Kejadian 37
37
Yusuf deng de pu mimpi-mimpi
37:1-11
1Yakub ni de lanjut tinggal di tana Kanaan, tempat yang dulu de pu bapa Ishak tinggal jadi pendatang disitu.
2Ini crita tentang Yakub pu kluarga.
Skarang begini, Yakub pu anak yang nama Yusuf ni, de umur 17 taun. Yusuf de biasa bantu jaga liat bapa Yakub pu kambing domba. Yusuf de kerja deng de pu kaka-kaka yang dari bapa Yakub pu istri Zilpa deng Bilha.#37:2 Zilpa deng Bilha ‒ Dong dua tu Yakub pu istri Rahel deng Lea pu budak prempuan. Kalo de pu kaka dong bikin jahat pas dong kerja, Yusuf de pi lapor ke Yakub, dong pu bapa ni.
3Karna Yusuf de lahir pas waktu Yakub su tua jadi, Yakub#37:3 Yakub ‒ Bahasa Ibrani: Israel. Juga ada di 37:13, 14. Israel tu de pu nama baru yang TUHAN kasi (liat di Kejadian 32:28 deng 35:10). ni de lebi sayang Yusuf daripada de pu anana yang lain. Itu yang, Yakub de suru bikin pakean bagus skali yang panjang untuk Yusuf pu hadia. 4Waktu Yusuf pu kaka dong liat bapa Yakub ni lebi sayang Yusuf daripada dong yang lain, Yusuf pu kaka dong langsung tra snang Yusuf skali, sampe dong su tra mo bicara baik-baik deng Yusuf lagi.
5Satu kali begini, Yusuf de mimpi, baru de crita de pu mimpi tu sama de pu kaka dorang. Waktu Yusuf pu kaka dong dengar de pu mimpi itu, dong langsung tamba tra suka de skali. 6Yusuf crita de pu mimpi begini,
“Kaka, coba kam dengar dulu sa pu mimpi ni. 7Sa mimpi, tong ada di kebun, ada ikat-ikat gandum. Trus begini sa pu gandum yang su dapa ikat tu, de bediri lurus. Trus begini kaka kam pu gandum yang su dapa ikat juga tu, datang kliling sa pu gandum baru dong tunduk kasi hormat ke sa pu gandum itu.”
8Dengar begitu, langsung Yusuf pu kaka dong bilang sama Yusuf, “Jadi, ko mo jadi raja trus suru-suru kitong, iyo?” Dari situ tu Yusuf pu kaka dong jadi tamba tra suka de skali, gara-gara dengar Yusuf de crita de pu mimpi itu.
9Satu kali begini, Yusuf de mimpi lagi, baru de pigi crita de pu mimpi tu sama de pu kaka dorang. De bilang begini, “Kaka-kaka, sa ada mimpi lagi ni. Dalam mimpi tu sa liat matahari deng bulan sama bintang 11, dong smua tunduk trus kasi hormat sama saya.”
10Habis de crita de pu mimpi itu ke de pu kaka dong deng ke de pu bapa, de pu bapa langsung mara dia, “Mimpi apa itu?! Ko pikir bapa, mama, deng ko pu sodara dong mo tunduk hormat ko sampe ke tana, iyo?” 11Dari situ, de pu kaka dong tamba iri hati deng de skali, gara-gara de pu mimpi-mimpi itu. Tapi de pu bapa tinggal ingat Yusuf pu mimpi trus.
Yusuf pu sodara dong baku atur untuk bikin jahat
37:12-24
12Satu hari begini, Yusuf pu kaka dong su pigi ke tempat dekat kota Sikem. Dong mo pigi kas makan dong bapa pu kambing domba disitu. 13Lewat brapa hari begini, Yakub#37:13 Yakub ‒ Bahasa Ibrani: Israel. bilang sama Yusuf, “Yusuf, sa mau ko pigi liat ko pu kaka dong dulu. Dong ada kas makan kambing domba dekat kota Sikem situ.”
Yusuf de jawab, “Iyo bapa.”
14Trus Yakub bilang Yusuf lagi, “Ko pigi liat ko pu kaka dong sama kambing domba itu. Dong baik-baik saja ka trada. Baru, nanti ko datang lapor ke bapa sini.” Jadi suda, Yusuf pu bapa kirim de ke tempat dekat kota Sikem situ, dari tana renda Hebron.
Lewat brapa hari begini, Yusuf de su sampe di kota Sikem. 15Waktu Yusuf de ada jalan kliling-kliling di daera sepi tempat rumput saja tu, ada bapa satu yang liat dia. Bapa itu de tanya Yusuf, “Anak, ko cari apa ka?”
16Yusuf de jawab, “Sa cari sa pu kaka dorang, bapa. Bapa tau ka, dong ada jaga liat kambing domba di sebla mana eh?”
17Trus bapa itu de jawab, “O... iyo betul, tadi dong ada disini. Tadi sa dengar dong bilang dong mo pigi ke kota Dotan.” Jadi, Yusuf de langsung pigi ke Dotan trus de ketemu deng de pu kaka dorang.
18Dari jau ni, de pu kaka dong su liat dia. Jadi, waktu de masi jau, dong su baku atur untuk mo bunu dia. 19De pu kaka dong baku kastau,
“We, kam liat eh! Tukang mimpi de ada datang tu. 20Mari! Tong bunu baru buang de ke dalam satu dari sumur kring#37:20 sumur kring ‒ Disitu ada banyak lobang yang dalam skali di tana, orang dong yang gali dulu untuk tampung air hujan. ini. Nanti tong tinggal bilang saja kalo ada binatang liar satu yang makan dia. Baru nanti tong liat, de pu mimpi tu jadi ka trada!”
21Waktu dong pu kaka Ruben, de dengar dong pu rencana tu, de mulai cari jalan untuk kas slamat Yusuf. Jadi, Ruben de bilang begini, “Suda, tong tra usa bunu dia! 22Lebi baik tong tra bikin de luka-luka. Tong lempar de ke dalam sumur kring di tempat sepi#37:22 tempat sepi ‒ Ini tempat yang kring baru rumput satu-satu saja. Trada orang yang tinggal disini karna terlalu tandus skali. ini saja, tapi tong tra usa bikin apapa ke dia.” Ruben de bilang begitu karna de mo kas slamat Yusuf trus bawa Yusuf balik ke de pu bapa.
23Jadi, waktu Yusuf su sampe di de pu kaka dong pu tempat, dong langsung tarik de pu pakean bagus yang panjang tu kas lepas. 24Baru dong seret de ke sumur, baru lempar de ke dalam sumur yang su kring itu.
Yusuf dapa jual, Yakub dapa tipu
37:25-36
25Habis itu, Yusuf pu kaka dong duduk makan. Pas dong angkat muka begini, dong liat ada orang Ismael satu rombongan yang datang dari Gilead. Orang-orang itu dong mo ke Mesir deng dong pu unta-unta yang ada bawa ramuan-ramuan sama geta-geta kental#37:25 geta-geta kental ‒ Itu geta dari tanaman yang beda-beda. Geta tu de pu bentuk, ada yang macam gam-gam, tapi ada juga yang kras macam batu. yang biasa dong pake untuk obat gosok sama untuk kas wangi-wangi. 26Langsung Yusuf pu kaka Yehuda ni, de kas suara ke de pu sodara-sodara dorang, “We kam, untuk apa juga tong bunu tong pu ade baru kas sembunyi dia? Trada untung juga mo. 27Tong jual de ke orang Ismael dong suda, tra usa bikin apapa dia. De juga tong pu sodara satu bapa mo.” De pu sodara-sodara dong stuju deng yang Yehuda bilang.
28Jadi waktu tukang jual-bli dari Midian ni dong lewat, Yusuf pu kaka dong tarik de kluar dari sumur trus jual de ke orang-orang Ismael itu. Yusuf pu sodara dong jual de deng harga 20 uang perak. Jadi, orang-orang itu dong bawa Yusuf sama-sama deng dong ke Mesir.
29Pas waktu Ruben de kembali,#37:29 de kembali ‒ Waktu dong jual Yusuf, Ruben trada disitu. Mungkin karna itu de pu giliran pigi jaga kambing domba jadi de tra sama-sama deng dong. de pi cek ke sumur begini, Yusuf su trada disitu. De pu hati langsung rasa sedi skali sampe de langsung robek de pu pakean. 30Trus de balik baru de bilang sama de pu sodara dorang, “We kam! Yusuf su trada! Bagemana ni, sa mo bikin apa lagi skarang?!”
31Trus, de pu sodara dong ambil Yusuf pu pakean bagus yang panjang tu, dong potong kambing satu, trus dong colo Yusuf pu pakean bagus ni dalam kambing pu dara tu. 32Baru dong suru antar Yusuf pu pakean bagus yang su ada dara tu ke dong pu bapa. Trus dong bilang dong pu bapa begini, “Bapa, coba bapa liat ini dulu, pakean yang tong ada dapat ni. Mungkin ini bapa pu anak Yusuf de pu pakean kapa?”
33Pas Yakub de liat pakean itu, de langsung knal trus bilang, “Iyo, ini sa pu anak Yusuf pu pakean! Pasti binatang liar su makan dia ini! Pasti Yusuf su dapa srang dari binatang itu!” 34Yakub juga langsung robek de pu pakean trus de pake kain kabung,#37:34 kain kabung ‒ Itu kain yang kasar yang dong biasa bikin dari bulu kambing. Biasa orang-orang pake kain kabung waktu dong ada duka ato waktu kas tunjuk kalo dong menyesal (Yunus 3:5). habis de sedi skali. Yakub de tinggal mnangis trus untuk de pu anak, sampe su lewat brapa hari juga de tra brenti. 35Biar de pu anana laki-laki deng anana prempuan dong datang kas tenang de juga tapi, de tetap tra mau. De bilang begini, “Sa trakan brenti mnangis untuk Yusuf, sampe sa juga mninggal ikut dia.” Jadi begitu suda, Yusuf pu bapa ni tinggal mnangis de trus.
36Baru pas waktu itu tu, orang dari Midian yang bawa Yusuf tu, dong jual Yusuf ke Mesir pu orang penting satu, ke bapa Potifar. De tu kepala dari raja pu pasukan kusus.#37:36 raja pu pasukan kusus ‒ Ini pasukan kusus yang biasa jalan kawal raja ke mana-mana, dong yang jaga raja Mesir ini.
ที่ได้เลือกล่าสุด:
Kejadian 37: MPapua
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023 (Active), Wycliffe Bible Translators, Inc. All rights reserved.
