Sini 25
25
Pol o vari kədan mum də kor jwə mə mbri mə nya Romə
1Bəka hinji' kəki məni Festus mbə day wə nya rum, mum car wə so Sezare ta so Jeruzalem. 2Sum rôwâ mə du sum po' fur kə sum rôwâ mə du sôwâ Zuwif tum kuni sem Pol wə kor rum wə hana. Handay o Festus 3kədan nə ve dan nday, ɓay nə sin Pol mbə so Jeruzalem, zə handay bargu rum kədan handay də um ci wə vari. 4Ama Festus ɗam vun nday i Pol wə so daŋgay' wə so Sezare, ɓay na kə tu rin, na faŋ də han ga'ri. 5«Say sôwâ rôwâ mi də cin nan wə so Sezare, ɓay kuni tum sem rum wə han, mum la' gi kwa mə bro' si.»
6Festus bar wə du nday bəka pâ coho' ko guɓ, ɓay mum faŋ ta so Sezare, siw rum, mum suk wə ri ɓok dan ɓay mum ne vari ne kə soje məni wə han kədan kuni mbə kə Pol. 7Kəri məni Pol mbə day, sôwâ Zuwif məni car mbə so Jeruzalem reŋ wa rum, ɓay handay təŋ kə tum sem rum kə dan mə bro' cem cem raw, ama handay cu gak ta' i dan tum sem rum nə kəzin' mi. 8Ama Pol riway dan nday kə ini: «Na cu gi kwa mə bro' wa dan dlay sôwâ Zuwif, ko wə so po' fur nday, ko hay' jwə mə mbri mə nya Romə mi.» 9Festus wə wa' kədan mum gi kwa mə kəɗam tu sôwâ Zuwif, zə rum mum ci vun Pol: «Ha wa' kədan ha faŋ də so Jeruzalem kədan na də ɓok dan wa ru wa dan rum wə han su?» 10Pol ɗam vun rumu: «Na ni car wə ri ɓok dan jwə mə mbri mə nya Romə, ɓay na wa' kədan dan ɓok man nə ndo' wə hana. Na cu gi kwa mə bro' məsin hay' sôwâ Zuwif mi, ha we kə tu ru si. 11Na la' gi kwa mə bro', ko kwa məsin məni na nde i fe mar wa rum si, na cu vaɗ mar rum mi. Ama dan tum sem məni handay wə tum sem rin kə ndi la' cu kəzin' mi si, swə ɗaw cu gak man ar də ɓa nday mi. Na wə o vari kədan na də kor jwə mə mbri mə nya Romə.» 12Festus faŋ ge dan kə sum rôwâ um, kəki rum mum la' ne kə Pol: «Ha o vari kədan ha də kor jwə mə mbri mə nya Romə, kəzin' ha də kor rumu.»
Pol wə kor Agripa kə Bernike
13Kəki rum bəka cep, jwə mə mbri mə nya Romə mə ɗe kə Agripa kə ma rum Bernike mbə day so Sezare kədan handay kaw jeɓ Festus. 14Handay bar wə han bəka raw, zə rum Festus in zu dan Pol ne kə jwə na. Mum la' ne numu: «Feliksə ar swə məsin wə so daŋgay' tira. 15Kəri məni na ta so Jeruzalem, sum rôwâ mə du sum po' fur sôwâ Zuwif kə sum rôwâ mə du sôwâ Zuwif tum kuni sem rum ɓay handay o nan kədan na ɓok dan mar wa rumu. 16Na ɗam vun nday i sôwâ mə nya Romə cu kə vari kədan handay ar swə məni kə dan wa rum də ɓa sum tum sem rum cop dan bə rum za' ri kədan mum mbə wə kor sum tum sem rum ɓay ge dan siɗ tu rum nə mi. 17Zə rum handay mbə ti kə rin, na cu vi' ri mi, siw rum na ta suk wə ri ɓok dan, ɓay na ne vari ne kə soje məni wə han kədan kuni mbə kə swə na. 18Sum tum sem rum car fray ge dan, ama handay cu mbə kə dan tum sem mə bro' ce' ndə məni na ɗik nə mi. 19Handay way dan wa kwata' nday taw, ɓay wa swə mə ɗe kə Zezu məni mar, ama Pol in i mum kə i. 20Na cu we vari kədan na keɓ mun zu dan mə ndani nə mi. Zə rum, na ci vun Pol mum la' wa' kədan mum faŋ də so Jeruzalem kədan na də ɓok dan wa rum wa dan rum wə han si. 21Ama Pol o vari kədan jwə mə mbri mə nya Romə də ɓok dan wa rumu. Zə rum, na ne vari ne kə soje kədan kuni ji Pol wə so daŋgay' hâ ka na za' ri kədan na gak um sin də hay' jwə mə mbri mə nya Romə.» 22Agripa la' ne kə Festus: «Na wə wa' kədan na mun dan swə nə kə tu rini.» Festus ɗam vun rumu: «Siw, ha də mun dan umu.»
23Siw rum, Agripa kə Bernike mbə kə mbra' juk, ɓay handay cok ta rawti so ɓok dan sôwâ, kə sum rôwâ soje, ɓay sum rôwâ mə so rumu. Festus ne vari ne kə soje məni wə han kədan kuni mbə kə Pol. 24Festus faŋ ini: «Jwə Agripa kə sôwâ daŋ' məni wə ti kə mba, hi we swə məni sôwâ Zuwif daŋ' mbə tum sem rum hay' rin wə so Jeruzalem ce' ndə mə ti ta'a. Handay do dan i mum cu kəri ke kə i za' mi. 25Mə na, na cu za' i mum gi kwa mə bro' məni nde i mum fe mar kə ndi nə mi. Ama mum kə tu rum o vari kədan mum də kor jwə mə mbri mə nya Romə, zə rum na keɓ vari kədan na um sin də hana. 26Na cu we njeŋ dan məni na gak wây' wa rum wə hay' jwə mə mbri mə nya Romə nə mi, zə rum na mbə wə kor ri, pâ daŋ' rum, wə kor ru, jwə Agripa, zə kəki məni ha ci vun rum, na za' dan məni na gak wây' wa rumu. 27Na ɗik cu ɓay kədan na sin daŋgay' dan wây' njeŋ dan tum sem wə wa rum mi.»
ที่ได้เลือกล่าสุด:
Sini 25: KMN
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
