Zimbazi 24
24
-19-
1Wulece kuzisulumila ze wanhu wabi.
Hamba wulece kwilunza nawo.
2Hambi wene nha wendile ze cikanikani.
Na mu mapango gose,
wekalaga wahame milomo yawo du,
ho wawatamise wanji.
-20-
3Ne zikaya zizenjeywe mu musinji we mahala no wizuce.
4Na so wumanye, koziwona zinyumba zayo zose,
zihambigwe ne vinhu viswanu,
vyo wuguzi wukamu.
-21-
5Yili ciba kuwa ne mahala,
si nha kuwa wuli vilungo.
Na mbeka, wizuce, co cinhu cono cikamile si nhe vilungo.
6Hamonga na zizo, yikunojeye wiwikanize viswanu,
lono wukali si nenjila mu wulugu.
Na mu nghango vyono kosuma kuwubocela wulanjizwe,
yo nghango yono yokupela wusume.
-22-
7No wulonje we mahala,
wuwezaga wukamu muno ku wizuce kuli munhu mulele.
Nayo, lono nghani zono zikamile zikulongwa,
mwene kawezaga yasina yo kulonga.
-23-
8Nagwe, hono wuwe kwikalaga wukwihwesa zo wituma zimbi,
kocemwa litagwa lyo musagahiza mazozo.
9Ne lihweso lyo mulele, kwituma wubi du.
Ne wanhu nawo,
wamusulile munhu mono kekalaga yakubedegala wayagwe.
-24-
10Hono wuzilice mwi'zuwa lyo wugazice,
vilungo vyako vidodo.
-25-
11Wulece kuleka kumuponya munhu,
mono yaling'anizwe yawulagwe mbula soko.
12Lunji 'gwe, kotya vyono wuwo si mulimo wako yaye.
Ninga Mulungu yamanyile,
kanyhi kawuwonaga no wuhile wako.
Kekalaga yakulanjiliye,
yamanyile zako zose.
Nayo kokuhumbiliza mu nghango ye metumo gako.
-26-
13Gwe mwanangu, weze kulya wuci,
hambi nha wuswanu.
Kanyhi nha vyono kuwuwonaga wuci wa mwi'lala,
wuli muzinzi mu mulomo wako,
14ale, nagwe wumanye nha vyono,
nago mahala, maswanu so nhumbula yako.
Holeka wutuje mahala,
nagwe kowona cambuzi ku mwande.
-27-
15Wulece kwihwana ne wanhu wabi,
wono wewikanizaga wabite wakamuhizize u munhu we ling'ani,
hamba kuyisola kaya yakwe.
16Kanyhi si nghani yaye,
u munhu we ling'ani,
hamba yagwe kali kenji,
ninga kenukaga du kanyhi, vilo vyose.
Ninga i wabi wongomezwaga no wutamiswe.
-28-
17Wulece kusangalala,
lono mulugu wako yenjilwa no wusungu.
Kanyhi, wulece kusangalala lono yakwikobala.
18Ninga Muwaha Mulungu,
kosuma kumanya nha vyono,
wukumusimanga.
Nayo hamba si kokwendezwa yaye.
Na yiyo yo yoleka u Mulungu nayo,
yalece kumulipiciza yaye.
-29-
19Wulece kukalala wetuma wubi.
Hamba wulece kuzisulumila ze wabi.
20U munhu mubi, nha yasina cono yetumbiye ku mwande,
hamba si kolopegwa cihumbilizwa.
-30-
21Gwe mwanangu, wumogope Muwaha Mulungu,
wumupele cogopo mutemi.
Kanyhi wulece kwilunza ne wanhu we cipitupitu.
22Hambi wanhu we liwala lilyo,
nha wokongomezwa nhinicizo.
Hamba hasina mono yamanyile wongomezwe wawo,
wono Mulungu kowaletela vyono wowa winha.
Zinghani zinji kanyhi ze Mahala
23Azi zo nghani zinji kanyhi,
zono wazilonga we Mahala.
Yo nghani 'mbi muno muno,
hono hakimu yawe muhijila mbejele kuli wanhu.
24Na hono yamupele ling'ani u munhu musutyi,
kokwipela kusulwa ne wanhu wose.
25Ninga hakimu wo wose,
hono yawe kuwalipiciza i wahodanji,
hakimu yuyo, komoteswa kanyhi kowa ne lilumbo yiswanu.
26Ne lipitulo lye ling'ani,
co citanjilo co wiyendi we mbeka.
27Wulece kuyizenga kaya yako,
no kunozeleza wikalo sunga wamule wuyiwikanize migunda yako.
Nagwe baho, ho kowa wumanyiye lukulu vyono kokwikala baho.
28Wulece kumuhomelela zo wulambi,
u mwikalani muyago.
Hamba wulece kulonga nghani zono zomwajiliza.
29Wulece kutya, “Nomutendela mwene,
nha vyono mwene yanhendela!
Ninga ane, nomulipiciza munhu mu nghango ye metumo gakwe!”
30Napulutaga, nghakolela ha migunda ya zabibu,
yo munhu mudoba kanyhi mulele.
31Nayiwona migunda yiyo,
yina vititika vye mamivya,
hamonga ne maselegwa mawaha.
Ne lijinji lye mabwe lyono lyali liyipilime,
nalyo lyakondya kugwa hasi.
32Nane nali neza kuziwona zizo,
nghazihwesa, ngheyijiza muli yiyo.
33Holeka wutandice lizuliya,
wugone hadodo hono wukusaka.
Na kanyhi wuyikunye migulu yako wucehe hadodo.
34Ninga lono wukali wugonile,
wuciwa wokuziza musunho nho muhizi.
Cigogo Bible © Bible Society of Tanzania, 2002.