MOSIS KƐŊ IZIRAL TƖŊŊAA LƖƖ 1
1
Iziral tɩŋŋaa na hɛɛŋ Ijipiti tinteeŋ lɛ
1Jekɔb hambolibiisi-la sɩ to ʋ harɩŋ mʋ Ijipiti tinteeŋ arɩ ba dɩa nɩaa nɛ ŋ-la: 2Rubiŋ, Simioŋ, Levi, arɩ Juda. 3Ɩsaka, Zebuluŋ arɩ Bɛnjamɩŋ, 4Daŋ, Nafɩtalɩ, Gad arɩ Asa. 5Jekɔb doho nɩalɩŋ kala fa ŋaa mahɩŋ batori arɩ fii nɛ, bʋa-la lɛ dɩ Josɛf-na fa paala hɛ Ijipiti tinteeŋ lɛ.
6Ʋ kʋ magɛ ŋɩɩ Josɛf arɩ ʋ naambiiri-la kala sɩ hɛ Ijipiti tinteeŋ lɛ sʋʋ. 7Ama ba doho nɩaa fa lʋl biiriŋ yʋgɛ nɛ woruŋ a pʋŋa su tintee-la kala.
8Ŋɩɩ nɛ kuoru-falɩɩ kʋ dii kuoruŋ Ijipiti tinteeŋ lɛ, ʋ bɩ Josɛf wɩaa jɩŋ. 9Kuoru-la bʋla pɩ ʋ nɩaa, “Má bee na, Iziral tɩmma-la pʋŋa kɩɩla nɛ. 10Má leŋ dɩ la chɛ wɩɩ, dɩ ŋɩɩ dee ba jaŋ pʋŋa kieli, dɩ laalɩŋ nɛ maachie kʋ sii, ba jaŋ pɛ la dʋndɔŋŋɔɔ lɛ dɩ ba yuo diila aŋ fá.”
11Ŋɩɩ nɛ ba chaarɛ nɩaa ba bibeŋ Iziral tɩmma-la dɩ ba fʋgɛba dɩ ba tɩtɩŋ yoŋ tɩntɩŋŋaa. Ba saa tabalaa balɩa a pɩ Ijipiti tinteeŋ kuoro, dɩ baa bil kɩaa nɩmɛ, tasɩ-la yɩraa nɛ Pɩtɔm arɩ Ramesis. 12Ba sɩ faasa dʋdɔgɩsɛba ŋɩɩ, ŋɩɩ tɩtɩa nɛ ba pʋŋa pɩpɛ, a jɛrɛ su tintee-la. A tɩŋ ŋɩɩ wɩaa Ijipiti tɩŋŋaa fɩfába woruŋ, 13aŋ ha dʋdɔgɩsɛba a leŋ ba tɩtɩŋ yoŋ tɩntɩŋŋaa. 14Ba joŋ dɩɩsɩŋ saanɩŋ arɩ ba tɩntɩŋ-duoruŋ kala ba sɩ kɛnɛ ba bagɩsɩŋ lɛ a fʋgɛba kɩɩ. Bʋa deeŋ kala lɛ Ijipiti tɩŋŋaa bɩ Iziral tɩŋŋaa nisusuŋ fa.
15Ŋɩɩ nɛ Ijipiti tinteeŋ kuoro bʋla pɩ Hiburu tɩŋŋaa hachagɩraa deemba balɩa: Sɩfɩra arɩ Pʋa, 16“Dɩ Hiburu tɩŋŋaa haal kala nɛ togilo dɩ ʋ lʋl, má bee na, dɩ ʋ nɛ ŋaa hambolibie, má kpʋʋ, ka dɩ hantolibie nɛ, ma leŋu.” 17Ama hachagɩra-la ka fá Wɩa nɛ, ba vɩa Ijipiti tinteeŋ kuoro niiŋ a bɩ Hiburu tɩŋŋaa hambolibiisi-la kpʋa. 18Ŋɩɩ nɛ Ijipiti tinteeŋ kuoro yɩrɛ hachagɩra-la kɔ ʋ sɩpaaŋ a pɩɛsɛba, “Bɛɛ nɛ ma ŋaa ŋ-la? Bɛɛ nɛ tɩɩ ma bɩ hambolibiisi-la kpʋa?”
19Ŋɩɩ nɛ hachagɩra-la bʋla pɩ Ijipiti tinteeŋ kuoro, “Hiburu tɩŋŋaa haalaa bɩ Ijipiti tɩŋŋaa haalaa naga. Hiburu tɩŋŋaa haalaa kɛŋ nyalɩma nɛ woruŋ, dɩ kʋŋ nɩɩ chɛ dɩ ʋ lʋl, hachagɩraa jaŋ magɛ ŋɩɩ kʋkɔ dɩ ʋ lʋla.”
20Ŋɩɩ nɛ Wɩa pɛ hachagɩra-la lɛ a leŋ Hiburu tɩmma-la pʋŋ woruŋ. 21A tɩŋ hachagɩra-la sɩɩ fá Wɩa a bɩ hambolibiisi-la kpʋa, Wɩa leŋ ba kʋŋkala lʋl biiriŋ, a kɛŋ ba tɩtɩa dɩa nɩaa.
22Ŋɩɩ nɛ Ijipiti tinteeŋ kuoro bʋla pɩ ʋ tinteeŋ nɩaa kala, “Má kɛsɛ Hiburu tɩŋŋaa hambolibiisiŋ kala a yuo hɛ fuo-la ba sɩɩ yɩrɛ Naayɩl lɛ, aŋ leŋ hantolibiisiŋ.”
ที่ได้เลือกล่าสุด:
MOSIS KƐŊ IZIRAL TƖŊŊAA LƖƖ 1: SIS
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Ghana Institute of Linguistics Literacy and Bible Translation 1984, 2014