MARKA 14
14
Jesu Thah Sawmna
(Mat 26.1-5; Luk 22.1-2; Joh 11.45-53)
1Huan ni nih nung a Paikan Ankuangluina leh Tanghou Silngou Soh Louh Ankuangluina om ding ahi a; siampu liante leh laigelhmite'n, amah khem a, man a, ahihlup theihna ding dan azongzong uhi. 2Himahleh, “Ankuanglui sung in hi kei hen, huchi lou in zaw vantang lak ah buaina ahong om kha ding,” achi uhi.
Bethani Khua A Jesu Thaunilhna
(Mat 26.6-13; Joh 12.1-8)
3Huan Bethani a phak Simon inn a a-om lai a, ankuang a-um lai in numei khat, alabaster bawm a spiknardi thau gimlim man tampi tawi in ahong a, abawm ahihkham a, alu ah asungta hi. 4Himahleh khenkhatte alunghita kei ua, “Bangziak a thau gimlim hihmang mawkmawk ahia? 5Hiai thau makhai zathum sang a tamzaw a zuak a, migentheite kiang a piak theih ahi ngal a,” achi uhi. Huchi in atung ah aphun uhi.
6Jesu'n, “Hih hen aw; bangziak a va hihbuai na hi ua? Ka tung ah thil hoihtak a hih ahi. 7Migentheite na kiang ua om gige ahi ua, na ut hun peuh un na hehpih thei uhi; kei bel na kiang ua om gige lou ding ka hi. 8Ahihtheih khamkham a hih ahi; ka pumpi vui ding a sathau nuhkhol ahi. 9Huchi in chihtaktak in ka hon hilh ahi, khovel tengteng a tanchinhoih akigenna koipeuh ah hiai numei thilhih, amah theihgigena ding in akigen zel ding,” achi hi.
Judas Muanhuai Louhna
(Mat 26.14-16; Luk 22.3-6)
10Huan Judas Iskariot, sawm-le-nihte lak a khat in, Jesu akiang ua zuausan a amatsak theihna ding in siampu liante kiang ah ava hoh hi. 11Amau huai thu azaktak un akipak mahmah ua, akiang ah dangka piak achiamta uhi. Huchi in zuausan a matsakdan ding lemtang azongta uhi.
Paikan Ankuang Nanung Umna
(Mat 26.17-25; Luk 22.7-14; 22.21-23; Joh 13.21-30)
12Huan Tanghou Silngou Soh Louh ani masapen a, Paikan Ankuangluina belamnou agoh zelna ni uah, anungzuite'n akiang ah, “Paikan Ankuanglui na nektheihna ding in koi ah va bawl le ung na ut a?” achi uhi.
13Huchi in anungzuite lak a mi nih asawl a, akiang uah, “Khopi ah va lut unla, huai ah bel a tui pua pasal in ahon tuak dia; amah zui un. 14Huan alutna peuh ah huai inn kempa kiang ah, ‘Sinsakpa'n ka nungzuite toh Paikan Ankuang ka nekna ding uh, mikhual inn pindan koi lai ahia? achi,’ na chi ding uhi. 15Huchi in ama'n inn pindan tungnung zatak, van omsa, mansa dimdiam ahon ensak dia; huai ah ei a ding in bawl un,” achi hi.
16Huan nungzuite apawt ua, khopi ah ava lut ua, akiang ua agen bangtak in ava mu ua; Paikan Ankuang abawlta uhi.
17Huan nitaklam ahong hih in, amah sawm-le-nihte toh ava hohta uhi. 18Huan an a-um ua anek lai un Jesu'n, “Chihtaktak in ka hon hilh ahi, na lak ua mi khat, ka kiang a ne sam in, hon zuausan in hon mansak ding,” achi hi.
19Huan alungkham panta ua, khatkhat in akiang ah, “Keimah ka hi hia?” achi chiat uhi.
20Huan ama'n akiang uah, “Sawm-le-nihte lak a mi khat, ka kuang a tanghou hon diahpihpa ahi. 21Mihing Tapa atanchin agelh bangtak un apai ding; himahleh Mihing Tapa mansak ding mipa tung agik hi! Huai mihing zaw piang keileh amah a ding in ahoihzaw ding,” achi hi.
Toupa Ankuang Siangthou
(Mat 26.26-30; Luk 22.14-20; 1 Kor 11.23-25)
22Huan an anek lai un Jesu'n tanghou ala a, avualzawl zoh in abalkham a, akiang uah apia a, “La unla ne un, hiai ka pumpi ahi,” achi hi.
23Huan nou ala a, kipahthu agen zoh in akiang uah apia a; huchi in avek un adawn chiat uhi. 24Huan ama'n akiang uah, “Hiai ka sisan a thukhun thak ahi, mi tampi a dia pawt ding ahi. 25Chihtaktak in ka hon hilh ahi, Pathian lalgam a athak ka dawn ni atun masiah grep guigah tui ka dawn nawnta kei ding,” achi hi.
26Huan la asak zoh un, apawt ua, Olive tang ah apaita uhi.
Nungzuite Taihsan Ding Thu Jesu'n Agenkhol
(Mat 26.31-35; Luk 22.31-34; Joh 13.36-38)
27Huan Jesu'n akiang uah, “Na vek un lungkia in na hon taisan ding uh. ‘Belamchingpa ka khen dia, belamte adalh ding uh’ chih gelh ahi ngal a. 28Himahleh ka thohnawn nung in Galili gam ah na ma uah ka pai ding,” achi hi.
29Peter in akiang ah, “Avek un lungkia in hon taisan mah le uh, ke'n zaw ka hon taisan kei ding,” achi hi.
30Huan Jesu'n akiang ah, “Chihtaktak in ka hon hilh ahi, tuzan ngeingei in, ak nihvei akhuan ma in, nang thumvei na hon kitheihmohbawl ding,” achi hi.
31Ama'n bel khauhtak in, “Na sihna ah si sam ding himah leng ka hon kitheihmohbawl kei hial ding,” achi hi. Huchibang in achi chiat uhi.
Gethsemani Huan A Jesu Thumna
(Mat 26.36-46; Luk 22.39-46)
32Huan Gethsemani achih mun uh atung ua; ama'n anungzuite kiang ah, “Ka thum sung teng hiai ah na tu un,” achi hi. 33Peter, Jakob leh Johan api a, nakpitak a lungkham in amangbang mahmah hi. 34Huchi in akiang uah, “Ka kha alungkham mahmah a, sihna khop hial ahi; hiai ah om unla, kiging gige un,” achi hi.
35Huan neukha in malam ah ava pai zek a, lei ah abokkhup a, ahihtheihleh huai hun in amah pel ding in athum hi. 36“Abba, Pa, bangkim na hihthei a; kei a kipan in hiai nou lamang in; himahleh kei thu hilou in nangmah thuthu hi zaw hen,” achi hi.
37Huan ahong pai a, amau ihmu in ahong mu a, huchi in Peter kiang ah, “Simon, ihmu na hi maw? Dakkal khat lel leng kiging gige in na om thei kei maw? 38Khemna a na lutlouhna ding un kiging gige in thum un. Kha in tuh angap a, sa zaw ahat kei,” achi hi.
39Huan ava hoh nawn a, athugen ngei gen in athum nawn hi. 40Huan ahong pai nawn a amau ihmu in ahong mu nawn hi, a-ihmut uh asuak mahmah ngal a; athugen dawndan ding leng athei kei uhi.
41Huan ahong pai thumveina ah akiang uah, “Na ihmu lailai uh maw, na tawlnga lailai uh maw? Ahunta ve; ahun hong tungta; Mihing Tapa mikhialte khut a zuausan a piak ahita hi. 42Thou un, i pai ding uh; en un, zuausanpa ahong naita,” achi hi.
Jesu Matna
(Mat 26.47-56; Luk 22.47-53; Joh 18.3-12)
43Huan agen laitak in, Judas, sawm-le-nihte lak a mi khat, ahong tung pah a, siampu liante leh laigelhmite leh upate a kipan mipi, namsau leh khetbuk tawite toh. 44Huan zuausanpa'n, “ka tawp peuhmah amah ahi ding; man unla, kizentak in na pimang ding uh,” chi in chiamtehna ana hilhkhol dimdiam hi.
45Huchi in atuntak in ava naih a, “Rabbi!” chi in atawp tonton hi. 46Huan amah alen ua, amanta uhi. 47Huan akiang a dinghte lak a mi kuahiam in anamsau adok a, siampu lianpen sikha asat a, abil asatkhiaksak hi. 48Huan Jesu'n amau ahoupih a, akiang uah, “Temsaute, khetbukte tawi in suamhat man ding bang in, kei hon man ding in na hong kuan uh maw? 49Tempul ah niteng a thu hilh in na kiang uah ka om a; na hon man ngal kei ua, himahleh Laisiangthou thugelh atuntheihna ding ei ve,” achi hi.
50Huan avek un amah anusia ua, ataimang vekta uhi.
51Tangval kuahiam, puanmalngat kia bat in, amah azui a; amah ana man uhi. 52Himahleh apuanmalngat ataisan a, vuaktang in ataimangta hi.
Siampu Lian Ma A Jesu Dinna
(Mat 26.57-68; Luk 22.54-55,63-71; Joh 18.13-14,19-24)
53Siampu lian kiang ah Jesu api ua; siampu liante, upate leh laigelhmite tengteng toh ahong ton uhi. 54Peter in gamlapi a pai in amah azui a, siampu lianpen inn huangsung kong lai pha in; sikhate lak ah meilum awi in atu sam hi. 55Jesu ahihlup theihna ding un siampu liante leh vaihawmte tengteng in amah hekna azong ua, amu kei uh. 56Mi tampi in zuau in ahek ua, himahleh, ahekna thu uh akituak kei hi.
57Huan kuate hiam adingh ua, zuau in ahek uhi. 58Hiai mi'n, “Khut a lam tempul ka hihse dia, ni thum sung in tempul dang, khut a lam louh, ka lam ding, achih, ka za uh,” achi uhi. 59Huchi in leng ahekna thu uh akituak thei sam kei uhi.
60Siampu lianpen alai ah adingkhia a, Jesu kiang ah, “Bangmah a dawng lou maw? Hiaite hon hekna bangchidan ahia?” chi in adong hi.
61Amah lah adai dide a, bangmah in adawng kei. Siampu lianpen in akiang ah, “Khrist, Hampha Tapa, na hi hia?” chi in adong nawn hi.
62Jesu'n, “Hi e, Mihing Tapa thilhihtheihna taklam a tu a, van meipi lak a hong pai na mu ding uh,” achi hi.
63Siampu lianpen in apuansilh abotkek a, “Theihpih dang bang ding in i deih lai dia? 64Pathian agensiatdan na zata uh; bangchi na sa ua?” achi hi. Avek un amah si tak in asep chiat uhi.
65Huan akhen in amah achilsiat pah ua, amai tuam in khuttum in atum ua, akiang ah, “Zawlnei bang in gen in,” achi uhi; sikhate'n apaipih kawm un akhutpek un abeng ekek uhi.
Peter In Jesu Kitheihmohbawl
(Mat 26.69-75; Luk 22.54-55,63-71; Joh 18.15-18,25-27)
66Huan Peter nuailam a inn huangsung kong lai a a-om lai in siampu lianpen sikha nungakte lak a khat ahong pai a, 67Peter, meilum awi amu a, a-en a, “Nang leng Nazaret mi Jesu kiang a om na hi ve,” achi hi.
68Ama'n, “Na thugen ka thei kei, angaihna leng ka thei kei,” chi in akitheihmohbawl hi. Inn lim ah apawtkhia a; huchi in ak akhuangta hi.
69Huan nungak in amu a, akiang a dinghte kiang ah, “Hiai mi alak ua mi ahi,” achi nawn hi. 70Himahleh akitheihmohbawl nawn hi. Sawt lou nung in akiang a dinghte'n, Peter kiang ah, “Alak ua mi hi tawk teh, Galili gam a mi na hi ngal a,” achi uhi.
71Ama'n, “Huai na mihing gen uh ka thei kei,” chi in hamsia kiloh in akichiamta hi.
72Huan ak khuan nihveina akhuang pah hi. Peter in, Jesu'n akiang a, “Ak nihvei akhuan ma in nang thumvei na hon kitheihmohbawl ding,” achih atheikhe thak nawn a, huai angaihtuah a akapta hi.
ที่ได้เลือกล่าสุด:
MARKA 14: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
