Romə 1
1
Kaw jeɓe
1Na Pol, bə sin Zezu Kris, Ifray ɗe nan kədan na faŋ bə sin um ɓay par nan kədan na ka' Dan mə Kəɗam umu.
2Ifray kawvun wa Dan mə Kəɗam rum ɓa' si, ɓay sum ka' dan um wây' dan kawvun rum wə du Ɗerwa Ifraya. 3Dan rum in dan wa Vay um, Bârî mba, mum nə sumra' zə mum vay rawti David. 4Ama Ifray ta' i mum Vay um kə gbəgboŋ kəri məni mum car mbə mar, Zezu Kris Bârî mba. Zə rum, mum Simbeɗ mə Kəleŋ ta'a. 5Zə Zezu, Ifray ne ɓay um ne mba, ɓay mum ɗe mba kədan namba faŋ sum sin um kədan namba ɗe sôwâ nya daŋ' mbə ve Dan mə Kəɗam ɓay ta zə Dan rumu. Mum gi ndəna' kədan sôwâ bur semɗe Kris. 6Hi sôwâ məni gay' wə so Romə, hi wə du sôwâ məni kuni ta'a. Ifray ɗe ni kədan i ke sôwâ mə Zezu Kris. 7Na wây' ɗerwa hay' ri, hi sôwâ məni gay' wə so Romə, hi sôwâ daŋ' məni Ifray wə mi bə ɓay ɗe ni kədan i faŋ sôwâ um, na wə wa' i Ba mba Ifray kə Bârî mba Zezu Kris, kuni ne ni ɓay kə heɓe.
Pol ti mê' də kar sôwâ Kris mə so Romə
8Cop rum, na gi soko ne kə Ifray zə ri daŋ' kə semɗe Zezu Kris: Zə sôwâ wə ge dan wa dan vari məni hi ve Kris wə du sôwâ nya daŋ'ŋ. 9Zə Ifray məni na wə gi sin zə rum kə vunduk mə ɗaw kə ka' Dan mə Kəɗam məni in dan wa Vay um, mum we si: Dan məni na in nə kəzin', mum we si, na wə ɗik dan wa ri bəka daŋ', 10kəri daŋ' məni na wə in dan kə Ifray, na wə ci vun rum kədan nə də gila' vari man ne kədan na də hay' ri, mum la' bə si. 11Zə mê' də mi kar wə man ti juk, kədan na də mi ne kwane məni Simbeɗ Ifray wə ne kədan hi fe gbəgboŋ wə vunduk ri 12pâ daŋ' rum, na wə wa' də du ri kədan na kə hi daŋ' mə jeŋ vunduk nji. Vunduk rin də jeŋ zə dan məni hi ve, ɓay vunduk ri də jeŋ zə dan məni na ve ta'a. 13Daw ba man, na wa' i i we: Na keɓ vari sem raw kədan na də hay' ri, ama na cu za' vari mi hâ tam, na wə wa' i dan ka' man nə gi sôwâ faŋ vunduk nday du ri ce' ndə məni dan ka' man nə gi sôwâ nya məsin faŋ vunduk nday ta'a#Sin 19.21. 14Zə na kə bal wa rin kədan na də hay' sôwâ daŋ': Sôwâ grek kə sôwâ məni cu sôwâ grek mi, ɓay sôwâ mə we kwa kə sôwâ mə dan we kwa. 15Zə rum, na wə wa' kədan na də ka' Dan mə Kəɗam du ri, hi sôwâ məni gay' wə so Romə.
Dan mə Kəɗam nə kə gbəgboŋo
16Zur cu man gi kə ka' Dan mə Kəɗam mi, zə mum nə gbəgboŋ Ifray məni gak siɗ sôwâ daŋ' məni ve dan rumu: Cop rum sôwâ Zuwif, ɓay kəki rum sôwâ grek ta'a. 17Zə Dan mə Kəɗam nə wə ta' vari məni Ifray wə gi sôwâ njeŋ kor rumu. Vari rum kə ve Kris ɗaw sar, daka təŋ zu rum hâ ndo' vun rum, ce' ndə məni Dan rum wây' wə du ɗerwa: «Swə məni Ifray gi num njeŋ kor rum zə mum ve num, bə rum də ke kə nyî#Hab 2.4.»
Sôwâ kə dan wa nday kor Ifraya
18Bak Ifray car daka wafray mbə wa sôwâ daŋ' məni cu ne wəlok Ifray mi ɓay wə gi vur vuru. Zə vur vur nday wə tak sôwâ dan we dan mə kəzini. 19Ifray wə gi boni nday ne zə handay gak we kwa məni Ifray wə gi nə takrama: Ifray kə tu rum ta' kwa rum ne nday takrama. 20Ifray kə kpak məni swə ɗaw cu gak we mi, ce' ndə gbəgboŋ um mə də hâ kə kpak Ifray umu. Ama daka kəri məni Ifray gi nya, sôwâ gak we kpak um wə du kwa məni mum gi. Zə rum, handay cu gak riway mi. 21Handay we Ifray si, ama handay cu wə gi mbra' um ne ko gi soko um ne ce' ndə məni mum nə Ifray mi#Efe 4.17-18. Zawa, handay faŋ lay wə du dan ɗik nday, ɓay vunduk nday mə bro' nyen peɗ kə ri mə ura'a. 22Handay gi tu nday ce' ndə sum kwawe, ama handay laya. 23Handay ar dan gi mbra' ne kə Ifray məni cu mar mi, ɓay handay faŋ gi mbra' ne kə foto mə ra' nji kə sumra' məni wə mar, rugwa, tlew gop, kə wu' məni sôwâ wə gi kə ɓa ndaya#Ddd 4.16-18.
24Zə rum, Ifray ar nday wə du sin mə bro' ce' ndə məni vunduk nday wə wa', ɓay handay wə gi kwa mə kə zur kə nji mbok nji dan zuru. 25Handay samwa dan mə kəzin' məni in dan wa Ifray kə hay dan, handay wə bur kwa məni Ifray gi kə gi sin zə rum ɓay ar Bə gi kwa rum məni nde i bur bəka daŋ'ŋ. Amen. 26Zə rum, Ifray ar nday wə du kwa səna' mə kə zur məni handay wə də gi dan zuru. Ndəna', rawkwa nday ar bar kə njiwkwa nday ɓay wə bar kə rawkwa məsini. 27Ndəna' ta', njiwkwa ar bar kə rawkwa nday ɓay wə səna' bar kə nji mbok nji. Njiwkwa wə gi sin mə kə zur kə nji mbok nji dan zuru. Zə rum, Ifray wə də gi boni nday ne ce' ndə sin mə bro' ndaya. 28Handay vaɗ dan mə kəzin' məni handay we wa Ifray, zə rum Ifray ar nday wə du kwawe nday mə bro' kədan handay gi kwa məni handay cu kə vari gi rum mi. 29Vunduk nday nyen peɗ kə sin mə vur vur, sin mə bro', səna' kwa, ɓay kwa mə bro', handay wə gi sây', wə ci mar, wə dle vun, wə gi vur vur, ɓay wə gi kolo. Handay wə hay dan wa sôwâ məsin, 30ɓay handay wə ge dan mə bro' kə nji mbok nji, handay wə sî Ifray, wə i nji mbok nji, wə mbra' tu nday, ɓay wə ge dan wa tu nday kor sôwâ. Handay wə keɓ vari mə mbrew kədan handay gi kwa mə bro', ɓay handay cu mun vun sôwâ nday mi. 31Handay cu kə kwawe mi, ɓay handay cu gi kwa məni handay kawvun wa rum nə mi, handay cu kə bə mi, ɓay handay cu we ca wa sôwâ məsin mi. 32Handay we si, dan dlay Ifray in i sôwâ məni wə gi kwa mə ndani nə, handay də fe mar, kə ndi nə daŋ', handay cu də kofo kə sin mə bro' nday taw mi, ama handay wə tuk kəɗam kə sôwâ məni wə gi sin rum ta'a.
ที่ได้เลือกล่าสุด:
Romə 1: KMN
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
