Met 3
3
1E betite bese ya fé Nti, nyô a ne Zambe, a nga té, nyo nje é nga dañe mefek. E nga jô minga na: Ye Zambe a nga tu'a fo'o jô na: Mia ye bo te di biôme bia so e bilé bise ya afup' 2Minga a nga jô nyoo na: Bia di ngab ébuma bilé ya afup. 3Ve mfa'a ébuma ya élé é ne ézezañ afup, Zambe a nga jô na: Mia ye bo te di je, a mia ye bo te nnambe je, nalé momo mia ye wu. 4Ane nyo é nga jô minga na: Teke fo'o bebé na mia ye wu! 5Ve Zambe a yeme na: E môse mia ye di je, mise menan ma ye kuiban, a na mia ye bo ane bezambe ba yeme mvaé a *abé.
6Minga a nga yene na élé é mbe mvaé ya di, abeñe ya yen é yi'ane fe ve mfasan. A nga nyoñ ébuma y'été a di je; a nga ve fe je nnôme wé baa nye be mbe, a a nga di je.
Ayaa Zambe
(Yak 1:13-15; Rm 5:12-21; 8:20-22)
7Ane mise me be bebaé me nga kuiban; be nga yeme na be mbe soé. Be nga loé bebiene menja'a a mekaé me figié. 8Wôna be nga wô'ô tyiñe Nti, nyô a ne Zambe, e nye a mbe a kelek a wulu afup e mone mfebe ya mamengô'é. Fam a e minga wé be nga ke sobô asu Nti, nyô a ne Zambe, ézezañe bilé y'afup. 9Nti, nyô a ne Zambe, a nga loone fam a jô nye na: Ô ne vé' 10Nye na: Ma te wô'ô tyiñe jôé afub été a ma te ko woñ, amu me ne soé, e nde ñhe ma te sobô.
11Nti, e nyô a ne Zambe, a nga jô na: Za a te kate wo na ô ne soé? Ye ô diya jôm éziñe ya élé me nga kamane wo na ô bo te di' 12Fam é nga yalane na: Ke minga ô nga tooé e fefele jam e nye a te ve ma jôme ya élé ane ma ke ma te je di. 13Wôna Nti, nyô a ne Zambe, a nga jô minga na: Amu jé wo te bo jame te? Minga a nga yalane na: Nyo ja te du'u ma, ane ma ke ma te je di.
14E nde Nti, nyô a ne Zambe, a nga jô nyo na:
Amu wo te bo jame te,
wo ye yo'oban e biyeme bise été a
betite bese ya fé été.
Wo ye woñ a abume dôé
a wo ye di mbuluk
melu mese y'ényiñe jôé.
15Ma ye futi ziñ e zañe jôé a minga,
e zañe mvoñe jôé a e mvoñe jé:
Enjéé ja ye fite wo nlô
a wo wo ye lôbe nye étimekili.
16A nga jô minga na:
Ma ye bo mebume môé njuk,
wo ye biaé e nju'u été
minkômbane miôé mia ye timbi e be nnôme wôé.
Ve nye a ye jôô wo.
17A nga jô fame na: Amu wo te bo tyiñe nyô ngale mewôk a na wo te di jôme y'élé me nga kamane wo na te di,
si ja ye yo'oban amu wo
wo ye soo bidi biôé été e nju'u été,
melu mese y'ényiñe jôé.
18Si éte ja ye kui wo biyo a fafôlô a
wo ye di bilo'o ya fé.
19Wo ye di bidi a édudu'u ya asu dôé
akekui wo bulane si e vôm ô nga nyoñeban;
amu ô ne mbuluk, a wo ye bulane mbuluk.
20Fam é nga yôlé minga wé na Eve; amu a mbe nyia bevevee bese. 21Nti, nyô a ne Zambe, a nga bo Adam baa minga wé mengômesan m'ékôp, e mme a nga jalé be.
22Nti, nyô a ne Zambe, a nga jô na: Eyoñe ji, ane môt a ntoo ane wua ya be bia, asu ñyemane mvaé a *abé, nsa'ala'ane na a same wo wé na a nyoñe fe jôme ya élé ényiñ, a di je a nyiñ nnôm éto.
23Nti, nyô a ne Zambe, a nga titane nye afub Eden na a bo ésaé si, e vôm a nga nyoñeban. 24Eyoñ a maneya titane môt, a nga tooé Bekerubim mfa'a jôbe da tôô afub Eden nalé fe nkaba'a nduane nkpwaté mekôn wo tyiñelan, asu ya ba'ale *zen élé ényiñ.
ที่ได้เลือกล่าสุด:
Met 3: BDCB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible en langue Bulu © L'Alliance Biblique du Cameroun, 2007, 2015.