MOSIS KƐŊ IZIRAL TƖŊŊAA LƖƖ 5
5
Mosis arɩ Arɔŋ mʋ Ijipiti tinteeŋ kuoro sɩpaaŋ
1Ŋɩɩ harɩŋ Mosis arɩ Arɔŋ mʋ Ijipiti tinteeŋ kuoro teeŋ a bʋla pʋ, “Wɩɩ-la La TƖƖNA Iziral tɩŋŋaa Wɩa sɩ bʋla nɛ ŋ-la, ‘Pɩ mɩ nɩaa wombiiŋ dɩ ba mʋ a gbiele pɩmɛ tintee-hɩlɩŋ lɛ.’ ”
2Ŋɩɩ nɛ Ijipiti tinteeŋ kuoro pɩɛsɛ, “Kʋbɛɛ nɛ ŋaa ma TƖƖNA, aa chɛ dɩ mɩ sɛɩ ʋ niiŋ, a leŋ dɩ ma mʋ? Mɩ bɩ ma TƖƖNA jɩŋ, mɩ bɩ jaŋ leŋ dɩ Iziral tɩŋŋaa mʋ.”
3Ŋɩɩ nɛ Mosis arɩ Arɔŋ bɩra bʋl, “Hiburu tɩŋŋaa Wɩa nɛ kɛŋ ʋ tɩtɩa dagɛla. Ŋɩɩ wɩaa, leŋ dɩ la vɛŋ wombiiŋ tapʋlaa batori a jʋʋ tintee-hɩlɩŋ tʋɔŋ a kpʋ pʋsʋŋ a ŋaa Wɩɩsʋlʋŋ pɩ La TƖƖNA Wɩa. Dɩ ŋɩɩ dee, ʋ jaŋ joŋ nyanyal bɔŋŋɔɔ hɛ la lɛ koo dɩ ʋ kpʋla.”
4Ŋɩɩ nɛ Ijipiti tinteeŋ kuoro pɩɛsɛ Mosis arɩ Arɔŋ, “Bɛɛ nɛ tɩɩ maa chɛ dɩ nɩalɩŋ leŋ ba tɩntɩŋŋaa? Má mɩɩra mʋ ma tɩntɩŋŋaa.” 5Ŋɩɩ nɛ Ijipiti tinteeŋ kuoro bʋl, “Lɛɛlɛ nɩalɩŋ yʋga nɛ aŋ ka ma bɩ chɛ dɩ ba faasa tɩŋ.”
6Tapʋlɩɩ-la tɩtɩa nɛ Ijipiti tinteeŋ kuoro bʋla pɩ nɩalɩŋ sɩ fʋgɛ Iziral tɩŋŋaa ba tɩtɩŋ yoŋ tɩntɩŋŋaa arɩ nɩalɩŋ sɩɩ beŋ tɩntɩmɩa-la, 7“Lɛɛlɛ má bɩra sɩ́ nɩalɩŋ viri-yaŋ pa dɩ ba hɛ tɩɛrɩŋ lɛ a pɛɛsɛ tiebiee, má leŋ dɩ ba tɩtɩa mʋ chɛ. 8Ama, má leŋ dɩ ba pɛɛsɛ tiebiee magɛ ŋɩɩ ba fa sɩ vɛnɛɛ pɛɛsɛ. Ba ŋaa yarɩ-wɩɩ tɩmma nɛ. Ŋɩɩ nɛ tɩɩ ba ŋɩŋaa goŋ a bʋl, ‘Má leŋ dɩ la mʋ a ŋaa Wɩɩsʋlʋŋ a pɩ la Wɩa.’ 9Má leŋ dɩ nɩalɩŋ faasa tɩŋ a kɩɩ ŋɩɩ ba fa sɩɩ tɩŋ, a sɩ́ wombiiŋ na a chɩnaa nɩɩ wʋnyɩɛrɩŋ.”
10Ŋɩɩ nɛ nɩalɩŋ sɩɩ beŋ tɩntɩmɩa-la arɩ nɩalɩŋ sɩ fʋgɛba ba tɩtɩŋ kʋ lɩɩ bʋla pɩ Iziral tɩŋŋaa, “Ijipiti tinteeŋ kuoro sɩ, la bɩra sɩ́ ma viri-yaŋ pa nɛ dɩ ma kaa pɛɛsɛ tiebiee. 11Má mʋ chɛ ma tɩtɩa viri-yaŋ, lee-la kala ma sɩ jaŋ naba, ama la bɩ jaŋ keri tɩntɩmɩɩ-la ma sɩ vɛnɛ tɩmaa magɛ ŋɩɩ ta.” 12Ŋɩɩ nɛ nɩalɩŋ pɩsɛ Ijipiti tinteeŋ kala lɛ a gɔllɔ chɩchɛ viri-yaŋ. 13Ŋɩɩ nɛ nɩalɩŋ sɩ fʋgɛba ba tɩtɩŋ yoŋ tɩntɩŋŋaa bʋl, “Má dɛrɛ tɩntɩmɩɩ-la ma sɩ maga dɩ ma tɩŋ tapʋlɩɩ kala, arɩ la fa sɩ pɩma viri-yaŋ ma tɩmaa magɛ ŋɩɩ.” 14Ŋɩɩ nɛ nɩalɩŋ sɩ fʋgɛba ba tɩtɩŋ yoŋ tɩntɩŋŋaa ŋmuŋmoo Iziral tɩmma-la ba ma sɩ lɩɩsa dɩ ba bibeŋ tɩntɩnnaa, aŋ pɩɛsɛba, “Bɛɛ nɛ tɩɩ ma bɩ tiebiee pɛɛsɛ jɩnɩŋ a magɛ ŋɩɩ ma sɩ vɛnɛɛ pɛɛsɛ?”
15Ŋɩɩ nɛ Iziral tɩmma-la sɩɩ beŋ tɩntɩnna-la mʋ yele pɩ Ijipiti tinteeŋ kuoro, “Bɛɛ nɛ tɩɩ ŋ dʋdɔgɩsɛ la ŋ-la? 16Ba bɩ la viri-yaŋ pa aŋ kpɩkpɩa la lɛ, ‘Má pɩpɛɛsɛ tiebiee,’ aŋ pɛ vɩvɩɩrɛla. Ŋ nɩaa nɛ ŋaa chei.”
17Ŋɩɩ nɛ Ijipiti tinteeŋ kuoro bʋl, “Ma kɛŋ yarɩ-wɩɩŋ, ŋɩɩ nɛ tɩɩ ma bʋbʋl arɩ mɩ leŋ dɩ ma mʋ a kpʋ pʋsʋŋ a ŋaa Wɩɩsʋlʋŋ pɩ ma TƖƖNA. 18Má mɩɩra mʋ ma tɩntɩŋŋaa, nʋʋkala bɩ jaŋ pɩma viri-yaŋ. Ama ma ha maga ma pɛɛsɛ tiebiee magɛ ŋɩɩ ma sɩ vɛnɛɛ pɛɛsɛ nɛ.”
19Ŋɩɩ nɛ Iziral tɩmma-la sɩɩ beŋ tɩntɩnna-la jɩŋ arɩ wɩɩŋ jʋʋba nɛ, arɩ ba sɩsɩ, “Má bɩ maga dɩ ma lɩɩsɛ tiebiee magɛ ŋɩɩ ma sɩ vɛnɛɛ pɛɛsɛ a ta.” 20Ba sɩ sii Ijipiti tinteeŋ kuoro sɩpaaŋ, baa mʋ dɩ Mosis arɩ Arɔŋ hɔnɔ gbɩgbɛrɛba. 21Ŋɩɩ nɛ ba bʋla pɩ Mosis arɩ Arɔŋ, “La TƖƖNA na wɩɩ-la ma sɩ ŋaa nɛ, ʋ jaŋ dɔgɩsɛma. Ma leŋe Ijipiti tinteeŋ kuoro arɩ ʋ nɩhɩasɩŋ bɛrɛla nɛ a joŋ dʋndɔnnʋŋ hɛ la pɛgɛ dɩ ba kpʋla.”
Wɩa sɩ ʋ jaŋ laa Iziral tɩŋŋaa ta
22Ŋɩɩ nɛ Mosis sʋl Wɩa a bʋl, “Ou mɩ Tɩɩna, bɛɛ nɛ tɩɩ ŋ joŋ hɛɛŋ deeŋ hɛ nɩaa deemba lɛ? Ŋ-la wɩaa nɛ ŋ tɩmmɛ daha? 23Bʋa-la kala lɛ ŋ sɩ tɩmmɛ Ijipiti tinteeŋ kuoro teeŋ ŋ yɩrɩŋ lɛ, ʋ dɔgɩsɛ nɩaa deemba nɛ, ka ŋ bɩ wɩɩkala ŋaa dɩ ŋ laaba ta.”
ที่ได้เลือกล่าสุด:
MOSIS KƐŊ IZIRAL TƖŊŊAA LƖƖ 5: SIS
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Ghana Institute of Linguistics Literacy and Bible Translation 1984, 2014