Luka 2
2
Kiatulalake ku Yesu
(Matai 1.18-25)
1Kikwidra, ku tinuhika ki swa Ruma ka Augusetuse wabaai padadavace ku pacase ka drekase, sanaka umawmase ki swa Ruma lri pakipacase ku la kusiki lini. 2Kikai aswalaalanga ka tapacasane ku kusiki yai, amani saka sutuke ku Kuriniu ki swa Siria. 3La makitu mubalriu mwa ki cekele lini si kipacase ku kusiki.
4Ku Yusepe maiyalri twalai tali Galrilri ka Nazarethe ka cekele papia Yuda, sa darurunga ki cekele ki Davidi, ka sia Bithelrihime; amani saka ngwakai ki Davidi ku cucungulaneini ki Yusepe, 5kai lasu la lri karedele kipacase kwidra ki alisu ka tusiasilanganengaini ka Malria. Ku Malria laka tawbaliringa. 6Kudra sa icengecenge ikai Bithelrihime yai, kwini alisu laka satulalalakenga, 7kwini alisu la tulalake ku aswalaalanga ku sawvalai, la lripucu arakai ku makalrilau, si papece pikai ki lrutungu ki rigi, asi lwiyane kudra lriwkange kadrwanga ku taikaiyane lini.
Tarapagwagwagu ki kiu si lasasiakawlu belenge
8Ikai ubulane Bithelrihime yakai kudra latarapagwagwagu ki kiu, wasulasulai iubulane, si mawbalribalrithi drangalru ki lakiu. 9Ku sasiakawlu ki Tamatama la mutaluvaivai adrelane liniane; ku draredrare ki lrigu ki Tamatama la paledra liniane, kwini lalasu la mukuludru turamuru. 10Ai ku sasiakawlu belenge amia kai liniane, “Madha mukuludru! Yakai kai mathariri ka vaga lri pelaelaku numiane; kikai mathariri ka vaga lri baai ki sanaka umawmase ku maadrau ku akiragadhane. 11Kaikameane, yakai ki cekele ki Davidi, ku Takipalribulribulane numi, ka Tamatama ka Kirisitu kiatulalakenga! 12Lri drele numi ku tangea ka daini, kiarakai ku makalrilau lripucu, si papece pikai ki lrutungu ki rigi; kwini amani ku baai numiane ka sapatuthingalane.”
13Ala kirimu, ikai ku takaalra ku lakwapingi subelebelenge si sasiakawlu belenge taelre utaluvaivai, drengedrengedrengere ki Twaumase iya kai:
14Ku lrigu ani papia ki sabebeelengenga ka Twaumase!
Ku sulivatane ani baai papia ki yakawmasane sanaka kathalraini ka umawmase!
15Sakatwasenga ku lasasiakawlu belenge kidaili liniane siwlri musubelebelenge, ku tarapagwagu ki kiu la makawrivariva iya kai, “Ila tapapia Bithelrihime, drele kwini tangimiane ku pelaela ki Tamatama.”
16Ala kirarimu katwase, si la kidringai ki Malria, Yusepe, si kudra pinapapecane pikai ki lrutungu ki rigi ka daini. 17Ku tarapagwagu ki kiu sadrelenga, la pelaela ki laumawmase ku pelaela ki sasiakawlu belenge patharukai kwini ki daini. 18Ku kialalra kwini vaga ki tarapagwagu la makitu kasamali. 19Ai ku Malria la alra kikai tangimiamiane patuelre apapelaela kidremedreme. 20Ku tarapagwagu ki kiu sasiwlringa, la pasikai kwini ki kilalra lini si drele lini senai drengedrengere ki Twaumase, asi lwiyane kwini tangimiane si tapelaelane ki sasiakawlu belenge mamamua.
Swanagane pasi Yesu
21Sa makavalrulunga ku vai, ku apakigelregelrane ka lrisi ki lrulai la darurunga, la sunagane iniane pasi Yesu; kikai nagane amani sakaiyana kikatawbaliri paswalaanga ku sasiakawlu belenge pasinagane iniane.
Patarwamara baai ki Tamatama
22Lu singikaiyane ku hulrice ki Musi ku tatukakudhanane, sa darurunga ku vai ku takitumabulane, kai Yusepe si Malria wailuku kwini ki lalake mwa Yerusalrime, lri patarumara ki Tamatama. 23Kikai singiakai ki hulrice ki Tamatama ku tapacasane, “Ku aswalaalanga kitulalake ku sawvalai ka lalake apatarumarane ki Tamatama.” 24Kikai ladrusa maiyalri ka lri singikai ki hulrice ki Tamatama ku tinukakudhanane, si patarumara ku ladrwadrusa ka penai ku drusa ka lrulai ka tavagu tusapatarumarane.
25Kikwidra, ikai Yerusalrime yakai ku tangea ku sia Simiune. Kwini lasu mwasakesakene ki Twaumase la ka madringelrese ka umawmase, si ka siadramadrama ku atarumarane ki swa Iseraylri ku akipalribulane. Ku Siri yakai iniane tapalrapalra; 26kai lasu tarwamara ku papukidremedreme ki Siri, la ngithathingale paswala ki akatwasane kai kawmasane, lri dulru drele ku palraingi ki Tamatama ka Kirisitu. 27Ngwalai ku takandwane ki Siri, kai lasu kaiyanganai mwa ki daane ki Twaumase. Kikwidra, ku marudrawdrange ki Yesu wakebere iniane mudaane ki daane ki Twaumase, si lri pangimia ku tapadrekadrekasane ki ngwakai ki hulrice. 28Kai Simiune la tarumara ibibi kwini ki lalake, si drengedrengere ki Twaumase iya kai:
29Tamatama, pangiamiangasu ku palraingisu;
kaikameane kai lri katumanenga pakasulivaliivatenga nakwane pakatwase kai kawmasane.
30Kai wadrelenga naku patakamacamaca kai sapalribulanesu,
31ka amani ku pasikaisu ki sanaka umawmasenga padulru:
32Lrika amani ku pathingale ki sakamaelanane ka ledra,
lrika amani ku lrigu ki laumawmasesu ka swa Iseraylri.
33Kai marudrawdrange ki lrulai la kasamali turamuru ki Simiune ku tapelaelane patharukai kikai ki lrulai. 34Kai Simiune la subulrubulru liniane, si papia ki Malria ka tina kwini ki lrulai iya kai, “Kikai lrulai ku takipilriane ki Twaumase, lri ikai ki swa Iseraylri pakamudu ki takaalra ka umawmase. Si lalri pakipalribulu ki takaalra ka umawmase. Lri kamani ku apaecebane ki takaalra ka umawmase tulilisi, 35si lri ngwalai kikai athingalane mutaluvaivai kudra kidremedremedreme kikai ki laumawmase. Ku atubiane lri mararaamau ki marangisi ka lrabu paladeke ceneke ki kidremedremesu.”
36La ikai ku tangea ku ababai ka yuginsia, sia Angena, swa Asere ka zuku ka lalake ki Paneili. Laka tarudrawdrangenga turamuru, marudrange saicengecenge, si tarapipitu ka caili maikai ki taelrelreini, 37la sakapacai, si ka tara 84 ka caili#2.37 “la sakapacai, si ka tara 84 ka caili” ku wahunyake madu iya kai “walibakanenga cekecekele tara 84 ka caili”.. Kadrwana ku takidailaneini ki daane ki Twaumase, ka vaiyane ka maungu sukusukubu ki Twaumase, lailaisi, inulrinulri. 38Sakamani kai kwidra, kai alisu maiyalri kela, drengedrengere ki Twaumase, si papia kwidra ki laumawmase sanaka siadramadrama ki Twaumase ku apalribulane Yerusalrime pelaelaela ku patharukai kikai ki lrulai.
Siawlri mwa Nazarethe
39Ku Yusepe si Malria sa singikai ki hulrice ki Tamatama si pangimianga ku tinukakudhanane patuelre yai, la siwlri mu Galrilri, mwa kwini ki cekele lini Nazarethe. 40La adiadili kadradrau kwini lalake, sapukwane si kalrigili; ku kalithane ki Twaumase la ikai iniane tapalrapalra.
Vavalake ka Yesu yakai ki daane ki Twaumase
41Ku marudrawdrange ki Yesu pia caili mu Yerusalrime tulrisisi ki Takilragavane ka lrisi. 42Ku Yesu satara 12 ku caili, kwi lalasu la tuthadaalrane papiapia paluludu tulrisisi. 43Sa tulrepenge tulrisisi, la katwase siwlri mubalriu, si kikai vavalake ka Yesu la asuru ikai Yerusalrime; si ka kai wathingathingale ku marudrawdrangeini, 44lau yakai tupapapalra ikai ki laumawmase la kiiya kai lasu, ala samakavalenga ku taikadadalranane lini la pathagili silape iniane mwa ki laretesane si talragilragi. 45La kai maka kidringai iniane, la siwlriwlri mu Yerusalrime silape iniane. 46Ala saka samakatulrulu, la kidringai iniane ikai ki daane ki Twaumase. Yacengeecenge nene ikabicelrakane ki tarabulrubulru ki swa Yuda, takukilalalalra si takukivavavaga; 47sanaka kialalra iniane ka laumawmase makitwa kasamali iniane ku lrigilaneini apatubalrebalre. 48Ku marudrawdrangeini la drele iniane si kasamali turamuru. Ku tinaini la iya kai iniane, “Nunu, asu piya kikai naiane? Kai tamasu si kunaku mathathiburu nai turamuru, salraelrenga nai silasilape muswane!”
49Ku Yesu la tubalre, “Anu silape nakwane? Bekace numi kaithingale ala ka naika lri ikaiyaku ki daane ki Ama?”#2.49 “ikaiyaku ki daane ki Ama” ku wahunyake madu iya kai “twakalithane ku awngane ki Ama”. 50Ai kai marudrawdrangeini kai maka wathingale ku pacugane kikai vagaini.
51La kirimu, ku Yesu tupapalra liniane siwlri mu Nazarethe ka cekele, si pasalaladha liniane sanaka maneemanenga. Ku tinaini la kakalithi kilakikai si pulringalringau pikidremedreme. 52Ku kinawmasane si lrigilane ki Yesu la masilasilange adiadili, si kikadalame ki Twaumase si laumawmase turamuru.
ที่ได้เลือกล่าสุด:
Luka 2: NDV
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© The Bible Society in Taiwan, 2017
All rights reserved
© 臺灣聖經公會版權所有，2017
