Mbete Rɔmri 13
13
1Ŋgerzah mí hi̧ lák mbay. Nzuk a a̧yri ké ƴo ri-ay, lák mbay woyri gbam ur ké ta̧w ye. Mí nzuk a suŋ suŋ le ɓá hȩk nzuk-lak tusiɓari. 2Nzukri ké kpuh tul ziŋ nzuk-lak tusiɓari le, ku mba nzak Ŋgerzah munu, mí nzukri ké ƴo kpuh tulaw ƴah salɓay ku̧ tul woyri ke mun woyri 3ɓayu ké nzuk-kuŋ salɓayri ta ɓa nzuk-se hȩkme ɓay nzuk-laɓ sukiri ya. Le ku ɓa nzuk-se hȩkme ké ta̧w nzuk-laɓ suyari. Mí mu sa ɓay hi̧ nzuk-lak tusiɓari ɓá se mu hȩkme ya le, mú laɓ suki, ku pír mu pir. 4Ɓay fe le ku ƴo laɓ pihna hi̧ Ŋgerzah ɓay suki wo. Mí mu laɓ suya le, hȩkme ɓá se mu. Ku uk mahwu̧y ndikpo ya. Ku ƴo laɓ pihna hi̧ Ŋgerzah le, ku uk ɓay sɔk keni law fa̧hna ɓay kuŋ salɓay tul nzukri ké laɓ suya. 5Sa̧wu mí su-su ɓay hȩk nzuk-lak tusiɓari ɓay salɓay kú-u kuŋu kaŋto ya. Le ɓay law a teh-u mí mu hȩk niri. 6Kandɔkaw mí í puh lampoh hi̧ niri pu-puh. A woyri ba, ku ƴo laɓ pihna hi̧ Ŋgerzah, ku ƴo poŋ mun woyri hi̧ pihna-u.
7Í hi̧ a ge ge le, fe ké-e vbi. Ɓa ra lampoh kara í hi̧ nzuk lampoh. Ɓa ra fe mbu̧hna kara í hi̧ nzuk fe mbu̧hna. Ɓa ra hȩkna kara í hȩk nzuk hȩkna. Ɓa ra rohna kara í roh nzuk-lak tusiɓari. 8Mbɔl ɓá na tul woiri ya. Mbɔl ƴo ri le, ɓá na ɓa mbɔl law sana ké i sa haniri. Nzuk ké sa nzuk a ɓoru le, ke ƴo tul bolkusol ɔh ke gelu gelu gbam. 9Bolkusol ɓahri se, mu mbí wu̧y mbaŋ wo ya, mu í hul ya, mu rí-riɓa ya, mu ɓáŋ law wo kan tul fe nzuk ya. Ɓayayri ke ɓay a ɓoruri gbam mbu̧h ma ɓil ɓay ké na-ay : Mu sá nzuk mbaŋ wo eŋ mun wo kaŋ. 10Law sana laɓ fe a se-u ziŋ mbaŋ wo nzuk pirmatul ya. Law sana mí bal tul ɓay bolkusol.
11Kaŋ mí i tu wuri tu, sewu ka̧h da, ɓa sa̧wseh tóm ke nam woiri ɓay kaɓ ke nun mí na-ay. Ur ke seh ké nah kan law tul Ŋgermbay, nah ziŋ wahɓay pa̧ymun a foyu. Aŋay le ziŋu ɗih mba. 12Suŋ sih mí gel fa̧h hoh.
Tipele ɗih ziŋ na mba.
Náh lur wuri fe laɓna tirim,
náh ndoh wuri gel tehna ɓa fe rem wah.
13Náh si wuri siŋ sina ké si ke se-seh-aw ma.
Yim nday ɓá ta-a, tá yim ɓá ta-a, mbí hani ɓa riɓa ɓá ta-a, lɔ́m hani ɓá ta-a, ɓál hani ke sere kara ɓá ta-a pi.
14Dale í mbi wuri Gaŋ tul feri riw, a ye Ŋgermbay Zezu í ndoh ni ɓa gar riŋ ɗina woiri.
Í lu kerɓay-laɓ fe ké voh ɗaka haymun woiri ma fal.
ที่ได้เลือกล่าสุด:
Mbete Rɔmri 13: SIAFNK
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Wycliffe Bible Translators, Inc. All rights reserved.
