Mbete 1 Kɔrenteri 7
7
Ɓay yá̧ hani ke káɓ ɓa iw
1Ɓay woiri ké i vbeh hi̧ mi ɓahri se : « Su-su ɓay wo̧ronzuk ɓá kaɓ kaŋ dan ná ke wu̧ynzuk » ra, 2mi yih nzak woiri kandɔkay : Ɓay fe zɔklɔ nunpuki, mí wo̧ronzuk ɓá na ke wu̧y ye, wu̧ynzuk ba, ɓá na ke wah ye. 3Ná ke hani ɓa mbɔl ké wo̧ronzuk ɓá puh hi̧ wu̧y ye. Wu̧ynzuk kara ɓá puh hi̧ wah ye kaŋ pi. 4Ɓay fe le wu̧ynzuk ɓa mbay tul mun ye ya. Le wo̧ronzuk mí ɓa mbay tul mun wu̧y ye. Wo̧ronzuk kara ɓa mbay tul mun ye ya. Le wu̧ynzuk mí ɓa mbay tul mun wah ye. 5Í nzik hani mun woiri ya. Gelke i mbu̧h nzak mbew, i lek ɓay poŋ ná ke hani nam ndi̧ ɓay hi̧ tul woiri goŋ Ŋgerzah dale, fal nam ndi̧-aw í el na ke hani ɓáy, rɔkɔ ŋgerna-mgba mun woiri ké ŋgi̧ ya ra ɓá mgbur ful hi̧ satan a ye mbay záh tukala leh law woiri. 6Kandɔkaw mí-i yih nzak woiri ɓay hi̧ law woiri ɓá voh. Ɓa hewna, ta ɓa bolkusol ya.
7A bi Pɔl mi yih ɓay wo̧rori gbam ɓá kaɓ kaŋ dan ná ke wu̧yri eŋ mi. Mí a ge ge le, Ŋgerzah hi̧ ni ŋgerna ye ŋgerna ye. Nzuk mbew ƴo ke ŋgerna a a̧y, nzuk a ɓoru ba, ƴo ke ŋgerna a a̧w#7.7 Í mgba Mbete Matiye 19.10-12 tuh ke gel ki̧na-ay ɓay lah ɓay kaɓ ɓa iw.. 8Mi ƴo ɓah hi̧ wu̧y kaŋpeleri ke iwri ɓahri, su-su ɓay kú kaɓ ɓa iw eŋ mi. 9Mí nzukri ké ta ke ŋgerna mgba mun woyri ya le, kú ya̧ hani. Yá̧ hani su mba law nzuk ké zaŋ huɗ huɗ ɓay mgba̧y.
10Mí nzuk yi̧n ɓil Ŋgermbay ké ya̧ haniri ra, mi hew niri ke bolkusolay. Ta ɓa bolkusol bi ya wara le, ɓa bolkusol Gaŋ tul feri riw. Bolkusolu mí na-ay : Wu̧ynzuk ɓá poŋ wah ye ya. 11Mí wu̧y poŋ wah ye le, ké kaɓ kaŋ, ké ya̧ wo̧ro a ɓoru ya. Ke sa kaɓ ɓa iw ya le, kú gɔl hani ke wah ye. Wo̧ronzuk ba, ɓá ni̧h wu̧y ye ya.
12Mí ɓay sam ya̧ hani ké zu-zukru ké nzuk a mbewu kan law tul Ŋgermbay ya ba, hewna bi mí na-ay, ta ɓa bolkusol Gaŋ tul feri riw ya : Nzuk yi̧n ɓil Ŋgermbay a a̧y ké wu̧y ye kan law tul Ŋgermbay ya, mí wu̧yu yih kaɓ ziŋ ni le, ké ni̧h ni ya. 13Nzuk yi̧n ɓil Ŋgermbay a wu̧yu ké wah ye kan law tul Ŋgermbay ya ba, wo̧ro-u yih kaɓ ziŋ ni le, ké poŋ ni ya, 14ɓayu ké wo̧ronzuk ké kan law tul Ŋgermbay ya, Ŋgerzah ko ni ɓa nunu a ye ɓayu kú-u ƴo mbew ke wu̧y ye. Kaŋ mí wu̧ynzuk ké kan law tul Ŋgermbay ya, Ŋgerzah ko ni ɓa nunu a ye ɓayu kú-u ƴo mbew ke wah ye pi. Mí Ŋgerzah ko niri ɓa nunu a ye ya le, gun woyri kara ɓay mah nun ye ya pi. Ketina le ku ɓa nunu a Ŋgerzah gaŋ. 15Mí nzuk a a̧y ké kan law tul Ŋgermbay ya ra, ke yih kehr hani ke nzuk yi̧n ɓil Ŋgermbay ké-e ya̧ le, nzuku ɓá gboh mun ye ya. Nzuk yi̧n ɓil Ŋgermbay a wu̧yu mini a wo̧ro-u ra yá̧ hani woyri ŋga̧h niri ɓa mgbal ya ɓay fe le, Ŋgerzah ɗi wuri nzuk yi̧n ɓil Ŋgermbayri ɓa nzuk-kaɓ ɓil ɗeŋ. 16A wo wu̧y, mu ɓay ten wah wo ke ɓil tirim kara, mu ta tu ya. A wo wo̧ro, mu ɓay ten wu̧y wo ke ɓil tirim kara, mu ta tu ya pi.
17Mí keni-aw gbam ké haŋsekle nzukri ké kan law sa tul Ŋgermbay ra a ge ge le, Gaŋ tul feri riw hi̧ ni gel ƴona ye gel ƴona ye kandɔk ké Ŋgerzah ɗi niri-aw, mí kú ƴo tulu. Mi ƴo ɓah hi̧ sa̧w in Ŋgermbay ké gelri gbam kandɔkaw. 18Le a wo ké sa̧w wo ɓa ziɓ, sa̧w wo ƴo kuŋ ndi̧w, Ŋgerzah ɗi mu ɓa nzuk-kan law, mú el ti̧h ɓa sa̧wnzuk ndi̧w ɓɔl ya. A wo ké sa̧w wo ɓa ziɓ ya, sa̧w wo ɓa nzuk ndi̧w ɓɔl, Ŋgerzah ɗi mu ɓa nzuk-kan law, mú el ti̧h ɓa sa̧wnzuk-kuŋ ndi̧w ya. 19Kúŋ ndi̧w ɓa fe ndikpo, ndi̧w ɓɔl ɓa fe ndikpo. Ƴó tul bolkusol Ŋgerzah mí ɓa fe a kpakpaŋu. 20Ŋgerzah ɗi nzuk ɓil gel ƴona ye gel ƴona ye le, a ge ge kara ɓá ƴo tul gel ƴona-aw ɓa nzuk-dih fal Ŋgerzah.
21A wo mgbal, Ŋgerzah ɗi mu ɓa nzuk-kan law, mú hi̧ kerɓay ɓá zɔklɔ mu ya. Mí mu ziŋ ful ti̧h ke ɓil mgbal le, su-su ɓay mú ti̧h, 22ɓayu ké mgbal ké riŋ Gaŋ tul feri riw ɗi tul ye ra, ti̧h ke ɓil mgbal suya da, ke ɓa nunu a Gaŋ tul feri riw. Kaŋ pi mí nzuk-kan law ké ɓa mgbal ya ra, Ŋgerzah ɗi ni ɓa mgbal Ŋgermbay. 23Ŋgerzah puh mbɔl a ŋgeru ké tul woiri ten wuri ɓil mgbal suya dale, í hi̧ mun woiri ɓa mgbal nzuk pirmatul mba. 24Yi̧n biri mi ɓahri se, ɓil gel ƴona nzuk a suŋ suŋ ké Ŋgerzah ɗi ni ké ri le, a ge ge kara ɓá ƴo tul gel ƴona ye-aw ké nun Ŋgerzah.
25Ɓay nzukri ké ya̧ hani bɔk mbew ya ɓáy ra, mi ta ke bolkusol Gaŋ tul feri riw ké tul woyri ya. Mí kandɔk ké Gaŋ tul feri riw mgba in ziŋ mi, mí-i ƴo ziŋ ni, hewna bi mí na-ay : 26Ɓay tul fe zɔklɔ tukala ké zaŋ tul nzukri mbamba-ay, mi ko ɓahri, su-su ɓay nzuk ɓá kaɓ kaŋ. 27Mu lek ɓay ya̧ wu̧ynzuk le, mú ƴah ful sél ɓayu ya. Mí mu lek ɓay ya̧ wu̧ynzuk ya bale, mú ƴah wu̧y ya. 28Seke ya̧ wu̧y le, ke laɓ suya ya. Tikla ya̧ wo̧ro kara ke laɓ suya ya pi. Mí nzukri ké ya̧ haniri ra ɓay ƴo ke baw fe zɔklɔri. A bi mi yih kɔr wuri hi̧ fe zɔklɔ-uri ɓá toh tul woyri ya.
29Yi̧n biri fe ké mi yih ɓah-u mí na-ay : Nam ƴo ɔhna wara. Mi mbu̧h tul ɓay bi kandɔkay : Nzukri ké ya̧ wu̧y, kú laɓ kandɔk ku ya̧ hani ya, 30nzukri ké ƴo ɓil mbihnun kú laɓ kandɔk ku vuh rew ya, nzukri ké ƴo zay mun kú laɓ kandɔk ku zay mun ya, nzukri ké ƴo yeh fe kú laɓ kandɔk ku ɓaŋ law kan tul fe kú-u yeh ya, 31nzukri ké ƴo su̧ suki tukala kú laɓ mun kandɔk ku ziŋ fe hani ya, ɓayu ké fe tukalari-aw ƴo kalna.
32Mi yih hi̧ kerɓay ɓá zɔklɔ wuri ya. Iw ra, ke ƴo ker ɓay pihna Gaŋ tul feri riw ɓay ké rih law Gaŋ tul feri riw. 33Mí nzuk ké ya̧ wu̧y ba, ke ƴo ker ɓay fe tukala ɓay hi̧ ké rih law wu̧y ye. 34Dale kerɓay ye keh-kehr.
Wu̧y ké ta ke wo̧ro ya mini tikla, ku ƴo ker ɓay pihna Gaŋ tul feri riw, ɓay kú na ɓa nunu a Gaŋ tul feri riw ke mun woyri pi ke tem woyri pi. Mí wu̧y wo̧ro ba, ke ƴo ker ɓay fe tukala ɓay hi̧ ké rih law wah ye. 35Mi hew wuri kaŋ ɓay suki woiri gaŋ. Hewna-u ta ɓa sal mí-i ŋga̧h kan sol woiri ya. Mi hew wuri ɓay gel kaɓna woiri ɓá na ɗeŋ dan fe zɔklɔri dale, kerɓay woiri ɓá na hoy ké tul Gaŋ tul feri riw dan kehrna.
36Gelke seke ƴo si mbana, mí ke ta̧h va̧na mgba mun ye kpu̧y, ke ko láɓ mbana-u ɓay ɓaŋ su̧hru kan nun wu̧y mbana ye le, mah ɓay ké laɓ kandɔk ké-e ker pol, kú ya̧ hani. Ke laɓ suya ya. 37Mí gelke seke ƴo si mbana, mí ke el ger ɓay ye ɓahri : « Mi káɓ ɓa iw. » Ɓay yá̧ wu̧yu ruklu law ye ya le, ke ɓa mbay tul kerɓay ye. Ke ɓahri se : « Mi poŋ sí mbana da, mi ta ya̧ wu̧y mba, » le ke laɓ fe a suki munu. 38Kaŋ mí nzuk ké ya̧ wu̧y laɓ suki, mí nzuk ké ya̧ wu̧y ya le, suki ye ŋgi̧ mbamba.
39Salɓay ŋga̧h wu̧y wo̧ro ke wah ye kpu̧ru. Mí wah ye hu le, mahful ƴo ri ɓay ké ya̧ nzuk a a̧y ké law ye yih. Mí wo̧ro-u ɓá na ɓa nzuk-kan law tul Gaŋ tul feri riw. 40Mi ɓahri, wu̧yu kaɓ kaŋ kandɔk a bi ké mi kaɓ ɓa iw-ay le, pol tehna a ŋgi̧-u ɓa nzuku a ye. Kerɓay bi munu. Ɓil nzak hewna biri-aw, mi ko ɓahri, Tem Ŋgerzah ƴo ziŋ mi pi.
ที่ได้เลือกล่าสุด:
Mbete 1 Kɔrenteri 7: SIAFNK
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Wycliffe Bible Translators, Inc. All rights reserved.