လံာ်တၢ်ကဲထီၣ်အခီၣ်ထံး တၢ်ကတိၤဆှၢနုာ်
တၢ်ကတိၤဆှၢနုာ်
လံာ်တၢ်ကဲထီၣ်အခီၣ်ထံးအခီပညီမ့ၢ်ဝဲ “တၢ်အခီၣ်ထံးခီၣ်ဘိ” န့ၣ်လီၤ. လံာ်အံၤတဲတၢ်ဘၣ်ဃးတၢ်တ့လီၤမူခိၣ်ဟီၣ်ခိၣ်, ပှၤကညီ အိၣ်ထီၣ်အဂံၢ်ထံး, တၢ်ဒဲးဘးဒီးတၢ်တူၢ်ဘၣ်ခီၣ်ဘၣ်လၢ ဟီၣ်ခိၣ်အတၢ်စးထီၣ်အသး, ဒီးတၢ်ဂ့ၢ်ဘၣ်ဃးကစၢ်ယွၤ အကျဲ, ဒီးကစၢ်ယွၤအတၢ်ဘၣ်ထွဲလိာ်အသးဒီးပှၤကညီ အဂ့ၢ်န့ၣ်လီၤ. လံာ်တၢ်ကဲထီၣ်အခီၣ်ထံးဘၣ်တၢ်နီၤဖးအီၤဆူတၢ်ဂ့ၢ်ဖးဒိၣ်ခံမံၤသ့ဝဲဒၣ် န့ၣ်လီၤ. ၁. အဆၢဒိၣ် ၁-၁၁. မ့ၢ်ဝဲတၢ်တ့လီၤပာ်လီၤဟီၣ်ခိၣ်ဒီးတၢ်စံၣ်စိၤတဲစိၤ အဂံၢ်ခိၣ်လၢအဘၣ်ထွဲဒီးပှၤကညီဟီၣ်ခိၣ်ဖိန့ၣ်လီၤ. ဖဲအံၤတၢ်ဂ့ၢ်တၢ်ကျိၤလၢအဘၣ်ဃးဒီးစီၤအၤဒၣ်ဒီးနီၢ်အံၣ်အု, စီၤကၤယံၣ်ဒီးစီၤဟ့းဘ့းလး, စီၤနိအၤဒီးထံလုၣ်ဘၢတၢ်, ဒီးဘၤဘူၤလိၣ်အတၢးထီၣ်ထီတဖၣ်ဘၣ်တၢ်ကွဲးနီၣ်အီၤန့ၣ်လီၤ. ၂. အဆၢဒိၣ် ၁၂-၅၀. မ့ၢ်ဝဲပှၤအံၣ်စရ့လးဖိအမိၢ်အပၢ်အဖံအဖုလၢပျၢၤတဖၣ်အတၢ်စံၣ်စိၤတဲစိၤအဂ့ၢ် န့ၣ်လီၤ. ပှၤအခီၣ်ထံးတဂၤန့ၣ်မ့ၢ်ဝဲစီၤအၤဘြၣ်ဟၣ်, ပှၤလၢအဘၣ်တၢ်သ့ၣ်ညါအီၤလီၤဆီဒၣ်တၢ်လၢအတၢ်စူၢ်တၢ်နာ်ဒီး အတၢ်စူၢ်ကစၢ်ယွၤအကလုၢ်အဃိန့ၣ်လီၤ. ပိာ်ထွဲထီၣ်အခံမ့ၢ်တၢ်တဲတဖၣ်လၢအဘၣ်ထွဲဒီးအဖိခွါစီၤအံၤစဲး, အလံၤစီၤယၤကိာ် (လၢအဘၣ်တၢ်ကိးစ့ၢ်ကီးအီၤလၢစီၤအံၣ်စရ့လး), ဒီးစီၤယၤကိာ်အဖိခွါတဆံခံဂၤလၢအမ့ၢ်ပှၤလၢအဒုးအိၣ်ထီၣ် ပှၤအံၣ်စရ့လးဖိတဆံခံဒူၣ်န့ၣ်လီၤ. တၢ်ဂ့ၢ်လီၤဆီလၢအဘၣ်တၢ်ပာ်ဖျါအီၤန့ၣ်မ့ၢ်ဝဲအဖိခွါအကျါ တဂၤလၢအမ့ၢ်စီၤယိၤသး, ဒီးတၢ်မၤအသးတဖၣ်လၢအဟဲစိာ်ဃီၤစီၤယၤကိာ်ဒီးအဖိခွါအဂၤတဖၣ် ဒီးအဒူၣ်ဖိထၢဖိသ့ၣ်တဖၣ်ဒ်သိးကဟဲ အိၣ်ဟဲဆိးလၢကီၢ်အဲၤကူပတူးအပူၤအဂ့ၢ်န့ၣ်လီၤ.
ဖဲလံာ်အံၤတဲတၢ်တဲတဖၣ်ဘၣ်ဃးဒီးပှၤဂီၢ်မုၢ်အဂ့ၢ်န့ၣ်, အခီၣ်ထံးဒီးအဆိကတၢၢ်မ့ၢ်တၢ်ဂ့ၢ်ဘၣ်ထွဲဒီးတၢ်လၢကစၢ်ယွၤမၤ တ့ၢ်ဝဲသ့ၣ်တဖၣ်န့ၣ်လီၤ. တၢ်ဂ့ၢ်စးထီၣ်အသးဒီးတၢ်သ့ၣ်ညါအၢၣ်လီၤနီၢ်နီၢ်လၢကစၢ်ယွၤ တ့လီၤပာ်လီၤမူခိၣ်ဟီၣ်ခိၣ်ဒီးကတၢၢ်ဝဲဒီးတၢ်အၢၣ်လီၤတမံၤ လၢကစၢ်ယွၤကပာ်ဖျါထွဲဒံးအတၢ်သးအိၣ်ဘၣ်အပှၤဂီၢ်မုၢ်န့ၣ် လီၤ. လၢလံာ်ဒီဘ့ၣ်အပူၤကစၢ်ယွၤမ့ၢ်တၢ်ဂ့ၢ်အမိၢ်ပှၢ်, ပှၤလၢအစံၣ်ညီၣ်ဒီးသိၣ်ဃီၣ်ပှၤလၢအမၤကမၣ်တၢ်တဖၣ်, ပၢဆှၢဒီးမၤစၢၤအပှၤဂီၢ်မုၢ်ဒီးသိန့ၢ်အဝဲသ့ၣ်အတၢ်စံၣ်စိၤတဲစိၤန့ၣ်လီၤ. လံာ်လၢပျၢၤတဘ့ၣ်အံၤဘၣ်တၢ်ကွဲးတ့ၢ်အီၤလၢကကွဲးနီၣ်ကွဲးဃါ တၢ်တဲဘၣ်ဃးဒီးပှၤဂီၢ်မုၢ်အတၢ်စူၢ်တၢ်နာ်ဒီးကမၤစၢၤအဝဲသ့ၣ် ဒ်သိးကဟံးဃာ်ဒုးမူဒံးတၢ်နာ်န့ၣ်လီၤ.
လံာ်အတကွီၣ်
တၢ်တ့လီၤမူခိၣ်ဟီၣ်ခိၣ်ဒီးပှၤကညီ ၁:၁-၂:၂၅
တၢ်ဒဲးဘးဒီးတၢ်တူၢ်ဘၣ်ခီၣ်ဘၣ်တၢ်အခီၣ်ထံးခီၣ်ဘိ ၃:၁-၂၄
စးထီၣ်လၢစီၤအၤဒၣ်တုၤလၢစီၤနိအၤ ၄:၁-၅:၂၃
စီၤနိအၤဒီးထံလုၣ်ဘၢတၢ် ၆:၁-၁၀:၃၂
ဘၤဘူၤလိၣ်အတၢးထီၣ်ထီ ၁၁:၁-၉
စးထီၣ်လၢစီၤၡ့ၣ်တုၤလၢစီၤအၤဘြၣ် ၁၁:၁၀-၃၂
ပၢ်ဖးဒိၣ်သ့ၣ်တဖၣ်လၢအမ့ၢ်ဝဲစီၤအၤဘြၤဟၣ်, စီၤအံၤစဲး, စီၤယၤကိာ် ၁၂:၁-၃၅:၂၉
စီၤဧ့ၡီၤအစၢၤအသွဲၣ်တဖၣ် ၃၆:၁-၄၃
စီၤယိၤသးဒီးအဒီပုၢ်ဝဲၢ်ခွါတဖၣ် ၃၇:၁-၄၅:၂၈
ပှၤအံၣ်စရ့လးဖိတဖၣ်လၢကီၢ်အဲၤကူပတူးအပူၤ ၄၆:၁-၅၀:၂၆
ที่ได้เลือกล่าสุด:
လံာ်တၢ်ကဲထီၣ်အခီၣ်ထံး တၢ်ကတိၤဆှၢနုာ်: KSWC
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Sgaw Karen Common Bible © Bible Society of Myanmar, 1992.