Kejadian 26
26
Ishak di daera Gerar
26:1-25
1Skarang begini, ada klaparan di tana yang Ishak tinggal itu. Klaparan macam begini dulu su perna ada juga di Abraham dong pu jaman. Gara-gara ini yang bikin Ishak dong pigi ke kota Gerar, ke orang Filistin dong pu raja Abimelek. 2Waktu itu, TUHAN kas tunjuk De pu diri sama Ishak baru bilang de begini,
“Jang pigi ke Mesir! Ko pigi tinggal dulu di daera yang nanti Sa kas tunjuk ko. 3Ko tinggal di tana ini jadi pendatang saja dulu. Sa yang nanti ada sama-sama ko, trus kas berkat ko, karna Sa mo kasi tana ni smua untuk ko deng ko pu turunan nanti. Sa pu sumpa ke ko pu bapa Abraham itu, pasti Sa bikin. 4Nanti Sa bikin ko pu anana cucu banyak macam bintang di langit, trus Sa kasi tana ni smua untuk ko pu anana cucu dorang. Dari ko pu turunan, bangsa di bumi ni smua nanti dapa berkat juga.#Kejadian 22:16-18 5Sa pasti bikin itu, karna Abraham de su dengar-dengar Saya. Baru de jaga de pu diri supaya tetap bikin Sa pu hukum, praturan, deng printa smua.”
6Itu yang, Ishak dong tinggal di kota Gerar.
7Waktu laki-laki dari Gerar dong tanya Ishak tentang de pu istri ni, Ishak de bilang, “De itu sa pu sodara prempuan.” De takut mo bilang, “De itu sa pu istri.” Habis de pikir begini, “Jang sampe nanti sa dapa bunu dari orang-orang disini lagi, habis Ribka ni cantik skali jadi.”
8Waktu Ishak de su tinggal lama di Gerar, satu kali begini, orang Filistin pu raja Abimelek ni de ada liat-liat dari de pu jendela ke bawa begini, de liat Ishak ada baku polo deng de pu istri Ribka. 9Suda. Abimelek de suru panggil Ishak trus de bicara deng Ishak begini, “Knapa ko bilang kalo de itu ko pu sodara prempuan? Padahal de itu ko pu istri baru.”
Ishak de jawab begini, “Habis, sa pikir kalo sa bilang de tu sa pu istri, nanti sa dapa bunu jadi.”
10Abimelek bilang dia, “Yang ko ada bikin ke kitong ini tra baik skali! Bagemana kalo sampe orang Gerar satu tidur deng ko pu istri? Kalo sampe jadi begitu, brarti ko su bikin kitong bikin dosa besar skali.”
11Trus Abimelek de printa de pu bangsa smua. De bilang begini, “Sapa saja yang brani ganggu orang ini ato ganggu de pu istri, nanti dapa hukum mati.”
12Jadi, Ishak de bikin kebun di tana itu. Taun itu Ishak de dapa hasil panen sampe 100 kali lipat dari yang de su tanam itu. Itu karna TUHAN yang kas berkat dia. 13Ishak ni jadi orang kaya. De pu barang-barang tinggal tamba banyak trus, sampe de jadi orang paling kaya suda. 14De pu kambing, domba, sapi, deng budak paling banyak skali. Bikin sampe orang Filistin dong iri hati deng dia, gara-gara de pu barang lebi banyak dari dorang. 15Orang Filistin dong timbun sumur-sumur pake tana, smua sumur yang Ishak pu bapa Abraham dong su gale itu. 16Trus Abimelek bilang Ishak begini, “Karna ko su lebi kuat dari kitong disini, jadi lebi baik ko kluar dari tana ini suda.”
17Jadi suda, Ishak de pinda dari situ, de bikin tenda di kota Gerar pu daera tana renda, trus de tinggal disitu brapa lama. 18Baru Ishak de gale lagi sumur-sumur yang perna orang gale waktu Abraham masi hidup, yang orang Filistin dong su timbun waktu Abraham de mninggal tu. Ishak de gale baru de kas nama lagi pake nama yang dulu de pu bapa su kas nama.
19Waktu Ishak pu orang-orang kerja ni, dong ada gale-gale, begini dong gale pas di bagian mata air, jadi de pu air kluar banyak skali. 20Trus begini, orang-orang dari kota Gerar yang jaga kambing domba ni, dong baku ribut deng Ishak pu orang-orang yang jaga kambing domba. Orang-orang Gerar bilang, “Sumur ini tong punya!” Gara-gara itu yang, Ishak de kas nama sumur itu deng nama Esek.#26:20 Esek ‒ De pu arti ʻbaku ribut.ʼ 21Trus Ishak pu orang-orang kerja dong gale sumur lain lagi. Begini dong baku ribut gara-gara sumur itu lagi, jadi Ishak kas nama sumur itu Sitna.#26:21 Sitna ‒ De pu arti ʻbaku tra snang.ʼ 22Ishak dong pinda lagi trus dong gale sumur lain lagi. Disini baru, dong tra baku ribut gara-gara sumur, jadi Ishak kas nama sumur ini Rehobot,#26:22 Rehobot ‒ De pu arti ʻtempat luas.ʼ karna TUHAN su kasi dong tempat yang luas, jadi dong su bisa tamba banyak disitu.
23Dari Rehobot sini, Ishak dong pinda ke Bersyeba. 24Pas malam itu, TUHAN kas tunjuk De pu diri ke Ishak trus bilang de begini, “Sa ini Allah yang ko pu bapa Abraham semba. Jang takut, karna Sa yang ada sama-sama deng ko. Nanti Sa kas berkat ko trus bikin ko pu anana cucu banyak, karna Sa su ikat janji deng Abraham, Sa pu pesuru itu.” 25Habis itu, Ishak de bikin tempat bakar korban, trus semba TUHAN. Trus dong bikin dong pu tenda disana baru Ishak pu orang kerja dong gale sumur disitu.
Abimelek ikat janji deng Ishak
26:26-33
26Satu hari begini, raja Abimelek datang dari kota Gerar untuk ketemu Ishak. Raja Abimelek de bawa de pu kepala tentara yang nama Pikol deng Ahuzat, orang yang biasa kasi naseat sama raja dia. 27Jadi Ishak tanya dong begini, “Kam datang ketemu sa untuk? Dulu kam yang tra snang trus usir sa dari kam pu tana baru?”
28Trus dong jawab begini,
“Skarang tong su tau kalo TUHAN yang ada sama-sama deng ko. Jadi, tong pikir lebi baik tong bikin janji deng ko. Ko sumpa ke kitong begini: 29Ko trakan bikin jahat ke kitong, sama deng tong juga tra perna bikin jahat ke ko. Dulu tong su bikin baik ke ko deng kas tinggal ko kluar baik-baik dari tong pu tana to? Skarang tong su tau skali kalo memang TUHAN De yang kas berkat ko.”
30Habis itu, Ishak bikin acara makan-makan besar untuk dorang. Trus dong rame-rame makan deng minum. 31Pas besok pagi baru, dong masing-masing bilang dong pu sumpa. Trus Ishak bilang slamat jalan ke dorang baru dong baku pisa baik-baik.
32Pas hari itu juga, Ishak pu orang-orang kerja datang lapor tentang sumur yang dong gale. Dong bilang begini, “Bapa, kitong su ketemu air!” 33Jadi suda, Ishak de kas nama sumur itu Syeba. Dari sini yang tempat ini dapa nama Bersyeba#26:33 Bersyeba ‒ Di dong pu bahasa, ber pu arti ʻsumur,ʼ trus syeba itu ʻsumpa.ʼ Itu yang dong dapat nama Bersyeba. sampe skarang.#26:33 sampe skarang ‒ De pu maksud sampe waktu yang buku ini dong tulis waktu itu.
Esau pu istri-istri
26:34-35
34Waktu Esau pu umur su masuk 40 taun, de kawin deng nona dua dari suku Het. Yang satu tu, bapa Beeri pu anak prempuan yang nama Yudit. Trus yang satu lagi, bapa Elon pu anak prempuan yang nama Basmat. 35Prempuan dua ni, dong bikin Ishak deng Ribka pu hati rasa tra snang skali.
ที่ได้เลือกล่าสุด:
Kejadian 26: MPapua
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023 (Active), Wycliffe Bible Translators, Inc. All rights reserved.
