MARKA 9
9
Mellamdanna
(Mat 17.1-13; Luk 9.28-36)
1Huan akiang uah, “Chihtaktak in ka hon hilh ahi, hiai a dingh akhente, Pathian lalgam thilhihtheihna toh hong tung amuh ma ua, sihna chiam lou ding a-om uh,” achi hi.
2Huan ni guk nung in Jesu'n Peter, Jakob leh Johan apituam a, tang sangtak ah apaitouhpih a; ama uah amel omdan ahong lamdangta hi. 3Huchi in apuansilhte lei a puansawpmi in asawp ngou theih louh khop hial a ngou velvol in ahong lamdangta hi. 4Akiang uah Elijah leh Mosi ahong kilak ua, Jesu toh akihou uhi. 5Peter in Jesu ahoupih a, “Heutupa, ei a ding in hiai a om ahoih; aidakbuk thum i lam ding ua, nang a ding in khat, Mosi a ding in khat, Elijah a ding in khat,” achi hi. 6Alau mahmah ziak un agen pen leng athei kei hi. 7Huan amau liah in meipi ahong kai a; meipi a pan aw ahong suak a, “Hiai ka Tapa deihtak ahi, amah thu ngai un,” achi hi. 8Kintak in akimvel a-en ua, akiang ua Jesu kia lou ngal kuamah amuta kei uhi. 9Huan tang a kipan apaisuk lai un, “Misi lak a kipan Mihing Tapa athohnawn khit mateng athil muhte uh kuamah hilh louh ding,” achi bikbek hi.
10Huchi in huai thu avom kinken uhi, misi lak a pan thohnawn pen bang chihna hi ding ahia chih akidong uhi. 11Huan amau akiang ah, “Bangchidan a laigelhmite'n, Elijah ahong pai masa ding ahi,” chi ahi ua? chi in adong uhi.
12Ama'n akiang uah, “Bangkim bawlhoih thak ding in Elijah ahong pai masa him ahi; ahihleh thil tampi athuak ding a, muhdah a mawkbawl in a-om ding chi a Mihing Tapa tungthu bangchidan a gelh a na om ahia le? achi hi. 13Himahleh ka hon hilh ahi, Elijah zaw ahong pai khinta hi, atanchin agelh bang ngei un atung ah a-utut un ahih khinta uhi,” achi hi.
Pasal Naupang Dawimat Hihdamna
(Mat 17.14-21; Luk 9.37-43)
14Huan nungzuite kiang atunsuk un, akim ua mipi tampite leh laigelhmite ana kisel lai uh amu uhi. 15Mipi tengteng in amah amuhtak un lamdang asa mahmah ua, akiang ah atai pah ua, chibai ava buk kheukhou uhi. 16Ama'n akiang uah, “Amaute toh bang thu ahia na na kisel uh?” chi in adong hi.
17Mipi lak a mi khat in akiang ah, “Sinsakpa, ka tapa, dawi mat pau thei lou dia abawl, na kiang ah ka hon pi a; 18amatna peuh ah apuksak ekek a; huchi in achilphuan pawt in, aha agawi a, ahong kongkaw a; na nungzuite'n delhkhe le uh ka chihleh adelhkhe thei kei uh,” achi hi.
19Ama'n akiang uah, “Ginna nei lou khangte aw, bang tan na kiang ua om ding a bang tan hon thuak thei ding ka hia? Amah ka kiang ah hon pi un,” chi in adawng hi. 20Huan amah Jesu kiang ah ahon pi ua; dawi in amah amuhtak in nakpi in naupang asawisa pah a; huchi in lei ah apuk a, achilphuan kai zezu in akikhuk volvol hi. 21Huan ama'n apa kiang ah, “Hichibang a ahong kipatna bang tan ahita a?” chi in adong hi. Ama'n, “Anaupan lai a kipan ahita,” 22“Huchi in amah hihmangthang ding in tamveipi mei ah leh tui ah asawnpuk a; himahleh nang bangchi chi hiam bek a na hihtheihleh hon hehpih inla, hon huh in,” achi hi. 23Jesu'n akiang ah, “Na gintakleh e! Agingtami a ding in bangkim hihtheih ahi,” achi hi. 24Huchi in naupang' pa'n khitui toh, “Toupa, ka gingta hi, ka ginlahna hon huh in,” chi in akikoukhia hi.
25Jesu'n mipi hong taikhawm amuh in, dawi nin atai a, akiang ah, “Nang dawi pau thei lou leh nangong, thu ka hon pia hi, asung a kipan pawt inla, lut nawn ke'n,” achi hi. 26Huchi in akikoukheta a, nakpitak a asawi khit in apawtta a, naupang misi bang in a-om a; huchi in mi tamzawte'n, “Asi ahi,” achi uhi. 27Jesu'n akhut alen a, akaithou a; huan ahong thou maimahta hi. 28Huan Jesu inn a ava lutleh anungzuite'n, “Bangchi a kou delhkhe thei lou ka hi ua?” chi in asim in adong uhi.
29Ama'n akiang uah, “Hichibang zaw thumna leh an ngawlna kia lou ngal in bangchi mah in apawt thei kei,” achi hi.
Sih Ding Agenkholh Nihveina
(Mat 17.22-23; Luk 9.43-45)
30Huan huai a kipan apaikhia ua; Galili gam paikan in, kuamah theih adeih kei, 31anungzuite asinsak lai ahih ziak in akiang uah, “Mihing Tapa mihingte khut ah matsak in a-om dia, athat ding ua; ahihlup nung uh ni thum nung in athounawn ding,” achi ngal a.
32Himahleh athugen atheisiam kei ua, amah lah adong ngam kei uhi.
Kingainiam Dia Thuhilhna
(Mat 18.1-5; Luk 9.46-48)
33Huan Kapernaum khua ahong tung ua; insung a a-om lai in, akiang uah, “Lampi a bang thu ahia na kisel uh?” chi in adong hi.
34Lampi ah, i lak uah kua i thupipen dia? chi a ana kisel khit ziak un adai dide uhi. 35Huan amah atu a, sawm-le-nihte asam a, akiang uah, “Kuapeuh in masapen hih a-utleh mi tengteng sang in ananungpen in a-om ding ahi, mi tengteng nna sem in a-om ding ahi,” achi hi. 36Huan naupang chik khat akai a, alak uah adingsak a; apom a akiang uah, 37“Kuapeuh ka min ziak a hiai bang naupang chik khat kipahpih keimah hon kipahpih ahi a, kuapeuh kei hon kipahpih zaw, kei hon kipahpih ahi kei ding, hon sawlpa kipahpih ahi zaw uh,” achi hi.
Na Lam A Pangte Thei In
(Luk 9.49-50)
38Johan in akiang ah, “Sinsakpa, kuahiam na min a dawite delhkhia ka mu ua; ahon zuih louh ziak in ka kham uhi,” achi hi.
39Jesu'n, “Kham nawn kei un; kuamah ka min a thil thupi hih kei hon gense pah thei a-om kei hi. 40Kuapeuh ei hon dou lou i lam a pang ahi. 41Kuapeuh Khrist mi na hih ziak ua tui nou khat dawn ding hon pia, chihtaktak in ka hon hilh ahi, akipahman atan kei hial ding hi.
Pukna Leh Gehenna Mei
(Mat 18.6-9; Luk 17.1-2)
42“Huan kuapeuh hon gingta neuchikte lak a khat leng hihpuk, angawng ah buh gawizanna suang lianpi oksak in tuipi ah khe le uh, amah a ding in ahoihzaw ding hi. 43Huan na khut in ahon hihpukleh tankhia in; melhem a hinna a lut nang ding in ahoihzaw, khut nih nei a gawtmun mei mit thei lou a pai sang in, 44athan uh asih louh a, meikuang mihlouhna ah. 45Na khe in ahon hihpukleh tankhia in, khe nih nei a gawtmun a paih a om sang in, khebai a hinna a lut nang a ding in ahoihzaw hi. 46Athan uh asih louh a, meikuang amihlouhna ah. 47Huan na mit in ahon hihpukleh khelkhia in; mit langnih nei a gawtmun a paih a om sang in mit langkhat nei a Pathian lalgam a lut nang a ding in ahoihzaw hi. 48Athan uh sih ngeilouhna leh mei mih ngeilouhna ah. 49Michih mei a soh a om ding uh ahi ngal a. 50Chi ahoih hi; himahleh, chi apen khitleh bang in na hih al nawn ding ua? Noumau ngei ah chi nei unla, khat-le-khat kilem in om un,” achi hi.
ที่ได้เลือกล่าสุด:
MARKA 9: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
