuwif mi, hi cu mun vun Ifray mi. Ama mgbaŋ ni nə, Ifray we ca wa ri zə sôwâ Zuwif cu mun vun rum mi. 31Ndəna' ta', zə handay we i Ifray we ca wa ri kə ri məni handay cu mun vun rum mi, mgbaŋ ni nə, handay cu mun vun rum mi, kədan mum we ca wa nday ta'a. 32Zə Ifray gi sôwâ daŋ' ce' ndə daŋgay' zə dan mun vun, kədan mum ta' we ca um wa nday daŋ'ŋ.
Mbra' Ifraya
33Ndak Ifray nə toŋo.
Gwet kə kwawe um seŋe.
Sa gak pay zu dan ɗik um su?
Sa gak mun zu sin gi um su#Esa 55.8?
34Ce' ndə məni Dan rum wây' wə du ɗerwa:
«Sa gak we dan ɗik Bârî su?
Sa gak ke bə har um su?
35Sa gak um ne kwa cop,
kədan bə rum faŋ fe bal rum su?»
36Zə kwa daŋ' wə car mbə hay' rum,
kwa daŋ' kəta' kə rum ɓay zə rumu.
Mbra' nə ke kə Ifray hâ də hâ! Amen#1Ko 8.6.
ที่ได้เลือกล่าสุด:
Romə 11: KMN
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
