Luka 6
6
Patharukai ki Taisadrasadrane ka vai
(Matai 12.1-8; Maruku 2.23-28)
1Yakai saka Taisadrasadrane ka vai, ku Yesu la ngukakai ki mamugimugi; ku situini la theredre ngubekele ku mugi si malra kudra madru, la ara alrima gumagumu si kane. 2La ikai ku la swa Palrisai ku wadrele, la iya kai, “Anu pia ku kaika pinalraingane pia ki Taisadrasadrane ka vai?”
3Ku Yesu la tubalre, “Ku Davidi si kudra latwapapapalra iniane sa mubaisi yai watumane, kai numi sialrigwana? 4Kwini lasu la mudaane ki daane ki Twaumase, la malra ku nipatarumaranenga ki Twaumase ku pange si kane, la baaiyana pakane ki papalraini; kikai pange, kathane ku barakalai ku lri dulru kane, sanaka wakanenga ku umawmase lri kitupasalrivane makanaelre.”
5La iya kai ku Yesu, “Kai Lalake ki Umawmase amani kudra Tamatama ki Taisadrasadrane ka vai.”
Pawadringai ki macaeme kalrunai ku alrima
(Matai 12.9-14; Maruku 3.1-6)
6Yakai saka kiningivalanenga ka Taisadrasadrane ka vai. Ku Yesu la mwa ki rarubwane ki swa Yuda bulru ki umawmase, ikai kwini la ikai ku tangea ku umawmase, ku vanale ku alrimaini la kalrunai. 7La ikai ku latarabulrubulru ki Sisiu si swa Palrisai ku pasanu silasilape ku tapasalrivane ki Yesu, si taesai ku akukuswane iniane, ngwalai kai la ikai thili lelelepenge, dredrele ki Yesu lu lri ikai ki Taisadrasadrane ka vai pawdringai ki macaeme. 8Ku Yesu la thingale kudra kidremedreme lini, la papia kwini ki macaeme kalrunai ku alrima ka umawmase iya kai, “Ngidrakala, bwala mucucubunga acegecege!” Kwini umawmase la ngidrakale acegecege. 9Lakamani ku Yesu la iya kai liniane, “Nau kivaga numiane, patharukai ki Taisadrasadrane ka vai, kwidra hulriceta watumane ku tatukakudhanane? Pia ku mathariri amia? Pia ku malisi amia? Palribula ki niake amia? Kabebetetha ki niake amia?” 10La drele pangithalringulu kwini ki ngiathalringulu ka laumawmase, ala kawriva kwini ki lasu iya kai#6.10 “ala kawriva kwini ki lasu iya kai” yakai ku sidrumane ku hungu ku amia kai “si kaliisi kwini ki lasu iya kikai”., “Sega kwi alrimasu!” Kwi lasu sasege ku alrima, la mudringainga kwini alrima.
11Kwini lalasu la kagirimucu turamuru, si madrekadrekase ku lrika apangimiane kiecebe ki Yesu.
Ku Yesu wapilri ku ta 12 ku nisikawlane
(Matai 10.1-4; Maruku 3.13-19)
12Yakai saka minakavalane, ku Yesu la mulregelrege inulri, ikai kwini taleare inulrinulri ki Twaumase. 13Sakaliare, la sarubu ki lasitu pucucubungu iniane, si twalai liniane pilri ku ta 12 ka laumawmase, si pasudalepe liniane tunisikawlane. 14Kai lalasu yai Simune (ku Yesu la pasinaganeana pasi Pitiru) si agini ka Anederiu, Yakubu si Yuhani, Pilripi si Barethulumiu, 15Matai si Tumase, lalake ki Alepaiuse ka Yakubu, si kwidra swakai ki “Cicintu” ka Simune, 16lalake ki Yakubu ka Yuda, si sakabilrilanenga amani kudra kialangai ki Yesu ka swa Isekaliwte ka sia Yuda.
Tabulrwane ki Yesu si tapawdringadhane
(Matai 4.23-25)
17Ku Yesu si lanisikawlane la karedeedele mulrawdru ki lregelrege; la taelre ki takaalra ki lasitu acegecege ikai dratatane, la ikai ku madrikidrikidrikisi ka laumawmase twalai Yuda palraelre, Yerusalrime si ngwababiabila ki laveke ka Tayre, Sidune ka cekele isarubu mwa kwini, 18lri kilalra ku abulrwaneini, la sidrama ku apawdringadhaneini ki lacaemane lini. Kudra la kiavangavangavange ki aidridringane la mialri kela, si kipawdringai. 19Kwini laumawmase apia sulrape iniane, asi lwiyane yakai ku puku twalai ki kinawmasaneini utaluvaivai, si pawdringainga liniane.
Kiaragai si adirivanane
(Matai 5.1-12)
20Ku Yesu la ngibangulu papia ki lasituini, si iya kai liniane:
“Ku matiakukuru ka umawmase ala mwaesai turamuru; amaninga numi kudra laumawmase ki Twaumase!
21Kaiasasane ku masilrasilrau ku umawmase ala mwaesai turamuru;
kunumi lri tarumaranga numi ku akabucukane!
Kikai asasane ku watubitubi ku umawmase ala mwaesai turamuru;
lri kiraragainga numi!
22“Ku ngwalai ki Lalake ki Umawmase, lri ikai ku umawmase ku malisi numiane, kalrase si cilri numiane, tusinalrelreme numiane, si alra numiane tungialisiane, kunumi yakainga ku akaesadhane numi! 23Kunadruma ku cucungulane lini mialri tungimiyaiya kai ki yuginsia. Ikai kwini ki vai, lri itituku numi ki sakiaragai, asi lwiyane ikai belenge pasiakai numiane ku makaalra ka pakalreva.
24“Ai, kaiasasane ku maesaesaesai ku umawmase lri matikurunga,
asi lwiyane kiasupilringa numi ku akiragadhane!
25Kaiasasane ku mabucubucuku ku umawmase lri matikurunga,
asi lwiyane lri kasilraunga numi!
Kaiasasane ku mwalrakalrakai ku umawmase lri matikuru,
asi lwiyane lri adirivane numi si tubitubi turamuru!
26“Ku laumawmase lu drengedrengedrengere numiane yai, lri matikurunga numi, asi lwiyane ku cucungulane lini mialri kawrivanga ku thadalrane ka vaga kwidra ki kaika patengane ka yuginsia.”
Patharukai ki kialibake ki badha
(Matai 5.38-48; 7.12)
27“Ai, kunumi ka la kialalra kai vagali, nau pelaela numiane, kilibaka ki badha numi, pakatharira marasikai ki malisilisi numiane; 28pasikaiya ki wapusu numiane ka umawmase subulrubulru, pasikaiya ki twasinalrelreme numiane ka umawmase inulri. 29Lu ikai ku umawmase ku wacamilrigi kwini thili ki cimisu, ngibangula la pacamilrigi kwini thili kwi cimisu! Lu ikai ku umawmase ku wamalra ku sapakabelebelengane ku laimaisu, pamalra iniane adravane kwi sapakadriadringanesu! 30Sanaka aneanenga ku kiatubi muswane, baadha iniane; lu ikai ku umawmase ku wamalra ku lamanemanesu, madha mwamwa malra sawlri. 31Kunumi ani pangitumane marasikai numiane lu iya numi ki palrapalra, kunumi tungimiyaiya pangimia marasikai liniane.
32“Lwiyasi kunumi la kilibake numi sikakathane kudra ki la kialibake numiane ka umawmase, yakai ku manemane ku takatharirane? Adravane ka pasalrisalriu ka umawmase mialri kilibake kwidra ki kialibake liniane ka laumawmase! 33Lwiyasi la pakathariri numi marasikai sikakathane kwidra ki la pakathariri marasikai numiane ka umawmase, yakai ku manemane ku takatharirane? Adravane ka pasalrisaalriu ka umawmase maiyalri dulru pia kikai! 34Lwiyasi kunumi la pakisalru numi sikakathane ku paisu ki matiasidrama sawlri ku kiame ka umawmase, yakai ku manemane ku takatharirane? Adravane ka pasalrisalriu ka umawmase maiyalri pakisalru ku paisu ki pasalrisalriu ka umawmase, si amani salri kisawlri ku takathane! 35Ini, kunumi kilibaka ki badha numi, pakatharira marasikai liniane; pakisalrua ku paisu ki umawmase, si kai sidrama ku asawlriane. Lu mia kwini, kunumi lri tarumara numi ku makaalra ku pakalreva, la lri kamani numi ku lalalake ki Abebeelengenga ka Twaumase, asi lwiyane ku Twaumase mialri arakai ku thalradhane marasikai kudra ki marimuru ku takikilibakaneini si ki manganga ka umawmase. 36Kunumi kathalradha, mia ki Tama numi ka yasubelebelenge ka mathalrai.”
Madha raeratene ki palrapalra
(Matai 7.1-5)
37“Madha raeratene ki umawmase, ku Twaumase lri kai saibange numiane; madha tupasalrisalrivane ki umawmase, ku Twaumase lri kai tupasalriu numiane; pacepa ki umawmase, ku Twaumase lri pacepe numiane. 38Ku vutha numi baai ki palrapalra, ku Twaumase lri vwavutha baai numiane, si arakai ku maadrau ka sabungubungane, takuvelevele si dengece, pakaelre ku amaka dulrwane numi iluku, pasuete gugu baai numiane. Lu arakai numi ku manemane aceacepange ki umawmase, ku Twaumase mialri arakai ku tapangimiane numi ki umawmase si aceacepange numiane.”
39Ku Yesu la iyana liniane ku vaeva ku pathalrilriku, “Ku mukimukici kai lri maka dulru ililuku ki mukimukici; luiyasi miakai, kwini tadrusa lri tara mwadreke mucilri mulrubangane. 40Ku situ kai lri dulru ka sabebelenge ki sinsi, ai lu ngimianga ku takibulrwaneini lri mia ki sinsi mararamau.
41“Asu drele sikakathane kwi buti ki maca ki retesanesu, la kaisu ngikakidremedreme yakai ki macasu kwi maadrau ka bulri? 42Ikai ki macasu yakai kwi maadrau ka bulri, asu maka duulru iya kai ki retesanesu, ‘Retesane, tanau mwalra kwini yakai ki macasu ka buti’? Kusu ka ngiakathaithaitharirane ka umawmase, paswalana mwalra kwi bulri ki macasu, lasu dulru drele patakulringau, si patwalai ki maca ki retesanesu mubuti.”
Cebe si madru
(Matai 7.16-20; 12.33-35)
43“Ku mathariri ka cebe kai lri pumadru ku malisi ku madru, ku malisi ka cebe kai lri pumadru ku mathariri ku madru; 44kai angatu ku mathariri si malisi twalai ki madruini athingalane. Kai numi lri ikai ki cecenekane ka angatu kimadru ku icizike, lai kai numi lri ikai ki bala ka ubulu kimadru ku budu. 45Ku mathariri ka umawmase patwalai ku yakidremedremane ku ruburubuini ku mulecegane si putaluvaivai ku tharirane; ku manganga ka umawmase patwalai ku ruburubuini ku malisi si putaluvaivai ku ngilisianane. Lukamanemane ku swaete ki kidremedreme ki umawmase, ku ngudwini lri avavaga ku manemane.”
Taidrusane ka twadaane ka umawmase
(Matai 7.24-27)
46“Anu kirimu iya kai nakwane, ‘Tamatama, Tamatama’, la kai numi pasuusu ku pelaelali numiane ku vagali? 47Nau pelaela numiane, kudra wakela mucucubungu nakwane, si kilalra ku vagali la pangimia pasuusu, ngiamia ki ngitwatumane ka umawmase? 48Kwini lasu mararaamau kudra ki taratudadaane ka umawmase, sa lruku pwadringi ki dae, la cegecege ku karwalai pibelenge ki alrisapesape. Sa umuku si lriau mwa kwini ki daane, kwini daane kai ngiavelevele, asi lwiyane mapapedrenge ku takarwaladhane. 49Ai, kudra kialalra kikai vagali si lakai pangimia pia, mararaamau kudra ki umawmase ku twadaane pibebelenge ka kadrwa ku karwalai, sana lriau ku acilai, kwini daane la makakaai mukadrulu, si pakilringau ku takaburukane!”
ที่ได้เลือกล่าสุด:
Luka 6: NDV
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© The Bible Society in Taiwan, 2017
All rights reserved
© 臺灣聖經公會版權所有，2017
