Exodo 25
25
Jun limosna ja' b'a snaj ja Dyosi
1Ja Dyosi, yala yab' ja Moisesi:
2—Ala yab' ja israelenio jumasa a stsom'e' jun limosna a yi'ejan ki. Mok a k'anyi'e t'ilan, a ya' ye'nle ja janek' wa sk'ana oj ya'e ki'i, a ya'e sok spetsanil sk'ujole'. 3Ja it jumasa ja wax k'ana oj ya'weki'i:
K'anal tak'in, sakal tak'in sok kobre;
4k'u'uts b'a chak muk muk, b'a k'ik' muk muk, b'a jel chak, sok pilan k'u'uts b'a lek lek;
sts'ujmil chivo,
5sts'ujmil chej b'a ts'isub'al sok chak sok tuk ts'u'um b'a lek lek,
sok te' b'a sb'i'il acasia,
6ja aceite sb'a ajlub' jumasa,
sok ja perjume sb'a aceite b'a oj pek'xuk yi ja kristyano jumasa, sok ja pom it jel tsamal yik'ili,
7tsamal ton, jastal Onise b'a jitsan yelaw, b'a oj a'xi ochyi ja sk'u' wa slapa ja pagre ma niwan ja ya'teli.
8—Wax k'ana oj cho a tojb'esex jun snajtsil tsomjel b'a ti oj ajyukon a mokexa. 9Jach' oj ja tojb'esex, ja jastal ojto je'a wi'exi, ja smesa'il sok ja siya'il jumasa.
Ja skaja'il ja trato
10—Wax cho jk'ana oj ja k'u'l jun kaja sok te' sb'i'il acasia. A'yi jun metro sok nalan ch'ile ja snajtili, jaxa sati a'yi ox ch'ile sok snalan, cho jach' a'yi ja scha'anili. 11Ja b'a jwera sok ja b'a yojoli potso sok kanal tak'in jach'ni ja b'a sti'tiki. 12B'a jujune' yok a och yargoya'il b'a kanal tak'in, b'a jachuk oj ajyuk chab' argoya b'a jujune' sts'e'el. 13K'u'lan chab' oxuk yal b'ok'an te' sb'i'il acasia, potso lek sok k'anal tak'in. 14Tix wa' och b'a argoya jumasa b'a yok ja kajoni, b'a jach' oj b'ob' likxuk ek'a. 15Mok lom awa eluk ja tiwi, akan ja b'a yoj argoya. 16Jaxa yajni xka' b'a a k'ab' ja lajune ab'ali, ti xwa' och b'a yoj skajonil ja trato.
17—Tsa'an ti'xa k'u'lan jun smakb'al sti' ja skajonil ja trato b'a toj k'anal tak'in, a'yi jun metro sok nalan ch'ile ja snajtili, jaxa sati a'yi ox ch'ile sok snalan. 18B'a jujune' sts'e'el jas makb'ali tixa wa'a chab' jastal anjel querubin,#25:18 anjel querubin: Ja querubini jach splanta jastal chante sok winik, jel tsatse sok wax talnaniye. b'a toj k'anal tak'in tojb'el sok martiyo. 19Ja smajkil sti' sok ja chab' anjel querubin tojb'eli june ita oj kanuk. 20Ja chab' anjel tojb'eli ti oj ajyuke tek'an b'a jujune' s'olom ja oj sk'el'e' ja smajkil sti' ja kaja, ja oj smak e' sok ja swech'e'i. 21Yajni xa maka sti ja skajonil ja trato, ti'xa nolo b'a yojol ja lajune yab'ali. 22Jaxa b'a tek'an ja chab' anjel querubin tojb'eli, ti' oj jta' jb'ajtik b'a snalane ja ke'ntiki, ti' oj kal a wab' tiw ja jas oj b'ob' sk'u'luk sok jasunk'a mi oj sk'u'luke ja israelenio jumasa, —xchi ja Dyosi.
Ja mesa b'a oj ajyuk kajan ja span ja Dyosi
23—Wax k'ana oj ja k'u'luk jun mesa sok te' sb'i'il acasia. A'yi chan ch'ile sok snalan ja snajtili, jaxa sati a'yi chab' ch'ile sok ox k'ab'e, ja scha'anili, a'yi ox ch'ile sok ox k'ab'e. 24Potso sok k'anal tak'in, a'kan jun yelaw sjoyanal sok k'anal tak'in. 25A'kan xe'n yal spejanal ja sti sok chan k'ab'e sniwanil, a kan sok yelaw k'anal tak'in. 26-28B'a jujune' yok a och yargoya'il b'a k'anal tak'in, ja oj makunuk b'a oj likxuk sok ja mesa jawi. Ja yal ste'il oj och b'a yargoya'ili, t'ilan oj tojb'uk sok te' acasia sok oj potsxuk sok k'anal tak'in. 29Ja jastik oj makunuk b'a mesa t'ilan toj k'anal tak'in, jastal sek', slechulab'il, jarro, sb'isolab'il ya'lel ts'usub' b'a smajtan Dyos. 30Ja b'a mesa, ja ti oj ajyuk ja pan it oj ja wa'wex ki b'a jmajtani.
Ja kandelerio toj k'anal tak'ini
31-36—Wax cho jk'ana oj ja tojb'es jun kandelerio b'a tojb'el sok martiyo june ita oj kanuk. Spetsanil t'ilan toj k'anal tak'in. Jach'ni ja snichmal wax b'ots'xi soki. B'a skujla yub'i oj och chane nichim sb'i'il almendro, ja oxe snich b'a ib'elajeli oj el wake sk'ab'; oxe b'a jun ste'il oxe b'a pilan. Jaxa snich b'a k'e'eli oj el jun sk'ab b'a snalani. B'a jujune' sk'ab' oj tojb'uk sok oxe snich almendra, oj ajyuk sok jun yajlub', ja'yuj ja kandelerio jawi, oj ajyuk juke yajlub' ja spetsanili. Jach'ni ja ajlub' jumasa jach' yiljel jastal almendra, 37tini oj ajluk b'a sti' sat. 38Ja slats'u lab'il chakal k'ak' sok ja b'a wax nololxi ja ta'ani, t'ilan toj k'anal tak'in.
39—B'a oj ja tojb'es jun kandelerio sok spetsanil ja smoj jumasa, t'ilan oj makunuk a wuj jun tajb'e sok ox lajune (33) kilo k'anal tak'in. 40Na'a lek yuj ja t'ilan jach' oj ja k'u'luk, ja jastal je'a wi b'a witsi.
ที่ได้เลือกล่าสุด:
Exodo 25: YABD
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Sociedad Bíblica de México 2021