Zimbazi 23
23
-6-
1Hono wikale ho wulye ndigwa,
ko munhu we lilumbo,
ale, wilanjililaje vyono wukulya.
2Hono wuwe wuli mubugu,
wiyimilaje kwe vilungo vyako vyose.
3Wulece kulya cibugu bugu ndigwa zakwe vyono swanu,
na lunji kowa yena wuhile wo kukuwona agwe vyono winha.
-7-
4Weze ne mahala,
wulece kwikataza muno so wulondola wugoli.
5Hambi sawo,
nha yopuluta musunho kotya yina mabawa no kuguluka nha 'ndi.
-8-
6Wulece kulya ndigwa yo munhu mukamu ku vinhu,
hamba kuzibugucila zindigwa zakwe swanu.
7Hambi mwene nha kokutya,
“Ale wonjeleze, wujendelele kulya.”
Ninga yakulonga ha mulomo du,
hamba si zikulawa mu nhumbula yakwe ng'o.
8Nagwe hono wulece kwilanjilila,
koyideka ne ndigwa yono wali walya,
no wupepelezwe wako, wukuwa wa bwete du.
-9-
9Wulece kumulonjela mulele zinghani ze mahala,
hambi mwene nha kozibedegala du.
-10-
10Wulece kuwusa citanjilo co mupaka we katali wo mugunda,
hamba kusola migunda ye wana wono wasina walezi.
11Hambi mukombozi wawo,
u Muwaha Mulungu, nha yali vilungo,
nayo yo kowahijila zinghani zawo kuli'gwe.
-11-
12Wumuhulicizaje viswanu mwalimu wako,
no kwiyijiza zose nha vyono kosuma.
-12-
13Wulece kuleka kumufunda mwanago.
Hamba wumukune no mukotya, si kofwa yaye.
14Ninga nha vyono yinha, komuponya wumi wakwe.
-13-
15Mwanangu, hono wuwe ne mahala,
nane nosangalala muno.
16Nane nokwilumbila muli 'gwe kolo
nghuhulika wukulonga zinghani ze mahala.
-14-
17Wulece kusulumila ze wabi,
langa weze wuli mogopa Muwaha Mulungu du,
no kwihwesa zo wumi wako go mweneco.
18Na hono witume nhavivyo,
kowona cambuzi ciwaha ku mwande.
-15-
19Hulicize mwanangu,
yikunojeye weze ne mahala,
kanyhi weze kwiyihwesa muno,
vyono wikaye mu mikalile yako.
20Kanyhi wulece kwihanza hamonga ne wanhu wagalo 'jimbi,
hamba i wabuguci ku nyama.
21I wang'wela, hamonga ne wabugu,
nha wose wociwapa.
Holeka nagwe, hono yiwe nghani yako yo kulya du no kugona,
ale, wulanjilile, kovwala masambi musunho.
-16-
22Mwanangu, wumuhulicize sogo mono yakulela.
Hambi hono yali yawe si yuyo,
agwe mhali si wuli mono'nze.
Na lono nyina yako yawe yakombipa,
agwe wulecele lukulu kumubedegala.
23Holeka wigulilaje i mbeka,
ne mahala, ne mafundo,
hamonga no wizuce wuswanu.
Hambi vivi nha vyo vinhu vyo wuguzi wukamu.
Nagwe wulece kumuguziza munhu yunji.
24U sogwe wo munhu we ling'ani,
kawezaga yena soko yo kusangalalila.
Hambi nha kosuma kwilumbila muli mwanagwe we mahala.
25Gwe mwanangu,
wuwalekaje u sogo no nyina yako welumbile muli gwegwe.
No nyina yako, nayo kosangalala.
-17-
26Gwe mwanangu, wuhulicizaje.
Ne mikalile yangu yiweze colecezo kuli'gwe.
27Kanyhi wumanye vyono,
i wacekulu wasenyha, wo mutego we lifwa.
28Wakutejeye nhe wahizi,
no kunoza wanhu wenji wawuka mu wihuwilwa.
-18-
29Alo wanani wono wakuzoza?
Wanani wono wena wukalale?
Wanani wono wena wiwanganile?
Wanani wono wena wung'ung'ulice?
Wanani wono wena nghomele mbula soko?
Wo wanani lo wono wena meso gadunghuwaye?
30Wo wuwo wono si wawukaga mu wujimbi.
Wono wekalaga wakujeza wujimbi u mukoso muno.
31Holeka mwanangu,
wulece kuleceleza wujimbi wukukwejeleze,
hamba wuwe wuswanu vyono winha,
hamba wuwe wukulajila wudunghu wayo mu bakuli,
no kuseleta mhola mhola lono wakuwung'wa.
32Ninga kolo wela mitondo muyagwe,
kokwiwona kotya nha wulumigwe ne lizoka lyono lina sumu.
33Ne meso gako gowona zinghani, gokwizina.
Nagwe hamba si kosuma kwihwesa,
hamba kulonga viswanu.
34Nagwe kokwiwona nha munhu mono wuli mwi'lenga, wukudeka,
wukuninyina mucanyha ye libici lye ngalawa,
no wuyumbe-yumbe wayo.
35Nagwe baho kokwanza kutya,
“Ane nghuwona kowa nidumiza hanji,
hamba kowa nhowa na wanji,
ninga si nghukumbucila yaye.
Alu nhawule si nghusuma hamba no kwinuka kose?
Kanyhi vyo nghali nina nyhilu yo wujimbi du,
nghusaka nzimulile.”
Cigogo Bible © Bible Society of Tanzania, 2002.