Nahumu 2
2
Taukadrulane ki Ninivi
1Swa Ninivi,
kudra puku kulri alra derenau paalamenge muswane wakelanga.
Elrelrea ku puku, drangalrwa ki kepale!
Takalra ki kadalranane, padulrwa ku akikaruburane!
2(Ku Tamatama lri pasiwlriwlriane ku lrigu ki swa Iseraylri, lri siwlriwlriane ku natangimiane sakaiyana kiravase ki badha.)
3Ku kwapingi ki badha waecenge ku duduli ku alathare, la silaimai ku duduli ku laimai ki kwapingi;
kwi lalasu yacengecenge padulrudulru ku awdaanane kikaruburu.
Ku sakikaruburane ku palridingi mia ki apwi ledraedra;
ku sakikaruburane ka rigi lini la lrakuthukuthulu#2.3 “sakikaruburane ka rigi lini la lrakuthukuthulu” ku pacase ki Hiburu yai “wavidrividrividri ku cedare ka angatu” amia..
4Ku sakikaruburane ka palridingi walrakuthulu masasawlriwlriwlri capange ikai kadalranane,
ikai ki rarubwane latadre.
Kwi sakikaruburuburane ka lapalridingi mia ki taliwlare kelrakelrabe,
la mia ki ledra ki lrikace ku ridarane.
5La kidawlu kwi latabebelenge;
si takulridrawdrawdrau kainganai.
Ku kaiyanganai kikaruburu wacungucungu mwa ki balingibingi ki kepale ki cekele,
si cegecege ku sangipapaidringane ku madrau ka alathare.
6Ku taelelengane ki vaalru maburuku;
ku daane ki talialalai la ukadrulu.
7Ku taelrelre ki talialalai la kiravase;
ku yakai ki daane ki talialalai ku laababai mia ki tavagu tubitubi,
ngiatatatuku makanaelre si tubitubi.
8Ku mapapangale pangwa lrakuthulu mulatadre Ninivi,
mia ki taelelengane ki acilai ka kiamuelenge.
Kwi lalasu watawtau iya kai: Madha katwase! Madha katwase!
Ai kadrwa ku natangeeanga ku umawmase ku siaulri.
9Ravasa ku lagingi!
Ravasa ku lakingi!
Swaete ki cekele ku nipudringadhane ku lazaisange!
Ku la tinukucingalrane ku lalawbubulu!
10Ku swa Ninivi mamudunga, aubulanenga palraelre si matiisepele!
Ku kidremedreme ki umawmase ngwalai ki sawkukuludru si kasuburu;
ku tara paculru manwagiligili, laka kadrwa ku puku;
ku lringau masaleese ka kadrwa ku kulau.
11Kaiasasane kikai madrau ka cekele la inunga?
Kudra mia ki barungulu ki raiyungu,
ka taikaiyane lapulapu ki lrulai ka raiyungu la inunga?
Tamasasawlriane ki sawvalai ka raiyungu si tina ka raiyungu,
si ku takilepengane ki lrulai ka raiyungu la inunga?
12Ku sawvalai ka raiyungu wakace si papacai ki nipanane;
wamalra thurilace si baai ki tina si lrulai ka raiyungu;
ki barungulu paswaete rubu ku nithurilacane ka tawkamanimani ku beate.
13Ku Tamatama ka abebeelengenga ki sanaka kwapingi amia kai, “Ninivi, amaniaku ku badhasu; lri lamaku ku sakikaruburuburanesu ku palridingi. Ku tarakikaruburuburu ku kwapingisu lri ikai takikaruburane pacai; lri ribicaku ku patwalaisu ki palrapalra ribici ku lamanemane. Lri kai akilalranenga ku lingau ki sikawlusu.”
ที่ได้เลือกล่าสุด:
Nahumu 2: NDV
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© The Bible Society in Taiwan, 2017
All rights reserved
© 臺灣聖經公會版權所有，2017