Zimbazi 25
25
Mbazi zinji kanyhi za Solomona
1Azino nazo zo mbazi za Solomona,
zono munhu yunji yazisolela mu kaya ya Hezekiya,
u mutemi wa Yuda.
2Cikumutogoza Mulungu,
so zono kazigubicizaga,
cikuwatogoza watemi,
so zose zono wazilolosaga.
3Nagwe hamba si kozimanya,
zono mutemi yakwihwesa.
Hambi mahweso gakwe, nha gacicizize'se,
gehwanile no wulanga vyono wuli kutali nase,
hamba cisolo ce lilenga.
4Wuwuse makwe gawuce mu fweza,
holeka nayo munghula konoza cinhu ciswanu.
5Wawusaje i wabi ho mutemi holeka no wutemi,
wakwe womanyika so ling'ani yayo.
6Nagwe kolo wema ha mwande yo mutemi,
wulece kujela kwiyendeceza hali mutemi,
no kwinoza nha wuli munhu we lilumbo.
7Ciba wulindile sunga wuwikwe hanhu he lilumbo,
si nha kulonjelwa, wuwuce hono wikaye,
wumutelele yunji mono yena lilumbo.
8Na hono wuwone nghani,
wulece kubita mbela mbela mu mahakama so nghani yiyo.
Ku soko hono yaze muhomelezi yunji yahomelele vyono zizo si za mbeka,
alu 'gwe ho konozaci?
9Na hono wuwe wina nghani no mwikalani muyago,
muzimalaje nyenye du muli wejete,
ninga wulece kuzigubula ze cinyele za yunji.
10Na hono nhavivyo, wose womanya vyono agwe wuli 'hede,
si kuhundikaga ze cinyele.
No wubi wuwo, si wokuwucila yaye.
11Ne nghani yono yikulonjelwa hono hanojeye,
yihwanile ne mikalo ye zahabu mu nhoto za fweza.
12No wutacile wono wukulavywa no munhu we mahala,
kuli munhu mono yendile kuhuliciza,
wuswanu, wucizize nyamwidole za zahabu,
hamba vibwe vyo wuguzi wukamu,
vyono vinozigwe ne zahabu nengu.
13U mwitumami mwihuwilwa,
kamwendezaga mono yakumutuma,
nhe malenga ge mbeho, mu madaha ge nhwanga,
mwi'zuwa likali.
14Ne wanhu wono wehuwizaga vinhu ko wulambi,
wehwanile mavunde ne mbeho, vyono visina mvula.
15Zinghani ze ngola,
ziwusaga wiwanganile we vilungo no kutuza watemi.
16Wulece kukomba wuci winji kuciza,
hono wucizilize, kodeka.
17Wulece kubita ku kaya yo mwikalani muyago kali kenji.
Hambi nha lyowa yikataza kuli mwene,
na hanyuma kokusula.
18Na mono yakumubalalila muyagwe,
yuyo muwulaji, yenha mumaje,
ne nhumbi, hamba songa nghali.
19Hono wumwitumbile munhu mono si mwihuwilwa,
mu vilo vyo wugaye,
yowa nha munhu mono yakujela kutafunya ndigwa ne lino lyono libenece,
hamba kujenda no mugulu wono wutinghuce.
20Na hono wumwimbile zinyimbo munhu mono yena wukalale,
yowa nha wukumuvula myenda yakwe,
mwi'zuwa lyono lina mbeho nghali,
hamba kotya nho kuwukusuwa mwino mu nghomele.
21Na hono mulugu wako yawe yadabuce, wumulisaje.
Na hono yakaluce, mupelaje malenga yang'we.
22Na hono wumutendele zizo,
komukoza cevu muno.
Nagwe Muwaha Mulungu kokuhumbiliza.
23Maheho, galetaga makuwo,
nha vyono mbeho ya kusumuka yiletaga mvula.
24Yili ciba kwikala kunze mwi'tembe mucanyha,
si nho kuwa mu kaya monga,
no mucekulu mono yali zozo.
25No wuhulika nghani swanu,
ku wulawa ku yisi yo kutali,
yihwanile no kung'wa malenga ge zizizi,
lono wukaluce.
26No munhu muswanu lono yakuhanga no munhu mubi,
yakwihwana no munhu we ling'ani,
mono yakuwuya ne nyuma no kuhanga ne wabi,
kawa nho muvwilo wono wanhu watibuye ne magulu,
hamba cisima cono civizice.
27Si viswanu kuli'gwe kulya wuci winji.
Weze no wiyimile mu wituma nghani.
28Na hono wulece kusuma kulimila likuwo lyako,
kokwihwana ne likaya lyono lisina magomawakali,
nalyo liwezaga yipelu no kuhomwa.
Cigogo Bible © Bible Society of Tanzania, 2002.