Mbete 1 Kɔrenteri 8
8
Ɓay su̧ fe su̧na kú-u puh hi̧ záhri
1Mí ɓay su̧ fe su̧na kú-u puh hi̧ záhri ɓoɗ ɓoɗ ra le, nah tu wuri ɓayu tu. Mí law sana#8.1 Ɓay law sana, í mgba Mbete Deutéronome 6.5 tuh ke gel ki̧na-ay. hi̧ sa̧w in Ŋgermbay ŋger ma pol pol, fe tuna ba, hu̧h tul ndikpo. 2Gelke nzuk ker ɓahri, ke tu fe tu le, ke tu fe mah fe tuna ya dih. 3Mí nzuk ké sa Ŋgerzah le Ŋgerzah tu ni tu.
4Kaŋ le ɓay su̧ fe puhna kú-u hi̧ záhri ra, nah tu wuri tu ɓahri se, záhri ɓa fe ya. Ŋgerzah mbew yaŋ mí ɓa záh a kpakpaŋu#8.4 Í mgba Mbete Deutéronome 6.4 tuh ke gel ki̧na-ayri.. 5Nzuk tukalari ker ɓahri, záhri ɓoɗ ɓoɗ ɓa ŋgi̧-u ƴo nunmbam ke tusiɓa, ku ƴo ɗi záhri-aw ɓa záh woyri pi, ɓa gaŋ woyri pi. 6Mí a wah nzuk-kan law tul Ŋgermbayri le, Bah wah Ŋgerzah mbew yaŋ mí ɓa záh a kpakpaŋu. Sa̧w feri gbam ur ké ta̧w ye, nah ƴo el si ta̧w ye. Gaŋ tul feri riw mbew yaŋ mí ɓa a ye Ŋgermbay Zezu. Ɓay tul ye mí feri riw ƴo. A wah kara nah ƴo ɓay tul ye pi.
7Keni-aw kara fe tuna nzuk-kan law tul Ŋgermbayri gbam mah hani ya. Nzuk a hani-uri tih ke sú̧ fe su̧na kú-u puh hi̧ záhri. Ku su̧ fe puhna ra le, kerɓay woyri na sa tul záhri-aw. Mí kerɓay woyri ké ŋgi̧ ya ra, ƴo ruklu law woyri. 8Fe su̧na ta ɓah ɓay a hani-u tul wah ké nun Ŋgerzah ya. Nah su̧ ya le, nah zi fe ya. Mí nah su̧ kara nah ziŋ fe a hani-u ya pi. 9Í ko tul woiri ger rɔkɔ sú̧ fe puhna-aw ɓá ti̧h ɓa kasaw-ɓe bɔk hi̧ nzuk a ɓoruri ké kerɓay woyri ŋgi̧ ya.
10Gelke yi̧n wo ɓil Ŋgermbay a hani ko mu a wo nzuk fe tuna-u, mu kaɓ nzak fe su̧na gel fe puhna záhri dale, a ye ké kerɓay ye ŋgi̧ ya ɓáy ra, ke mbí mun ye ɓay su̧ fe puhna hi̧ záhri ra ya le wo ? 11Ɓay fe tuna wo-aw mí ke zi keni, a ye ké kanlaw ye ŋger ya ra Ŋgermbay hu ɓay tul ye. 12Kandɔkaw mí i ƴo laɓ nzuk yi̧n ɓil Ŋgermbayri su ya, i el ɓeɓ law woyri ké kerɓay woyri ŋgi̧ ya ra le, i ƴo laɓ Ŋgermbay su ya munu. 13Sa̧wu mí hay fe puhna ɓa ndaw ké pol yi̧n bi le, mi ta su̧ hay mba wu̧m rɔkɔ yi̧n bi ɓá lih.
ที่ได้เลือกล่าสุด:
Mbete 1 Kɔrenteri 8: SIAFNK
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Wycliffe Bible Translators, Inc. All rights reserved.