MOSIS KƐŊ IZIRAL TƖŊŊAA LƖƖ 3
3
Mosis na tɩɩ-pʋgʋŋ sɩɩ dii nyiniŋ
1Ŋɩɩ nɛ Mosis dɩdaa ʋ hɩɩlɩ-baala Jeturo pʋsʋŋ. Jeturo nɛ ŋaa Wɩɩsʋllɩ sɩpaalaara Midiaŋ lɛ. Mosis daa pʋsʋ-la a mʋ kieli tintee-hɩlɩɩ-la a mʋ yi Wɩa peel-la ba sɩɩ yɩrɛ Sɩnaɩ. 2Nɩmɛ nɛ Wɩa tɩndaara kɛŋ ʋ tɩtɩa kʋ dagʋ tɩɩ-pugubie sɩ chol nyiŋgeliŋ tʋɔŋ. Mosis na dɩ tɩɩ-pugu-la chol nyiniŋ, ama nyiŋ-la bɩ tɩɩ-pugubie-la ka dii. 3Ŋɩɩ nɛ Mosis sɩ, “Mɩ jaŋ mʋ kpagɛ a na wʋkpuŋkpere deeŋ, wɩɩ-la sɩ tɩɩ nyiŋ-la chol aŋ bɩ tɩɩ-pugubie-la ka dii.”
4La TƖƖNA sɩ na dɩ Mosis kʋ kpagɛ dɩ ʋ na wɩɩ-la sɩɩ ŋaa, Wɩa hɛ tɩɩ-pugubie-la lɛ nɛ aŋ yɩrʋ, “Mosis, Mosis.”
Ŋɩɩ nɛ Mosis sɛɩ aŋ bʋl, “Na mɩ nɛ ŋ-la.”
5Ŋɩɩ nɛ Wɩa bʋla pʋ, “Chɩna magɛ ŋɩɩ, pʋpɔ ŋ bɩra sɩ́ sʋrɩsa kʋ kpagɛ. Chaarɛ ŋ nɛntɛŋŋɛɛ, bɛɛ wɩaa tintee-la lɛ ŋ sɩ chɩna ŋaa Wɩa lee nɛ.” 6Ŋɩɩ nɛ La TƖƖNA bɩra bʋl, “Mɩ nɛ ŋaa ŋ naabalɩmaba Abɩraham, Aɩzɩk arɩ Jekɔb Wɩa.” Mosis sɩ nɩɩ wɩaa deemba, ʋ kɛŋ ʋ sɩaa kaa faa, bɛɛ wɩaa fawʋllʋŋ kɛnʋ nɛ, ʋ bɩ cho dɩ ʋ beŋ Wɩa.
7Ŋɩɩ nɛ La TƖƖNA bʋl, “Mɩ na mɩ nɩaa sɩ faasa na hɛɛŋ ŋɩɩ nɛ Ijipiti tinteeŋ lɛ. Mɩ nɩɩ ba bunso nɛ a mʋ tɩgɛ ŋɩɩ nɩalɩŋ sɩ chaasaa dɔgɩsɛba lɛ. Hɛɛ-la ba sɩɩ na wɩaa chɩl mɩ nɛ. 8Ŋɩɩ nɛ mɩ kʋ tuu dɩ mɩ laaba ta Ijipiti tɩmma-la nɩsɩŋ lɛ, a lɩɩsɛba tintee-la lɛ a kaa mʋ tintee-la sɩ zɔmɔ a kɛŋ kʋdiilee aŋ pɛ jal ma. Mɩ jaŋ joŋ Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa tinteyee a pɩba. 9Mɩ nɩɩ Iziral tɩŋŋaa bunso nɛ a na dɔgɩsɩna-la ma, Ijipiti tɩŋŋaa sɩɩ dɔgɩsɛba. 10Ŋɩɩ wɩaa mʋ, mɩɩ tɩmɩŋ nɛ Ijipiti tinteeŋ kuoro teeŋ, dɩ ŋ kɛŋ mɩ nɩaa kʋ lɩɩ Ijipiti tinteeŋ lɛ.”
11Ŋɩɩ nɛ Mosis pɩɛsɛ Wɩa, “Kʋbɛɛ nɛ ka mɩ dɩ mɩ mʋ Ijipiti tinteeŋ kuoro sɩpaaŋ a wuo kɛŋ Iziral tɩŋŋaa kaa lɩɩ Ijipiti tinteeŋ lɛ?” 12Ŋɩɩ nɛ Wɩa bʋl, “Mɩ jaŋ chɩŋ ŋ harɩŋ. Dɩ ŋ nɛ kɛŋ Iziral tɩmma-la kaa kɔ peeliŋ deeŋ nyuŋ dɩ ba chʋɔlɛmɛ daha, ŋɩɩ nɛ jaŋ dagɛ arɩ mɩ-na Wɩa nɛ tɩmɩŋ.”
13Ŋɩɩ nɛ Mosis pɩɛsɛ Wɩa, “Ka dɩ mɩ nɛ mʋ Iziral tɩŋŋaa teeŋ a bʋla pɩba, ‘Ma nyɩmmaba Wɩa nɛ tɩmmɛ ma teeŋ,’ dɩ ba pɩɛsɛmɛ, ‘Ʋ yɩrɩŋ nɛ bɛɛ?’ Bɛɛ nɛ mɩ jaŋ bʋla pɩba?”
14Ŋɩɩ nɛ Wɩa bʋla pɩ Mosis, “MƖ NƐ ŊAA NƖƖ-LA MƖ SƖ ŊAA. Bʋl ŋ-la pɩ Iziral tɩŋŋaa, MƖ-NA NƖƖ-LA MƖ SƖ ŊAA nɛ tɩmmɛ ma teeŋ.”
15Ŋɩɩ nɛ Wɩa bɩra bʋla pɩ Mosis, “Mʋ bʋla pɩ Iziral tɩŋŋaa, mɩ-na ma TƖƖNA, ma naabalɩmaba Abɩraham, Aɩzɩk arɩ Jekɔb Wɩa nɛ tɩmmɛ ma teeŋ. Mɩ yɩrɩŋ nɛ ma TƖƖNA. Ŋɩɩ nɛ ma doho nɩaa jaŋ yɩyɩrɛmɛ a kaa mʋ wuu.
16Mʋ a yɩrɛ Iziral nɩhɩasɩŋ kala a hilimi a bʋla pɩba, ‘Ma TƖƖNA Wɩa sɩ ŋaa ma naabalɩma Abɩraham, Aɩzɩk arɩ Jekɔb Wɩa nɛ kɛŋ ʋ tɩtɩa kʋ dagɛmɛ a bʋl: Mɩ na ma nɛ, a na ba sɩɩ ŋaama ŋɩɩ Ijipiti tinteeŋ lɛ. 17Ŋɩɩ nɛ mɩ sɩ mɩ jaŋ lɩɩsɛma hɛɛŋ deeŋ lɛ Ijipiti tinteeŋ lɛ a kɛmma mʋ Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa tinteeŋ, tintee-la sɩ sɩma a kɛŋ kɩaa woruŋ.’
18Dɩ ŋ nɛ bʋl ŋ-la, Iziral nɩhɩasɩ-la jaŋ jegile nɩɩ ŋ teeŋ. Ŋ dɩ ba jaŋ mʋ Ijipiti tinteeŋ kuoro teeŋ a bʋla pʋ, ‘La TƖƖNA Iziral tɩŋŋaa Wɩa kɛŋ ʋ tɩtɩa a dagɛla nɛ. Leŋ dɩ la vɛŋ wombiiŋ tapʋlaa batori a jʋʋ tintee-hɩlɩŋ tʋɔŋ a kpʋ pʋsʋŋ a ŋaa Wɩɩsʋlʋŋ pɩ La TƖƖNA Wɩa.’ 19Ama mɩ jɩma arɩ Ijipiti tinteeŋ kuoro bɩ jaŋ sɛɩ, see dɩ doluŋ nɛ diiu. 20Mɩ jaŋ joŋ mɩ doluŋ a fʋgɛ Ijipiti tɩŋŋaa, a ŋaa wʋmagɩlaa Ijipiti tinteeŋ lɛ. Ŋɩɩ harɩŋ, ʋ jaŋ leŋ dɩ ma mʋ.
21Mɩ jaŋ leŋ dɩ Ijipiti tɩŋŋaa zilma, dɩ ma nɩɩ lɩɩ, dɩ ma sɩ́ na-hɩllɩŋ kaa mʋ. 22Iziral tɩŋŋaa haal kala jaŋ mʋ Ijipiti tɩŋŋaa haala-la sɩ jʋʋ kpɩkpagɛba dɩɩsɩŋ arɩ haala-la sɩ hɛ ba dɩɩsɩŋ lɛ a pɩɛsa laa sɛlɩmɛ arɩ hɔpʋla kɩaa arɩ gɛnnɩŋ a joŋo laalɛ ba hambolibiisiŋ arɩ ba hantolibiisiŋ. Ŋɩɩ nɛ ma jaŋ ŋaa a laa Ijipiti tɩŋŋaa dʋa kaa viiri.”
ที่ได้เลือกล่าสุด:
MOSIS KƐŊ IZIRAL TƖŊŊAA LƖƖ 3: SIS
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Ghana Institute of Linguistics Literacy and Bible Translation 1984, 2014