Kejadian 50
50
1Dari situ Yusuf langsung tunduk polo de pu bapa pu kepala, de mnangis baru cium de pu bapa. 2Habis itu, Yusuf suru orang-orang yang biasa bikin ramuan-ramuan untuk bikin mayat tahan lama tu, urus de pu bapa pu mayat. Jadi orang-orang itu dong bikin ramuan-ramuan baru kasi ke Yakub#50:2 Yakub ‒ Bahasa Ibrani: Israel. Liat catatan di Kejadian 37:3. Ada juga di 50:25. pu mayat. 3Dong pu cara bikin mayat tahan lama tu, pake waktu sampe 40 hari. Orang-orang Mesir dong duka 70 hari untuk Yakub.
4Habis dong pu waktu duka su lewat, Yusuf bilang sama orang-orang di raja Mesir pu istana,
“Kalo kam snang deng saya, nanti tolong kastau pesan ni sama raja Mesir, 5‘Waktu sa pu bapa su mo mninggal, de suru sa sumpa ke dia kalo nanti sa kubur de di kuburan yang de su siap di tana Kanaan. Itu jadi, sa mo minta ijin untuk pi kubur sa pu bapa. Habis itu nanti sa kembali.’”#Kejadian 47:29-31
6Habis dong bawa pesan itu, raja Mesir de jawab, “Pigi suda ke Kanaan! Pi kubur ko pu bapa! Bikin yang ko su sumpa sama ko pu bapa itu.”
7Jadi waktu Yusuf de pigi kubur de pu bapa tu, raja pu orang penting smua, tua-tua di istana deng tua-tua di tana Mesir, dong smua pigi sama-sama deng Yusuf. 8Yusuf pu kluarga, de pu sodara-sodara, deng de bapa pu sodara-sodara yang lain juga ikut. Tapi anana kecil deng binatang piara macam kambing domba deng sapi-sapi tu tetap tinggal di daera Gosyen. 9Orang-orang yang pake kreta kuda deng pasukan-pasukan yang pake kuda juga ikut. Itu bikin sampe dong pu rombongan yang antar tu, panjang skali.
10Pas dong sampe di tempat yang nama Goren-Haatad, yang ada di kali Yordan pu bagian timur, dong smua bongkar mnangis gara-gara dong sedi skali. Yusuf bikin acara duka untuk de pu bapa lagi disitu tu sampe tuju hari. 11Waktu pas orang-orang Kanaan yang tinggal disitu dengar orang dong mnangis kuat-kuat di Goren-Haatad tu, orang Kanaan dong bilang begini, “Ini memang orang Mesir pu acara duka paling sedi suda.” Jadi dari situ suda, tempat tu dong kas nama Abel-Mizraim.#50:11 Abel-Mizraim ‒ De pu arti ʻMesir dong pu rasa sedi yang para skali.ʼ De pu tempat tu pas di sebla kali Yordan.
12Jadi memang, apa yang Yakub de suru de pu anana bikin, dong bikin itu. 13Yakub pu anana dong bawa de pu mayat ke Kanaan. Dong kubur de di kuburan dalam goa di kebun Makpela. Tempat itu dulu Abraham de bli dari orang Het yang nama Efron, untuk bikin jadi dong pu kuburan. De pu tempat ada di sebla timur daera Mamre. 14Habis kubur de pu bapa, Yusuf sama de pu sodara dorang deng rombongan smua yang ikut pigi kubur tu, dong kembali ke Mesir.
Yusuf hibur de pu sodara dong pu hati
50:15-21
15Habis Yusuf pu sodara-sodara liat kalo dong pu bapa su mninggal, dong mulai baku bilang, “We, bagemana kalo Yusuf de masi mara deng kitong? Bagemana kalo de balik bikin tong macam dulu tong bikin jahat de begitu?” 16Jadi dong kirim pesan begini ke Yusuf,
“Waktu ko pu bapa su mo mninggal, 17de suru kitong bilang begini sama ko, ‘Yusuf, kas ampun ko pu sodara dorang suda, yang dulu perna bikin sala besar sama ko.’ Itu jadi, tong mo minta ko untuk kas ampun kitong pu sala paling besar yang dulu tong bikin sama ko. Tong ni semba Allah yang sama, Allah yang tong pu bapa semba.”
Waktu dengar pesan tu, Yusuf de langsung mnangis.
18Waktu itu Yusuf pu sodara dong datang trus tunduk kasi hormat depan Yusuf baru bilang, “Tong ini ko pu budak.”
19Tapi Yusuf bilang sama dorang,
“Sodara eee, kam takut untuk? Sa ni Allah ka? 20Memang dulu kam bikin rencana jahat ke saya, tapi Allah bikin kam pu rencana tu jadi baik. Allah pake itu untuk kas slamat orang banyak pu hidup skarang ni. 21Jadi sodara, kam jang takut! Sa nanti tanggung kam deng kam pu anana pu hidup.”
Waktu bilang begitu, Yusuf bikin de pu sodara dong langsung tenang. De bikin dong pu hati langsung tra rasa takut lagi.
Yusuf mninggal
50:22-26
22Yusuf deng de pu kluarga smua dong tetap tinggal di Mesir. Yusuf de masi hidup sampe de pu umur 110 taun. 23Yusuf masi hidup sampe de pu cucu pu anana lahir. Jadi Yusuf masi liat Efraim pu cucu-cucu. Trus Manasye pu anak Makir pu anana juga tu, Yusuf bikin dong macam de pu anana sendiri begitu.#50:23 Yusuf bikin dong macam de pu anana sendiri begitu ‒ Bahasa Ibrani: Dong lahir di Yusuf pu pangkuan.
24Begini, Yusuf bilang sama de pu sodara-sodara, “Tra lama lagi ni sa su mo mninggal. Tapi Allah pasti datang liat kam nanti, trus pimpin kam kluar dari tana ini ke tana yang Allah De su janji deng sumpa sama Abraham, Ishak, deng Yakub.” 25Habis itu Yusuf suru Yakub pu anana cucu dong sumpa juga. De bilang, “Allah pasti datang liat kam nanti. Waktu itu, kam harus bawa sa pu tulang-tulang kluar dari tana ini sama-sama deng kam juga.”#Keluaran 13:19; Yosua 24:32; Ibrani 11:22
26Jadi Yusuf de mninggal di Mesir, waktu de pu umur su masuk 110 taun. Orang-orang Mesir kasi ramuan-ramuan untuk bikin de pu mayat bisa tahan lama, trus dong taru de pu mayat dalam peti di Mesir.
ที่ได้เลือกล่าสุด:
Kejadian 50: MPapua
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023 (Active), Wycliffe Bible Translators, Inc. All rights reserved.
